1, 2. Ke hobaneng ha mangolo a mang e ba a bohlokwa ha maemo a rona a fetoha?

 KE LETSATSI la lenyalo mme banyalani ba batle ba mametse puo ya bona ya lenyalo e thehilweng Bibeleng. Ha ba qale ho utlwa mangolo a ntseng a balwa ha puo e ntse e tswela pele empa ho tloha hona jwale mangolo ao e se e tla ba a bohlokwa haholo ho bona. Hobaneng? Hobane ke mangolo ao ba tla a sebedisa lenyalong la bona.

² Taba ena e tshwana hantle le ha banyalani ba Bakreste e tlo ba batswadi. Ho ka etsahala hore ka dilemo tse ngata ba ne ba utlwa ha ho fanwa ka dipuo tse buang ka ho hodisa bana. Hona jwale ba se ba tla sebedisa melaomotheo e neng e balwa dipuong tseo hobane ba se ba tlo ba le ngwana. Ka nnete bona ke boikarabelo bo boholo. Mangolo a mang e ba a bohlokwa haholo ha maemo a rona a fetoha. Lena ke le leng la mabaka a etsang hore bahlanka ba Jehova ba bale Mangolo mme ba nahanisise ka ona “ka matsatsi ohle” a bophelo ba bona jwalo ka ha marena a Iseraele a ne a laetswe hore a etse jwalo.​—Deut. 17:19.

3. Re tlo bua kang sehloohong see?

³ Batswadi, le na le boikarabelo ba bohlokwa ba ho ruta bana ba lona ka Jehova. Le lokela ho ruta bana ba lona ka Modimo mme le ba thuse hore ba mo rate. Le ka etsang ho thusa bana ba lona hore ba rate Jehova? Sehloohong sena re tlo bua ka melaomotheo e mene ya Bibele e ka le thusang. (2 Tim. 3:16) Re tla boela re bone hore na ho sebedisa keletso ya Bibele ho tswetse batswadi ba bang molemo jwang.

4. Ke molaomotheo ofe o ka thusang batswadi hore ba rute bana ba bona ho rata Jehova? (Jakobo 1:5)

⁴ Molaomotheo wa pele: Kopa keletso ho Jehova. Kopa Jehova hore a o fe bohlale e le hore o rute bana ba hao ho mo rata. (Bala Jakobo 1:5.) Ke yena ya ka o fang keletso e bohlale ka ho fetisisa. Ho na le mabaka a mabedi a tiisang taba ena. Lebaka la pele, Jehova ke motswadi ya bohlale ka ho fetisisa. (Pes. 36:9) Lebaka la bobedi, o dula a re fa keletso e re tswelang molemo.​—Esa. 48:17.

5. (a) Mokgatlo wa Jehova o thusa batswadi jwang? (b) O ithutileng videong ya Mora le Moradiwabo rona Amorim e bontshang tsela eo ba neng ba hodisa bana ba bona ka yona?

⁵ Jehova o sebedisa Lentswe la hae Bibele le mokgatlo wa hae ho fana ka dingolwa le divideo tse thusang batswadi ho ruta bana ba bona ho mo rata. (Mat. 24:45) Ka mohlala, batswadi ba ka fumana keletso e ka ba thusang dihloohong tsa “Se ka Thusang Lelapa,” tseo pele di neng di hatiswa ho Fadimehang! mme hona jwale di se di fumaneha le websaeteng ya rona. Ho boetse ho na le divideo tse ngata tsa dipuisano le ditshwantshiso tse fumanehang ho jw.org tse ka thusang batswadi hore ba sebedise keletso ya Jehova ha ba ntse ba hodisa bana. *​—Liprov. 2:4-6.

6. Morabo rona e mong o ikutlwa jwang ka keletso eo yena le mohatsae ba e fumanang mokgatlong wa Jehova?

⁶ Batswadi ba bangata ba re ba ananela tsela eo Jehova a ba thusang ka yona a sebedisa mokgatlo wa hae. Morabo rona Joe o re: “Ha ho bonolo ho thusa bana ba bararo hore ba sebeletse Jehova. Nna le mohatsaka re dula re kopa Jehova hore a re thuse. Ka mehla re fumana sehlooho kapa video e re thusang ha re na le bothata bo itseng. Re dula re batla keletso ya Jehova.” Morabo rona Joe le mohatsae ba ile ba hlokomela hore dintho tseo di thusa bana ba bona hore e be metswalle ya Jehova.

