1. Moapostola Pauluse o ne a ikutlwa jwang ka bahlanka ba sebeletsang?

 BAHLANKA ba sebeletsang ba etsa mosebetsi wa bohlokwa diphuthehong. Moapostola Pauluse o ne a nka banna bana ba tshepahalang e le ba bohlokwa. Ka mohlala, ha a ne a ngolla Bakreste ba Filipi, ka ho kgetheha o ile a dumedisa bahlanka ba sebeletsang ha mmoho le baholo.—Bafil. 1:1.

2. Morabo rona Luis o ikutlwa jwang ka ho ba mohlanka ya sebeletsang?

² Bara ba bo rona ba bangata ba kolobeditsweng, ho sa tsotellehe hore na ba batjha kapa ba hodile, ba thabela ho ba bahlanka ba sebeletsang. Ka mohlala, Morabo rona Devan o ne a le dilemo di 18 ha a ne a kgethwa hore e be mohlanka ya sebeletsang. Morabo rona Luis yena o ne a le ka hodimo ho dilemo tse 50 ha a ne a kgethwa hore e be mohlanka ya sebeletsang. O ikutlwa jwang ka ho ba mohlanka ya sebeletsang? O re: “Ke ananela mosebetsi oo ke o etsang haholo jwalo ka mohlanka ya sebeletsang, haholoholo ha ke nahana ka tsela eo phutheho e bontshitseng ka yona hore e a nthata.” Bahlanka ba sebeletsang ba bangata le bona ba ikutlwa ka tsela ena.

3. Re tlo araba dipotso dife sehloohong see?

³ Haeba o morabo rona ya kolobeditsweng mme ha o eso be mohlanka ya sebeletsang, ikemisetse ho ba yena. Ke eng e ka o thusang hore o ikemisetse ho ba mohlanka ya sebeletsang? Hape ke ditshwaneleho dife tse hlahang ka Bibeleng tseo o lokelang ho ba le tsona? Sehloohong sena, re tlo araba dipotso tsena. Empa pele a re bueng ka hore na mosebetsi wa mohlanka ya sebeletsang ke ofe.

MESEBETSI YA BAHLANKA BA SEBELETSANG KE EFE?

4. Mesebetsi ya bahlanka ba sebeletsang ke efe? (Sheba setshwantsho.)

⁴ Mohlanka ya sebeletsang ke morabo rona ya kolobeditsweng  ya kgethilweng ke moya o halalelang, e le hore a thuse baholo ho etsa mesebetsi e mengata ya bohlokwa ka phuthehong. Bahlanka ba sebeletsang ba bang ba etsa bonnete ba hore bahweletsi ba na le tshimo e lekaneng eo ba e sebetsang le dingolwa tse lekaneng bakeng sa tshimo. Ba bang ba thusa ka ho hlwekisa Holo ya Mmuso le ho e hlokomela. Bahlanka ba sebeletsang e boetse eba bahlokomedi ebile ba thusa ka ho bapala dipina le divideo nakong ya diboka. Mosebetsi o mongata oo ba o etsang ke wa bohlokwa. Le ha ho le jwalo, ntho ya bohlokwa ka ho fetisisa ke hore bahlanka ba sebeletsang ke banna ba ratang Jehova ebile ba phela ka tsela e mo thabisang. Ba boetse ba rata Bakrestemmoho le bona haholo. (Mat. 22:​37-39) Morabo rona ya kolobeditsweng a ka etsa boiteko ba ho ba mohlanka ya sebeletsang jwang?

5. Morabo rona a ka etsang hore a tshwanelehe ho ba mohlanka ya sebeletsang?

⁵ Bibele e bua ka ditshwaneleho tse hlokahalang pele morabo rona a ka kgethwa hore e be mohlanka ya sebeletsang. (1 Tim. 3:​8-10, 12, 13) O ka etsa boiteko ba ho fumana tokelo ena ka hore o ithute ka ditshwaneleho tseo o be o sebetse ka thata hore o be le tsona. Empa pele ho moo, o lokela ho ipotsa hore na ha e le hantle sepheo sa hao ke sefe sa ho etsa boiteko ba ho ba mohlanka ya sebeletsang.

