Bibele ha e bue ka taba ena. Le ha ho le jwalo, e na le dintlha tse thahasellisang tse bontshang mabaka ao e ka nnang yaba a ile a etsa hore Josefa le Maria ba se ke ba kgutlela Nazaretha ka nako eo.

Lengeloi le ile la bolella Maria hore o ne a tla ima mme a tswale mora. Ha lengeloi le ne le fana ka molaetsa ona, Josefa le Maria ba ne ba dula motseng wa Nazaretha o Galilea. (Luka 1:26-31; 2:4) Ha morao ha ba tloha Egepeta, ba ile ba kgutlela Nazaretha. Jesu o ile a holela moo mme ya eba Monazaretha. (Mat. 2:19-23) Ke ka hoo re nahanang ka Jesu, Josefa le Maria ha ho buuwa ka Nazaretha.

Maria o ne a amana le Elizabetha ya neng a dula Juda. Elizabetha e ne e le mosadi wa moprista Zakaria mme e ile ya eba mme wa Johanne Mokolobetsi. (Luka 1:5, 9, 13, 36) Maria o ile a tjhakela Elizabetha motseng wa Juda mme a dula moo ka dikgwedi tse tharo. Ka mora moo Maria o ile a kgutlela Nazaretha. (Luka 1:39, 40, 56) Ke ka hoo Maria a neng a tseba sebaka seo sa Juda.

Ha morao Josefa o ile a mamela taelo ya hore ba ngodiswe. Ka hoo, Josefa o ile a tloha Nazaretha a ya Bethlehema e neng e bitswa ‘motse wa Davida.’ Boprofeta bo ile ba bontsha hore Mesia o ne a tla tswallwa Bethlehema. (Luka 2:3, 4; 1 Sam. 17:15; 20:6; Mik. 5:2) Ka mora hore Maria a belehe Jesu, Josefa ha a ka a batla hore ba nke leeto le lelelele ka lesea. Ba ile ba dula Bethlehema e neng e le bohole ba dikhilomithara tse robong ho tloha Jerusalema. Ho ne ho tla ba bonolo hore ba ise lesea la bona tempeleng mme ba fane ka nyehelo eo Molao o neng o re ba lokela ho fana ka yona.—Lev. 12:2, 6-8; Luka 2:22-24.

Lengeloi le ile la bolella Maria hore mora wa hae o ne a tla fuwa ‘terone ya Davida’ mme e be “Morena.” Mohlomong Josefa le Maria ba ne ba nahana hore ke ha bohlokwa hore Jesu a tswallwe motseng wa Davida. (Luka 1:32, 33; 2:11, 17) E ka nna yaba ba ile ba bona e le ha bohlokwa hore ba dule moo ho fihlela Modimo a ba bolella hore na ba etseng.

Ha re tsebe hantle hore na ba ne ba se ba dutse nako e kae Bethlehema ha balepi ba dinaledi ba fihla. Ka nako eo, Josefa le Maria ba ne ba dula ntlong mme mora wa bona e ne e se e se lesea. (Mat. 2:11) Ho ena le hore ba kgutlele Nazaretha, ho bonahala ba ile ba dula Bethlehema nako e telele mme ya eba lehae la bona.

Heroda o ile a fana ka taelo ya hore “ho bolawe bana bohle ba bashanyana Bethlehema . . . ho tloha ka ba dilemo di pedi ho ya tlase.” (Mat. 2:16) Lengeloi le ile la bolella Josefa le Maria ka taelo eo mme ba ile ba balehela Egepeta le Jesu yaba ba dula moo ho fihlela Heroda a shwa. Ha morao Josefa o ile a isa lelapa la hae Nazaretha. Ke hobaneng ha ba sa ka ba kgutlela Bethlehema? Lebaka ke hobane mora wa Heroda e leng Arkelause ya neng a le kgopo o ne a busa motse wa Judea. Lengeloi le ile la boela la lemosa Josefa hore a se ke a ya moo. Nazaretha e ne e le sebaka se sireletsehileng seo Josefa a neng a tla hodisetsa Jesu ho sona hore e be mohlanka wa Modimo.—Mat. 2:19-22; 13:55; Luka 2:39, 52.

Ho ya ka moo ho bonahalang ka teng, Josefa o ile a shwa pele Jesu a bulela batho monyetla wa hore ba ye lehodimong. Ka hoo, Josefa o tla tsosetswa lefatsheng. Batho ba bangata ba tla ba le monyetla wa ho kopana le yena mme ba utlwe hore na ke hobaneng ha yena le Maria ba ile ba kgetha ho dula Bethlehema ka mora hore Jesu a hlahe.