1. Ho Moeklesia 7:​20, Morena Solomone o ile a bua nnete efe?

 MORENA SOLOMONE o ile a re: “Ha ho motho ya lokileng lefatsheng ya tswelang pele ho etsa se molemo mme a sa etse sebe.” (Moek. 7:20) Taba eo ke nnete hobane kaofela ha rona re baetsadibe. (1 Joh. 1:8) Re hloka hore Modimo le batho ba bang ba re tshwarele.

2. O ile wa ikutlwa jwang ha motswalle wa hao a ne a o tshwarela?

² Mohlomong o hopola nakong eo o ileng wa utlwisa motswalle wa hao bohloko. O ne o batla ho lokisa ditaba le yena e le hore le ka ba metswalle hape, ka hoo o ile wa kopa tshwarelo. O ile wa ikutlwa jwang ha motswalle wa hao a o tshwarela? E ka nna yaba o ile wa ikutlwa o imolohile ebile o thabile.

3. Re tlo araba dipotso dife sehloohong see?

³ Re batla hore Jehova e be Motswalle wa rona empa ka dinako tse ding re ka bua kapa ra etsa dintho tse mo utlwisang bohloko. Keng e ka re kgodisang hore Jehova o batla ho re tshwarela? Tsela eo Jehova a tshwarelang ka yona e fapana jwang le eo rona re tshwarelang batho ba bang ka yona? Ke batho bafe bao Modimo a ba tshwarelang?

4. Keng e ka re kgodisang hore Jehova o batla ho re tshwarela?

⁴ Lentswe la Modimo le a re kgodisa hore Jehova o batla ho re tshwarela. Ha Jehova a ne a itlhalosa ho Moshe Thabeng ya Sinai, O ile a romela lengeloi mme le ile la re: “Jehova, Jehova, Modimo ya mohau le ya mosa, ya diehang ho halefa le  ya tletseng mosa o lerato le nnete, ya bolokelang ba dikete mosa o lerato, ya tshwarelang phoso le tlolo le sebe.” (Ex. 34:6, 7) Jehova ke Modimo ya mohau le ya mosa mme o dula a batla ho tshwarela baetsadibe ba bakileng.​—Neh. 9:17; Pes. 86:15.

5. Ho ya ka Pesaleme ya 103:​13, 14, taba ya hore Jehova o re tseba hantle e mo susumelletsa hore a etseng?

⁵ Jehova ke yena ya re bopileng, ka hoo o tseba ntho e nngwe le e nngwe ka rona mme taba ena e a hlolla. (Pes. 139:15-17) O kgona ho bona dintho tseo re di etsang ka lebaka la ho se phethahale hoo re ho futsitseng ho batswadi ba rona. O tseba dintho tse re etsahalletseng bophelong, tse etsang hore re be ka tsela eo re leng ka yona. Taba ya hore Jehova o re tseba hantle e mo susumelletsa hore a re bontshe mohau.​—Pes. 78:39; bala Pesaleme ya 103:13, 14.

6. Jehova o bontshitse jwang hore o batla ho re tshwarela?

⁶ Jehova o re bontshitse hore o batla ho re tshwarela. O a utlwisisa hore ka lebaka la motho wa pele e leng Adama, kaofela ha rona re baetsadibe ebile re a shwa. (Bar. 5:12) Re ke ke ra kgona ho itokolla sebeng le lefung kapa ra lokolla batho ba bang. (Pes. 49:7-9) Le ha ho le jwalo, Modimo wa rona ya lerato o ile a re qenehela yaba o lokisetsa ho re lokolla. O ile a etsa seo jwang? Johanne 3:16 e bontsha hore Jehova o ile a romela Mora wa hae a le mong feela hore a tlo re shwela. (Mat. 20:28; Bar. 5:19) Re ne re tshwanelwa ke lefu empa Jesu o ile a shwa molemong wa rona e le hore a ka lokolla batho ba bontshang tumelo ho yena. (Baheb. 2:9) Jehova o ile a utlwa bohloko haholo ha a bona Mora wa hae eo a mo ratang a shwa lefu le sehloho le le tlotlollang. Jehova o ne a ke ke a dumella hore Mora wa hae a shwe haeba a ne a sa batle ho re tshwarela.