KE ENG E O SUSUMELETSANG HORE O ETSE BOITEKO BA HO BA MOHLANKA YA SEBELETSANG?

6. Ke eng e lokelang ho o susumeletsa ho etsetsa Bakrestemmoho le wena mosebetsi le ha e le ofe? (Matheu 20:28; sheba setshwantsho.)

⁶ Nahana ka mohlala wa rona o ka sehloohong, e leng Jesu Kreste. Ntho e nngwe le e nngwe eo a neng a e etsa, o ne a e etsa hobane a ne a rata Ntate wa hae le batho. Lerato leo le ile la mo susumeletsa hore a sebeletse ba bang ka thata a be a ba etsetse mesebetsi e neng e kgellwa fatshe. (Bala Matheu 20:28; Joh. 13:​5, 14, 15) Haeba le wena o etsa dintho hobane o susumetswa ke lerato, Jehova o tla o hlohonolofatsa a be a o thuse hore o tshwanelehe ho ba mohlanka ya sebeletsang.—1 Bakor. 16:14; 1 Pet. 5:5.

7. Ke hobaneng ha morabo rona a sa lokela ho batla ho ba mohlanka ya sebeletsang hobane a batla ho ikutlwa a le bohlokwa?

⁷ Lefatsheng, batho ba inkelang hodimo ke bona ba nkwang e le ba bohlokwa. Empa eseng ka mokgatlong wa Jehova. Morabo rona ya susumetswang ke lerato jwalo ka Jesu, ha a batle  ho laola batho ba bang, kapa ho etsa hore ba bang ba mo nke eka ke wa bohlokwa. Haeba morabo rona ya jwalo a ne a ka kgethwa, o ne a ka nna a hana ho etsa mesebetsi e kgellwang fatshe empa e hlokahala bakeng sa ho hlokomela dinku tsa Jehova tsa bohlokwa. A ka nka mesebetsi e jwalo e le tlase ebile e sa mo tshwanele. (Joh. 10:12) Jehova a ke ke a hlohonolofatsa boiteko ba motho le ha e le ofe ya susumetswang ke ho ikgohomosa kapa ho ikutlwa a le bohlokwa.—1 Bakor. 10:​24, 33; 13:​4, 5.

8. Jesu o ile a fa baapostola ba hae keletso efe?

⁸ Ka dinako tse ding, le metswalle ya Jesu e haufi e ile ya batla ditokelo ka sepheo se sebe. Nahana ka seo moapostola Jakobo le Johanne ba ileng ba se etsa. Ba ile ba kopa Jesu hore a ba fe boemo bo phahameng Mmusong wa hae. Jesu ha a ka a ba babatsa hobane ba ne ba batla ho inka e le ba bohlokwa ho feta ba bang. Ho ena le hoo, o ile a re ho baapostola bohle ba 12: “Ya batlang ho ba moholo hara lona e lokela ho ba mosebeletsi wa lona. Ya batlang ho ba wa pele hara lona e lokela ho ba mohlanka wa bohle.” (Mar. 10:​35-37, 43, 44) Bara ba bo rona ba nang le sepheo se setle sa ho batla ho ba bahlanka ba sebeletsang, e leng ho sebeletsa ba bang e tla ba tlhohonolofatso e kgolo diphuthehong tsa habo bona.—1 Bathes. 2:8.

KE ENG E KA O THUSANG HO ETSA BOITEKO BA HO BA MOHLANKA YA SEBELETSANG?

9. Ke eng e ka o thusang ho etsa boiteko ba ho ba mohlanka ya sebeletsang?

⁹ Ho hlakile hore o rata Jehova ebile o batla ho sebeletsa ba bang. Le ha ho le jwalo, ho ka etsahala hore ha o rate ho etsa mesebetsi eo bahlanka ba sebeletsang ba lokelang ho e etsa. Ke eng e ka o thusang hore o batle ho etsa mosebetsi oo? Nahana ka hore na ho sebeletsa Bakrestemmoho le wena ho tla o thabisa hakae. Jesu o ile a re: “Ho fana ho thabisa haholo ho feta ho fuwa.” (Dik. 20:35) Jesu o ile a phelela mantswe a hae. O ile a thaba e le ka nnete ka lebaka la ho sebeletsa ba bang mme le wena o ka thaba.

