1. Ke thuto efe e kgothatsang eo Jehova a ileng a e ruta Abrahama?

 ABRAHAMA o ne a ke ke a lebala puisano ena le ka mohla. Modimo o ile a sebedisa lengeloi ho jwetsa Abrahama hore o ne a tlo fedisa motse wa Sodoma le Gomora. Monna eo ya tshepahalang o ne a kgathatsehile. O ile a botsa: “Na ka nnete o tla fedisa ya lokileng le ya kgopo? . . . O Moahlodi wa lefatshe lohle ya ahlolang ka toka.” Ka mamello Jehova o ile a ruta motswalle eo wa hae eo a mo ratang thuto ya bohlokwa: Modimo a ke ke a fedisa batho ba lokileng. Le rona thuto eo e re tswela molemo mme e a re tshedisa.—Gen. 18:​23-33.

2. Ke hobaneng ha re ka kgodiseha hore Jehova o ahlola ka mohau le ka toka?

² Ke hobaneng ha re ka kgodiseha hore Jehova o ahlola ka mohau le ka toka? Ke hobane re a tseba hore “Jehova o bona se ka pelong.” (1 Sam. 16:7) Ha e le hantle, o tseba “pelo ya motho e mong le e mong.” (1 Mar. 8:39; 1 Dikron. 28:9) Eo ke taba e hlollang. Jehova o bohlale haholo ho re feta, ke ka hoo eseng ka mehla re ka utlwisisang diqeto tseo a di etsang. Ke ka hona moapostola Pauluse a ileng a re ka Jehova Modimo: “Dikahlolo tsa hae di ke ke tsa utlwisiswa ka ho feletseng.”—Bar. 11:33.

3, 4. Re ka ipotsa dipotso dife ka dinako tse ding, hona re tlo bua ka eng sehloohong see? (Johanne 5:​28, 29)

³ Le hoja re tseba hore kamehla Jehova o ahlola ka toka, re ka nna ra botsa dipotso tse tshwanang le tseo Abrahama a ileng a di botsa. Re ka nna ra ipotsa: ‘Na batho bao Jehova a ileng a ba timetsa jwalo ka ba Sodoma le Gomora ba ka phela hape? Na ho ka etsahala hore ebe ba bang ba bona ba ka tsoswa ha Modimo a “tsosa batho ba . . . sa lokang bafung”?’—Dik. 24:15.

 ⁴ A re ikgopotseng hore na hana re tseba eng ka tsoho. Haufinyane re sa tswa fumana kutlwisiso e ntlafaditsweng ya hore na ho bolelwang ha ho thwe ba bang ba tla “tsohela bophelo” ebe ba bang ba ‘tsohela kahlolo.’ a (Bala Johanne 5:​28, 29.) Kutlwisiso ena e entse hore ho be le diphetoho tse eketsehileng tseleng eo re utlwisisang taba ena ka yona. Sehlooho sena le se latelang di tla bua ka diphetoho tseo. Re tla bua pele ka hore na ha re tsebe eng ka dikahlolo tsa Jehova tse lokileng ebe re bua ka hore na re tseba eng ka tsona.

HA RE TSEBE ENG?

5. Nakong e fetileng, dingolwa tsa rona di ile tsa reng ka batho ba ileng ba timetswa Sodoma le Gomora?

⁵ Nakong e fetileng dingolweng tsa rona re ile ra bua ka hore na ho etsahalang ka batho bao Jehova a ba ahlotseng e le ba sa lokang. Re ile ra re batho ba timeditsweng ke Jehova jwalo ka ba Sodoma le Gomora ba ke ke ba tsoha. Empa ka mora ho ithuta ka hloko le ho rapela haholwanyane ka taba eo, ho hlakile hore ha re na bonnete ba hore ho jwalo. Ke hobaneng ha re tjho jwalo?