7. Bibele e bua ka batho bafe ba bang bao Jehova a ileng a ba tshwarela?

⁷ Bibele e bua ka batho ba bangata bao Jehova a ileng a ba tshwarela. (Baef. 4:32) Wena o hopola mang? Mohlomong o hopola Morena Manase. Monna eo ya kgopo o ile a sitelwa Jehova ka ho etsa dintho tse mpe haholo. O ile a rapela medimo ya bohata mme a kgothalletsa le batho ba bang hore ba e rapele. O ile a bolaya bana ba hae mme a fana ka bona e le sehlabelo ho medimo ya bohata. O ile a ba a  beha setshwantsho sa modimo wa bohata ka tempeleng ya Jehova e halalelang. Bibele e re ka yena: “A etsa se sebe mahlong a Jehova ka tekanyo e kgolo, ho mo sitelwa.” (2 Likron. 33:2-7) Le ha ho le jwalo, ha Manase a bontsha hore o bakile, Jehova o ile a mo tshwarela a ba a mo dumella hore e be morena hape. (2 Likron. 33:12, 13) Mohlomong o hopola le Morena Davida ya ileng a etsa dibe tse tebileng tse akarelletsang bofebe le ho bolaya. Le yena Jehova o ile a mo tshwarela ha a dumela diphoso tsa hae ebile a baka. (2 Sam. 12:9, 10, 13, 14) Ka hoo, re ka kgodiseha hore Jehova o batla ho re tshwarela. Re tlo bona hore tsela eo a re tshwarelang ka yona e fapane le tsela eo batho ba tshwarelang ka yona.

8. Taba ya hore Jehova ke Moahlodi ya molemohadi e ama tsela eo a tshwarelang ka yona jwang?

⁸ Jehova ke “Moahlodi wa lefatshe lohle.” (Gen. 18:25) Moahlodi ya molemo o lokela ho tseba molao hantle. Jehova ke Moahlodi wa rona ebile o utlwisisa molao hantle hobane ke Mofani wa wona. (Esa. 33:22) Jehova o tseba se nepahetseng le se fosahetseng ho feta motho le ha e le ofe. Keng hape eo moahlodi ya molemo a lokelang ho e tseba? O lokela ho tseba dintlha kaofela pele a ka fana ka kahlolo. Ka hoo, Jehova ke Moahlodi ya molemohadi hobane o dula a tseba dintlha kaofela.

9. Ke dintho dife tseo Jehova a di tsebang tse ka etsang hore a re tshwarele?

⁹ Jehova ha a tshwane le baahlodi ba batho hobane yena o dula a tseba dintlha kaofela ka boemo le ha e le bofe. (Gen. 18:20, 21; Pes. 90:8) Ha a itshetlehe ka seo batho ba se bonang kapa ba se utlwang. O a utlwisisa hore tsela eo motho a etsang dintho ka yona e ka susumetswa ke dintho tseo a di futsitseng ho batswadi ba hae, thuto eo a e fumaneng, sebaka seo a dulang ho sona kapa kgatello ya maikutlo. Jehova o boetse o bona se ka pelong ya motho. O utlwisisa hantle hore na ke hobaneng ha motho a entse dintho ka tsela e itseng. Ha ho na ntho e ka patelwang Jehova. (Baheb. 4:13) Ka hoo, Jehova o tshwarela motho hobane a tseba dintlha kaofela.

10. Ke hobaneng ha re ka re Jehova o dula a ahlola ka toka? (Deuteronoma 32:⁠4)

¹⁰ Jehova o dula a ahlola ka toka ebile ha a na kgethollo. Ha ho mohla a tshwarelang motho hobane a le motle, a ruile, e le motho ya hlahelletseng kapa a ena le ditalenta. (1 Sam. 16:7; Jak. 2:1-4) Ha ho na motho ya ka fang Jehova tjotjo kapa a mo qobella ho etsa ntho le ha e le efe. (2 Likron. 19:7) Ha ho mohla Jehova a etsang diqeto a halefile. (Ex. 34:7) Ka nnete Jehova ke Moahlodi ya molemohadi hobane o tseba dintlha kaofela.​—Bala Deuteronoma 32:4.