10. Jesu o ile a bontsha jwang hore o ne a thabela ho sebeletsa ba bang? (Mareka 6:​31-34)

¹⁰ Nahana ka mohlala o bontshang hore Jesu o ne a thabela ho sebeletsa ba bang. (Bala Mareka 6:​31-34.) Ka le leng, Jesu le baapostola ba hae ba ne ba kgathetse. Ba ne ba le tseleng e yang sebakeng se ka thoko moo ba tla phomola. Empa batho ba bangata ba ile ba ba fihlela pele moo ba yang hobane ba ne ba batla ho rutwa ke Jesu. Jesu a ka be a ile a hana hobane yena le barutuwa ba hae “ba ne ba se na nako ya ho phomola esita le ya ho ja.” Mohlomong Jesu a ka be a ile a ba ruta ntho e le nngwe kapa tse pedi, ebe ka mora moo o re ba tsamaye. Empa ka ha o ne a susumetswa ke lerato, o ile “a qala ho ba ruta dintho tse ngata.” O ile a tswela pele ho ba ruta ho fihlela “e se e le mantsiboya.” (Mar. 6:35) Ha a ka a etsa jwalo hobane a ne a tlamehile empa hobane o ne “a ba hauhela.” O ne a batla ho ba ruta hobane a ba rata. Jesu o ne a thabiswa haholo ke ho sebeletsa ba bang.

11. Jesu o ile a thusa batho jwang ka dintho tseo ba di hlokang? (Sheba setshwantsho.)

¹¹ Ha Jesu a ntse a thusa batho ba bangata ka hore a ba rute ka Modimo, o ile a boela a ba thusa ka dintho tseo ba di hlokang. Ka mohlolo o ile a etsa hore ho be le dijo yaba o re barutuwa ba hae ba di abele batho. (Mar. 6:41) Ka ho etsa jwalo, o ile a ruta barutuwa ba hae ho sebeletsa ba bang. O ile a boela a ba bontsha hore mesebetsi e kang ena eo hangata e etswang ke bahlanka ba sebeletsang, le yona e bohlokwa. Nahana feela hore na baapostola ba ile ba thaba hakae ha ba sebetsa le Jesu ho aba dijo tsena tseo Jesu a neng a di entse ka mohlolo ho fihlela “bohle ba ja ba kgora.” (Mar. 6:42) Re a tseba hore lena e ne e se lekgetlo la pele Jesu a etsa hore ditlhoko tsa batho ba bang di tle pele  ho tsa hae. O ile a sebeletsa batho bophelo bohle ba hae ha a le lefatsheng. (Mat. 4:23; 8:16) Jesu o ne a thaba a bile a kgotsofala ka lebaka la ho ruta batho le ho ba thusa ka dintho tseo ba di hlokang. Le wena o tla thaba haholo ka lebaka la ho itella ba bang ka hore o be mohlanka ya sebeletsang.

12. Ke hobaneng ha ho se na motho ya lokelang ho ikutlwa eka ha a na molemo ka phuthehong?

¹² Haeba o utlwa eka ha o na bokgoni bo itseng bo ikgethang, o se ke wa nyahama. E tlameha ebe o na le makgabane a matle a ka tswelang phutheho molemo. Nahana ka mantswe a Pauluse a hlahang ho 1 Bakorinthe 12:​12-30 ebe o kopa Jehova hore a o thuse. Mantswe a Pauluse a bontsha ka ho hlaka hore le wena jwalo ka mohlanka e mong le e mong wa Jehova, phutheho e a o hloka ebile o motho wa bohlokwa. Haeba hona jwale ha o eso ka o tshwaneleha ho ba mohlanka ya sebeletsang, o se ke wa nyahama. Ho ena le hoo, etsa sohle seo o ka se kgonang ho sebeletsa Jehova le Bakrestemmoho le wena. Kgodiseha hore baholo ba tla nahana ka bokgoni ba hao mme ba o fe mosebetsi oo o tla kgona ho o etsa.—Bar. 12:​4-8.

