1. Re ka thatafallwa keng?

 NA O kile wa batla ho etsetsa Jehova ntho e itseng empa wa thatafallwa ke ho e finyella? b Haeba ho jwalo, ha o mong. Ka mohlala, Morabo rona Philip o ne a batla ho ntlafatsa dithapelo tsa hae empa o ne a thatafallwa ke ho fumana nako ya ho rapela. Moradi wa bo rona Erika o ne a batla ho fihla sebokeng sa tshebeletso ya tshimo ka nako empa o ne a dula a fihla ka mora nako. Morabo rona Tomáš o ile a leka ka makgetlo ho bala Bibele kaofela. O re: “Ke ile ka Ieka ho bala Bibele hoo e ka bang ka makgetlo a mararo empa e ne e sa nnatefele. Makgetlong ao a mararo ke ne ke bala ho fihlela lengolong la Levitike ebe ke a kgaotsa.”

2. Ke hobaneng ha re sa lokela ho nyahama haeba re sa kgone ho etsa dintho tseo re neng re batla ho di etsetsa Jehova?

² Haeba o batla ho etsa ntho e itseng empa o eso ka o e finyella, o se ke wa nyahama. Re ntse re lokela ho sebetsa ka thata le ha re etsa dintho tse nyenyane tseo re batlang ho di finyella. Taba ya hore o batla ho finyella seo o se rerileng e a bontsha hore Jehova ke motswalle wa hao wa bohlokwa mme o batla ho mo fa se molemo. Jehova o ananela seo o mo etsetsang sona. Ha a lebella hore o etse dintho tseo o ke keng wa kgona ho di etsa. (Pes. 103:14; Mik. 6:8) Ka hoo, ha o batla ho etsa ntho e itseng, etsa bonnete ba hore o tla kgona ho e finyella. Ka mora  ho tseba hore na o batla ho etsang, o ka etsang e le hore o finyelle ntho eo? A re ke re bueng ka dintho tse tla re thusa.

3. Ke hobaneng ha ho ba le tabatabelo ya ho etsa seo o se rerileng e le ha bohlokwa?

³ Ke ha bohlokwa ho ba le tabatabelo ya ho finyella seo o se rerileng. Ha o ena le tabatabelo ya ho finyella seo o se rerileng, o tla sebetsa ka thata hore o se finyelle. Re ka bapisa tabatabelo eo re nang le yona le moya o kgannang sekepe e le hore se fihle moo se yang teng. Ha moya o foka ka matla, mosesisi wa sekepe a ka fihla moo a yang teng kapele. Ka tsela e tshwanang, haeba re ena le tabatabelo ya ho etsa ntho eo re e rerileng, re tla kgona ho e finyella. Morabo rona David ya dulang El Salvador o re: “Ha o rerile ho etsa ntho e itseng, o tla sebetsa ka thata ho e etsa. O ke ke wa dumella letho ho o sitisa ho phetha seo o batlang ho se finyella.” O ka etsang e le hore o be le tabatabelo ya ho finyella dintho tseo o di rerileng?

4. Re ka rapellang? (Bafilipi 2:13) (Sheba setshwantsho.)

⁴ Kopa Jehova hore a o thuse ho ba le tabatabelo ya ho finyella dintho tseo o di rerileng. Jehova a ka sebedisa moya wa hae o halalelang ho o thusa hore o finyelle seo o batlang ho se etsa. (Bala Bafilipi 2:13.) Re ipehela dintho tseo re batlang ho di etsa hobane re a tseba hore ho molemo ho etsa jwalo. Empa ka dinako tse ding re ka utlwa re se na tabatabelo ya ho etsa dintho tseo. Sena se ile sa etsahalla Moradi wa bo rona Norina ya dulang Uganda. O ne a batla motho eo a ka ithutang Bibele le yena empa o ne a se na tabatabelo ya ho mo batla hobane o ne a nahana hore ha a kgone ho ruta hantle. O thusitswe keng? O re: “Ke ile ka rapela Jehova letsatsi le letsatsi, ka mo kopa hore a nthuse hore ke be le tabatabelo ya ho batla motho eo nka ithutang Bibele le yena. Ka yona nako eo, ke ile ka ntlafatsa tsela eo ke rutang ka yona. Ka mora dikgwedi tse seng kae, ke ile ka hlokomela hore ke se ke ena le tabatabelo ya ho batla ho ruta batho Bibele. Hona selemong seo, ke ile ka qala ho ruta batho ba babedi Bibele.”

