1. Jehova o mema barapedi ba hae hore ba etseng? (Sheba setshwantsho.)

 RE KA ya ho mang ha re hloka ho tshediswa le ho tataiswa? Re tseba karabo ya potso eo. Re ka rapela Jehova Modimo. Jehova o re mema hore re mo rapele. Bibele e re: “Dulang le rapela.” Ka hoo, re a tseba hore o batla hore re mo rapele hangata. (1 Bathes. 5:17) Re ka mo rapela ka bolokolohi re mo kopa tataiso dikarolong tsohle tsa bophelo ba rona. (Diprov. 3:5, 6) Ka ha Jehova ke Modimo ya fanang, o batla hore re mo rapele hangata ka moo re ka kgonang.

2. Re tlo ithuta eng sehloohong see?

² Re leboha Jehova haholo hore ebe o re fa monyetla wa ho mo rapela. Ho ntse ho le jwalo, ka ha ho na le dintho tse ngata tseo re lokelang ho di etsa, ho ka nna ha eba thata ho fumana nako ya ho rapela. Hape re ka utlwa ho hlokahala hore re ntlafatse tsela eo re rapelang ka yona. Ho thabisang ke hore Bibele e a re kgothatsa ebile e a re tataisa tabeng ena. Sehloohong sena re tlo ithuta mohlaleng wa Jesu tabeng ya hore na re lokela ho etsang e le hore re be le nako ya ho rapela. Re tla boela re hlahlobe hore na re ka ntlafatsa tsela ya rona ya ho rapela jwang ka ho kenyeletsa dintlha tse hlano tsa bohlokwa.

3. Jesu o ne a tseba eng ka thapelo?

³ Jesu o ne a tseba hore Jehova o nka dithapelo tsa rona di le bohlokwa. Pele a tla lefatsheng, o ile a bona ha Ntate wa hae a araba dithapelo tsa banna le basadi ba tshepahalang. Ka mohlala, Jesu o ne a ena le Ntate wa hae ha a araba dithapelo  tse tswang pelong tsa Anna, Davida, Elia le batho ba bang ba bangata ba tshepahalang. (1 Sam. 1:10, 11, 20; 1 Mar. 19:4-6; Pes. 32:5) Ke ka hoo Jesu a ileng a ruta balatedi ba hae hore ba rapele hangata, ba kgodisehile hore dithapelo tsa bona di tla arajwa.—Mat. 7:7-11.

4. Re ithutang dithapelong tseo Jesu a ileng a di etsa?

⁴ Jesu o behetse barutuwa ba hae mohlala wa hore na ba ka rapela jwang ka tsela eo yena a neng a rapela ka yona. O ile a rapela hangata nakong ya tshebeletso ya hae. Ka ha o ne a phathahane ebile ho dula ho ena le batho ba bangata ba nang le yena, o ile a lokela ho ipha nako ya ho rapela. (Mar. 6:31, 45, 46) O ne a tsoha esale hoseng e le hore a ka ba le nako ya ho rapela moo a leng mong. (Mar. 1:35) Ka lekgetlo le leng o ile a rapela bosiu kaofela pele a etsa qeto ya bohlokwa. (Luka 6:12, 13) Bosiu ba ho qetela pele a eshwa, o ile a rapela ka makgetlo a mangata ha a le mothating wa ho phetha karolo e thata ka ho fetisisa ya thomo ya hae.​—Mat. 26:39, 42, 44.

5. Re ka etsisa Jesu jwang e le hore re be le nako ya ho rapela?

⁵ Mohlala wa Jesu o re ruta hore ho sa tsotellehe hore na re phathahane hakae, re lokela ho ipha nako ya ho rapela. Jwalo ka Jesu, re ka nna ra lokela ho ipehela nako eo re tla rapela ka yona. Mohlomong re ka tsoha hoseng haholo kapa ra dieha ho robala e le hore re ka ba le nako ya ho rapela. Ha re etsa jwalo re tla be re bontsha Jehova hore re ananela mpho ena e kgethehileng eo a re fileng yona. Moradi wa bo rona Lynne o hopola ka moo a neng a thabile ka teng ha a qala ho ithuta ka mpho ya thapelo. O re: “Ha ke ithuta hore nka bua le Jehova ka dinako tsohle, seo se ile sa nthusa hore ke mo nke jwalo ka Motswalle wa ka ya haufiufi le hore ke batle ho ntlafatsa tsela eo ke mo rapelang ka yona.” Bongata ba rona re ikutlwa jwalo ka yena. Jwale a re ke re bueng ka dintho tse hlano tsa bohlokwa tseo re ka di kenyeletsang dithapelong tsa rona.

