1. Ke potso efe eo re ka nnang ra ipotsa yona?

NA KA dinako tse ding o ye o ikutlwe o tshwenyehile ha o nahana ka dintho tse tla etsahala haufinyane, tse kang ho fediswa ha bodumedi ba bohata, tlhaselo ya Gogo wa Magogo le ntwa ya Armagedone? Na o kile wa ipotsa wa re, ‘Na ebe ke tla kgona ho dula ke tshepahala ha dintho tsee tse tshosang di etsahala?’ Haeba o kile wa nahana ka dipotso tsena, taba eo Jesu a ileng a bua ka yona e hlahang temaneng ya rona ya sehlooho e tla o thusa. Jesu o ile a re ho barutuwa ba hae: “Le se ke la dumella dipelo tsa lona hore di kgathatsehe. Bontshang tumelo.” (Joh. 14:1) Tumelo e matla e tla re thusa hore re be sebete ho sa tsotellehe hore na keng e etsahalang nakong e tlang.

2. Re ka matlafatsa tumelo ya rona jwang, hona re tlo bua kang sehloohong see?

² Ho nahana ka hore na re etsang hona jwale ha tumelo ya rona e lekwa, ho tla re thusa ho tseba hore na ke jwang re ka matlafatsang tumelo ya rona e le hore re kgone ho mamella nakong e tlang. Ha re nahana ka taba eo, re tla kgona ho bona hore na ke hokae moo re lokelang ho matlafatsa tumelo ya rona. Lekgetlo le leng le le leng ha re mamella teko, tumelo ya rona e ba matla le ho feta mme seo se tla re thusa ho mamella diteko nakong e tlang. Sehloohong sena, re tlo bua ka maemo a mane a ileng a bontsha hore barutuwa ba Jesu ba ne ba hloka ho ba le tumelo e matla. Re tlo boela re bone hore na re ka mamella mathata a tshwanang le ao jwang mehleng ena le hore na ke jwang ho mamella mathata ao ho ka re lokisetsang hore re mamelle le nakong e tlang.

3. Mantswe a Jesu a ho Matheu 6:​30, 33, a re thusa hore re utlwisiseng?

³ Ke ntho e tlwaelehileng hore hlooho ya lelapa e batle ho hlokomela mosadi le bana ka dijo, diaparo le bodulo empa ha se ka  mehla ho leng bonolo ho etsa jwalo dinakong tsena tse thata. Bara le baradibabo rona ba bang ba lahlehetswe ke mesebetsi mme ho sa tsotellehe boiteko boo ba bo etsang, ha ba fumane e meng. Ba bang ba ile ba lokela ho hana mesebetsi e sa lokelang Bakreste. Maemong ana ohle, re lokela ho ba le tumelo e matla ya hore Jehova o tla etsa bonnete ba hore rona le ba malapa a rona re ba le dintho tseo re di hlokang. Jesu o ile a hlakisetsa barutuwa ba hae taba ena hantle Thutong ya Thabeng. (Bala Matheu 6:​30, 33.) Ha re kgodisehile ka ho feletseng hore Jehova a ke ke a re lahla, re tla tsepamisa dikelello tsa rona nthong ya bohlokwa e leng ho sebeletsa Jehova. Jwale, ha re bona ka moo Jehova a re thusang ka teng ka dintho tseo re di hlokang, re tla atamela haufi le yena ebile tumelo ya rona e tla ba matla.

4, 5. Lelapa le leng le ile la thuswa keng ha le ne le tshwenyehile hobane ho le thata ho fumana dintho tseo le di hlokang?

⁴ Hlokomela ka moo lelapa le leng la Venezuela le ileng la bona ha Jehova a le thusa ha le ne le tshwenyehile ka dintho tseo le di hlokang. Lelapa la ha Castro le ne le phela ka tjhelete e lekaneng eo le neng le e fumana polasing ya lelapa. Banna ba bang ba nkileng dithunya ba ile ba leleka lelapa la ha Castro mme ba hapa polasi eo. Ntate wa lelapa leo e leng morabo rona Miguel o re: “Hona jwale re se re phela ka ho lema tshimo e nyane eo re e kadimileng. Ke qala letsatsi le leng le le leng ka ho kopa Jehova hore a re thuse ka dintho tseo re tla di hloka letsatsing leo.” Le hoja bophelo bo thatafalletse lelapa la ha Castro, le na le tumelo e matla ya hore Ntate wa rona ya lerato a ka kgona ho le hlokomela ka dintho tseo le di hlokang letsatsi le letsatsi mme le ya tshimong le dibokeng ka mehla. Ho sebeletsa Jehova ke ntho e tlang pele bophelong ba lelapa lena mme Jehova o le fa dintho tseo le di hlokang.

