1, 2. (a) Pauluse o ne a le boemong bofe ha a ne a ngolla Baefese, hona ke hobaneng ha a ile a ba ngolla? (b) Ke dipotso dife tseo re tlo di hlahloba?

 MOAPOSTOLA PAULUSE o ne a batla ho kgothatsa Bakrestemmoho le yena ha a ne a kwaletswe ka tlung Roma. Ka ha o ne a sa kgone ho ba etela, o ile a ba ngolla mangolo. O ile a ngola le leng la mangolo ao hoo e ka bang ka selemo sa 60 kapa 61 mme le ne le ya ho Baefese.—Baef. 1:1; 4:1.

² Dilemong tse ka bang leshome pele ho moo, Pauluse o ne a ile a qeta nako a le Efese, a bolela a bile a ruta ditaba tse monate. (Dik. 19:​1, 8-10; 20:​20, 21) O ne a rata bara babo haholo a bile a batla ho ba thusa hore ba dule ba tshepahalla Jehova. Empa ke hobaneng ha a ile a ngolla Bakreste ba tlotsitsweng ka lefifi le lesedi, hona Bakreste bohle ba ka ithuta eng ho seo a ileng a se bua? A re hlahlobeng dikarabo tsa dipotso tsena.

HO TLOHA LEFIFING HO YA LESEDING

3. Ke mantswe afe ao Pauluse a ileng a a sebedisa e le mokgabopuo lengolong leo a ileng a le ngolla Baefese?

³ Pauluse o ile a re ho Bakreste ba Efese: “Pele le ne le le lefifing empa hona jwale le leseding.” (Baef. 5:8) Mona Pauluse o sebedisitse lefifi le lesedi e le mokgabopuo ho hlalosa maemo a mabedi a fapaneng. A re hlahlobeng hore na ke hobaneng ha Pauluse a ile a re ho Baefese: “Pele le ne le le lefifing.”

4. Baefese ba ne ba le lefifing la bodumedi ba bohata ka tsela efe?

⁴ Lefifi la bodumedi ba bohata. Pele batho ba Efese ba ithuta nnete mme e eba Bakreste, ba ne ba le bodumeding ba bohata ba bile ba dumela boselamose. Motseng wa Efese ho ne ho ena le tempele ya modimotsana wa Mogerike Artemise, eo  batho ba mehleng eo ba neng ba e nka e le e nngwe ya dintho tse supileng tse ntle ka ho fetisisa tse kileng tsa ahwa. Batho ba ne ba ya tempeleng eo ho ya rapela ditshwantsho. Batho ba neng ba etsa dintho tsa silevera ba ne ba etsa tjhelete e ngata ka ho etsa le ho rekisa ditshwantsho tsa tempele le modimotsana wa yona. (Dik. 19:​23-27) Hape batho ba bangata Efese e ne e le maselamose.—Dik. 19:19.

5. Baefese ba ne ba le lefifing la boitshwaro bo bobe ka tsela efe?

⁵ Lefifi la boitshwaro bo bobe. Batho ba Efese ba ne ba itshwere hampe haholo ba bile ba sa swabele boitshwaro ba bona bo bobe. Hangata dipapading tsa kalaneng le meketeng ya bodumedi ho ne ho buuwa puo e ditshila. (Baef. 5:3) Batho ba bangata Efese ba ne “ba se na mekgwa ho hang,” e leng polelo eo ka Segerike e bolelang hore ba ne ba “kgaotsa ho utlwa bohloko.” (Baef. 4:​17-19) Pele ba ithuta ka melao ya Jehova ya se nepahetseng le se fosahetseng, letswalo la bona le ne le sa ba tshwenye ha ba entse ntho e fosahetseng. Ba ne ba boetse ba sa tsotelle hore na Jehova o ikutlwa jwang ka dintho tseo ba di etsang. Ke ka hoo Pauluse a neng a ka re ka bona: “Dikelello tsa bona di lefifing, ba suthetse hole le bophelo bo tswang ho Modimo.”