6. Ho latela Tshenolo 4:10, 11, Jehova o tshwanelwa ke eng?

⁶ Rorisa Jehova. Moapostola Johanne o ile a bona pono e hlollang moo baholo ba 24 ba lehodimong ba neng ba rapela Jehova. Ba ne ba rorisa Modimo mme ba re o  “tshwanelwa ke ho roriswa le ho hlomphuwa.” (Bala Tshenolo 4:10, 11.) Mangeloi a tshepahalang le ona a na le mabaka a mangata a ho rorisa le ho hlompha Jehova. A dula le yena lehodimong mme a mo tseba hantle. A bona makgabane a hae dinthong tseo a di etsang. Ha a bona dintho tseo Jehova a di etsang, a susumeletseha ho mo rorisa.​—Jobo 38:4-7.

7. Ke hobaneng ha re ka rorisa Jehova?

⁷ Le rona ka ho tshwanang re lokela ho rorisa Jehova ha re rapela, re mo bolelle hore na ke hobaneng ha re mo rata ebile re mo ananela. Ha o ntse o bala Bibele le ho ithuta yona, leka ho bona hore na ke makgabane afe a Jehova ao o a ratang ka ho kgetheha. (Jobo 37:23; Bar. 11:33) Ka mora moo, bolella Jehova hore na o ikutlwa jwang ka makgabane ao. Re ka boetse ra rorisa Jehova hobane o a re thusa ebile o thusa Bakrestemmoho le rona kaofela. O dula a re hlokomela le ho re sireletsa.​—1 Sam. 1:27; 2:1, 2.

8. Re na le mabaka afe a ho leboha Jehova? (1 Bathesalonika 5:18)

⁸ Leboha Jehova. Re na le mabaka a mangata a ho leboha Jehova ha re mo rapela. (Bala 1 Bathesalonika 5:18.) Re ka mo leboha bakeng sa eng kapa eng e molemo eo re nang le yona hobane mpho e nngwe le e nngwe e molemo e tswa ho yena. (Jak. 1:17) Ka mohlala, re ka mo leboha ka lefatshe le letle leo a le bopileng le dintho tse ding tse hlollang tseo a di entseng. Re ka boetse ra mo leboha bakeng sa bophelo, malapa a rona, metswalle ya rona le tshepo ya bokamoso eo re nang le yona. Hape re lokela ho leboha Jehova hore ebe o re dumeletse ho ba metswalle ya hae.

9. Ke hobaneng ha re lokela ho itlwaetsa ho bontsha kananelo bakeng sa dintho tseo Jehova a re etsetsang tsona?

⁹ Re ka nna ra lokela ho etsa boiteko bo kgethehileng ba ho nahana ka mabaka a ho leboha Jehova. Batho ba bangata mehleng ena ha ba na teboho. Ba nahana haholo ka hore na ba ka fumana dintho tseo ba di batlang jwang ho ena le ho nahana hore na ba ka etsang ho bontsha teboho bakeng sa dintho tseo ba nang le tsona. Haeba re tshwaetswa ke mokgwa ona, dithapelo tsa rona e tla dula e le dikopo feela. Ho qoba hore seo se re etsahalle, re lokela ho itlwaetsa ho dula re bontsha kananelo bakeng sa dintho tsohle tseo Jehova a re etsetsang tsona.​—Luka 6:45.

10. Ho ba le teboho ho ile ha thusa moradi wa bo rona e mong jwang hore a mamelle? (Sheba setshwantsho.)

¹⁰ Ha re ena le teboho re ka kgona ho mamella mathata. Nahana ka se ileng sa etsahalla Moradi wa bo rona Kyung-sook, se tlalehilweng ho Molula-Qhooa wa January 15, 2015. Dingaka di ile tsa fumana hore o na le kankere e mpe ya matshwafo. O re: “Ho kula hona ho ile ha nkama ha bohloko. Ke ne ke utlwa eka ke lahlehetswe ke sohle mme ke tshohile haholo.” Ke eng e ileng ya mo thusa ho mamella? O re bosiu bo bong le bo bong pele a  robala, o ne a ya karolong e marulelong ya ntlo mme a rapela Jehova ka lentswe le phahameng ka dintho tse hlano tseo a di lebohang letsatsing leo. Ho etsa jwalo ho ile ha mo thusa hore a se ke a tshwenyeha haholo, ha ba ha mo susumeletsa ho bolella Jehova ka moo a mo ratang ka teng. O ile a bona ka moo Jehova a thusang bahlanka ba hae ba tshepahalang ha ba tobane le maemo a boima. O ile a hlokomela hore ho na le ditlhohonolofatso tse ngata bophelong ba rona ho feta mathata. Jwalo ka Moradi wa bo rona Kyung-sook, le rona re na le mabaka a mangata a ho leboha Jehova le haeba re tobana le mathata. Ho mo leboha dithapelong tsa rona ho ka re thusa ho mamella le ho dula re kgobile matshwafo.