11. Jehova o tshwarela ka tsela e fapaneng le ya batho jwang?

¹¹ Bangodi ba Mangolo a Seheberu ba ne ba hlokomela hore Jehova o tshwarela ka tsela e fapaneng le ya batho. Maemong a mang, ba sebedisitse lentswe la Seheberu leo buka e nngwe e reng “le ne le sebediswa feela ho hlalosa tsela eo Modimo a tshwarelang baetsadibe ka yona. Lentswe leo ha le hlalose tsela eo batho ba tshwarelanang ka yona.” Jehova ke yena feela ya nang le matla a ho tshwarela moetsadibe ya bakileng ka ho felletseng. Ho tla etsahalang ha Jehova a re tshwarela?

12, 13. (a) Motho o ikutlwa jwang ha Jehova a mo tshwaretse? (b) Jehova o tshwarela motho nako e kae?

¹² Ha re dumela hore Jehova o re tshwaretse, re thabela “dinako tse kgathollang” tse akarelletsang ho ba le kgotso ya kelello le letswalo le se nang molato. Ke “Jehova” feela ya ka re tshwarelang ka tsela e ka etsang hore re ikutlwe jwalo. (Lik. 3:19) Ha Jehova a re tshwarela, o re dumella hore re boele re be metswalle ya hae jwalo ka ha eka ha re a ka ra etsa sebe ho hang.

¹³ Ha Jehova a re tshwarela, a ke ke a hlola a re qosa kapa a re fa kotlo ka sebe seo re se entseng. (Esa. 43:25; Jer. 31:34) Jehova o suthiseditse ditlolo tsa rona hole le rona “jwalo ka ha botjhabatsatsi bo le hole le bophirimatsatsi.” b (Pes. 103:12) Ha re nahana ka moo Jehova a re tshwarelang ka teng, re utlwa re mo ananela ebile re mo hlompha. (Pes. 130:4) Empa ke batho bafe bao Jehova a ba tshwarelang?

14. Re se re ithutileng ka tsela eo Jehova a tshwarelang ka yona?

¹⁴ Re se re ithutile hore ha Jehova a tshwarela motho, ha a itshetlehe ka hore na sebe seo a se entseng se tebile hakae. Re boetse re ithutile hore ka ha Jehova ke Mmopi, Mofani wa molao le Moahlodi, o kgona ho etsa qeto ya ho tshwarela motho. Ke dintho dife tseo Jehova a nahanang ka tsona pele a ka etsa qeto ya ho tshwarela motho?

15. Ho ya ka Luka 12:​47, 48, Jehova o nahana ka eng pele a tshwarela motho?

¹⁵ Ntho e nngwe eo Jehova a nahanang ka yona ke hore na mofosi o ne a tseba hore o etsa ntho e fosahetseng. Jesu o ile a hlakisa taba ena ho Luka 12:47, 48. (E bale.) Motho o tla be a etsa sebe se tebileng haeba a rera ho etsa ntho e mpe a tseba hantle hore Jehova ha a e rate. Jehova a ka nna a etsa qeto ya hore a se ke a tshwarela motho eo. (Mar. 3:29; Joh. 9:41) Ke nnete hore ka dinako tse ding re a tseba hore dintho tseo re di entseng di fosahetse. Na re ka ba le tshepo ya hore Jehova o tla re tshwarela? Ho jwalo. A re boneng ntho e nngwe eo Jehova a nahanang ka yona pele a re tshwarela.

