KA 1934 ha ke hlaha, Ntate wa ka Fred le Mme wa ka Edna, ba ne ba se ba na le dilemo tse 20 e le Baithuti ba Bibele (Dipaki Tsa Jehova). Ba nrutile Bibele ho tloha boseeng mme ba nthusa hore ke rate Modimo. Re ne re dula Parsons, e leng torotswana e ka borwabotjhabela ba Kansas mme boholo ba ditho tsa phutheho eo re neng re kopanela ho yona, e ne e le batlotsuwa. Re ne re thabela ho ya dibokeng le ho ya tshimong. Moqebelo mantsiboya, re ne re etsa street work e leng seo hona jwale re se bitsang ho bolela molaetsa wa Bibele ka ditorole. Ka dinako tse ding re ne re kgutla re sa ipatle ke mokgathala, ebe Papa o re phumula dikeledi ka ho re rekela aesekrimi.

Phutheho ya rona e ne e le nyane empa e ne e na le tshimo e kgolo e neng e akarelletsa mapolasi le ditorotswana tse mabapi. Ho e na le hore batho ba re fe tjhelete ha re ba fa dingolwa, hangata borapolasi ba bangata ba ne ba re fa meroho, mahe a foreshe (ke hore a tswang hantle ka serobeng) esita le dikgoho. Ka ha Papa o ne a se a ntshitse monehelo wa dingolwa, re ne re thiba tlala ka dijo tsena tseo re di fuwang.

Batswadi ba ka ba ne ba na le keramafono eo ba neng ba e sebedisa ha ba le tshimong. Le hoja ke ne ke le monyenyane hore nka e sebedisa, ke ne ke thabela ho thusa Papa le Mama ha ba ntse ba bapala dipuo tsa Morabo rona Rutherford maetong a bona a ho boela le ho batho bao ba ithutang Bibele le bona.

Papa o ile a kenya sepikara se seholo ka hodimo koloing ya lapeng ya moetso wa Ford ya 1936 mme yaba e se e bitswa koloi e bolelang ditaba tse molemo. E ne e re thusa haholo mosebetsing wa ho bolela ka Mmuso. Hangata re ne re bapala lehlaso la mmino e le ho hapa thahasello ya batho, ebe he ha morao re bapala puo ya Bibele. E ne e re ha puo e fela, ebe re fa batho ba thabelang dingolwa tsa rona.

 Torotswaneng e nngwe ya Cherryvale e Kansas, Papa o ile a emisa koloi phakeng, moo batho ba bangata ba neng ba roba monakedi teng ka Disontaha. Yaba maponesa a re ha a dumellwa hore a emise koloi moo empa a ka nna a e emisa ka ntle ho phaka. Papa ha a a ka a etsa seteraeke empa o ile a e emisa seterateng se shebaneng le phaka moo batho ba neng ba ka nolofallwa ke ho utlwa molaetsa. Yaba o tswela pele ho bapala lenaneo. Ho ne ho ba monate ho ba le Papa le Abuti wa ka Jerry diketsahalong tse jwalo.

Ho elella mafelong a bo 1930, re ile ra etsa matsholo a ho bolela molaetsa wa Bibele masimong ao mosebetsi wa rona o neng o hanyetswa ho ona, e le hore re a kwahele ka pele. Jwalo ka ha ke se ke tjholo qalong, re ne re lokela ho tsoha hoseng ka matjeke ebe ka lenyele re kenya dipampitshana kapa dibukana tlasa mamati a beng ba matlo. Ka mora moo, re ne re emella thoko ho motse e le hore re bone hore na ha ho na ba tshwerweng ke maponesa na.

Ntho e nngwe e neng e thabisa haholo mehleng eo ka tshebeletso, ke ha re ne re etsa mekoloko ya ho bolela molaetsa wa Bibele. O ne o tla fumana re haka dipolakate tse ngotsweng molaetsa wa Mmuso wa Modimo, ebe re etsa laene ho potoloha toropo. Ke sa hopola ka tsatsi le leng tjena bara le baradibabo rona ba tla ba entse mokoloko sebakeng sa rona, ba hakile dipolakate tse neng di re “Bodumedi ke Leraba le Kgwebo ya Bomenemene.” Ba ile ba tsamaya dikhilomitara tse ka bang 1.6 ka hara toropo mme ba kgutlela moo re neng re le teng. Ho thabisang ke hore ha ba a ka ba kopana le mathata empa ba ile ba kgutla ba hapile ba bangata.

