1, 2. Re tobana le mathata afe a tshwanang le ao Lota a ileng a tobana le ona?

 RE IKUTLWA ka tsela e tshwanang le eo Lota a ileng a ikutlwa ka yona ha re bona tsela eo boitshwaro ba batho bo leng bobe ka teng mehleng ena. Ka ha o ne a tseba hore Ntate wa rona ya lehodimong o hloile boitshwaro bo bobe, o ne “a utlwisitswe bohloko ke batho ba sa mameleng ba neng ba etsa boitshwaro bo bobe ba sa swabe.” (2 Pet. 2:7, 8) Ka ha Lota o ne a hlompha Jehova haholo a bile a mo rata, o ne a hloile boitshwaro bo bobe boo batho ba phelang le yena ba neng ba bo etsa. Le rona re phela le batho ba sa mameleng melao ya Jehova ya boitshwaro. Le ha ho le jwalo, re ka itshwara hantle haeba re ithuta ho rata Jehova le ho mo hlompha haholo.—Diprov. 14:2.

² Jehova o re thusa ka dikeletso tseo re di fumanang bukeng ya Diproverbia. Kaofela ha rona re ka rua molemo o moholo ha re bala dikeletso tse fumanehang lengolong leo ho sa tsotellehe hore na re banna kapa basadi, re banyenyane kapa re baholo.

3. Ho latela Diproverbia 17:3, ke hobaneng ha re lokela ho sireletsa dipelo tsa rona? (Sheba setshwantsho.)

³ Lebaka le ka sehloohong leo ka lona re lokelang ho sireletsa dipelo tsa rona ke hobane Jehova o hlahloba dipelo. Taba ena e bolela hore o tseba dintho tseo batho ba bang ba sa di tsebeng ka rona ebile o tseba hantle hore na re batho ba mofuta ofe. (Bala Diproverbia 17:3.) O tla re rata haeba re dula re nahana ka dikeletso tsa hae tse tla re thusa ho phela ka ho sa feleng. (Joh. 4:14) Re ke ke ra lematswa ke mekgwa e mebe le mashano a Satane le batho ba kgopo. (1 Joh. 5:18, 19) Ha setswalle sa rona le Jehova se ntse se hola, re tla mo rata re be re mo hlomphe le ho feta. Haeba re sa batle ho utlwisa Ntate wa rona bohloko,  re ke ke ra batla le ho nahana ka ho etsa sebe. Haeba o lekeha ho etsa sebe, o ke o ipotse potso ena: ‘Na ka nnete nka utlwisa Motho ya nthatang hakaale bohloko ka boomo?’—1 Joh. 4:9, 10.

4. Ho hlompha Jehova ho ile ha sireletsa Moradi wa bo rona Marta jwang hore a se ke a etsa sebe?

⁴ Moradi wa bo rona Marta ya dulang Croatia ya ileng a lekeha ho etsa boitshwaro bo bobe o re: “Ke ne ke thatafallwa ke ho nahana dintho hantle le ho hlola takatso ya ho etsa sebe seo. Empa ho hlompha Jehova ho ile ha ntshireletsa.” b Ho hlompha Modimo ho ile ha mo sireletsa jwang? Moradi wa bo rona Marta o re o ile a nahanisisa ka hore na diphello e ne e tla ba dife ha a ne a ka etsa qeto e fosahetseng. Le rona re ka mo etsisa. Ntho e bohloko ka ho fetisisa e tla re etsahalla haeba re ka etsa dintho tse fosahetseng, ke hore re tla utlwisa Jehova bohloko ebile re ka lahlehelwa ke menyetla ya ho mo sebeletsa ka ho sa feleng.—Gen. 6:5, 6.

5. Re ka ithutang ho se ileng sa etsahalla Morabo rona Leo?

⁵ Haeba re hlompha Jehova, re tla qoba ho ba le metswalle e etsang dintho tse fosahetseng. Morabo rona Leo ya dulang Congo, o ile a hlokomela hore taba ena ke nnete. Dilemo tse nne ka mora hore a kolobetswe, o ile a ba le metswalle e etsang dintho tse fosahetseng. O ne a nahana hore ha se phoso ho ba motswalle wa batho bao ha feela yena a sa etse dintho tseo ba neng ba di etsa. Le ha ho le jwalo, ha ho a ka ha feta nako e kae pele metswalle ya hae e mo susumeletsa ho tahwa le ho etsa boitshwaro bo bobe. O ile a qala ho nahana ka dintho tseo batswadi ba hae ba neng ba mo rutile tsona le ka moo a neng a thabile ka teng ha a ntse a sebeletsa Jehova. Qetellong o ile a hlaphohelwa. Baholo ba ile ba mo thusa hore a boele a be le setswalle se setle le Jehova.  Hona jwale o thabile mme ke moholo le pulamadiboho e kgethehileng.