13. O lokela ho nahana ka eng?

¹³ Nahana ka sena: Boholo ba makgabane ao Bibele e buang ka ona hore a a hlokahala bakeng sa bahlanka ba sebeletsang, ke makgabane ao Bakreste bohle ba lokelang ho ba le ona. Bakreste bohle e lokela ho ba metswalle ya Jehova, ba thabele ho fa ba bang le hore ba phele ka tsela e thabisang Modimo. Taba ena e bolela hore e ka nna yaba o se o ntse o ena le makgabane a mang a hlokahalang hore o be mohlanka ya sebeletsang. Empa ke eng ka ho kgetheha eo morabo rona a lokelang ho e etsa e le hore a tshwanelehe ho ba mohlanka ya sebeletsang?

O KA ETSA BOITEKO BA HO BA MOHLANKA YA SEBELETSANG JWANG?

14. Ho bolelang ho ‘ba motho ya hodileng kelellong’? (1 Timothea 3:​8-10, 12)

¹⁴ A re hlahlobeng tse ding tsa ditshwaneleho tse hlahang ho 1 Timothea 3:​8-10, 12. (E bale.) Mohlanka ya sebeletsang e lokela ho ‘ba motho ya hodileng kelellong.’ Polelwana ena e ka boela ya fetolelwa e le “ya sa tlalwang ke papadi,” “ya nang le boikarabelo” kapa “ya itshwarang ka tsela e etsang hore batho ba mo hlomphe.” Sena ha se bolele hore ha ho mohla o tla tsheha kapa o swaswe le ba bang. (Moek. 3:​1, 4) Empa se bolela hore o lokela ho nka boikarabelo bohle boo o bo filweng ka botebo. Haeba o ena le botumo ba ho phetha mosebetsi oo o o filweng hantle, phutheho e tla o hlompha e be e o tshepe.

15. Ho bolela eng ho ‘se be moikaketsi’ le ho ‘se be meharo ya ho fumana leruo ka bolotsana’?

 ¹⁵ Ho ‘se be moikaketsi’ ho bolela hore o rata nnete ebile o a tshepahala. O etsa dintho tseo o itseng o tla di etsa, ebile ha o thetse batho ba bang. (Diprov. 3:32) Ho ‘se be meharo ya ho fumana leruo ka bolotsana’ ho bolela hore o a tshepahala ha o sebedisana le batho ditabeng tsa kgwebo le tsela eo o sebedisang tjhelete ka yona. O ke ke wa nka monyetla ka Bakrestemmoho le wena ka hore o ba sebedise hore o be le tjhelete ngata.

16. (a) Ho bolela eng ho ‘se nwe veine haholo’? (b) Ho bolela eng ho ba le “letswalo le kgutsitseng”?

¹⁶ Ho ‘se nwe veine haholo’ ho bolela ho se nwe jwala haholo le ho se tsebahale o le motho ya nwang jwala haholo. Ho ba le “letswalo le kgutsitseng” ho bolela hore o phela tumellanong le melao ya Jehova. Le hoja o sa phethahala, o thabela ho ba motswalle wa Modimo mme seo se etsa hore o be le kgotso.

17. Morabo rona a ka bontsha jwang hore a ka tsheptjwa ha a ntse a ‘hlahlojwa pele hore ho bonwe hore na o a tshwaneleha’? (1 Timothea 3:10; sheba setshwantsho.)