Hangata re ne re tshwarela dikopano tsa rona Texas. Papa o ne a sebetsa khampaneng ya diterene ya Missouri-Kansas-Texas. Ka hoo, re ne re sebedisa monyetla ona ho palama terene mahala ha re ya dikopanong le ha re ilo bona beng ka rona. Malome wa ka e leng Fred Wismar le mosadi wa hae Eulalie, ba ne ba dula Temple hona Texas. Malome Fred o ile a ithuta nnete ya Bibele ha e sa le motjha maqalong a bo 1900 mme a kolobetswa. Yaba o ruta le bana babo ho akarelletsa le Mama. O ne a tumme haholo karolong e bohareng ya Texas, e leng moo a neng a kile a sebeletsa e le mohlanka wa dibaka kapa molebedi wa potoloho jwalo ka ha hona jwale ba se ba bitswa jwalo. E ne e le motho wa batho, a le mosa ebile re thabela ho ba le yena. O ne a sa batle letho ka nnete eo a ithutileng yona mme a mpehela mohlala ka ha ke ne ke sa le monyenyane.

Ka 1941 re ile ra tsamaya ka terene ho ya kopanong e kgolo kwana St. Louis, Missouri. Ho ile ha thwe bana ba dule haufi le sethala e le hore ba kgone ho mamela puo ya Morabo rona Rutherford e neng e re “Bana ba Morena.” Qetellong ya puo, Morabo rona Rutherford le bathusi ba hae ba ile ba fa bana bohle buka e ntjha e nang le sehlooho se reng Children. Bana ba fetang 15 000 ba neng ba mametse puo, ba ile ba hlollwa haholo ha ba fuwa mpho ena e babatsehang.

Ka April 1943, re ile ra thabela kopano e nyenyane kwana Coffeyville, Kansas e neng e na le sehlooho se ipiletsang se reng “Kgweletso ya ho Nka Kgato.” Ha re ntse re le kopanong, re ile ra utlwa tsebiso e reng seboka se setjha sa Sekolo sa Tshebeletso sa  Puso ya Modimo se tla thakgoha diphuthehong. Yaba re fuwa le bukana e nang le dithuto tse 52 e neng e tla sebediswa sebokeng seo. Ho elella mafelong a selemo seo, ke ile ka fana ka puo ya ka ya pele. Ena ke kopano eo nke keng ka e lebala le ka mohla. Hobane ke hona mona moo ke ileng ka kolobetswa polasing e haufinyane le moo kopano e neng e le hona teng letamong la metsi a batang.

Ke qetile high school ka 1951 mme jwale ke ne ke tlameha ho kgetha hore na ke tla etsang ka bophelo ba ka. Takatso ya ka e ne e le ho ya sebeletsa Bethele, e leng moo Abuti wa ka Jerry a kileng a sebeletsa teng. Yaba foromo ya ka e iswa ofising e Brooklyn. Kgetho ena eo ke ileng ka e etsa, e ile ya ntswela molemo haholo tumelong. Ka mora nako e sa fediseng pelo, ke ile ka amohelwa mme ka qala ho sebeletsa Bethele ho tloha ka la 10 March 1952.