6. Ke mehlala efe ya moo Jehova a ileng a ahlola batho ba sa lokang, hona ke eng seo re sa se tsebeng?

⁶ Nahana ka ditlaleho tse mmalwa tse hlahang ka Bibeleng tseo ho tsona Jehova a ileng ahlola batho ba sa lokang. Ka mohlala, Jehova o ile a timetsa batho bohle ntle le Noe le lelapa la hae nakong ya Morwallo. Hape o ile a sebedisa Baiseraele ho timetsa ditjhaba tse supileng tse neng di dula Naheng e Tshepisitsweng. O ile a sebedisa lengeloi le le leng ho bolaya masole a 185 000 a Baasiria ka bosiu bo le bong. (Gen. 7:23; Deut. 7:​1-3; Esa. 37:​36, 37) Mehlaleng ee, na Bibele e bolela ka ho hlakileng hore Jehova o ile a etsa qeto ya hore e mong le e mong wa batho baa a fediswe ka ho sa feleng ho se na tshepo ya hore a tsohe? Tjhe, ha ho jwalo. Ke hobaneng ha re ka tjho jwalo?

7. Ke eng eo re sa e tsebeng ka batho ba ileng ba timetswa ka nako ya morwallo kapa ha ho haptjwa Kanana? (Sheba setshwantsho .)

⁷ Mehlaleng e ka hodimo, ha re tsebe hore na Jehova o ile a ahlola e mong le e mong jwang ebile ha re tsebe hore na batho ba ileng ba bolawa ba ile ba eba le monyetla wa ho ithuta ka Jehova le hore ba bake. Ha Bibele e bua ka nako ya Morwallo e re Noe o ne “a phatlalatsa ditaba tse lokileng.” (2 Pet. 2:5) Empa ha e re ha a ne a ntse a haha areka eo e kgolo, o ne a boetse a ntse a leka ho bolella motho e mong le e mong ya phelang lefatsheng molaetsa. Ka tsela e tshwanang, ha re tsebe hore na batho ba neng ba dula Kanana ba ile ba eba le monyetla wa ho ithuta ka Jehova le ho fetola mekgwa ya bona.

8. Ke eng eo re sa e tsebeng ka batho ba Sodoma le Gomora?

⁸ Ho thweng ka batho ba Sodoma le Gomora? Monna ya lokileng ya bitswang Lota o ne a dula hara bona. Empa na re a tseba hore ehlile Lota o ile a ba bolella ka Jehova kaofela ha bona? Tjhe. Kaofela ha bona ba ne ba le kgopo empa na e mong le e mong wa bona o ne a tseba ntho e nepahetseng le e fosahetseng? Ha ho bonahale ho le jwalo. Hopola hore na Bibele e reng ka letshwele la banna ba neng ba batla ho beta baeti ba Lota. Bibele e re letshwele leo e ne e le banna bohle “ho tloha ho moshanyana ho ya ho monnamoholo.” (Gen. 19:4; 2 Pet. 2:7) Na ehlile re tseba hantle hore Modimo ya mohau Jehova o entse qeto ya hore ha ho le ya mong wa bona ya tla tsoha? Tjhe, re ke ke ra tjho jwalo. Jehova o ile a tiisetsa Abrahama hore ha ho na le ha e se e le batho ba leshome ba lokileng motseng oo.  (Gen. 18:32) Ka hoo, ba ne ba sa loka mme Jehova o ne a nepile ka ho ba timetsa. Na re ka bua re kgodisehile hore ha ho le ya mong wa bona ya tla tsoha ha Modimo a “tsosa batho . . . ba sa lokang bafung”? Tjhe, re ke ke ra tiisa hore ho jwalo.

