1. Batho ba bang ba ikutlwa jwang ka keletso e bohlale e hlahang ka Bibeleng? (Diproverbia 1:20, 21)

 DINAHENG tse ngata re ne re atisa ho bona bara le baradibabo rona ba eme dibakeng tseo batho ba fetang ka bongata, ba bososela le ho fa batho dingolwa tseo ba ka di balang. Na le wena o kile wa kenya letsoho mosebetsing oo o thabisang? Haeba ho jwalo, mohlomong o kile wa nahana ka bohlale bo hlahang bukeng ya Diproverbia bo hweletsang hara batho e le hore ba ka utlwa keletso ya bona. (Bala Diproverbia 1:20, 21.) Bibele le dingolwa tsa rona di na le “bohlale ba nnete” bo tswang ho Jehova. Bona ke bona bohlale boo batho ba bo hlokang e le hore ba ka fumana bophelo bo sa feleng. Re a thaba ha motho e mong a amohela dingolwa tsa rona. Empa ha se kaofela ba di amohelang. Batho ba bang ha ba thabele ho ithuta Bibele. Ba bang ba a re tsheha, ba nahana hore Bibele e siilwe ke nako. Ba bang bona ha ba rate seo Bibele e se rutang ditabeng tsa boitshwaro mme ba re batho ba e latelang ha ba na mosa ebile ba ahlola batho ba bang. Ho ntse ho le jwalo, Jehova o etsa hore bohlale ba nnete bo fumanehe ho batho bohle. Ka ditsela dife?

2. Re ka etsang ho fumana bohlale ba nnete empa batho ba bangata bona ba kgetha ho etsang?

² Tsela e nngwe eo Jehova a re tsebisang bohlale ba nnete ka yona ke ka Lentswe la hae, Bibele. Buka ena e ka fumanwa ke batho bohle. Empa ho thweng ka dingolwa tsa rona tse thehilweng Bibeleng? Re leboha tlhohonolofatso ya Jehova ka ha di fumaneha ka dipuo tse fetang 1 000. Batho ba balang dingolwa tsena le ba sebedisang seo ba ithutileng sona, ba rua molemo o moholo. Le ha ho le jwalo, batho ba bangata ba kgetha  ho se mamele Jehova. Ba etsa diqeto ho ya ka ditakatso tsa bona kapa hore na batho ba bang ba batla eng. Ho feta moo, ba re kgella fatshe hobane re latela seo Bibele e se rutang. Sehlooho sena se tlo re thusa ho bona hore na ke hobaneng ha batho ba itshwara ka tsela ena. A re qaleng pele ka ho hlahloba hore na re ka fumana bohlale bo tswang ho Jehova jwang.

3. Re lokela ho etsang hore re be le bohlale ba nnete?

³ Bohlale ke bokgoni ba ho sebedisa seo re se tsebang ho etsa diqeto tse nepahetseng. Empa bohlale ba nnete bo bolela ho fetang hoo. Bibele e re: “Mohato wa pele wa ho fumana bohlale ke ho hlompha Jehova. Ho tseba Ya Halalelang ka ho Fetisisa ho bolela kutlwisiso.” (Diprov. 9:10) Ka hoo, ha ho ena le qeto ya bohlokwa eo re lokelang ho e etsa re lokela ho tseba hore na Jehova o ikutlwa jwang ka yona. Re ka etsa jwalo ka ho ithuta Bibele le dingolwa tsa rona tse thehilweng Bibeleng. Ha re etsa jwalo re bontsha hore re bohlale.​—Diprov. 2:5-7.

4. Ke hobaneng ha e le Jehova feela ya ka re rutang bohlale ba nnete?

⁴ Jehova ke yena ya ka re fang bohlale ba nnete. (Bar. 16:27) Ke hobaneng ha re re Jehova ke Mohlodi wa bohlale? Ntlha ya pele, ka ha Jehova ke Mmopi, o tseba ntho e nngwe le e nngwe ka popo ya hae. (Pes. 104:24) Ntlha ya bobedi, ntho e nngwe le e nngwe eo Jehova a e etsang e bontsha hore o bohlale. (Bar. 11:33) Ntlha ya boraro, re rua molemo haeba re mamela dikeletso tse bohlale tse tswang ho Jehova. (Diprov. 2:10-12) Haeba re batla ho ba le bohlale ba nnete, re tlameha ho dumella Jehova hore a re tataise ka Lentswe la hae ha re etsa diqeto.