5. Ke dintho dife tseo re ka nahanisisang ka tsona e le hore re ikemisetse ho finyella dintho tseo re batlang ho di etsa?

⁵ Nahanisisa ka dintho tseo Jehova a o etseditseng tsona. (Pes. 143:5) Moapostola Pauluse o ile a nahanisisa ka mosa o moholo oo Jehova a ileng a mo bontsha wona mme seo se ile sa mo thusa hore a sebeletse Jehova ka hohle ka moo a ka kgonang ka teng. (1 Bakor. 15:9, 10; 1 Tim. 1:12-14) Ka ho tshwanang, haeba o nahanisisa ka dintho tseo Jehova a o etseditseng tsona, o tla ba le tabatabelo ya ho finyella dintho tseo o batlang ho di etsa. (Pes. 116:12) Hlokomela hore na keng e thusitseng moradi wa bo rona ya dulang Honduras hore e be pulamadiboho ya ka mehla. O re: “Ke ile ka nahana ka hore na Jehova o nthata hakae. O nthusitse hore ke be e mong wa bahlanka ba hae. O a ntsotella ebile o a ntshireletsa. Ho  nahana ka dintho tsena ho entse hore ke rate Jehova le ho feta mme ke ile ka ikemisetsa ho ba pulamadiboho.”

6. Keng hape e ka re thusang ho ba le tabatabelo ya ho etsa ntho e itseng?

⁶ Nahana ka melemo eo o tla e fumana ha o se o finyeletse seo o batlang ho se etsa. Hlokomela hore na keng e thusitseng Moradi wa bo rona Erika eo re buileng ka yena hore a tshware nako. O re: “Ke hlokometse hore ke lahlehelwa haholo ha ke fihla ka mora nako sebokeng sa tshimo. Empa ho fihla ka nako ho ne ho tla nthusa hore ke kgone ho dumedisa Bakrestemmoho Ie ho qeta nako le bona. Hape ke ne ke tla fumana dintlha tse neng di tla nthusa ho thabela mosebetsi wa boboledi le ho ntlafatsa tsela eo ke rutang ka yona.” Moradi wa bo rona Erika o ile a nahana ka melemo eo a neng a tla e fumana ha a ne a ka fihla ka nako sebokeng sa tshimo mme seo se ile sa mo thusa hore a kgone ho fihla ka nako. Wena o ka nahana ka melemo efe? Haeba o batla ho ntlafatsa tsela eo o balang Bibele ka yona kapa dithapelo tsa hao, nahana ka moo ho etsa seo ho tla o thusa hore o dule o le motswalle wa Jehova. (Pes. 145:18, 19) Haeba ho na le makgabane ao o batlang ho ba le ona, nahana ka moo a ka o thusang ka teng hore o utlwane le batho ba bang. (Bakol. 3:14) O ka ngola mabaka ao o nang le ona a ho batla ho finyella seo o batlang ho se etsa. Dula o sheba mabaka ao. Morabo rona Tomáš eo re buileng ka yena o re: “Ha ke tseba hore na ke hobaneng ha ke batla ho etsa ntho e itseng, ke sebetsa ka thata hore ke e etse.”

7. Keng e thusitseng Morabo rona Julio le mosadi wa hae hore ba finyelle ntho eo ba neng ba batla ho e etsa?

⁷ Dula o ena le batho ba o kgothaletsang hore o finyelle dintho tseo o batlang ho di etsa. (Diprov. 13:20) Nahana ka se ileng sa thusa Morabo rona Julio le mosadi wa hae hore ba eketse tshebeletso ya bona e leng yona ntho eo ba neng ba batla ho e finyella. O re: “Re ile ra kgetha metswalle e neng e re kgothaletsa hore re sebetse ka thata mosebetsing wa boboledi mme re ne re bua le bona ka taba ena. Bongata ba bona ba ne ba sebetsa ka thata mosebetsing wa boboledi, ka hoo ba ile ba re fa dikeletso tse ka re thusang. Metswalle ya rona e ne e boetse e re botsa hore na re ntse re eya jwang tabeng ya ho eketsa tshebeletso ya rona ebe ba a re kgothatsa.”