7. Ke hobaneng ha e le ha bohlokwa hore batswadi ba behele bana ba bona mohlala o motle? (Baroma 2:21)

⁷ Molaomotheo wa bobedi: Ba behele mohlala o motle. Bana ba sheba dintho tseo batswadi ba bona ba di etsang ebe ba a ba etsisa. Ha  ho na motswadi ya sa etseng diphoso. (Bar. 3:23) Le ha ho le jwalo, batswadi ba lokela ho etsa sohle seo ba ka se kgonang ho behela bana ba bona mohlala o motle. (Bala Baroma 2:21.) Ntate e mong o re: “Bana ba tshwana le sepontjhe se monyang ntho e nngwe le e nngwe.” O boetse o re: “Ba tla re bolella haeba re sa etse dintho tseo re ba rutang tsona.” Ka hoo, re lokela ho rata Jehova le ho bontsha seo ka diketso haeba re batla hore bana ba rona ba mo rate.

8, 9. O ithutileng ho seo Morabo rona Andrew le Moradiwabo rona Emma ba se buileng?

⁸ Ho na le ditsela tse ngata tseo ka tsona batswadi ba ka rutang bana ba bona ho rata Jehova. Morabo rona Andrew ya dilemo di 17 o re: “Batswadi ba ka ba ne ba dula ba nthuta hore ho rapela ke ha bohlokwa. Ntate wa ka o ne a rapela le nna bosiu bo bong le bo bong esita le ka mora hore ke ithapelle. Batswadi ba ka ba ne ba dula ba re hopotsa hore re ka rapela Jehova ka nako e nngwe le e nngwe. Seo se nthusitse hore ke nke ho rapela e le ha bohlokwa mme hona jwale ho bonolo hore ke rapele le ho nka Jehova e le Ntate ya lerato.” Batswadi, dulang le hopola hore ha le rata Jehova, seo se tla etsa hore le bana ba lona ba mo rate.

⁹ Hona jwale a re bueng ka mohlala wa Moradiwabo rona Emma. Ntate wa bona o ile a siya mme wa bona a le dikolotong tse ngata. Moradiwabo rona Emma o re: “Ho ne ho na le nako eo mme wa rona a neng a se na tjhelete e lekaneng empa o ne a dula a bua ka tsela eo Jehova a hlokomelang bahlanka ba hae ka yona. Ke ne ke bona ka tsela eo a phelang ka yona hore o kgodisehile ka taba eo. Mme wa rona o ne a phelela seo a se rutang.” Re ithutang tabeng ee? Batswadi ba ka behela bana ba bona mohlala o motle le ha ba ena le mathata.​—⁠Bagal. 6:⁠9.

10. Batswadi ba Baiseraele ba ne ba ka buisana le bana ba bona ka Jehova neng? (Deuteronoma 6:6, 7)

¹⁰ Molaomotheo wa boraro: Buisana le bana ba hao ka mehla. Jehova o ile a laela Baiseraele hore ba dule ba ruta bana ba bona ka yena. (Bala Deuteronoma 6:6, 7.) Batswadi ba Baiseraele ba ne ba ena le menyetla e mengata ya ho buisana le bana ba bona le ho ba ruta hore ba rate Jehova. Ka mohlala, moshanyana wa Moiseraele o ne a qeta nako e ngata a thusa ntate wa hae ho lema kapa ho kotula. Ngwanana yena o ne a qeta nako e ngata a thusa mme wa hae ka ho roka, ho loha ntho e itseng le ho etsa mesebetsi ya ka tlung. Batswadi ba ne ba ka bua le bana ba bona ka dintho tse ngata tsa bohlokwa ha ba ntse ba sebetsa le bona. Ka mohlala, ba ne ba ka bua ka makgabane a Jehova le ka moo a ntseng a thusa lelapa la bona ka teng.