¹⁷ Ho ‘hlahlojwa pele hore ho bonwe hore na o a tshwaneleha’ ho bolela hore baholo ba bone hore o phetha boikarabelo ba hao hantle mme ba ka o tshepa. Ka hoo, ha baholo ba o fa mosebetsi, latela ka hloko ditaelo tseo ba o fang tsona le tataiso eo ba o fang yona ho tswa mokgatlong. Etsa bonnete ba hore o a utlwisisa hore na o lokela ho etsa eng le hore na o lokela ho qeta mosebetsi oo neng. Ha o ntse o etsa mosebetsi wa hao hantle le ka mafolofolo, phutheho e tla hlokomela le ho ananela kgatelopele ya hao. Baholo, etsang bonnete ba hore le kwetlisa bara ba bo rona ba kolobeditsweng. (Bala 1 Timothea 3:10.) Na ho na le bara ba bo rona ba kolobeditsweng phuthehong ya habo lona ba dilemong tsa botjha kapa ka tlase ho moo? Na ba ithuta Bibele ka mehla le ho lokisetsa diboka hantle? Na ba arabela ka mehla dibokeng le ho ya tshimong? Haeba ho jwalo, ba feng mesebetsi e ba tshwanelang ho latela dilemo tsa bona le maemo a bona. Ha le etsa jwalo, le tla be le ba ‘hlahloba pele hore ho bonwe hore na ba a tshwaneleha.’ E tla re ha ba le haufi le ho ba dilemo tse 20, ba ka nna ba tshwaneleha ho ba bahlanka ba sebeletsang.

18. Ho ‘se be le letho leo o qoswang ka lona’ ho bolela eng?

¹⁸ Ho ‘se be le letho leo o qoswang ka lona’ ho bolela hore ha ho na motho ya ka o qosang a bile a ena le bopaki ba hore o entse phoso e tebileng. Ke nnete hore ka dinako tse ding, Bakreste ba ka nna ba qoswa ka ntho eo ba sa e etsang. Jesu le  yena o ile a nna a qoswa ka dintho tseo a sa di etsang a ba a bolela hore balatedi ba hae le bona ba tla etsahallwa ke se tshwanang. (Joh. 15:20) Le ha ho le jwalo, haeba o tswela pele o itshwere hantle jwalo ka Jesu, o tla ba le botumo bo botle ka phuthehong.—Mat. 11:19.

19. Bibele e bolela eng ha e re monna ya nyetseng “a be le mosadi a le mong”?

¹⁹ “A be le mosadi a le mong.” Haeba o monna ya nyetseng, o lokela ho ba le mosadi a le mong, e leng yona tokisetso eo Jehova a e entseng ho tloha tshimolohong. (Mat. 19:​3-9) Monna wa Mokreste, ha a lokela ho etsa boitshwaro bo bobe bo amanang le thobalano. (Baheb. 13:4) Ha ho felle moo, o lokela ho tshepahalla mosadi wa hao mme o se ke wa bontsha maikutlo a lerato ho mosadi le ha e le ofe e mong.—Jobo 31:1.

20. Ke jwang morabo rona a ka laolang lelapa la hae “hantle”?

²⁰ “A laole lelapa la hae hantle, haholoholo bana ba hae.” Haeba o hlooho ya lelapa, o lokela ho nka boikarabelo ba hao ka ho teba. Tshwara borapedi ba lelapa ka mehla. E ya tshimong le setho ka seng sa lelapa la hao hangata ka moo o ka kgonang. Thusa bana ba hao hore e be metswalle ya Jehova. (Baef. 6:4) Ha monna a kgona ho hlokomela ba lelapa la hae, seo se bontsha hore a ka kgona ho hlokomela le phutheho.—Bapisa le 1 Timothea 3:5.

21. O ka etsa eng haeba ha o eso be mohlanka ya sebeletsang?

²¹ Morabo rona, haeba ha o eso be mohlanka ya sebeletsang, bala sehlooho sena ka hloko mme o rapele Jehova ka taba ena. Ithute ka ditshwaneleho tsa bahlanka ba sebeletsang mme o sebetse ka thata hore o be le tsona. Nahana ka moo o ratang Jehova le Bakrestemmoho le wena ka teng. Matlafatsa lerato leo o ba ratang ka lona mme o nahane hore na ke hobaneng ha o batla ho ba sebeletsa. (1 Pet. 4:​8, 10) O tla latswa thabo e tliswang ke ho sebeletsa Bakrestemmoho le wena. E se eka Jehova a ka hlohonolofatsa boiteko boo o bo etsang ba ho batla ho ba mohlanka ya sebeletsang.—Bafil. 2:13.