8. Keng e ka etsahalang haeba re ka emela hore re be le tabatabelo ya ho etsa dintho tseo re di rerileng? (Sheba setshwantsho.)

⁸ Ho na le matsatsi ao kaofela ha rona re ikutlwang re se na tabatabelo ya ho etsa dintho tseo re di rerileng. Na see se bolela hore re ke ke ra finyella dintho tseo re batlang ho di etsa? Tjhe. Ka mohlala, moya o matla o etsa hore sekepe se tsamaye. Le ha ho le jwalo, ho na le matsatsi ao moya o ka fokang ka matla le ao o ka bang siyo. Empa sena ha se bolele hore sekepe se ke ke sa tsamaya. Dikepe tse ding di na le enjene, ha tse ding di kgannwa ka masokwana.  Mosesisi wa sekepe a ka sebedisa dintho tsena ho se kganna. Re ka bapisa tabatabelo eo re nang le yona le moya. Ka dinako tse ding re ka labalabela ho etsa ntho e itseng, ha ka dinako tse ding re ka utlwa re se na tabatabelo ya ho e etsa. Haeba re etsa ntho eo re neng re e rerile mohlang re utlwang re ena le tabatabelo ya ho e etsa, re ka nna ra se ke ra e finyella. Feela jwalo ka ha mosesisi wa sekepe a sebedisa ditsela tse fapaneng ho se kganna, le rona re ka leka ho etsa ntho eo re e rerileng le hoja ka dinako tse ding re ka utlwa re sa batle ho e etsa. Ke nnete hore o tla lokela ho sebetsa ka thata empa o tla thaba ha o se o finyeletse seo o neng o se rerile. Pele re bona hore na re ka etsang, a re bueng ka potso eo re ka nnang ra ipotsa yona.

9. Na re lokela ho etsa dintho tseo re di rerileng le hoja re se na tabatabelo ya ho di etsa? Hlalosa.

⁹ Jehova o batla hore re thabele ho mo sebeletsa. (Pes. 100:2; 2 Bakor. 9:7) Empa na re lokela ho etsa dintho tseo re batlang ho di etsetsa Jehova le haeba re sa batle ho di etsa? Nahana ka seo moapostola Pauluse a ileng a se etsa. O ile a re: “Ke tshwara mmele wa ka ka thata ebile ke o tshwara jwalo ka lekgoba.” (1 Bakor. 9:25-27) Pauluse o ne a iqobella ho etsa dintho tse nepahetseng le hoja a ne a se na tabatabelo ya ho di etsa. Jehova o ne a thabela dintho tseo Pauluse a neng a mo etsetsa tsona mme o ile a mo hlohonolofatsa.​—2 Tim. 4:7, 8.

10. Re ka fumana melemo efe ha re etsa dintho tseo re di rerileng le hoja re se na tabatabelo ya ho di etsa?

¹⁰ Jehova o a thaba ha re etsa dintho tseo re di rerileng le hoja re se na tabatabelo ya ho di etsa. O a tseba hore re etsa dintho tseo re di rerileng hobane re mo rata le hoja ka dinako tse ding re sa thabele ho di etsa mme seo se a mo thabisa. Jehova o tla re hlohonolofatsa ha re etsa dintho tseo re di rerileng jwalo ka ha a ile a hlohonolofatsa Pauluse. (Pes. 126:5) Ka hoo, ha re bona tsela eo Jehova a re hlohonolofatsang ka yona, re ka ba le tabatabelo ya ho etsa dintho tseo re di rerileng. Moradi wa bo rona Lucyna ya dulang Poland o re: “Ka dinako tse ding, ha ke batle ho ya tshimong, haholoholo ha ke kgathetse. Empa ka mora hore ke kgutle tshimong, ke ikutlwa ke thabile haholo.” Hona jwale a re bueng ka dintho tse tla re thusa hore re be le tabatabelo.

