1, 2. Motho o lokela ho etsang pele a ka kolobetswa?

 DILEMONG tse hlano tse fetileng, batho ba ka hodimo ho milione ba ile ba kolobetswa mme ya eba Dipaki Tsa Jehova. Bongata ba bona ba tshwana le Timothea ya ileng a rutwa ka Jehova “e sa le lesea.” (2 Tim. 3:​14, 15) Ba bang bona ba ithutile ka Jehova ba se ba hodile. Nakong e fetileng, mosadi e mong o ile a ithuta Bibele le Dipaki Tsa Jehova mme a kolobetswa a le dilemo di 97.

² Haeba o ithuta Bibele kapa o hodiswa ke batswadi bao e leng Dipaki Tsa Jehova, na o ntse o nahana ka ho kolobetswa? Ke ntho e ntle haeba o batla ho kolobetswa. Le ha ho le jwalo, o lokela ho inehela ho Jehova pele o ka kolobetswa. Sehlooho sena se tlo hlalosa hore na ho inehela ho Modimo ho bolelang. Se tla boela se o thuse ho bona hore na ke hobaneng ha o sa lokela ho tshaba ho inehela ho Modimo le hore o kolobetswe ha o se o loketse ho etsa jwalo.

HO INEHELA HO JEHOVA HO BOLELANG?

3. Fana ka mohlala wa batho ba ka Bibeleng ba ileng ba inehela ho Jehova.

³ Ka Bibeleng ha ho buuwa ka motho ya inehetseng, ho buuwa ka motho ya kgethetsweng ho etsa mosebetsi o kgethehileng. Baiseraele e ne e le setjhaba se inehetseng ho Jehova. Empa ba bang ba bona ba ne ba inehela ho Jehova ka tsela e kgethehileng. Ka mohlala, Arone o ne a rwala tuku e nang le lesenke le benyang la kgauta karolong e ka pele ya yona e le “pontsho e halalelang ya boinehelo” ba hae ho Jehova. Lesenke leo le benyang la kgauta le ne le bontsha hore o kgethetswe  ho etsa mosebetsi o kgethehileng e le moprista ya phahameng wa Iseraele. (Lev. 8:9) Banazari le bona ba ne ba inehela ho Jehova ka tsela e kgethehileng. Lentswe “Monazari” le nkilweng lentsweng la Seheberu e leng nazirʹ, le bolela “Ya Kgethilweng” kapa “Ya Inehetseng.” Banazari ba ne ba phela ka melao e fapaneng le e neng e ngotswe Molaong wa Moshe.—Num. 6:​2-8.

4. (a) O lokela ho etsang ha o se o inehetse ho Jehova? (b) Ho se hlole o “iphelela” ho bolelang? (Sheba setshwantsho.)

⁴ Ha o inehela ho Jehova, o kgetha ho ba e mong wa barutuwa ba Jesu Kreste ebile o kgetha hore ho etsa thato ya Modimo e be ntho ya bohlokwa bophelong ba hao. O lokela ho etsang ha o se o inehetse ho Jehova? Jesu o itse: “Haeba mang kapa mang a batla ho ntshala morao, a se ke a hlola a iphelela.” (Mat. 16:24) Ha o se o inehetse ho Jehova, o lokela ho qoba ntho le ha e le efe e sa dumellaneng le thato ya hae. (2 Bakor. 5:​14, 15) Seo se akareletsa ho qoba ho etsa “diketso tse mpe” jwalo ka “boitshwaro bo bobe bo amanang le thobalano.” (Bagal. 5:​19-21; 1 Bakor. 6:18) Na ho mamela melao ya Jehova ho tla etsa hore o phele ka thata? Haeba o rata Jehova ebile o mamela melao ya hae, o tla hlokomela hore e o tswela molemo. (Pes. 119:97; Esa. 48:​17, 18) Morabo rona Nicholas o re: “O ka nka melao ya Jehova jwalo ka ditshepe tsa teronkong tse o thibelang ho etsa seo o batlang ho se etsa kapa jwalo ka ditshepe tse sebedisitsweng ho kwalla ditau e le ho o sireletsa hore di se ke tsa o ntsha kotsi.”

5. (a) O ka inehela ho Jehova jwang? (b) Ho na le phapang efe pakeng tsa ho inehela le ho kolobetswa?(Sheba setshwantsho.)