6. Re tlo bua ka eng hona jwale?

⁶ A re ke re tshohleng Diproverbia kgaolo ya borobong e buang ka basadi ba babedi, e mong o tshwantshetsa bohlale mme e mong ha a na kelello. (Bala Baroma 5:14 le Bagalata 4:24 ho bona mehlala e meng ya moo Bibele e hlalositseng dintho jwalo ka ha eka ke batho.) Ha re ntse re hlahloba lengolo leo, dula o hopola hore batho lefatsheng lena le laolwang ke Satane ba hlanyetsa ho etsa thobalano ka ntle ho lenyalo le ho shebella pornography. (Baef. 4:19) Ka hoo ho bohlokwa hore re dule re hlompha Modimo le ho furalla bobe. (Diprov. 16:6) Kaofela ha rona re ka rua molemo kgaolong ena. Bobedi ba basadi ba hlahang kgaolong ena ba mema “ba se nang kelello.” Ho tshwana le ha eka ba re: ‘Tloo ntlong ya ka mme o je.’ (Diprov. 9:1, 5, 6, 13, 16, 17) Empa batho ba amohelang dimemo tsa basadi bana ba etsahallwa ke dintho tse fapaneng.

7. Ho latela Diproverbia 9:13-18, ho etsahalang ka batho ba fapohelang ntlong ya mosadi ya se nang kelello? (Sheba setshwantsho.)

⁷ Bala ka memo ya “mosadi ya se nang kelello.” (Bala Diproverbia 9:13-18.) Ha a swabele ho hweletsa batho ba se nang tsebo hore ‘ba fapohele’ ha hae mme ba je le yena. Ho etsahalang ka bona ha ba fapohela ha hae? Lengolo lena le re: “Ntlo ya hae e tletse bafu.” Mohlomong o hopola mekgabopuo e tshwanang le ona e hlahang dikgaolong tse qalang tsa lengolo la Diproverbia. Ditemaneng tseo re lemoswa ka “mosadi wa letekatse” le “mosadi ya boitshwaro bo bobe.” Re bolellwa hore “ho ya ha hae ho tshwana le ho ikisa lefung.” (Diprov. 2:11-19) Ho Diproverbia 5:3-10 re lemoswa ka mosadi e mong “ya boitshwaro bo bobe” eo ‘maoto a hae a theohelang lefung.’

8. O ka iphumana o lokela ho kgetha ho etsang?

⁸ Batho ba utlwang ha “mosadi ya se nang kelello” a ba hweletsa ba ka kgetha hore na ba a fapohela kapa ha ba fapohele. Le rona re ka iphumana re lokela ho kgetha hore na re a fapohela kapa ha re fapohele. O tla etsang haeba motho e mong a o susumelletsa ho etsa boitshwaro bo bobe bo amanang le thobalano kapa ha o bona setshwantsho sa pornography ka tshohanyetso?

9, 10. Ke hobaneng ha re lokela ho qoba boitshwaro bo bobe bo amanang le thobalano?

⁹ Re na le mabaka a utlwahalang a ho qoba boitshwaro bo bobe bo amanang le thobalano. “Mosadi ya se nang kelello” o re: “Metsi a utswitsweng a monate.” “Metsi a utswitsweng” ke eng? Bibele e bapisa thobalano pakeng tsa  monna le mosadi ba nyalaneng le metsi a phodileng. (Diprov. 5:15-18) Monna le mosadi ba nyalaneng ka molao ba dumeletswe ho thabela ho etsa thobalano. “Metsi a utswitsweng” ona ke eng? Ona ke thobalano eo Modimo a sa e dumellang e leng e etswang ke batho ba sa nyalanang. Hangata batho ba e etsang ba a ipata jwalo ka ha leshodu le ipata ha le ilo utswa. “Metsi a utswitsweng” a ka utlwahala a le monate haeba batho ba nahana hore ba kgonne ho pata ntho eo ba e entseng. Ba a ithetsa hobane Jehova o bona dintho tsohle. Ha ho na ntho e bohloko jwalo ka ho lahlehelwa ke setswalle sa rona le Jehova. Ka hoo, ha ho na ntho e “monate” ka taba eo. (1 Bakor. 6:9, 10) Ho na le ditlamorao tse ding tse bohloko.