11. Jehova a ka re thusa jwang hore re be le boitshwaro?

¹¹ Kopa Jehova hore a o thuse hore o be le boitshwaro. Maemong a mangata lentswe lena le bolela hore motho o ithiba ho etsa dintho tse fosahetseng. Le ha ho le jwalo, re hloka ho ba le boitshwaro e le hore re etse ntho e nepahetseng, haholoholo haeba e le thata kapa re se na tabatabelo ya ho e etsa. Hopola hore boitshwaro ke tholwana ya moya o halalelang. Ka hoo, kopa hore Jehova a o thuse a sebedisa moya wa hae o halalelang hore o be le boitshwaro. (Luka 11:13; Bagal. 5:22, 23) Morabo rona David eo re buileng ka yena o re hlalosetsa hore na ho rapela ho mo thusitse jwang. O ne a batla ho ithuta Bibele ka mehla. O re: “Ke ne ke kopa Jehova hore a nthuse hore ke be le boitshwaro. O ile a nthusa hore ke ipehele nako ya ho ithuta Bibele le hore ke e tshepahalle.”

12. Lengolo la Moeklesia 11:4 le re thusa jwang hore re etse dintho tseo re di rerileng?

¹² O se ke wa emela hore maemo a fetohe. Maemo a rona a ka nna a se ke a fetoha. Haeba re emela hore a fetohe, re ka nna ra se ke ra finyella dintho tseo re di rerileng. (Bala Moeklesia 11:4.) Morabo rona Dayniel o re: “Ha ho na hore motho a ke ke a hlahelwa ke mathata. Ka hoo, ha re a lokela ho emela hore maemo a rona a fetohe empa re lokela ho etsa dintho tseo re di rerileng.” Morabo rona Paul ya dulang Uganda o hlalosa lebaka le leng leo re sa lokelang ho dieha ho etsa dintho. O re: “Haeba re etsa dintho tseo re neng re di rerile le hoja ho le thata, Jehova o tla re thusa.”​—Mal. 3:10.

13. Ho qala hanyane ho ka re thusa jwang ho etsa dintho tseo re di rerileng?

 ¹³ Qala hanyane. Re ka nyahama ha re bona eka ho thata ho finyella dintho tseo re neng re di rerile. Ha o nyahame, ntho e ka o thusang ke hore o qale hanyane. Haeba o batla ho ba le makgabane a itseng, o ka qala ho a bontsha ka ditsela tse nyenyane. Ha o batla ho bala Bibele kaofela, o ka qala ka ho ipehela nako e kgutshwanyane ya ho e bala. Morabo rona Tomáš eo re buileng ka yena qalong o ne a thatafallwa ke ho qeta ho bala Bibele ka selemo. O re: “Ke ile ka hlokomela hore ke ne ke bala dikgaolo tse ngata haholo. Ka hoo, ke ile ka leka hape yaba ke bala ditemana tse mmalwa letsatsi le letsatsi mme ke nahanisisa ka tsona. Ho etsa jwalo ho nthusitse hore ke thabele ho bala Bibele.” Ka ha Morabo rona Tomáš’ o ne a se a thabela ho bala Bibele, o ne a se a qeta nako e ngata a e bala. O ile a kgona ho qeta ho bala Bibele. c

14. Ke dintho dife tse ka re hlahelang re sa lebella?

¹⁴ Re ka nna ra hlahelwa ke dintho tseo re sa di lebellang le hoja re ne re ikemiseditse ho etsa dintho tseo re neng re di rerile. Ka mohlala, re ka hlahelwa ke “dintho ka tshohanyetso” tse ka re sitisang ho etsa dintho tseo re neng re di rerile. (Moek. 9:11) Re ka hlahelwa ke mathata hoo re ka nyahamang mme ra fellwa ke matla. (Diprov. 24:10) Ka ha re baetsadibe, re ka etsa diphoso tse ka etsang hore ho be thata ho finyella dintho tseo re batlang ho di etsa. (Bar. 7:23) Ka dinako tse ding re ka ikutlwa re kgathetse. (Mat. 26:43) Re ka thuswa keng ha re hlahelwa ke dintho tseo re sa di lebellang?