16. Ho baka ho bolelang, hona ke hobaneng ha re lokela ho baka e le hore Jehova a re tshwarele?

¹⁶ Ntho e nngwe eo Jehova a e shebang ke hore na mofosi o bakile e le ka nnete. Ho baka ho bolelang? Ho baka ho bolela hore motho a fetole tsela eo a nahanang ka yona le ho etsa dintho ka yona. Ho akarelletsa hore a ikwahlaye a be a utlwiswe bohloko ke dintho tse mpe tseo a di entseng le ho nahana ka dintho tse nepahetseng tseo a neng a lokela ho di etsa. Motho ya bakileng o boetse o utlwiswa bohloko ke hore o ile a dumella kamano ya hae le Jehova e senyehe, e leng se ileng sa etsa hore a etse dintho tse mpe. Hopola hore Morena Manase le Morena Davida ba ile ba etsa dibe tse tebileng empa Jehova o ile a ba tshwarela hobane ba ile ba baka e le ka nnete. (1 Mar. 14:8) Jehova o tla re tshwarela hafeela a bona hore re bakile e le ka nnete. Ha ho a lekana hore re utlwiswe bohloko ke dintho tse mpe tseo re di entseng empa re lokela ho ikemisetsa ho di tlohela. c A re bueng ka ntho e nngwe hape eo Jehova a nahanang ka yona pele a re tshwarela.

17. Ho sokoloha ho bolelang, hona ke hobaneng ha ho le bohlokwa hore re sokolohe e le hore re qobe ho pheta dibe tseo re di entseng nakong e fetileng? (Esaia 55:7)

¹⁷ Ntho e nngwe eo Jehova a e shebang ke hore na motho o sokolohile. Ho sokoloha ho bolela ho fetoha. Ka mantswe a mang motho o lokela ho tlohela dintho tse mpe tseo a di etsang mme a phele ka tsela eo Jehova a e batlang. (Bala Esaia 55:7) O lokela ho fetola tsela eo a nahanang ka yona e le hore a ka nahana jwalo ka Jehova. (Bar. 12:2; Baef. 4:23) O boetse o lokela ho kgaotsa ho nahana ka dintho tse mpe le ho di etsa. (Bakol. 3:7-10) Lebaka le ka sehloohong leo Jehova a re tshwarelang le ho re hlwekisa sebeng ka lona, ke hobane re ena le tumelo sehlabelong sa Kreste. Jehova o tla re tshwarela ka lebaka la sehlabelo seo ha a bona re etsa boiteko ba ho fetola boitshwaro ba rona.​—1 Joh. 1:7.

18. Re ithutileng ka tsela eo Jehova a tshwarelang ka yona?

¹⁸ A re ke re ikgopotseng dintlha tsa bohlokwa tseo re buileng ka tsona. Ha ho na motho ya tshwarelang jwalo ka Jehova. Ke hobaneng ha re tjho jwalo? Ntlha ya pele, o dula a batla ho re tshwarela. Ntlha ya bobedi, Jehova o re tseba hantle. O tseba ntho e nngwe le e nngwe ka rona ebile ke yena ya ka bonang hore na re  bakile e le ka nnete. Ntlha ya boraro, ha Jehova a re tshwarela, o re tshwarela ka ho felletseng jwalo ka ha eka ha re eso etse sebe ho hang. Taba ena e re thusa hore re be le letswalo le se nang molato le hore re be metswalle ya hae.

19. Keng e ka etsang hore re thabe le hoja re sa phethahala ebile re dula re etsa dibe?

¹⁹ Re tla dula re etsa dibe hobane ha re a phethahala. Le ha ho le jwalo, re ka kgothatswa ke mantswe a hlahang ho Insight on the Scriptures, Volume 2, leqephe la 771 a reng: “Jehova o mohau ebile o a tseba hore bahlanka ba hae ha ba a phethahala. Ka hoo, ha ba a lokela ho dula ba utlwisitswe bohloko ke diphoso tseo ba di etsang hobane ba sa phethahala. (Pes 103:8-14; 130:3) Haeba ba leka ka hohle ho phela ka melao ya Modimo ba tla thaba. (Fil 4:4-6; 1Jo 3:19-22).” Taba ena e re kgothatsa haholo.

20. Re tlo araba dipotso dife sehloohong se latelang?

²⁰ Re ananela hore ebe Jehova o batla ho re tshwarela ha re bontsha hore re bakile e le ka nnete. Re ka tshwarela batho ba bang jwalo ka Jehova jwang? Tsela eo re tshwarelang ka yona e tshwana jwang le eo Jehova a tshwarelang ka yona, hona e fapana jwang? Ke hobaneng ha ho le bohlokwa hore re utlwisise taba ee? Sehloohong se latelang re tlo araba dipotso tsena.