5. Ditlamorao e ba dife haeba batho ba sa dumele hore Jehova ke yena feela Mohlodi wa bohlale ba nnete?

⁵ Batho ba bangata bao re kopanang le bona tshimong ba hlollwa ke botle ba popo empa ha ba dumele hore dintho tsena di bopilwe. Ho ena le hoo ba re di bile teng ka ho iphetola ha dintho. Batho ba bang bona ba re ba dumela ho Modimo empa ba nahana hore dithuto tsa Bibele di siilwe ke nako. Ditlamorao e bile dife? Na ho hlokomoloha ha batho bohlale ba Modimo ho entse hore lefatshe le ntlafale? Na batho ba thabile e le ka nnete kapa ba na le tshepo e tiileng ka bokamoso? Dintho tseo re di bonang di re kgodisa hore “ha ho bohlale, temoho kapa morero o ka hanyetsang Jehova.” (Diprov. 21:30) Sena se etsa hore re dule re kopa Jehova ho re fa bohlale ba nnete. Ka bomadimabe, batho ba bangata ha ba etse jwalo. Hobaneng?

6. Ho ya ka Diproverbia 1:22-25, ke bomang ba hanang bohlale bo tswang ho Jehova?

⁶ Batho ba bangata ba a iphapanya ha bohlale ba nnete “bo hweletsa seterateng.” Bibele e bua ka dihlopha tse tharo tsa batho ba iphapanyetsang bohlale bona e leng “ba se nang tsebo,” “basomi” le “ba se nang kelello.” (Bala Diproverbia 1:22-25.) A re hlahlobeng hore na ke hobaneng ha batho ba hana bohlale bo tswang hodimo le hore na re ka etsang hore re se ke ra ba jwalo ka bona.

7. Ke hobaneng ha batho ba bang ba ikgethela ho dula ‘ba se na tsebo’?

⁷ Batho “ba se nang tsebo” ba dumela ntho e nngwe le e nngwe eo batho ba e buang mme ba thetseha ha bonolo. (Diprov. 14:15) Re atisa ho kopana le batho ba jwalo ha re le tshimong. Ka mohlala, nahana ka batho ba dimilione ba thetswang ke baetapele ba  bodumedi le ba dipolotiki. Ba bang ba a makala ha ba elellwa hore baetapele ba bodumedi le ba dipolotiki ba ba thetsitse. Empa batho bao ho buuweng ka bona ho Diproverbia 1:22 ba ikgethela ho dula ba le lefifing. (Jer. 5:31) Ba iketsetsa dintho tseo ba di batlang mme ha ba batle ho ithuta hore na Bibele e reng kapa ho mamela melao ya yona. Batho ba bangata ba ikutlwa jwalo ka mme e mong wa Canada ya hlaheletseng bodumeding ya ileng a re ho Paki ya Jehova e nngwe: “Haeba moruti o re thetsitse, ke molato wa hae eseng wa rona.” Ho hang ha re batle ho etsisa mofuta ona wa batho o ikgethelang ho se mamele.​—Diprov. 1:32; 27:12.