11. Ke hobaneng ha barutuwa ba Jesu ba ne ba hloka sebete ka mora hore a kgutlele lehodimong?

¹¹ Kopa Jehova hore a o fe sebete ha o le tshimong. Nakwana pele Jesu a kgutlela lehodimong, o ile a hopotsa barutuwa ba hae ka mosebetsi wa ho mo pakela “Jerusalema, dibakeng tsohle tsa Judea le Samaria le karolong e holehole ya lefatshe.” (Dik. 1:8; Luka 24:46-48) Ka mora moo, baetapele ba Bajuda ba ile ba tshwara moapostola Petrose le Johanne yaba ba ba isa Lekgotleng le Phahameng la Bajuda. Ba ile ba tshosa banna bao ba tshepahalang le ho ba laela hore ba kgaotse ho paka. (Dik. 4:18, 21) Petrose le Johanne ba ile ba etsang?

12. Ho latela Diketso 4:29, 31, barutuwa ba ile ba etsang?

¹² Ka mora hore baetapele ba Bajuda ba ba tshose, Petrose le Johanne ba ile ba re: “Lona iketsetseng qeto hore na ho nepahetse mahlong a Modimo hore re mamele lona ho ena le ho mamela yena. Empa rona re ke ke ra kgaotsa ho bua ka dintho tseo re di boneng le tseo re di utlwileng.” (Dik. 4:19, 20) Ka mora hore Petrose le Johanne ba lokollwe, barutuwa ba ile ba rapela Jehova hore thato ya hae e etsahale. Ba ile ba re: “Re kopa o . . . thuse makgoba a hao hore a nne a bolele lentswe la hao ka sebete sohle.” Jehova o ile a araba thapelo eo ya bona e tswang pelong.​—Bala Diketso 4:29, 31.

13. Re ithutang mohlaleng wa Morabo rona Jin-hyuk?

¹³ Re ka etsisa mohlala wa barutuwa ka hore re tswele pele ho bua le batho ka molaetsa wa Bibele le ha mmuso o thibela mosebetsi wa rona. Nahana ka mohlala wa Morabo rona Jin-hyuk, ya ileng a kenngwa teronkong ka lebaka la ho se nke lehlakore. Ha a le teronkong o ile a fuwa mosebetsi wa ho hlokomela batshwaruwa ba neng ba kwaletswe ba le bang ka diseleng. Empa o ne a lokela ho bua le bona ka dintho tseo ba di hlokang feela. O ne a sa dumellwa ho bua le bona ka Bibele. O ile a rapella sebete le bohlale ba hore a pake ha monyetla o mong le o mong o hlaha. (Dik. 5:29) O re: “Jehova o ile a araba dithapelo tsa ka ka ho mpha sebete le bohlale ba ho qala dithuto tse ngata tsa Bibele tseo ke neng ke di kganna metsotso e mehlano ke eme menyako ya disele. Bosiu ke ne ke ngola mangolo ao ke neng ke tla a fa batshwaruwa letsatsing le latelang.” Le rona re ka kgodiseha hore Jehova o tla re thusa ho phetha tshebeletso ya rona. Jwalo ka Morabo rona Jin-hyuk, re ka rapella sebete le bohlale.

14. Ke eng e ka re thusang ha re sebetsana le mathata? (Pesaleme ya 37:3, 5)

¹⁴ Kopa Jehova hore a o thuse ho sebetsana le mathata. Bongata ba rona re sebetsana le ho kula mmeleng kapa maikutlong, ho hlokahallwa ke moratuwa, ho sebetsana le maemo a boima ka lapeng, ho hloriswa le mathata a mang a mangata. Dintho tse kang mafu a  sewa le dintwa di entse hore ho be thata le ho feta ho sebetsana le mathata ana. Phetlela Jehova sefuba sa hao. Mo jwetse ka boemo boo o sebetsanang le bona jwalo ka ha o ne o tla bolella motswalle wa hao ya haufiufi. O kgodisehe hore Jehova “o tla o thusa.”​—Bala Pesaleme ya 37:3, 5.