11. Batswadi ba ka buisana le bana ba bona neng?

¹¹ Mehleng ena dintho ha di sa tshwana le pele. Dinaheng tse ngata batswadi ha ba kgone ho qeta nako e ngata ba ena le bana ba bona. E ka nna yaba batswadi ba mosebetsing mme bana bona ba sekolong. Batswadi ba lokela ho ipha nako ya hore ba buisane le bana ba bona. (Baef. 5:15, 16; Bafil. 1:10) Borapedi ba lelapa bo fa batswadi monyetla wa hore ba buisane le bana. Morabo rona Alexander e motjha o re: “Ntate wa ka o dula a etsa hore ho be le borapedi ba lelapa mme o etsa bonnete ba hore ha ho letho le re sitisang. Ka mora borapedi ba lelapa re qoqa ka dintho tse ding.”

12. Hlooho ya lelapa e lokela ho etsang borapeding ba lelapa?

¹² Haeba o hlooho ya lelapa, o ka etsang ho thusa bana ba hao hore ba thabele borapedi ba lelapa? Mohlomong o ka bala le bona buka e ntjha ya O ka Thaba ka ho sa Feleng! Buka ena  e tla etsa hore ho be bonolo hore le buisane ka dintho tse ngata. O ka thusa bana ba hao hore ba phutholohe mme ba ntshe maikutlo a bona ka hore o se ke wa sebedisa nako ya borapedi ba lelapa ho bua ka diphoso tsa bona kapa ho ba kgalemela. Hape, leka hore o se ke wa halefa ha bana ba hao ba bua dintho tse sa dumellaneng le Bibele. Ho ena le hoo, o lokela ho thabela hore ba o bolella dintho tseo ba di nahanang mme o ba kgothalletse hore ba tswele pele ho o bolella maikutlo a bona. O ka kgona ho thusa bana ba hao hafeela o tseba hore na ba ikutlwa jwang.

13. Ke nakong efe hape eo batswadi ba ka thusang bana ba bona hore e be metswalle ya Jehova?

¹³ Batswadi, letsatsi le letsatsi batlang menyetla ya ho thusa bana ba lona hore e be metswalle ya Jehova. Ha le a lokela ho ruta bana ba lona ka Modimo wa rona ya lerato ha le ithuta Bibele le bona feela. Hlokomela seo Moradiwabo rona Lisa a se buang, o re: “Re ne re bua le bana ba rona ka dintho tse bopilweng e le ho ba ruta ka Jehova. Ka mohlala, ha ntja ya rona e ne e etsa dintho tse tshehisang bana ba rona, re ne re ba bolella hore sena se bontsha hore Jehova ke Modimo ya thabileng ebile o batla hore le rona re thabele bophelo.”

14. Ke hobaneng ha e le ha bohlokwa hore batswadi ba thuse bana ba bona hore ba kgethe metswalle e nepahetseng? (Liproverbia 13:20)

¹⁴ Molaomotheo wa bone: Thusa bana ba hao hore ba kgethe metswalle e nepahetseng. Lentswe la Modimo le re bolella ka ho hlaka hore batho bao re kgethang hore e be metswalle ya rona ba ka re susumelletsa hore re etse dintho tse nepahetseng kapa tse fosahetseng. (Bala Liproverbia 13:20.) Batswadi, na le tseba metswalle ya bana ba lona? Na le kile la kopana le metswalle eo kapa la qeta nako le yona? Le ka thusa bana ba lona jwang hore ba be le metswalle e ratang Jehova? (1 Bakor. 15:​33) Le ka ba thusa hore ba be le metswalle e nepahetseng ka hore le meme batho ba ratang Jehova e le hore ba qete nako le lona.​—Pes. 119:63.