⁵ Nakong ena e thata, morabo rona Miguel le mosadi wa hae Yurai esale ba hlokomela ka moo Jehova a ba hlokometseng ka teng. Ka dinako tse ding, Jehova o ile a sebedisa bara le baradibabo rona ho ba thusa ka dintho tseo ba di hlokang kapa ho thusa morabo rona Miguel ho fumana mosebetsi. Ka dinako tse ding, Jehova o ne a sebedisa ofisi ya lekala ho ba phallela ka dintho tseo ba di hlokang. Jehova ha a ka a ba lahla. Ka lebaka leo, tumelo ya lelapa lena e ile ya matlafala. Ka mora hore moradi wa bona e moholo e leng Yoselin a bue ka moo Jehova a ileng a ba thusa ka teng, o ile a re: “Ho a kgothatsa ho bona ka moo Jehova a re thusitseng ka teng. Ke mo nka e le motswalle wa ka mme ke kgodisehile hore o tla dula a nthusa.” O ile a boela a re: “Mathata ao re fetileng ho ona re le lelapa a re kwetliseditse ho mamella mathata a boima le ho feta ao re tlo kopana le ona nakong e tlang.”

6. O ka matlafatsa tumelo ya hao jwang ha o na le mathata a ditjhelete?

⁶ Na o na le mathata a ditjhelete? Haeba ho jwalo, e tlameha ebe bophelo ba hao bo thata haholo. Ho ntse ho le jwalo, o ka sebedisa nako ena ho matlafatsa tumelo ya hao. Rapela Jehova ebe o bala mantswe a Jesu a hlahang ho Matheu 6:​25-34 mme o nahanisise ka ona.  Nahana ka mehlala ya mehleng ena e bontshang hore Jehova o hlokomela batho ba dulang ba phathahane ka ho mo sebeletsa. (1 Bakor. 15:​58) Ha o etsa jwalo, o tla kgodiseha le ho feta hore Jehova o tla o thusa jwalo ka ha a ile a thusa batho ba bang ba neng ba ena le mathata a tshwanang le a hao. O tseba dintho tseo o di hlokang ebile o a tseba hore na a ka o fa tsona jwang. Ha o bona ka moo Jehova a o thusang ka teng bophelong, tumelo ya hao e tla matlafala mme e tla o thusa ho mamella mathata a boima le ho feta nakong e tlang.​—Hab. 3:​17, 18.

7. Ho ya ka Matheu 8:​23-26, sefefo se matla se ile sa bontsha jwang hore baapostola ba ne ba lokela ho matlafatsa tumelo ya bona?

⁷ Ha Jesu le barutuwa ba hae ba ne ba tsamaya ka sekepe, ka tshohanyetso ho ile ha eba le sefefo. Jesu o ile a sebedisa ketsahalo eo ho ba thusa ho utlwisisa hore ba ne ba hloka ho matlafatsa tumelo ya bona. (Bala Matheu 8:​23-26.) Sefefo se ne se le matla hoo maqhubu a lewatle a ileng a tlatsa sekepe ka metsi empa Jesu o ne a kgalehile. Ha barutuwa ba mo tsosa ba tshohile mme ba mo kopa hore a ba pholose, Morena o ile a re ho bona: “Ke hobaneng ha le le boi, lona ba nang le tumelo e nyenyane?” Barutuwa bana ba tshohileng ba ne ba tlameha hore ebe ba a tseba hore Jehova a ka kgona ho sireletsa Jesu le batho ba nang le yena. Re ithutang tabeng ee? Tumelo e matla e ka re thusa ho mamella difefo tse matla kapa bothata le ha e le bofe bo tshwanang le sefefo.

8, 9. Tumelo ya moradiwabo rona Anel e ile ya lekwa jwang, hona o ile a thuswa keng?