¹⁰ Batho ba etsang boitshwaro bo bobe bo amanang le thobalano ba ka hlajwa ke dihlong, ba ikutlwa ba se na thuso, ba ima ba sa rera le malapa a bona a ka qhalana. Ka hoo, re tla be re le bohlale haeba re hana ho fapohela ‘ntlong’ ya mosadi ya se nang kelello. Ntle le hore batho ba etsang boitshwaro bo bobe bo amanang le thobalano ba lahlehelwa ke setswalle sa bona le Jehova, ba boetse ba tshwarwa ke mafu a ka ba bolayang. (Diprov. 7:23, 26) Diproverbia kgaolo ya borobong temana ya 18 e re: “Baeti ba hae ba theohetse lebitleng.” Jwale ke hobaneng ha batho ba bangata ba amohela memo ya hae e lebisang lefung?—Diprov. 9:13-18.

11. Ke hobaneng ha ho le kotsi hakaale ho sheba pornography?

¹¹ Leraba le tlwaelehileng ke ho sheba pornography. Batho ba bang ba nahana hore pornography ha e kotsi. Le ha ho le jwalo, pornography e kotsi, e ka etsa hore motho a hloke tlhompho, hape motho a ka e lemalla. Ha motho a bona setshwantsho sa pornography, ho ka ba thata ho se tlosa kelellong ya hae. Ho feta moo, pornography e ke ke ya o thusa ho tlosa takatso ya ho etsa dintho tse mpe empa e etsa hore e be matla le ho feta. (Bakol. 3:5; Jak. 1:14, 15) Batho ba bangata ba shebang pornography ba qetella ba entse boitshwaro bo bobe.

12. Re ka bontsha jwang hore ha re batle ho sheba ditshwantsho tse ka etsang hore re be le takatso ya ho etsa boitshwaro bo bobe?

¹² Re lokela ho etsang haeba ka tshohanyetso setshwantsho sa pornography se ka hlaha disebedisweng tsa rona tsa elektronike? Hanghang feela re se tlose. Re ka nolofallwa ho etsa jwalo haeba re hopola hore ntho ya bohlokwa ka ho fetisisa ke setswalle sa rona le Jehova. Ditshwantsho tse ding di ka etsa hore re be le takatso ya ho etsa boitshwaro bo bobe le hoja e se pornography. Ke hobaneng ha re lokela ho di qoba? Hobane ha re batle ho etsa letho le ka etsang hore re nahane ka ho etsa boitshwaro bo bobe. (Mat. 5:28, 29) Morabo rona David eo e leng moholo ya dulang naheng ya Thailand o re: “Ke ye ke ipotse hore na le hoja ditshwantsho tsena e se pornography, na Jehova a ka thaba ha a mpona ke dula ke di shebile. Ho ipotsa potso ena ho nthusa hore ke etse dintho hantle.”

13. Ke eng e ka re thusang ho etsa dintho ka bohlale?

¹³ Ho tshaba ho etsa eng kapa eng e ka utlwisang Jehova bohloko ho tla re thusa hore re etse dintho ka bohlale. Ho hlompha Jehova ke “mohato wa pele” wa ho ba “bohlale.” (Diprov. 9:10) Diproverbia kgaolo ya borobong e hlakisa taba ena ditemaneng tse qalang moo e buang ka mosadi e mong ya tshwantshetsang “bohlale.”

14. Diproverbia 9:1-6 e bua ka memo e tswang ho mang?

¹⁴ Bala Diproverbia 9:1-6. Mona re bala ka memo e tswang ho Jehova e leng Mmopi wa rona le Mohlodi wa bohlale. (Diprov. 2:6; Bar. 16:27) Re etseditswe setshwantsho sa ntlo e kgolo e nang le dipilara tse supileng. Taba ena e bontsha hore Jehova o seatla se bulehileng  ebile o amohela batho bohle ba batlang ho rutwa ke yena.