⁵ O ka inehela ho Jehova jwang? Ka ho mo rapela mme o mo tshepise hore o tla sebeletsa yena feela le ho etsa hore thato ya hae e be yona ntho e tlang pele bophelong ba hao. Ha o etsa jwalo, o tshepisa Jehova hore o tla dula o mo rata “ka pelo ya hao yohle, ka moya wa  hao wohle, ka kelello ya hao yohle le ka matla a hao ohle.” (Mar. 12:30) Ho inehela ke ntho eo o e etsang moo o leng mong, e pakeng tsa hao le Jehova. Empa ho kolobetswa ke ntho eo o e etsang phatlalatsa moo batho ba bang ba bonang hore o inehetse ho Jehova. Ho inehela ke boitlamo boo o bo etsang ho Jehova mme o lebeletse hore o bo phethe. Ka hoo, o lokela ho ikemisetsa ho phetha boitlamo boo.—Moek. 5:​4, 5.

KE HOBANENG HA O LOKELA HO INEHELA HO JEHOVA?

6. Keng e ka o susumeletsang hore o batle ho inehela ho Jehova?

⁶ Lebaka la bohlokwa le etsang hore o batle ho inehela ho Jehova ke hobane o a mo rata. Ntho e nngwe e ka o susumeletsang hore o inehele ho yena ke hobane o ena le “tsebo e ngata e nepahetseng” le “kutlwisiso” ka yena. Dintho tseo o ithutileng tsona ka Jehova di entse hore o mo rate haholo. (Bakol. 1:9) Ho ithuta Bibele ho entse hore o kgodisehe hore (1) Jehova o teng, (2) Bibele ke Lentswe la hae le hore (3) o sebedisa mokgatlo wa hae ho etsa hore thato ya hae e phethahale.

7. Re lokela ho etsang pele re inehela ho Modimo?

⁷ Batho ba inehetseng ho Jehova ba lokela ho tseba dintho tseo Bibele e di rutang ebile ba mamela melao ya Modimo. Ba leka ka hohle ho bolella batho ba bang dintho tseo ba ithutileng tsona. (Mat. 28:​19, 20) Ba rata Jehova haholo mme seo se etsa hore ba rapele yena feela. Na ke ka tsela eo o ikutlwang ka yona? Ha o rata Jehova ka tsela ena, o ke ke wa batla ho inehela ho yena le ho kolobetswa hobane feela o batla ho thabisa motho eo o ithutang Bibele le yena, batswadi ba hao kapa hobane metswalle ya hao le yona e kolobetswa.

8. Ho nahana ka dintho tseo Jehova a o etseditseng tsona ho ka o susumetsa jwang hore o inehele ho yena? (Pesaleme ya 116:​12-14)

 ⁸ Ha o nahana ka dintho tsohle tseo Jehova a o etseditseng tsona, o tla di ananela mme o tla batla ho nehela bophelo ba hao ho yena. (Bala Pesaleme ya 116:​12-14.) Bibele e re Jehova o fana ka “mpho e nngwe le e nngwe e molemo le ntho e nngwe le e nngwe e phethahetseng.” (Jak. 1:17) Mpho e kgolo eo Jehova a re fileng yona ke sehlabelo sa Mora wa hae Jesu. Nahana ka hore na mpho ena ke ya bohlokwa hakae. Sehlabelo sa Jesu se entse hore o kgone ho ba motswalle wa Jehova ebile se entse hore o be le tshepo ya ho phela ka ho sa feleng. (1 Joh. 4:​9, 10, 19) Ha o inehela ho Jehova, o mo bontsha hore o ananela lerato leo a o bontshitseng lona le ditlhohonolofatso tseo a o fileng tsona. (Deut. 16:17; 2 Bakor. 5:15) Buka ya O ka Thaba ka ho sa Feleng! kgaolo ya 46 ntlha ya 4, e bua ka hore na re ka bontsha hore re ananela dintho tseo Jehova a re etseditseng tsona jwang ebile e na le video e nkang metsotso e meraro e reng Dimpho Tseo re di Fang Modimo.

NA O SE O LOKETSE HO INEHELA HO JEHOVA LE HO KOLOBETSWA?

