Dipotso Tse Tswang ho Babadi
Ke hobaneng ha batho ba bang ba re mantswe a hlahang ho Pesaleme ya 12:7 a bua ka “dipolelo tsa Jehova,” (temana ya 6) ha Bibele ya Phetolelo ya Lefatshe le Letjha yona e bontsha hore ho buuwa ka batho “ba hlophehileng” (temana ya 5)?
Ditaba tse hlahang kgaolong ena di a bontsha hore ho buuwa ka batho temaneng ena.
Pesaleme ya 12:1-4 e re “batho ba tshepahalang ba fedile.” Jwale nahana ka Pesaleme ya 12:5-7, e leng ditemana tse hlahang potsong ena.
“Jehova o re, ‘Ka lebaka la hore ba hlophehileng ba a hatellwa,
Ka lebaka la hore ba futsanehileng ba a lla,
Ke tla etsa ho hong ho ba thusa.
Ke tla ba pholosa ho ba ba tshwarang hampe.’
Dipolelo tsa Jehova di hlwekile.
Di tshwana le silevera e hlwekisitsweng seboping sa mollo, e hlwekisitsweng ka makgetlo a supileng.
Jehova, o tla ba lebela.
O tla sireletsa e mong le e mong wa bona molokong ona ka ho sa feleng.”
Temana ya bohlano e bontsha hore Modimo o tla pholosa “ba hlophehileng.”
Temana ya botshelela e re “dipolelo tsa Jehova di hlwekile, di tshwana le silevera e hlwekisitsweng.” Ana ke mantswe ao Bakreste ba dumellanang le ona ka ho feletseng.—Pes. 18:30; 119:140.
Dibibeleng tse ding, temana ya bosupa e re: “O tla di lebela.” Hape, ka hobane temana e tlang pele ho yona e bua ka “dipolelo tsa Jehova,” batho ba bang ba ka nahana hore ha ho thwe “di” ho buuwa ka dipolelo tsa Modimo. Re a tseba hore Modimo o ile a sireletsa Bibele ho sa tsotellehe dintho tseo bahanyetsi ba ileng ba di etsa ho leka ho e thibela kapa ho e fedisa.—Esa. 40:8; 1 Pet. 1:25.
Le ha ho le jwalo, se boletsweng temaneng ya bohlano le sona ke nnete. Jehova o ile a thusa “batho ba hloriswang” le ba ‘hateletsweng’ a ba a ba pholosa mme o tla tswela pele a etsa jwalo.—Jobo 36:15; Pes. 6:4; 31:1, 2; 54:7; 145:20.
Ka hoo, ditemana tse hlahang Pesalemeng ena di a bontsha hore temana ya bosupa e bua ka batho.
Ho Pesaleme ya 12:1, Davida o bua ka “batho ba tshepahalang” ba thetsitsweng. Ditemana tse latelang di a bontsha hore Jehova o tla nka kgato ka batho ba buang dintho tse mpe. Mopesaleme o a re tiisetsa hore re ka tshepa hore Modimo o tla nka kgato molemong wa batho ba hae hobane dipolelo tsa hae di hlwekile.
Temana ya bosupa e bontsha hore Jehova o tla lebela le ho sireletsa “ba” hlophehileng ka lebaka la ba kgopo.
Dikopi tsa Mangolo a Seheberu tse tsheptjwang di sebedisitse lentswe “bona” temaneng ena. Septuagint ya Segerike yona e sebedisa lentswe “rona” habedi temaneng ya bosupa, e buang ka ba tshepahalang e leng ba hlophehileng le ba hateletsweng. Qetellong temana ya bosupa e bontsha hore “e mong le e mong” wa bana ba tshepahalang ba tla sireletswa “molokong ona,” o kgothaletsang hore ho etswe dintho tse mpe. (Pes. 12:7, 8) Phetolelong ya Searame ya Mangolo a Seheberu, mantswe a qalang a temana ya bosupa a fetoletswe ka tsela ena: “Wena Morena, o tla sireletsa ba lokileng, o tla ba lebela molokong ona o kgopo ka ho sa feleng.” Temana ena e fana ka bopaki bo eketsehileng ba hore Pesaleme ya 12:7 ha e bue ka dipolelo tsa Modimo.
Ka hoo, temana ena e fa “batho ba tshepahalang” tshepo ya hore Modimo o tla nka kgato.