Ke ne ke tswepile mahlo ke lebelletse hore ke tla iswa printareng, e le hore ke kgathe tema mosebetsing wa ho etsa dimakasine le dingolwa. Le ha ho le jwalo, ke ile ka abelwa ho ilo sebeletsa ke le motho ya fanang ka dijo tafoleng. Yaba ha morao ke ilo sebetsa kitjhineng, e leng moo ke ileng ka ithuta dintho tse ngata. Ka hoo, le ka mohla ha ke so fuwe monyetla wa ho sebeletsa printareng. Ka ha re ne re sebetsa ka ditjhifi, ke ne ke ba le nako e ngata ya ho ithuta ke le mong. Hangata ke ne ke ithutela ka laeboraring ya Bethele e nang le dibuka tse ngata. Sena se ile sa tiisa kamano ya ka le Modimo sa ba sa matlafatsa le tumelo ya ka. Se ile sa ba sa nthusa hore ke ikemisetse le ho feta ho sebeletsa Jehova mona Bethele ha feela ho sa na le monyetla. Abuti Jerry o ile a tswa Bethele ha a nyalana le Patricia ka 1949, empa bonyane ba ne ba dula haufi le Brooklyn. Ba ne ba dula ba nthusa le ho nkgothatsa ha ke sa fihla Bethele.

Nakwana ka mora hore ke fihle Bethele, barababo rona ba etellang pele, ba ne ba batla barababo rona bao e tla ba dibui tse tswang Bethele. Bara bana babo rona ba ne ba abelwa diphutheho tse itseng dikhilomitara tse 320 ka ntle ho Brooklyn. Ba ne ba lokela ho fana ka dipuo tsa phatlalatsa ba be ba sebetse tshimo le phutheho eo ba e abetsweng. Le nna ke ile ka kgethwa. Kgetlo la pele ha ke ne ke qala ho fana ka puo ya phatlalatsa, e neng e nka hora kaofela ka nako eo, ke ne ke sa ipatle ke letswalo. Hangata ke ne ke etela diphutheho ka terene. Nke ke ka lebala mohla monene, e le ka Sontaha dihoreng tsa mantsiboya mariheng a 1954. Ke ile ka kena tereneng e yang New York. Ke ne ke lokela ho fihla Bethele ha shwalane e theha. Empa ha ke le tseleng, sefefo se ile sa ruthutha se tla ka moya o bohale le lehlwa. Yaba enjene ya terene e sebetsang ka motlakase e emisa ho sebetsa. E leng se ileng sa etsa hore ke kokomale moo ho fihlela ke fihla New York City tsatsi le hlahlamang hoo e kabang ka 5 hoseng ha Mantaha. Ke ile ka totoba ka tsela ya maoto e fetang ka tlasa seporo ke lebile Brooklyn. Yaba ke fetela mosebetsing wa ka kitjhineng hanghang, le hoja ke ne ke qetile bosui kaofela ke sa phomola ke bile ke shwele ke mokgathala. Empa thabo eo ke neng ke ye ke be le yona ha ke etetse bara le baradibabo rona diphuthehong, e ne e feta maswabinyana ao ke neng ke ba ba le ona ha ke le tseleng.

Ke ile ka boela ka memelwa ho kenya letsoho kgasong ya radio seteisheneng sa WBBR. Re ne re sebeletsa mokatong wa bobedi moahong wa 124 Columbia Heights. Kabelo ya ka e ne e le ho ba e mong wa ba neng ba kgethilwe hore ba etse kgaso ya lenaneo la thuto ya Bibele la beke le beke. Morabo rona A. H. Macmillan ya neng a se a sebeleditse Bethele ka dilemo tse ngata, o ne a sebediswa hangata mananeong ana a radio. Re ne re tlwaetse ho mo bitsa Morabo rona Mac. Ntho e nngwe e ikgethang ka yena ke hore o ile a dula a tshepahala ho sa tsotellehe mathata. Ke ka hoo re neng re shebile ho yena haholo e le mohlala wa rona ba batjha mona Bethele.

Ka 1958, ke ile ka fuwa mosebetsi wa ho sebetsa haufiufi le bara le baradibabo rona ba tlang Sekolong sa Gileade. Mosebetsi wa ka e ne e le ho ba thusa hore ba fumane divisa le ho hlophisa maeto a bona ha ba ya dinaheng tseo ba di abetsweng. Ho ne ho tura ho tsamaya ka sefofane dilemong tseo. Ka hoo, e ne e ba ba mmalwa feela ba neng ba tsamaya ka difofane. Ba bangata ba neng ba ya Africa le Asia, ba ne ba itsamaela ka dikepe tse palamisang thepa. Eitse dilemonyana ha morao ha ditefello tsa  difofane di ya tlase, baromuwa ba bangata ba tsamaiswa ka tsona ho ya dikabelong tsa bona.