15. Jehova o re mema hore re etseng?

¹⁵ Jehova o seatla se bulehileng ebile o re fa dintho tse ngata. Re ithuta taba ena mohlaleng wa mosadi ya tshwantshetsang “bohlale” eo Diproverbia kgaolo ya borobong e buang ka yena. Ditemana tsena di re mosadi enwa o memela batho ha hae e le hore ba je dijo tse monate, nama le veine tseo a di hlophisitseng. (Diprov. 9:2) Temana ya bone le ya bohlano e re mosadi eo o re ho ya se nang kelello: “Tloo, o je bohobe ba ka.” Ke hobaneng ha re lokela ho amohela memo ya hae? Jehova o batla hore bana ba hae ba be bohlale ba be ba dule ba sireletsehile. Ha a batle hore re utlwe ka letlalo. Ka hoo, “o bolokela ba lokileng bohlale.” (Diprov. 2:7) Ha re hlompha Jehova haholo, re tla batla ho dula re mo thabisa. Re tla mamela dikeletso tsa hae re be re thabele ho etsa dintho tseo a reng re di etse.—Jak. 1:25.

16. Ho hlompha Jehova ho ile ha thusa Morabo rona Alain jwang ho etsa qeto e bohlale, hona diphello e bile dife?

¹⁶ Hlokomela hore na ho hlompha Modimo ho ile ha thusa Morabo rona Alain jwang ho etsa qeto e bohlale. Morabo rona Alain ke moholo ebile ke titjhere. O ile a re: “Basebetsimmoho le nna ba ne ba nka ho shebella difilimi tsa pornography e le mokgwa wa ho ithuta.” Empa yena o ne a tseba hore taba eo ha se nnete. O re: “Ka ha ke rata Jehova ebile ke a mo hlompha, ke ile ka hana ho shebella difilimi tseo. Ke ile ka boela ka bolella basebetsimmoho le nna hore na ke hobaneng ha ke sa di shebelle.” O ne a sebedisa keletso e tswang ho mosadi ya bohlale ya ho “tsamaya tseleng ya kutlwisiso.” (Diprov. 9:6) Basebetsimmoho le yena ba bang ba ile ba hlollwa haholo mme ba qala ho ithuta Bibele le ho ya dibokeng.

17, 18. Batho ba amohelang memo ya mosadi ya “bohlale” ba tla fumana melemo efe, hona ba ka lebella eng ka moso? (Sheba setshwantsho.)

¹⁷ Jehova o sebedisa mohlala wa mosadi ya bohlale le mosadi ya se nang kelello ho re bontsha hore na re ka etsang e le hore re be le bokamoso bo tjhabileng. Batho ba amohelang memo ya “mosadi ya se nang kelello” ba leka ho ithabisa ka ho etsa boitshwaro bo bobe. Le ha ho le jwalo, ha ba hlokomele hore na dintho tseo ba di etsang hona jwale di tla ba le diphello dife ka moso. Dintho tseo ba di etsang di lebisa lefung.—Diprov. 9:13, 17, 18.

¹⁸ Batho ba amohelang memo ya mosadi ya tshwantshetsang “bohlale” bona ba tla ba le bokamoso bo tjhabileng. Hape ba thabile hobane ba na le dintho tsohle tseo ba di hlokang ho ba thusa hore ba be haufi le Jehova. (Esa. 65:13) Jehova o ile a susumeletsa moprofeta  Esaia hore a re: “Mmameleng ka hloko mme le je dijo tse nang le phepo. Le tla thaba haholo ka lebaka la dijo tse matlafatsang e le ka nnete.” (Esa. 55:1, 2) Re ithuta ho rata dintho tseo Jehova a di ratang le ho hloya tseo a di hloileng. (Pes. 97:10) Re thabile hobane re mema batho ba bang hore ba rutwe ke Jehova. Re tshwana le basebetsi ‘ba hweletsang ba le qhoweng ya motse ba re: “Mang kapa mang ya se nang tsebo a ke a fapohele mona.”’ Melemo eo re tla e fumana ha mmoho le batho ba amohelang memo ena ha se ya hona jwale feela. Ke ya nako e telele e tla re thusa hore re “phele” ka ho sa feleng ha re “tswela pele ho tsamaya tseleng ya kutlwisiso.”—Diprov. 9:3, 4, 6.

19. Ho latela Moeklesia 12:13, 14, re lokela ho ikemisetsa ho etsang? (Sheba lebokose le reng “ Ho Hlompha Modimo ho re Tswela Molemo.”)

¹⁹ Bala Moeklesia 12:13, 14. Ho hlompha Jehova ho tla re sireletsa ho be ho re thuse hore re dule re itshwere hantle re bile re le haufi le yena matsatsing ana a ho qetela. Hape re tla tswela pele ho mema batho ba bangata ka moo ho ka kgonehang ho batla bohlale le ho fumana melemo ya bona hobane re rata Jehova ebile re mo hlompha ka dipelo tsa rona kaofela.