⁸ Nahana ka moo tumelo ya moradiwabo rona Anel wa lesoha wa Puerto Rico e ileng ya matlafala ka teng ka mora hore a mamelle teko e boima. Teko ya hae e boima e ne e le sefefo sa sebele. Mathata a qadile ka 2017 ha lehoduotswana le bitswang Maria le senya ntlo ya moradiwabo rona Anel. O ile a ba a fellwa ke mosebetsi ka lebaka la sona sefefo seo. Moradiwabo rona Anel o re: “Dinakong tseo tse thata, ke ne ke tshwenyehile empa ke ile ka ithuta ho tshepa Jehova ka hore ke mo rapele le hore ke se ke ka tshwenyeha hoo nka sitwang ho etsa dintho tseo ke lokelang ho di etsa.”

⁹ Moradiwabo rona Anel o re ntho e nngwe e ileng ya mo thusa hore a mamelle mathata a hae ke ho mamela. O re: “Ho latela tataiso ya mokgatlo wa Jehova ho ile ha nthusa hore ke dule ke sa kgathatseha. Jehova o ile a nthusa a sebedisa bara le baradibabo rona. Ba ile ba nkgothatsa mme ba mpha dintho tseo ke neng ke di hloka hore ke nne ke phele.” O tswela pele ho re: “Jehova o mphile dintho tse ngata ho feta tseo ke neng nka di kopa mme tumelo ya ka e matlafetse haholo.”

10. O ka etsang haeba o na le mathata a boima?

¹⁰ Na le wena o na le mathata bophelong? E ka nna yaba mathata ao ke a bakilweng ke koduwa ya tlhaho. Kapa e ka nna yaba o kula haholo hoo o ikutlwang o nyahame ebile o sa tsebe hore na o etseng. Le hoja ka dinako tse ding o ka tshwenyeha, ha o a lokela ho dumella ho tshwenyeha hore ho o sitise ho tshepa Jehova.  Atamela ho yena ka ho mo rapela ho tswa pelong. Matlafatsa tumelo ya hao ka ho nahanisisa ka moo Jehova a o thusitseng ka teng nakong e fetileng. (Pes. 77:​11, 12) O ka kgodiseha hore a ke ke a o lahla le ka mohla.

11. Ke hobaneng ha re lokela ho ikemisetsa ho mamela ba etellang pele?

¹¹ Keng hape e ka o thusang ho mamella mathata? Ke ho mamela jwalo ka ha moradiwabo rona Anel a bontshitse. Ithute ho tshepa batho bao Jehova le Jesu ba ba tshepang. Ka dinako tse ding, ba etellang pele ba ka nna ba re fa ditaelo tseo re bonang eka ha di utlwahale. Empa Jehova o tla re hlohonolofatsa haeba re mamela. Re ithuta Lentsweng la hae le mehlaleng ya bara le baradibabo rona hore ho mamela ho pholosa bophelo. (Ex. 14:​1-4; 2 Likron. 20:​17) Nahanisisa ka mehlala e jwalo. Ho nahanisisa ka yona ho tla o susumeletsa hore o batle ho latela tataiso ya mokgatlo wa Jehova hona jwale le nakong e tlang. (Baheb. 13:​17) Ka lebaka leo, o ke ke wa tshoha matshwenyeho a maholo a tlang.​—Liprov. 3:25.

12. Ho latela Luka 18:​1-8, ho ba le tumelo le ho mamella ho hloka toka ho amana jwang?

¹² Jesu o ne a tseba hore ho tshwarwa ka ho hloka toka ho ne ho tla leka tumelo ya barutuwa ba hae. E le ho ba thusa hore ba mamelle, o ile a ba etsetsa papiso e tlalehilweng lengolong la Luka. Jesu o ile a ba bolella ka mohlolohadi ya neng a dula a kopa moahlodi ya sa lokang hore a mo sebeletse ka toka. Mohlolohadi eo, o ne a kgodisehile hore haeba a dula a kopa o tla qetella a fumane thuso. Qetellong moahlodi o ile a thusa mohlolohadi eo. Re ithutang tabeng ee? Jehova o na le toka. Jesu o ile a re: “Jwale, na ka sebele Modimo a ke ke a etsa hore toka e etsetswe bakgethwa ba hae ba hweletsang ho yena bosiu le motshehare?” (Bala Luka 18:​1-8.) Jesu o ile a eketsa ka ho re: “Ha Mora motho a fihla, na ka sebele o tla fumana tumelo lefatsheng?” Ha re tshwarwa ka ho hloka toka, re ka bontsha hore re na le tumelo e matla jwalo ka ya mohlolohadi eo ka hore re mamelle re be re phehelle. Ha re ena le tumelo e jwalo, re ka kgodiseha hore Jehova o tla re thusa. Re boetse re lokela ho dumela hore thapelo e na le matla a maholo. Ka dinako tse ding dithapelo tsa rona di ka arabelwa ka ditsela tseo re neng re sa di lebella.