15. Batswadi ba ka thusa bana ba bona jwang hore ba be le metswalle e ratang Jehova?

¹⁵ Morabo rona Tony o a hlalosa hore na yena le mohatsae ba ile ba etsang ho thusa  bana ba bona hore ba kgethe metswalle e nepahetseng. O re: “Ka dilemo tse ngata nna le mohatsaka re ile ra mema Bakrestemmoho ba maemo a sa tshwaneng le ba dilemo tse sa tshwaneng. Re ne re ja le ho tshwara borapedi ba lelapa le bona. Ena ke tsela e molemo ya ho tseba batho ba ratang Jehova le ba thabelang ho mo sebeletsa. Balebedi ba potoloho, baromuwa le batho ba bang ba ne ba robaletsa ha rona. Dintho tse ileng tsa ba etsahalla, tsela eo ba neng ba le mafolofolo ka yona le eo ba neng ba itetse ha ba ntse ba sebeletsa Jehova, e ile ya thusa bana ba rona hore e be metswalle ya Jehova.” Batswadi, ikemisetseng ho thusa bana ba lona hore ba be le metswalle e nepahetseng.

16. O tla etsang haeba e mong wa bana ba hao a re ha a batle ho sebeletsa Jehova?

¹⁶ O tla etsang haeba e mong wa bana ba hao a re ha a batle ho sebeletsa Jehova le hoja o sebeditse ka thata ho mo ruta ka Yena? O se ke wa nka hore o hlolehile ho mo thusa. Jehova o file motho e mong le e mong ho akarelletsa le ngwana wa hao bolokolohi ba ho kgetha hore na o tla mo sebeletsa kapa tjhe. Ha ngwana wa hao a entse qeto ya ho tlohela ho sebeletsa Jehova, o se ke wa fellwa ke tshepo ya hore o tla mo sebeletsa hape. Hopola papiso ya mora ya lahlehileng. (Luka 15:11-19, 22-24) Mora eo o ile a etsa dintho tse ngata tse mpe empa qetellong o ile a kgaotsa ho di etsa. Batho ba bang ba ka nna ba re: “Taba eo e ne e le pale feela. Na ka nnete ke ntho e ka etsahalang?” Ho jwalo. Ha e le hantle, sena ke se ileng sa etsahalla motjha e mong ya bitswang Elie.

17. Pale ya Elie e o kgothatsa jwang?

¹⁷ Ha Elie a bua ka batswadi ba hae o re: “Ba ile ba etsa sohle seo ba ka se kgonang ho nthusa hore ke rate Jehova le Lentswe la hae Bibele. Le ha ho le jwalo, ha ke kena dilemong tsa botjha ke ile ka qala ho ba fetohela.” Elie o ile a qala ho etsa dintho tse fosahetseng moo batswadi ba hae ba sa mo boneng mme ha a ka a mamela batswadi ba hae ha ba leka ho mo thusa hore a dule e le motswalle wa Jehova. Ka mora hore a tlohe lapeng, o ile a qala ho  itshwara hampe. Le ha ho le jwalo, ka dinako tse ding o ne a bua le e mong wa metswalle ya hae ka Bibele. Elie o re: “Ha ke ntse ke tswela pele ho bua le motswalle wa ka ka Jehova, seo se ne se etsa hore ke nahane ka Jehova le ho feta. Butlebutle peo ya nnete ya Bibele e neng e le ka pelong ya ka empa e sa mele e leng eo batswadi ba ka ba ileng ba leka ka matla ho e jala e ile ya qala ho hola.” Ha nako e ntse e ya, Elie o ile a boela a sebeletsa Jehova. * O ka inahanela feela hore na batswadi ba hae ba ne ba thabile hakae hore ebe ba ile ba mo ruta a sa le monyenyane hore a rate Jehova.—2 Tim. 3:14, 15.

18. O ikutlwa jwang ka batswadi ba sebetsang ka thata ho ruta bana ba bona ho rata Jehova?

¹⁸ Batswadi, Jehova o le file mpho e babatsehang ya hore le hodise bana bao e tla ba bahlanka ba hae. (Pes. 78:4-6) Ke nnete hore ho etsa jwalo ha ho bonolo empa re a le babatsa hobane le sebetsa ka thata ho thusa bana ba lona. Kgodisehang hore Ntate wa rona ya lehodimong o tla thaba haeba le tswela pele ho etsa sohle seo le ka se kgonang ho thusa bana ba lona hore ba mo rate le ho mo mamela.​—Baef. 6:4.