15. Thapelo e ka re thusa jwang hore re ‘mamelle ha re ena le mathata’? Fana ka mohlala.

¹⁵ Ho dula re rapela ho tla re thusa ho ‘mamella ha re ena le mathata.’ (Bar. 12:12) Jehova o tseba mathata ao barapedi ba hae ba nang le ona ebile “o utlwa sello sa bona ha ba kopa thuso.” (Pes. 145:18, 19) Moradi wa bo rona Kristie ya dilemo di 29 wa pulamadiboho o ile a bona hore seo ke nnete. Ka tshohanyetso o ile a qala ho kula haholo. Ka lebaka leo, o ile a tepella hampe maikutlong. Ha morao o ile a fumana hore mme wa hae o tshwerwe ke bolwetse bo bolayang. Kristie o re: “Ke ile ka rapela Jehova ka tiyo, ke mo kopa hore a mphe matla ao ke neng ke a hloka letsatsi ka leng. Ke ile ka leka ho etsa dintho tse neng di tla matlafatsa setswalle sa ka le Jehova ka hore ka mehla ke be teng dibokeng le ho ithuta Bibele moo ke leng mong.” O eketsa ka ho re: “Thapelo e ile ya nthusa ho mamella nakong eo e thata. Ke ne ke tseba hore Jehova o ne a dula a ena le nna mme ho tseba seo ho ile ha nthusa hore ke kgobe matshwafo. Le hoja bokudi ba ka bo sa ka ba ya moriting hanghang, Jehova o ile a araba dithapelo tsa ka ka ho mpha kgotso ya kelello le kgutso.” E se eka le ka mohla re ke ke ra lebala hore “Jehova o tseba ho pholosa batho ba mo sebeletsang ka botshepehi mathateng.”​—2 Pet. 2:9.

16. Ke hobaneng ha re hloka thuso ya Jehova e le hore re lwantshe diteko?

¹⁶ Kopa Jehova hore a o thuse ho hlola diteko. Ka ha ha re a phethahala, re lokela ho dula re lwantsha teko ya ho etsa se fosahetseng. Satane o etsa matsapa ohle ho re thatafaletsa ntwa ena. Tsela e nngwe eo a lekang ho silafatsa dikelello tsa rona ka yona ke ka  ho sebedisa boithabiso bo sa hlwekang. Boithabiso bo jwalo bo ka tlatsa dikelello tsa rona ka menahano e ditshila e ka etsang hore Jehova a re nke re sa hlweka le e ka etsang hore re etse dibe tse tebileng.—Mar. 7:21-23; Jak. 1:14, 15.

17. Ka mora hore re rapelle thuso ya Jehova, re lokela ho etsang ho qoba diteko? (Sheba setshwantsho.)

¹⁷ Re hloka thuso ya Jehova haeba re batla ho hlola teko ya ho etsa dintho tse fosahetseng. Jesu o ile a kenyeletsa mantswe a latelang thapelong ya mohlala: “O se ke wa re dumella hore re hlolwe ke moleko empa o re lopolle ho ya kgopo.” (Mat. 6:13) Jehova o batla ho re thusa empa re lokela ho mo kopa thuso. Ha re se re rapeletse thuso re lokela ho qoba ka hohle dintho tse ka re behang tekong. Re lokela ho leka ka hohle ho qoba ho mamela kapa ho bala dintho tse ka susumetsang maikutlo a fosahetseng a atileng lefatsheng lena la Satane. (Pes. 97:10) Re tlatse dikelello tsa rona ka dintho tse lokileng ka ho bala le ho ithuta Bibele. Ho ba teng dibokeng le tshimong le hona ho tla re thusa ho sireletsa tsela ya rona ya ho nahana. Hape Jehova o tshepisa hore a ke ke a dumella hore re hlahelwe ke diteko tseo re ke keng ra kgona ho di mamella.​—1 Bak. 10:12, 13.

18. Re ka etsang e le hore re be le nako ya ho rapela, hona re ka etsang ho ntlafatsa dithapelo tsa rona?

¹⁸ Kaofela ha rona re hloka ho dula re rapela ho feta le ha e le neng pele e le hore re dule re tshepahalla Jehova matsatsing ana a thata a bofelo. Ipehele nako ya ho rapela Jehova ho tswa pelong letsatsi le leng le le leng. Jehova o batla hore re ‘mo bolelle dintho tsohle tse ka dipelong tsa rona.’ (Pes. 62:8) Rorisa Jehova o be o mo lebohe bakeng sa dintho tsohle tseo a di etsang. Mo kope hore a o thuse hore o be sebete ha o le tshimong. Mo kope hore a o thuse ho sebetsana le mathata ao o nang le ona le hore o hlole diteko le ha e le dife tseo o tobaneng le tsona. O se ke wa dumella ntho le ha e le efe kapa motho le ha e le ofe ho o thibela ho rapela Jehova ka dinako tsohle. Empa Jehova o arabela dithapelo tsa rona jwang? Re tla araba potso eo ya bohlokwa sehloohong se latelang.