6. Ke hobaneng ha Pauluse a ne a ka re ho Baefese “hona jwale le leseding”?

⁶ Le ha ho le jwalo, ba bang ba Baefese ha ba a ka ba dula ba le lefifing. Pauluse o ile a ngola a re ka bona: “Hona jwale le leseding ka ha le ba Morena.” (Baef. 5:8) Ba ne ba se ba phela tumellanong le Lentswe la Jehova, leo e neng eka ke lesedi le neng le ba tataisa. (Pes. 119:105) Ba ne ba se ba tlohetse ditlwaelo tsa bodumedi ba bohata le boitshwaro bo bobe. Ba ne ba se ba ‘etsisa Modimo’ ba bile ba etsa sohle seo ba ka se kgonang ho mo sebeletsa le ho mo thabisa.—Baef. 5:1.

7. Ke ka tsela efe re tshwanang le Bakreste ba bangata ba Efese?

⁷ Ka tsela e tshwanang, pele re ithuta nnete re ne re le lefifing la bodumedi ba bohata le lefifing la boitshwaro bo bobe. Ba bang ba rona re ne re keteka matsatsi a phomolo a bodumedi ba bohata, ha ba bang ba rona re ne re phela re etsa boitshwaro bo bobe. Empa  re ile ra etsa diphetoho ka mora ho ithuta ka melao ya Jehova ya se nepahetseng le se fosahetseng. Re ile ra qala ho phela ka tsela eo a batlang hore re phele ka yona mme re fumane melemo e mengata. (Esa. 48:17) Le ha ho le jwalo, re ntse re tswela pele re kopana le mathata. Re lokela hore re se ke ra kgutlela lefifing leo re tswang ho lona mme re ‘tswele pele re phela jwalo ka bana ba lesedi.’ Re ka etsa seo jwang?

QOBA HO BA LEFIFING

8. Ho latela Baefese 5:​3-5, Baefese ba ne ba lokela ho qoba eng?

⁸ Bala Baefese 5:​3-5. E le hore Bakreste ba Baefese ba se ke ba kgutlela lefifing la boitshwaro bo bobe, ba ne ba lokela ho tswela pele ba etsa dintho tse thabisang Jehova. Ba ne ba lokela ho qoba ho etsa boitshwaro bo bobe bo amanang le thobalano le puo e ditshila. Pauluse o ile a hopotsa Baefese hore ba ne ba lokela ho qoba dintho tse jwalo haeba ba ne ba batla “ho fumana Mmuso wa Kreste le wa Modimo.”

9. Ke hobaneng ha re lokela ho qoba eng kapa eng e ka qetellang e entse hore re etse boitshwaro bo bobe?

⁹ Le rona re lokela ho ba hlokolosi hore re se ke ra etsa “dintho tse se nang thuso tsa lefifi.” (Baef. 5:11) Ke nnete hore ha motho a sheba, a mamela kapa a bua ka dintho tse sa hlwekang kapa tse ditshila, ho ba bonolo hore a qetelle a etsa dintho tse fosahetseng. (Gen. 3:6; Jak. 1:​14, 15) Naheng e nngwe, sehlopha se seng sa bara ba bo rona e ne e le metswalle motjheng wa puisano. Qalong, boholo ba bona ba ne ba bua feela ka Jehova le Bibele. Hanyane ka hanyane ba ile ba qala ho bua ka dintho tse sa thabiseng Jehova. Hangata ba ne ba se ba qoqa ka thobalano. Ha morao, boholo ba bara bana ba bo rona ba ile ba dumela hore dipuo tseo tse ditshila di ile tsa etsa hore ba qetelle ba entse boitshwaro bo bobe bo amanang le thobalano.

10. Satane o batla hore re nahane eng? (Baefese 5:6)

¹⁰ Lefatshe la Satane le leka ho re thetsa. Le etsa hore re dumele hore boitshwaro boo Jehova a reng bo ditshila ebile ha bo a hlweka, ha bo phoso. (2 Pet. 2:19) Sena ha se re makatse. Esale Diabolose a ferekanya batho e le hore ba se ke ba kgona ho lemoha se nepahetseng le se fosahetseng. (Esa. 5:20; 2 Bakor. 4:4) Ha ho makatse hore ebe dimovie, mananeo a thelevishene le diwebsaete di bontsha dintho tse kgahlanong le melao ya Jehova e lokileng. Satane o batla hore re nahane hore boitshwaro bo sa hlwekang le ditlwaelo tse ditshila tse tummeng lefatsheng lena, ha di phoso ebile di monate hape ha di kotsi.—Bala Baefese 5:6.