Mosebetsi wa ka o ile wa atoloha ka 1960 ha ke lokela ho hlophisa difofane tse tlohang United States ho ya Europe bakeng sa dikopano tsa matjhaba tsa 1961. Ke ile ka ya ho e nngwe ya dikopano tseo e neng e le kwana Hamburg, Germany. Ka mora kopano, nna le bara ba bang babo rona ba bararo, re ile ra hira koloi mme ra ya Italy, ra ba ra etela le ofisi ya lekala e Roma. Ho tloha moo yaba re ya France, ra feta Dithaba tsa Pyrenees mme ra kena Spain, moo mosebetsi wa rona o neng o thibetsweng teng. Re ile ra kgona le ho fa barababo rona ba Barcelona dingolwa tse ding tseo re neng re di phuthetse hore di tle di bonahale eka ke dimpho. Hlathe e ile ya lelekisa tsebe ha re kopana le bona. Yaba ho tloha moo re fetela Amsterdam, e leng moo re ileng ra palama sefofane ho kgutlela New York.

Selemo ha morao, ke ile ka ekeletswa boikarabelo Bethele, ka hore ke hlophisetse barababo rona ba kgethilweng ho ya dikopanong tsa matjhaba tse kgethehileng lefatsheng ho pota. E ne e le kopano ya 1963 e neng e na le sehlooho se reng “Ditaba tse Molemo tsa ka ho sa Feleng.” Ho ile ha etswa ditlhophiso tsa hore bara le baradibabo rona ba 583 ba ye dikopanong Europe, Asia, South Pacific, Honolulu, Hawaii, ebe ba qetella ka Pasadena, California. Ba ile ba ba ba etela Lebanon le Jordan bakeng sa maeto a kgethehileng a ho ithuta ka dinaha tseo ho buuwang ka tsona ka Bibeleng. Ho phaella tabeng ya ho hlophisa dihotele, lefapha la rona mona Bethele le ne le bile le ba hlophisetsa le divisa tsa ho etela dinaheng tseo.

Selemo se seng seo nke keng ka se lebala le ka mohla, ke sa 1963. Ka la 29 June, ke ile ka nyalana le Lila Rogers wa Missouri, ya qadileng ho sebeletsa Bethele ka 1960. Ka mora letjhato, re ile ra etela Greece, Egypt le Lebanon. Ho tloha moo ra ya Jordan. Re ne re ipotsa hore na ho tla etsahalang ha re fihla moo, etswe mosebetsi wa rona o ne o thibetswe ebile le Dipaki Tsa Jehova di sa dumellwa ho kena. Re ile ra hlollwa le ho thaba ha e re ha re fihla, ra fumana letshwele boemakepe le neng le tshwere lesela le neng le re “Le a Amohelwa Dipaki Tsa Jehova.” Re ile ra thabela ho etela dibaka tseo batho ba kang Abrahama, Isaka le Jakobo ba phetseng ho tsona. Ra ba ra latswa ka mahlo mme ra bona dibaka tseo Jesu le baapostola ba neng ba bolela ditaba tse molemo ho tsona. Re ile ra ba ra bona esita le moo Bokreste bo ileng ba qala ho namela teng.—Lik. 13:47.

Re qetile dilemo tse 55 mohatsaka Lila a ntshehetsa dikabelong tsohle tseo re neng re di fuwa. Re ile ra etela Spain le Portugal ka makgetlonyana ha mosebetsi wa rona o ntse o thibetswe moo. Jwale re ne re ye re kgothatse bara le baradibabo rona le ho ba isetsa dingolwa le dintho tse ding tseo ba neng ba di hloka. Re ne re bile re etela le barababo rona ba teronkong ya Cádiz e Spain. Ke ne ke hlatswehile pelo ka ha ke ile ka ba fa le puo e kgothatsang.