8. Ke eng e tla re thusa ho ba le tsebo e nepahetseng?

⁸ Ka lebaka le utlwahalang, Bibele e re kgothalletsa hore re se ke ra dula re se na tsebo ho ena le hoo re “nahane jwalo ka batho ba baholo.” (1 Bakor. 14:20) Re ba le tsebo e nepahetseng ha re sebedisa melaomotheo ya Bibele bophelong ba rona. Ha re etsa jwalo re tla bona ka moo Bibele e re thusang ka teng ho etsa diqeto tse nepahetseng le ho qoba mathata. Ke hantle hore re nahane ka diqeto tseo re ileng ra di etsa. Haeba re se re ena le nako re ntse re ithuta Bibele le ho ba teng dibokeng tsa Bokreste empa re eso inehele ho Jehova le ho kolobetswa, ke hantle ho ipotsa hore na ke hobaneng ha re eso inehele le ho kolobetswa. Haeba o se o kolobeditswe, na o ntse o ntlafatsa tseleng eo o rutang ka yona le ho bolela ditaba tse molemo? Na o sebedisa seo o ithutang sona Bibeleng ha o etsa diqeto? Na o tshwara batho ba bang ka tsela eo Jesu a neng a ka etsa ka yona? Haeba re bona hore re hloka ho ntlafatsa, re lokela ho nahana ka ho teba ka dikeletso tsa Jehova ka ha di “hlalefisa ya se nang boiphihlelo.”​—Pes. 19:7.

9. “Basomi” ba bontsha jwang hore ha ba batle bohlale bo tswang ho Modimo?

⁹ Sehlopha sa bobedi sa batho ba iphapanyetsang bohlale ba Modimo ke “basomi.” Ka dinako tse ding re kopana le batho ba jwalo ha re le tshimong. Ba thabela ho soma batho ba bang. (Pes. 123:4) Bibele e ile ya bolela esale pele hore matsatsing a ho qetela ho tla ba le basomi ba bangata. (2 Pet. 3:3, 4) Jwalo ka bakgwenyana ba Lota ya neng a lokile, batho ba bang mehleng ena ha ba mamele dikeletso tse tswang ho Modimo. (Gen. 19:14) Ba bangata ba tsheha batho ba mamelang melao ya Bibele. Ba etsa jwalo hobane ba batla ho kgotsofatsa “ditakatso tsa bona tse kgopo.” (Juda 7, 17, 18) Dintho tse etswang ke bakwenehi le batho ba hanyetsang Jehova di dumellana hantle le tsela eo Bibele e hlalosang basomi ka yona.

10. Ho ya ka Pesaleme ya 1:1, ke jwang re ka qobang ho fetoha basomi?

¹⁰ Keng e ka re thusang hore re se ke ra fetoha basomi? Re ka etsa jwalo ka ho qoba ho tlwaelana le batho ba tlwaetseng ho korotla. (Bala Pesaleme ya 1:1.) Sena se bolela hore ha re mamele kapa hona ho bala ntho le ha e le efe e tswang ho bakwenehi. Ha re sa hlokomele ho ka ba bonolo hore re fetohe batho ba korotlang mme re ka qala ho se tshepe Jehova le tataiso eo mokgatlo wa hae o fanang ka yona. Re ka qoba mekgwa eo ka hore re ipotse dipotso tsena: ‘Na ke dula ke belaela ha ke fumana tlhaloso kapa tataiso eo ke qalang ho e utlwa? Na ke dula ke batla ho tshwaya ba etellang pele diphoso?’ Haeba re potlakela ho etsa diphetoho re tla thabisa Jehova.​—Diprov. 3:34, 35.

11. Batho “ba se nang kelello” ba ikutlwa jwang ka melao ya Jehova ya boitshwaro?

¹¹ Sehlopha sa boraro sa batho ba hanang bohlale ke “ba se nang kelello.” Ke ba se nang  kelello hobane ha ba batle ho phela ka melao ya Modimo ya boitshwaro. Ba iketsetsa dintho tseo ba di batlang. (Diprov. 12:15) Batho ba jwalo ba hana ho mamela Jehova, e leng yena Mohlodi wa bohlale. (Pes. 53:1) Ha re kopana le bona tshimong, hangata ba a re halefela le hona ho re nyefola ha re mamela ditaelo tse tswang ka Bibeleng. Empa ha ho letho le molemo leo ba ka fanang ka lona. Bibele e re: “Lewatla ha le kgone ho fumana bohlale ba nnete, ha ho letho leo le ka le buang keiting ya motse.” (Diprov. 24:7) Ha ho keletso e bohlale eo mawatla a ka fanang ka yona. Ke ka lebaka leo Jehova a re eletsang hore re ‘suthele hole le motho ya hlokang kelello.’​—Diprov. 14:7.