9. Ke hobaneng ha motho a sa lokela ho ikutlwa a le tlasa kgatello ya hore a inehele ho Jehova?

⁹ O ka bona eka ha o eso lokele ho inehela ho Jehova le hore o kolobetswe. Mohlomong o hloka ho etsa diphetoho bophelong ba hao e le hore bo dumellane le melao ya Jehova kapa mohlomong o hloka nako e eketsehileng e le ho matlafatsa tumelo ya hao. (Bakol. 2:​6, 7) Ha se batho bohle ba ithutang Bibele ba ka etsang diphetoho bophelong ba bona ka nako e tshwanang. Hape ha se batjha bohle ba lekanang ka dilemo ba loketseng ho inehela ho Jehova le ho kolobetswa. Leka ho hlahloba hore na ke hokae moo o ka ntlafatsang teng o sa ipapise le motho e mong.—Bagal. 6:​4, 5.

10. O ka etsang haeba o hlokomela hore ha o eso lokele ho inehela ho Jehova le ho kolobetswa? (Sheba le lebokose le reng “ Batho ba Hodisitsweng ke Dipaki Tsa Jehova.”)

¹⁰ Haeba o hlokomela hore ha o eso lokele ho inehela ho Jehova, etsa dintho tse tla o thusa hore o inehele ho yena. Kopa Jehova hore a o thuse hore o etse diphetoho tse hlokahalang bophelong ba hao. (Bafil. 2:13; 3:16) O ka kgodiseha hore Jehova o tla utlwa thapelo ya hao mme a o thuse.—1 Joh. 5:14.

KE HOBANENG HA BATHO BA BANG BA TSHABA HO INEHELA LE HO KOLOBETSWA?

11. Jehova o tla re thusa jwang hore re dule re mo tshepahalla?

¹¹ Batho ba bang ba se ba loketse hore ba ka inehela ho Jehova le hore ba kolobetswe empa ba a tshaba. Mohlomong ke hobane ba tshohile hore ka mora hore ba kolobetswe ba ka nna ba etsa sebe se tebileng ebe ba a kgaolwa. Haeba o tshaba ho inehela ho Jehova le ho kolobetswa, kgodiseha hore Jehova o tla o thusa hore ‘tsela eo o phelang ka yona e mo thabise.’ (Bakol. 1:10) O tla boela a o fe matla a hore o kgone ho etsa se nepahetseng. Jehova o se a thusitse batho ba bangata hore ba etse dintho tse nepahetseng, ka hoo le wena o tla o thusa. (1 Bakor. 10:13) Ka ha Jehova o a re thusa, ke batho ba mmalwa feela ba kgaolwang ka phuthehong. Jehova o thusa batho ba hae hore ba dule ba tshepahala.

12. O ka etsang hore o qobe ho etsa sebe se tebileng?

¹² Motho e mong le e mong o tobana le teko ya hore a etse ntho e mpe. (Jak. 1:14) Le ha ho le jwalo, o ka kgetha hore na o tla etsang haeba o tobana le teko ya hore o etse ntho e fosahetseng. Ha e le hantle, ke wena ya kgonang ho laola tsela eo o batlang ho phela ka yona. Empa batho ba bang ba re ho ke ke ha  kgoneha hore o laole tsela eo o ikutlwang ka yona le tsela eo o etsang dintho ka yona. Le ha ho le jwalo, seo ha se nnete. O ka kgona ho ithuta ho laola maikutlo a ho batla ho etsa dintho tse fosahetseng. Ka hoo, haeba o tobana le teko ya hore o etse ntho e fosahetseng, o ka kgetha hore o se ke wa e etsa. O ka thuswa ke ho rapela Jehova letsatsi le leng le le leng. O ka boela wa ithuta Lentswe la Modimo letsatsi le letsatsi, wa eba teng dibokeng ka mehla wa ba wa bolella batho ba bang ka dintho tseo o di dumelang. Ho etsa dintho tsena ka mehla ho tla o thusa hore o phelele boitlamo ba hao. Ka hoo, o se ke wa lebala hore Jehova o tla o thusa hore o kgone ho etsa dintho tse nepahetseng.—Bagal. 5:16.

13. Ke mohlala ofe o motle oo Josefa a re behetseng wona?

¹³ Ho tla ba bonolo hore o dule o tshepahalla Jehova haeba o tseba esale pele hore na o tla etsang ha o tobana le teko ya ho etsa ntho e fosahetseng. Bibele e bua ka batho ba ileng ba etsa sona seo le hoja e ne e le baetsadibe jwalo ka rona. Ka mohlala, mosadi wa Potifaro o ile a leka ka makgetlo ho qobella Josefa hore a robale le yena. Empa Josefa o ne a tseba hore na o tla etsang. Bibele e re o ile “a hana” yaba o re: “Nka etsa bobe boo bo boholo jwang mme ka fosetsa Modimo?” (Gen. 39:​8-10) Ho hlakile hore Josefa o ne a tseba hore na o tla etsang le pele mosadi wa Potifaro a mo leka. Ntho eo e ile ya mo thusa hore a etse se nepahetseng ha a ne a tobana le teko ya ho etsa ntho e fosahetseng.