15. Haeba re hlahelwa ke dintho tseo re sa di lebellang tse ka re sitisang hore re finyelle dintho tseo re di rerileng, na seo se bolela hore re hlolehile? Hlalosa. (Pesaleme ya 145:14)

¹⁵ Ha ho etsahala ntho eo o sa e lebellang e o sitisang ho finyella seo o se rerileng, seo ha se bolele hore o hlolehile. Bibele e re re ka hlahelwa ke  mathata hangata. Le ha ho le jwalo, e boetse e bontsha hore Jehova a ka re thusa hore re finyelle dintho tseo re di rerileng. (Bala Pesaleme ya 145:14.) Morabo rona Philip eo re buileng ka yena o re: “Ha ke nahane haholo ka makgetlo ao ke hlolehileng ho finyella seo ke se rerileng. Empa ke nahana ka hore ke finyelle seo ke se rerileng hape.” Morabo rona David eo re buileng ka yena o re: “Ha ke hlahelwa ke dintho tseo ke sa di lebellang tse ntshitisang kapa ke nyahame, ke nka maemo ao e le monyetla wa ho bontsha hore na ke rata Jehova hakae.” Ha o leka ho finyella seo o se rerileng le hoja ho le thata, o bontsha Jehova hore o batla ho mo thabisa mme o thaba haholo ha a bona o etsa jwalo.

16. O ka ithutang dinthong tse ka o sitisang ho finyella seo o se rerileng?

¹⁶ Ithute dinthong tse ileng tsa o sitisa ho finyella seo o se rerileng. Nahana ka se etsahetseng mme o ipotse: ‘Na ho na le ntho eo nka e etsang e le hore ke qobe tshitiso e tshwanang nakong e tlang?’ (Diprov. 27:12) Ka dinako tse ding haeba re thatafallwa ke ho finyella ntho eo re e rerileng, seo se ka bolela hore re ne re batla ho etsa ntho e ka hodima matla a rona. Haeba le wena o utlwa ho le thata ho etsa seo o se rerileng, hlahloba ntho eo o neng o batla ho e etsa mme o bone hore na o ntse o ka kgona ho e etsa. d Jehova a ke ke a nka hore o hlolehile haeba o sa kgona ho etsa ntho itseng e ka hodima matla a hao.​—2 Bakor. 8:12.

17. Ke hobaneng ha re lokela ho dula re nahana ka dintho tseo re di etseditseng Jehova?

¹⁷ Dula o nahana ka dintho tseo o di etseditseng Jehova. Bibele e re “Modimo o lokile, ka lebaka leo a ke ke a lebala mosebetsi wa [hao].” (Baheb. 6:10) Ka hoo, le wena o se ke wa lebala dintho tseo o mo etseditseng tsona. Nahana ka dintho tseo o seng o di entse tse kang ho ba motswalle wa Jehova, ho bolella batho ba bang ka yena kapa ho kolobetswa. O ntse o ka kgona ho etsetsa Jehova dintho tse ding le hona jwale feela jwalo ka ha o ile wa kgona ho mo etsetsa dintho tse itseng nakong e fetileng.​—Bafil. 3:16.

18. Keng eo re lokelang ho e hopola ha re ntse re leka ho finyella dintho tseo re di rerileng? (Sheba setshwantsho.)

¹⁸ Feela jwalo ka ha mosesisi wa sekepe a fihla moo a yang teng, le wena Jehova a ka o thusa ho finyella dintho tseo o rerileng ho di etsa. Hopola hore basesisi ba bangata ba kgannang dikepe tseo ba thabela leeto. Ka tsela e tshwanang, ha o ntse o tswela pele ho sebetsa ka thata ho finyella dintho tseo o di rerileng, o se ke wa lebala ho thabela ho bona ha Jehova a o thusa le ho o hlohonolofatsa. (2 Bakor. 4:7) Jehova o tla o hlohonolofatsa haholo haeba o sa tele.​—Bagal. 6:9.