9. Ke eng eo re sa e tsebeng ka Solomone?

⁹ Ka lehlakoreng le leng, Bibele e bua ka ditlaleho tsa batho ba neng ba lokile empa ba qetella ba se ba sa loka. Morena Solomone ke mohlala wa batho ba jwalo. O ne a tseba Jehova hantle ebile a tseba hore na o lokela ho mo rapela jwang mme Jehova o ile a mo hlohonolofatsa haholo. Empa ha morao Solomone o ile a rapela medimo ya bohata. Taba ena e ile ya halefisa Jehova haholo hoo setjhaba sa Baiseraele se ileng sa kgola ditholwana tse bosula ka dilemo tse makgolo ka lebaka la dibe tsa Solomone. Ke nnete hore Mangolo a re Solomone o ile “a patwa jwalo ka baholoholo ba hae,” ho akareletsa le banna ba tshepahalang jwalo ka Morena Davida. (1 Mar. 11:​5-9, 43, nal; 2 Mar. 23:13) Empa na taba ya hore o ile a patwa jwalo ka baholoholo ba hae ke tiiso ya hore Jehova o tla mo tsosa? Bibele ha e re bolelle. Batho ba bang ba ka nna ba nahana hore Solomone o tla tsoswa hobane Bibele e re “motho ya shweleng o tshwaretswe sebe sa hae.” (Bar. 6:7) Le ha ho le jwalo, ha ho bolele hore batho bohle ba shweleng ba tla tsoswa, etswe taba ya hore motho o shwele ha e bolele hore o na le tokelo ya ho phela hape. Tsoho ke mpho e tswang ho Modimo wa rona ya lerato. O e fa batho bao a batlang hore ba be le monyetla wa ho mo sebeletsa ka ho sa feleng. (Jobo 14:​13, 14; Joh. 6:44) Na Solomone o tla fumana mpho eo? Jehova ke yena ya tsebang, rona ha re tsebe. Ntho eo re e tsebang ke hore Jehova o tla etsa ntho e nepahetseng.

RE TSEBA ENG?

10. Jehova o ikutlwa jwang ka ho timetsa batho? (Ezekiele 33:11) (Sheba setshwantsho.)

¹⁰ Bala Ezekiele 33:11. Jehova o a re bolella hore na o ikutlwa jwang ka taba ya ho ahlola batho. Moapostola Petrose o ile a ngola mantswe a tshwanang le a moprofeta Ezekiele ha a re “Jehova . . . ha a lakatse hore mang kapa mang a timetswe.” (2 Pet. 3:9) Mantswe ana a kgothatsang a re thusa ho tseba hore Jehova ha a potlakele ho timetsa batho ka ho sa feleng ntle le ha a ena le lebaka le utlwahalang la ho etsa jwalo. O mohau haholo mme o o bontsha ka dinako tsohle ha ho kgoneha.

11. Ke bomang ba sa tlo tsoswa, hona re tseba jwang?

¹¹ Ke eng eo re e tsebang ka batho ba sa tlo tsoswa? Bibele e bua ka mehlala e seng mekae feela. b Jesu o ile a bontsha hore Judase Iskariota a ke ke a tsoswa. (Mar. 14:21; sheba le Johanne 17:12.) Judase o ne a tseba hore ntho eo a e entseng e ne e le kgahlanong le Jehova le Mora wa hae empa o ile a e etsa ho ntse ho le jwalo. (Sheba Mareka 3:29 le w07/15 leq. 18.) Ka tsela e tshwanang, Jesu o ile a re ba bang ba baetapele ba bodumedi ba neng ba mo hanyetsa ba ne ba tla shwa ba se na tshepo ya tsoho. (Mat. 23:33) Le moapostola Pauluse o ile a re bakwenehi ba sa bakeng ba ke ke ba tsoswa.—Baheb. 6:​4-8; 10:29.

12. Re tseba eng ka mohau wa Jehova? Etsa mehlala.

¹² Le ha ho le jwalo, re tseba eng ka mohau wa Jehova? O bontshitse jwang hore “ha a lakatse hore mang kapa mang a timetswe”? Nahana ka mohau oo a ileng a o bontsha ba bang ba ileng ba etsa dibe tse tebileng. Morena Davida o ile a etsa dibe tse tebileng jwalo ka bofebe le ho bolaya. Le ha ho le jwalo, Davida o ile a baka mme Jehova a mo bontsha mohau  ka ho mo tshwarela. (2 Sam. 12:​1-13) Morena Manase o ne a le kgopo haholo hoo e ka bang bophelo bohle ba hae. Le boemong bo bobe hakaalo Jehova o ile a mo bontsha mohau mme a mo tshwarela hobane o ile a baka. (2 Dikron. 33:​9-16) Mehlala ena e re hopotsa hore Jehova o bontsha mohau ha feela ho ena le lebaka le utlwahalang la hore a etse jwalo. O tla tsosa batho ba jwalo hobane ba ile ba hlokomela hore ba entse dibe tse tebileng ba ba ba di bakela.

13. (a) Ke hobaneng ha Jehova a ile a hauhela Baninive? (b) Dilemo ha morao Jesu o ile a reng ka Baninive?