14. Re ka etsang e le hore re qobe ho etsa dintho tse fosahetseng?

¹⁴ O ka etsisa Josefa jwang ka hore o etse se nepahetseng ha o tobana le teko e itseng? O ka etsa qeto hona jwale ya hore na o tla etsang ha o tobana le teko ya hore o etse dintho tse fosahetseng. Ithute ho hana hanghang ho etsa dintho tseo Jehova a di hloileng mme o qobe ho nahana ka tsona. (Pes. 97:10; 119:165) Ha o etsa jwalo, o ke ke wa etsa sebe ha o tobana le teko hobane o tla be o itokisitse esale pele.

15. O ka bontsha jwang hore o ‘batla Jehova e le ka nnete’? (Baheberu 11:6)

¹⁵ Mohlomong o se o ithutile ka Jehova mme o batla ho mo sebeletsa ka pelo ya hao yohle empa ho ntse ho ena le ntho e etsang hore o se ke wa inehela le ho kolobetswa. O ka thuswa ke ho etsa seo Morena Davida a ileng a se etsa. O ka kopa Jehova wa re: “Ntlhahlobe  Modimo mme o bone se ka pelong ya ka. Ntlhahlobe mme o tsebe dintho tse ntshwenyang tseo ke di nahanang. Sheba hore na ho na le ntho le ha e le efe e mpe ka pelong ya ka. O ntsamaise tseleng e tla dula e le teng ka ho sa feleng.” (Pes. 139:​23, 24) Jehova o hlohonolofatsa batho bohle ba “mo batlang e le ka nnete.” Ha o ntse o sebetsa ka thata hore o inehele ho yena le ho kolobetswa, o a mo bontsha hore o mo batla e le ka nnete.—Bala Baheberu 11:6.

DULA O LE HAUFI LE JEHOVA

16, 17. Jehova o hula batho ba hodisitsweng ke Dipaki jwang? (Johanne 6:44)

¹⁶ Jesu o itse barutuwa ba hae ba hutswe ke Jehova. (Bala Johanne 6:44.) Nahana hore na taba ena e tebile hakae le hore e o ama jwang. Ho tlameha ho ena le se setle seo Jehova a se bonang ho e mong le e mong eo a mo hulelang ho yena. O nka motho e mong le e mong eo a mo huletseng ho yena e le “thepa ya hae e kgethehileng” kapa “letlotlo la bohlokwa.” (Deut. 7:6; nal.) Ho jwalo le ka wena.

¹⁷ E ka nna yaba o motjha ya hodisitsweng ke Dipaki Tsa Jehova. Mohlomong o utlwa eka o sebeletsa Jehova hobane ba lelapa leno ba mo sebeletsa le hore wena Jehova ha a o hulela ho yena. Le ha ho le jwalo, Bibele e re: “Atamelang ho Modimo mme o tla atamela ho lona.” (Jak. 4:8; 1 Dikron. 28:9) Ha o etsa boiteko ba hore o atamele ho Jehova, le yena o tla etsa boiteko ba hore a atamele ho wena. Jehova ha a o nke o le e mong wa sehlopha sa hae feela. O hulela motho e mong le e mong ho yena ha mmoho le ba hodiseditsweng ke Dipaki. Haeba motho ya jwalo a etsa boiteko ba hore a atamele ho Jehova, Jehova o atamela ho yena jwalo ka ha lengolo la Jakobo 4:8 le bontsha.—Bapisa le 2 Bathesalonika 2:13.

18. Re tlo bua kang sehloohong se latelang? (Pesaleme ya 40:8)

¹⁸ Ha o inehela ho Jehova mme o kolobetswa o etsisa Jesu. O ne a ikemiseditse ho etsa eng kapa eng eo Ntate wa hae a neng a batla hore a e etse. (Bala Pesaleme ya 40:8; Baheb. 10:7) Sehloohong se latelang re tlo bua ka hore na ke eng e ka o thusang hore o dule o sebeletsa Jehova ka botshepehi ka mora hore o kolobetswe.