11. Se etsahaletseng Angela se bontsha bohlokwa ba ho sebedisa keletso e ho Baefese 5:7 jwang? (Sheba setshwantsho.)

¹¹ Satane o batla hore re tlwaelane le batho ba etsang hore ho be thata ho mamela melao ya Jehova. Ke ka hoo Pauluse a ileng a re ho Baefese: “Le se ke la itswakanya le bona,” e leng batho ba etsang dintho tse mpe mahlong a Modimo. (Baef. 5:7) Re lokela ho ba hlokolosi haholo le ho feta Baefese ba mehleng ya pele hobane ha re qete nako le batho ka seqo feela empa re boetse re qeta nako le bona metjheng ya puisano. Angela a ya dulang Asia o ile a hlokomela ka moo metjha ya puisano e ka bang kotsi ka teng. O re: “Hanyane ka hanyane e ka fetola tsela eo o nahanang ka yona. Ho eso ye kae, ke ne ke se ke se na bothata ba ho ba le metswalle metjheng ya puisano, ho akareletsa le e neng e sa hlomphe melaomotheo ya Bibele. Qetellong ke ne ke se ke nahana hore ho nepahetse ho phela ka tsela e sa kgahliseng  Jehova.” Empa ka lerato baholo ba ile ba thusa Angela ho etsa diphetoho tse hlokahalang. O re: “Hona jwale ke se ke nahana ka Jehova le dintho tseo a di nahanang ho ena le ho qeta nako e ngata ke le metjheng ya puisano.”

12. Ke eng e ka re thusang ho dula re mamela melao ya Jehova ya se nepahetseng le se fosahetseng?

¹² Re lokela ho lwantsha boikutlo boo batho ba bangata lefatsheng lena ba nang le bona ba ho nahana hore boitshwaro bo bobe bo a amoheleha. Re a tseba hore bo fosahetse. (Baef. 4:​19, 20) Le ha ho le jwalo, ke hantle hore re ipotse: ‘Na ke qeta nako ho sa hlokahale le basebetsimmoho le nna, bana bao ke kenang ka tlelaseng le bona kapa batho ba bang ba sa hlompheng melao ya Jehova e lokileng? Na ka sebete ke mamela melao ya Jehova le haeba batho ba bang ba ka re ha ke amohele batho ba bang le tsela eo ba phelang ka yona?’ Jwalo ka ha 2 Timothea 2:​20-22 e bontsha, re ka nna ra tlameha ho ba hlokolosi ha re kgetha metswalle le ka phuthehong. Re a hopola hore ba bang ba ka nna ba se ke ba re thusa ho dula re tshepahalla Jehova.

PHELANG “JWALO KA BANA BA LESEDI”

13. Ho bolela eng ho ‘tswela pele re phela jwalo ka bana ba lesedi’? (Baefese 5:​7-9)

¹³ Pauluse o ile a eletsa Bakreste ba Efese hore ba tswele pele ba qoba ho ba lefifing le hore ba ‘tswele pele ba phela jwalo ka bana ba lesedi.’ (Bala Baefese 5:​7-9.) Ho etsa jwalo ho bolelang? Ho bolela ho itshwara jwalo ka Bakreste ba nnete ka dinako tsohle. Tsela e nngwe eo ka yona re ka atlehang ho etsa jwalo ke ka ho bala Bibele ka hloko le ka ho ithuta dingolwa tse thehilweng Bibeleng. Ho bohlokwa haholo ho latela mohlala wa Jesu Kreste le ho mamela dithuto tsa hae, jwalo ka ha e le “lesedi la lefatshe.”—Joh. 8:12; Diprov. 6:23.

14. Moya o halalelang o ka re thusa jwang?

¹⁴ Re boetse re hloka moya o halalelang wa Modimo e le hore re tswele pele re phela “jwalo ka bana ba lesedi.” Hobaneng? Hobane ha ho bonolo ho dula re hlwekile lefatsheng lena le tletseng boitshwaro bo bobe. (1 Bathes. 4:​3-5, 7, 8) Moya o halalelang o ka re thusa hore re se ke ra nahana jwalo ka batho  ba lefatshe lena, ba sa shebeng dintho ka tsela eo Jehova a di shebang ka yona. O boetse o ka re thusa hore re hlahise “mefuta yohle ya dintho tse molemo le tse lokileng.”—Baef. 5:9.