13. Thapelo e ile ya thusa lelapa le leng jwang ha le ne le tshwerwe ka ho hloka toka?

¹³ Nahana ka mohlala wa moradiwabo rona Vero ya dulang Democratic Republic of the Congo. Yena le monna wa hae eo e seng Paki le moradi wa bona ya dilemo di 15, ba ile ba tlameha ho baleha motseng oo ba neng ba dula ho wona ha o ne o hlaselwa ke sehlopha sa masole. Ha ba le tseleng ba ile ba kopana le masole a ileng a ba emisa yaba a ba tshosa ka hore a tla ba bolaya. Eitse ha moradiwabo rona Vero a qala ho lla, moradi wa hae o ile a leka ho mo kokobetsa ka ho rapella hodimo a phetapheta lebitso la Jehova thapelong eo. Ha a qeta ho rapela, molaodi wa masole ao o ile a mo botsa a re:  “Ngwanana, ke mang ya o rutileng ho rapela?” O ile a re: “Ke mme wa ka a sebedisa mohlala wa thapelo e ho Matheu 6:​9-13.” Molaodi eo o ile a re: “Ngwanana, tsamaya ka kgotso le batswadi ba hao mme e se eka Jehova Modimo wa hao a ka le sireletsa.”

14. Keng e ka nnang ya leka tumelo ya rona, hona re tla thuswa keng ho mamella?

¹⁴ Mehlala e kang ena, e re ruta hore le ka mohla re se ke ra lebala ka moo thapelo e leng bohlokwa ka teng. Empa ho thweng haeba dithapelo tsa hao ha di arajwe kapele kapa ka tsela e hlollang? Jwalo ka mohlolohadi ya papisong ya Jesu, tswela pele ho rapela o kgodisehile hore Modimo wa hao a ke ke a o tlohela ebile ka nako e loketseng o tla araba thapelo ya hao ka tsela e itseng. Tswela pele ho kopa Jehova hore a o fe moya wa hae o halalelang. (Bafil. 4:​13) Hopola hore haufinyane, Jehova o tla o hlohonolofatsa haholo hoo o tla lebala dintho tse bohloko tse o etsahaletseng nakong e fetileng. Ha o mamella diteko ka thuso ya Jehova, o tla matlafala mme o tla kgona ho mamella diteko nakong e tlang.​—1 Pet. 1:​6, 7.

15. Matheu 17:​19, 20 e re ke bothata bofe boo barutuwa ba Jesu ba neng ba ena le bona?

¹⁵ Jesu o ile a ruta barutuwa ba hae hore tumelo e tla ba thusa ho hlola mathata. (Bala Matheu 17:​19, 20.) Ka lekgetlo le leng, ba ile ba sitwa ho leleka modemona le hoja ka makgetlo a mang pele ho moo ba ile ba kgona ho leleka bademona. Bothata e ne e le bofe? Jesu o ile a re ba ne ba hloka ho ba le tumelo e eketsehileng. O ile a re haeba ba ne ba ena le tumelo e lekaneng ba ne ba tla kgona ho hlola mathata a maholo a kang dithaba. Le rona kajeno re ka nna ra ba le mathata ao ho bonahalang eka re ke ke ra a hlola.