Haesale ho tloha ka 1963 ho theosa le dilemo jwalo, ke ntse ke hlophisa maeto a ho ya dikopanong tsa  matjhaba tse neng di le dinaheng tse kang Africa, Australia, Central le South America, Europe, Far East, Hawaii, New Zealand le Puerto Rico. Nna le Lila re ile ra thabela ho ya dikopanong tse ngata tse sa lebaleheng, ho akarelletsa le ya Warsaw, Poland ka 1989. Bara le baradibabo rona ba tswang Russia ba ile ba thabela ho tla kopanong ena e kgolo le e neng e bile e le ya pele ho bona. Re ile ra kopana le bara le baradibabo rona ba ileng ba tshwarwa ka dilemo tse ngata ka lebaka la tumelo ya bona tlasa puso ya Soviet Union.

Kabelo e nngwe eo ke ileng ka e thabela, ke ya ho etela le ho kgothatsa ditho tsa lelapa la Bethele le baromuwa lefatsheng ho pota. Leetong la rona la ho qetela le lekala le South Korea, re ile ra kopana le barababo rona ba 50 ba neng ba le teronkong ya Suwon. Bara bana babo rona ba ne ba na le boikutlo bo botle mme ba lebelletse ka tjantjello e kgolo nako eo ka yona ba tlang ho etsa mosebetsi wa bona ka bolokolohi. Re ile ra tiya moko ha re bona tumelo ya bona e matla.—Bar. 1:11, 12

Ke ile ka bona ka ana a ka, ha Jehova a hlohonolofatsa bahlanka ba hae ho theosa le dilemo. Ha ke ne ke kolobetswa ka 1943, bahweletsi ba ne ba ka ba 100 000 feela lefatsheng lohle. Empa hona jwale, ba se ba feta 8 milione dinaheng tse 240. Bara le baradibabo rona ba tswang sekolong sa Gileade, le bona ba kgathile tema keketsehong ena. Ha ho na thabo e tshwanang le eo ke nnileng ka ba le yona ha ke thusa baromuwa ba bangata hore ba kgone ho ya dikabelong tsa bona.

Ha ke ikwahlaele qeto eo ke e entseng botjheng ba ka, ya ho kgetha ho sebeletsa Bethele. Haesale ke bona letsoho la Jehova ho theosa le dilemo. Ho phaella tshebeletsong ya Bethele, nna le Lila re thabetse ho sebetsa tshimo le diphutheho tse Brooklyn mme ra etsa metswalle ya popota.

Ka sebele Lila o dula a ntshehetsa ha ke ntse ke phetha dikabelo tsa ka mona Bethele. Le hoja hona jwale ke se ke le dilemo tse ka hodimo ho tse 84, ke ntse ke thusetsa haholo ka mangolo a tlang le a tswang lekaleng.

Ha ho na thabo e fetang eo motho a ka bang le yona ha e le karolo ya mokgatlo wa Jehova le ho bona phapang pakeng tsa ba mo sebeletsang le ba sa mo sebeletseng. Ke a kgolwa jwale re tla utlwisisa moelelo wa mantswe a ho Malakia 3:18 hantle, ha e re: “Le tla boela le bone phapang pakeng tsa ya lokileng le ya kgopo, pakeng tsa ya sebeletsang Modimo le ya sa kang a mo sebeletsa.” Tsatsi le tjhabang le le dikelang, ho a totobala hore lefatshe la Satane le ntse le tshwerehla le ho feta. Batho ha ba sa na tshepo ka bokamoso ebile ha ba sa thabela le ho phela. Empa ha e le batho ba sebeletsang Jehova le ba mo ratang bona, ba thabela bophelo. Ho phaella moo, tshepo ya bona ka bokamoso e hlakile ho sa tsotellehe dinako tsena tse thata tseo ba sesang ka hara tsona. Jwale ke tlotla e kaakang he, ho bolela ditaba tse molemo tsa Mmuso wa Modimo. (Mat. 24:14) Re shebile pele ka mahlo a mafubedu, letsatsi leo ka lona Mmuso wa Modimo o tlang ho fedisa lefatshe lena le seng le tsofetse. Ebe re kena lefatsheng le letjha, moo ditlhohonolofatso tsohle tseo Modimo a re tshepisitseng tsona di tlang ho phethahala. Ebe qetellong, re fumana bophelo bo phethahetseng le bo sa feleng.