15. Re ka fumana moya o halalelang ka ditsela dife? (Baefese 5:​19, 20)

¹⁵ Tsela e nngwe ya ho fumana moya o halalelang ke ka hore re o rapelle. Jesu o ile a re Jehova “o tla fana ka moya o halalelang ho ba mo kopang.” (Luka 11:13) Re boetse re fumana moya o halalelang ha re rorisa Jehova ha mmoho dibokeng tsa Bokreste. (Bala Baefese 5:​19, 20.) Moya o halalelang wa Modimo o re susumeletsa hore re phele ka tsela e thabisang Modimo.

16. Ke eng e tla re thusa ho etsa diqeto tse nepahetseng? (Baefese 5:​10, 17)

¹⁶ Ha re hloka ho etsa diqeto tsa bohlokwa, re lokela ho utlwisisa “hore na thato ya Jehova ke efe” mme re etse dintho tumellanong le yona. (Bala Baefese 5:​10, 17.) Ha re batla melaomotheo e amanang le boemo ba rona, ho tshwana le ha re batla tsela eo Modimo a nahanang ka yona ka boemo ba rona. Ka hoo, ha re e sebedisa, re tla kgona ho etsa diqeto tse nepahetseng.

17. Re ka sebedisa nako ya rona hantle jwang? (Baefese 5:​15, 16) (Sheba setshwantsho.)

¹⁷ Pauluse o ile a boela a eletsa Bakreste ba Efese hore ba sebedise nako ya bona hantle. (Bala Baefese 5:​15, 16.) “Ya kgopo,” e leng sera sa rona Satane a ka rata ho re phathahanya ka dintho tsa lefatshe lena hoo re ka hlokang nako ya ho sebeletsa Modimo. (1 Joh. 5:​19, nal.) Ho ka ba bonolo hore Mokreste a amehe ka tjhelete, thuto kapa mosebetsi ho ena le hore a amehe ka ditsela tse ngata tseo a ka sebeletsang Jehova ka tsona. Ha seo se ka etsahala, ho tla be ho hlakile hore o nahana jwalo ka batho ba lefatshe lena ba sa sebeletseng Jehova. Nnete ke hore ha se hore dintho tsena di fosahetse empa ha di a lokela ho tla pele bophelong ba rona. E le hore re phele “jwalo ka bana ba lesedi,” re lokela hore re  ‘sebedise nako ya rona hantle,’ ka hore re amehe ka dintho tsa bohlokwa.

18. Donald o ile a etsang e le hore a sebedise nako ya hae hantle?

¹⁸ Batla ditsela tsa ho sebeletsa Jehova haholwanyane. Sena ke seo Donald, ya dulang Afrika Borwa a ileng a se etsa. O re: “Ke ile ka nahana ka bophelo ba ka mme ka rapela Jehova ka tieo hore a nthuse hore ke etse ho eketsehileng tshebeletsong. Ke ile ka rapella ho ba le mosebetsi o neng o tla ntumella hore ke be le nako e ngata ya ho ya tshimong. Jehova o ile a nthusa ho fumana mosebetsi o jwalo. Nna le mohatsa wa ka re ile ra qala ho sebeletsa Jehova tshebeletsong ya nako e tletseng.”

19. Re ka etsang e le hore re tswele pele re phela “jwalo ka bana ba lesedi”?

¹⁹ E tlameha ebe lengolo leo Pauluse a ileng a le ngolla Baefese le ile la ba thusa hore ba dule ba tshepahalla Jehova. Le rona keletso eo e tswang ho Jehova e ka re thusa. Jwalo ka ha re ithutile, e ka re thusa hore re kgethe boithabiso le metswalle hantle. E ka re susumeletsa hore re tswele pele re ithuta Bibele ka mehla e le hore lesedi la nnete le ka tswela pele ho re tataisa dinthong tsohle. E hatisa bohlokwa ba moya o halalelang, o ka re thusang hore re be le makgabane a matle. Ho sebedisa keletso ya Pauluse ho ka re thusa hore re etse diqeto tse nepahetseng, tse dumellanang le seo Jehova a se nahanang. Ka ho etsa dintho tsena, re tla kgona ho qoba lefifi la lefatshe mme re dule re le leseding.