16. Tumelo e ile ya thusa moradiwabo rona Geydi jwang ho mamella ka mora hore monna wa hae a bolawe?

¹⁶ Nahana ka mohlala wa moradiwabo rona Geydi wa Guatemala. Monna wa hae Edi o ile a bolawa ha ba ne ba le tseleng e yang hae ba tswa dibokeng. Tumelo ya moradiwabo rona Geydi e ile ya mo thusa jwang hore a mamelle ho sa tsotellehe bohloko boo a bo utlwileng? O re: “Thapelo e nthusa ho lahlela morwalo wa ka ho Jehova mme ke ba le kgotso. Ke bona ka moo Jehova a ntlhokomelang ka teng a sebedisa ba lelapa le metswalle ya ka e ka phuthehong. Ho phathahana ka ho sebeletsa Jehova, ho nkokobetsa bohloko hape ho nthusa hore ke tswele pele letsatsi le leng le le leng ke sa tshwenyehe haholo ka letsatsi le hlahlamang. Ka mora ho hlahelwa ke bothata bona, ke ithutile hore ho sa tsotellehe hore na ke teko ya mofuta ofe e ka ntlhahelang nakong e tlang, ke tla kgona ho e mamella ka thuso ya Jehova, Jesu le mokgatlo wa Jehova.”

17. Re ka etsang ha re eba le mathata a maholo a kang dithaba?

¹⁷ Na o ntse o utlwile bohloko ka lebaka la ho hlokahallwa ke motho eo o mo ratang? Nka nako o matlafatsa tumelo ya hao tshepong ya tsoho ka hore o bale ditlaleho tsa Bibele tsa batho ba ileng ba tsoswa bafung. Na o utlwisitswe bohloko ke ho kgaolwa ha setho sa lelapa? Ithute  e le hore o ikgodise hore ka mehla tsela eo Modimo a re kgalemelang ka yona e nepahetse. Ho sa tsotellehe hore na o na le bothata bofe, bo nke e le monyetla wa ho matlafatsa tumelo ya hao. Bolella Jehova hore na o ikutlwa jwang. Dula o le haufi le bara le baradibabo rona, o se ke wa ikarola ho bona. (Liprov. 18:1) Etsa dintho tse tla o thusa hore o mamelle esita le haeba ka dinako tse ding o lla ha o hopola hore na o etsahalletswe keng. (Pes. 126:​5, 6) Tswela pele ho ya dibokeng, tshimong le ho bala Bibele. Hape tswela pele o nahana ka dintho tse molemo tseo Jehova a o tshepisitseng ho o etsetsa tsona nakong e tlang. Ha o bona ka moo Jehova a o thusang ka teng hona jwale, tumelo ya hao ho yena e tla ba matla le ho feta.

18. O ka etsang ha o hlokomela hore tumelo ya hao e a fokola?

¹⁸ Haeba diteko tse o hlahetseng nakong e fetileng kapa tse o hlahelang hona jwale di bontsha hore tumelo ya hao e a fokola, o se ke wa nyahama. Nka boemo boo e le monyetla wa ho matlafatsa tumelo ya hao. Etsa kopo e tshwanang le eo baapostola ba Jesu ba ileng ba e etsa ha ba ne ba re: “Re fe tumelo e eketsehileng.” (Luka 17:5) Hape nahana ka mehlala eo re buileng ka yona sehloohong sena. Jwalo ka morabo rona Miguel le mosadi wa hae Yurai, hopola dinako tsohle tseo Jehova a ileng a o thusa ka tsona. Jwalo ka moradi wa moradiwabo rona Vero le moradiwabo rona Anel, rapela Jehova ka matla, haholoholo ha o tobane le bothata bo boholo. Jwalo ka moradiwabo rona Geydi, ela hloko hore Jehova a ka fana ka thuso eo o e hlokang a sebedisa lelapa le metswalle. Ha o dumella Jehova hore a o thuse ho mamella diteko tseo o kopanang le tsona hona jwale, o tla kgodiseha le ho feta hore o tla o thusa ho mamella diteko tseo o ka nnang wa ba le tsona nakong e tlang.

19. Jesu o ne a kgodisehile kang mme le wena o ka kgodiseha kang?

¹⁹ Jesu o ile a thusa barutuwa ba hae ho bona hore na ke hokae moo ba hlokang tumelo e eketsehileng empa ha a ka a belaella taba ya hore ba tla kgona ho mamella diteko nakong e tlang ka thuso ya Jehova. (Joh. 14:1; 16:​33) O ne a kgodisehile hore ho tla ba le bongata bo boholo bo tla pholoha matshwenyeho a maholo hobane bo ena le tumelo e matla. (Tšen. 7:​9, 14) Na o tla ba e mong wa bona? Ka thuso ya Jehova o tla ba e mong wa bona haeba o etsa sohle seo o ka se kgonang hona jwale ho matlafatsa tumelo ya hao.​—Baheb. 10:39.