¹³ Re boetse re tseba mohau oo Jehova a ileng a o bontsha Baninive. Modimo o ile a re ho Jonase: “Ke hlokometse bokgopo ba bona.” Empa eitse ha ba bakela dibe tsa bona Jehova o ile a ba tshwarela. O ne a le mohau haholo ho feta Jonase. Modimo o ile a hopotsa moprofeta eo wa hae ya neng a halefile haholo hore Baninive ba ne ‘ba sa tsebe phapang pakeng tsa se nepahetseng le se fosahetseng.’ (Jon. 1:​1, 2; 3:10; 4:​9-11) Dilemo ha morao Jesu o ile a sebedisa mohlala oo ho ruta hore Jehova o mohau ebile o na le toka. Jesu o ile a re Baninive bao ba bakileng, “ka letsatsi la kahlolo . . . ba tla tsoha bafung.”—Mat. 12:41.

14. Ho ‘tsohela kahlolo’ ho tla bolelang ho Baninive?

¹⁴ Empa ho bolelwang ha ho thwe “ka letsatsi la kahlolo, batho ba Ninive ba tla tsoha bafung”? Jesu o ile a re ho na le batho ba tla ‘tsohela kahlolo.’ (Joh. 5:29) O ne a bua ka Puso ya Dilemo Tse Sekete eo ho yona “batho ba lokileng le ba sa lokang” ba tla tsoswa. (Dik. 24:15) Batho ba sa lokang ba tla ‘tsohela kahlolo.’ Sena se bolela hore ka mora hore ba tsoswe, Jehova le Jesu ba tla be ba ba shebile hore na ba tla mamela le ho etsa dintho tseo ba ithutang tsona. Haeba Moninive ya tsositsweng a hana ho rapela Jehova, Jehova a ke ke a mo dumella hore a nne a tswele pele a phela. (Esa. 65:20) Empa bohle ba kgethang ho sebeletsa Jehova ka botshepehi ba tla ba le monyetla wa ho phela ka ho sa feleng.—Dan. 12:2.

15. (a) Ke hobaneng ha re sa lokela ho re ha ho na motho le ya mong ho batho ba ileng ba dula Sodoma le Gomora ya tla tsoswa? (b) Re lokela ho utlwisisa mantswe a ho Juda 7 jwang? (Sheba lebokose le reng “ Juda o ne a Bolelang?”)

¹⁵ Ha Jesu a bua ka batho ba Sodoma le Gomora, o ile a re “ka Letsatsi la Kahlolo” kotlo  ya bona e tla ba bobebe ho feta ya batho ba ileng ba mo hana le ho hana dithuto tsa hae. (Mat. 10:​14, 15; 11:​23, 24; Luka 10:12) O ne a bolelang? Na Jesu o ne a mpa a sebedisa mokgabo puo wa pheteletso ho bontsha hore batho ba mehleng ya hae ba ne ba le babe ho feta ba mehleng ya Sodoma le Gomora? Hopola hore ha Jesu a ne a re “ka letsatsi la kahlolo, batho ba Ninive ba tla tsoha bafung” o ne a bolela seo ka tsela ya sebele. c Ho bonahala hore le ha Jesu a ne a bua ka batho ba Sodoma le Gomora, o ne a bolela seo ka tsela ya sebele. “Letsatsi la Kahlolo” leo a neng a bua ka lona maemong ana a mabedi e ne e le letsatsi le tshwanang. Batho ba Sodoma le Gomora ba ne ba etsa dintho tse mpe jwalo ka batho ba Ninive. Empa Baninive ba ile ba fumana monyetla wa ho baka. Ntle ho moo, hopola seo Jesu a ileng a se bua ka ho ‘tsohela kahlolo.’ Ho tla tsoswa le batho “ba neng ba tlwaetse ho etsa dintho tse fosahetseng.” (Joh. 5:29) Ka hoo, ho bonahala eka e ka nna yaba ho na le tshepo bakeng sa batho ba Sodoma le Gomora. Ho ka nna ha etsahala hore ebe ba bang ba batho bao ba tla tsoswa mme re ka nna ra ba le monyetla wa ho ba ruta ka Jehova le ka Jesu Kreste.

16. Ho ya ka seo re se tsebang, Jehova o tla etsa qeto jwang ya hore na o tla tsosa bomang? (Jeremia 17:10)

¹⁶ Bala Jeremia 17:10. Temana eo e re thusa ho akaretsa seo re se tsebang: Ka mehla Jehova ke yena ya ‘hlahlobang pelo, ya phenyang menahano e tebileng.’ Nakong e tlang ha a tsosa bafu o tla ‘fa e mong le e mong ho ya ka ditsela tsa hae’ jwalo ka ha a tlwaetse. Jehova o tla ema a tiile ha ho hlokahala empa o tla bontsha mohau ha ho kgoneha. Ha re a lokela ho etsa qeto ya hore motho a ke ke a tsoswa ntle le haeba ehlile re tseba hore ho jwalo.

“MOAHLODI WA LEFATSHE LOHLE” O TLA ‘AHLOLA KA TOKA’

17. Ho tlo etsahalang ka batho ba seng ba shwele?

¹⁷ Ho tloha ha Adama le Eva ba kopanela le Satane borabeleng ba hae kgahlanong le Jehova Modimo, ho se ho shwele batho ba dibilione. “Sera . . . e leng lefu” se se se nkile  batho ba bangata. (1 Bakor. 15:26) Ho tlo etsahalang ka batho bao kaofela? Ke palo e fokolang ya balatedi ba Kreste ba tshepahalang ba 144 000 ba tla tsosetswa ho ya phela lehodimong ba se ba sa shwe. (Tshen. 14:1) Banna le basadi ba bangata ba neng ba rata Jehova ba tla phela hape ha ho ‘tsoswa batho ba lokileng’ mme ba tla phela ka ho sa feleng lefatsheng haeba ba dula ba tshepahala nakong ya Puso ya Kreste ya Dilemo Tse Sekete le nakong ya teko ya ho qetela. (Dan. 12:13; Baheb. 12:1) Hape ka nako ya Dilemo Tse Sekete, batho “ba sa lokang” ba akareletsang batho ba sa kang ba sebeletsa Jehova kapa “ba neng ba tlwaetse ho etsa dintho tse fosahetseng,” ba tla fuwa monyetla wa ho fetola ditsela tsa bona hore e be bahlanka ba tshepahalang ba Jehova Modimo. (Luka 23:​42, 43) Le ha ho le jwalo, batho ba bang ba ne ba le kgopo haholo, ba ikemiseditse ho se mamele Jehova le merero ya hae hoo a entseng qeto ya hore a ke ke a ba tsosa ho hang.—Luka 12:​4, 5.

18, 19. (a) Ke hobaneng ha re ka kgodiseha hore Jehova o tla ahlola batho ba shweleng ka toka? (Esaia 55:​8, 9) (b) Re tlo bua kang sehloohong se latelang?

¹⁸ Na re ka kgodiseha ka ho feletseng hore dikahlolo tsohle tsa Jehova di nepahetse? Hantle haholo. Abrahama le yena o ne a tseba hore Jehova o phethahetse, o bohlale ebile ke “Moahlodi wa lefatshe lohle” ya mohau. O kwetlisitse Mora wa hae a ba a mo fa mosebetsi wa ho ahlola motho e mong le e mong. (Joh. 5:22) Ka bobedi Ntate le Mora wa hae ba kgona ho bona se ka pelong ya motho e mong le e mong. (Mat. 9:4) Maemong ohle ba tla dula ba ‘ahlola ka toka.’

¹⁹ A re ikemisetseng ho tshepa Jehova diqetong tsohle tseo a di etsang. Re a hlokomela hore rona re ke ke ra kgona ho ahlola ka toka empa yena a ka kgona. (Bala Esaia 55:​8, 9.) Ke ka lebaka leo re tshepang Jehova le Mora wa hae hore ba fane ka dikahlolo tsohle. Hape re a tseba hore Morena wa rona Jesu o tla etsisa ka ho phethahetseng toka le mohau wa Ntate wa hae. (Esa. 11:​3, 4) Empa re ka reng ka dikahlolo tsa Jehova le Jesu nakong ya mahlomola a maholo? Ha re tsebe eng? Re tseba eng? Sehlooho se latelang se tla araba dipotso tsena.