12. Ke eng eo re ka e etsang hore re se ke ra latela mekgwa ya batho ba se nang kelello?

¹² Ha re tshwane le batho bao ba hloileng keletso ya Modimo. Ho ena le hoo re ithuta ho rata melao ya Modimo le tsela eo a nahanang ka yona. Re tla rata tsela eo Modimo a nahanang ka yona le melao ya hae le ho feta haeba re bapisa melemo ya ho mamela le ditlamorao tsa ho se mamele. Sheba mathata ao batho ba ipakelang ona ha ka bowatla ba hana keletso ya Jehova e bohlale. Jwale ebe o sheba tsela e molemo eo o phelang ka yona ka lebaka la ho mamela Modimo.​—Pes. 32:8, 10.

13. Na Jehova o re qobella ho mamela keletso ya hae e bohlale?

¹³ Jehova o entse hore batho bohle ba be le monyetla wa ho fumana bohlale ba hae empa ha a ba qobelle hore ba bo amohele. Le ha ho le jwalo, o hlalosa se etsahalang ha batho ba sa amohele bohlale boo a fanang ka bona. (Diprov. 1:29-32) Batho ba sa mameleng Jehova “ba tla kotula seo ba se jetseng.” Ha nako e ntse e ya, ba tla utlwa bohloko hape ba be le mathata a mangata ka lebaka la tsela eo ba phelang ka yona. Qetellong Jehova o tla ba fedisa. Ka lehlakoreng le leng Jehova o re ho ba mamelang keletso ya hae e bohlale le ba e sebedisang: “Ya mmamelang o tla dula a sireletsehile, a ke ke a kgathatswa ke ho tshaba tlokotsi.”​—Diprov. 1:33.

14, 15. Re ithutang lengolong la Diproverbia 4:23?

¹⁴ Re rua molemo ka mehla ha re sebedisa bohlale bo tswang ho Modimo. Jwalo ka ha re hlokometse, batho bohle ba ka fumana dikeletso tsa Jehova tse bohlale ha bonolo. Ka mohlala, bukeng ya Diproverbia Jehova o fana ka dikeletso tse nakong le tse sebetsang. A re hlahlobeng e meng ya mehlala e mene ya dikeletso tsena tse bohlale.

¹⁵ Sireletsa pelo ya hao ya tshwantshetso. Bibele e re: “O sireletse pelo ya hao ho feta dintho tse ding tsohle ka ha didiba tsa bophelo di tswa ho yona.” (Diprov. 4:23) Nahana ka seo o lokelang ho se etsa ho sireletsa pelo ya hao. Re lokela ho ja dijo tse matlafatsang, ho ikwetlisa ka ho lekaneng le ho qoba mekgwa e  mebe. Re etsa dintho tse tshwanang le tseo ho sireletsa pelo ya rona ya tshwantshetso. Lentswe la Modimo ke dijo tsa rona tsa letsatsi le letsatsi. Re lokisetsa diboka, re ba teng ho tsona mme re a arabela ha re le dibokeng. Ho ba teng ka mehla tshimong ho etsa hore re dule re tjheseha. Hape re qoba ho ba le mekgwa e mebe ka hore re se ke ra silafatsa menahano ya rona. Re etsa jwalo ka ho qoba metswalle e mebe le boithabiso bo kgothalletsang dintho tse mpe.

16. Ke hobaneng ha Diproverbia 23:4, 5 e le molemo haholo mehleng ee?

¹⁶ Kgotsofalla dintho tseo o nang le tsona. Bibele e fana ka keletso ena: “O se ke wa sebetsa ka thata hore o fumane maruo . . . Ha o a shebisisa, a tla be a le siyo etswe a tla mela mapheo mme a fofele hodimo jwalo ka ntsu.” (Diprov. 23:4, 5) Batho ba bangata ba ka lahlehelwa ke tjhelete le maruo a bona ha bonolo. Le ha ho le jwalo, batho ba bangata kajeno ba ruileng le ba futsanehileng ba amehile ka ho etsa tjhelete. Ke ka lebaka lena hangata ba etsang dintho tse ba senyang lebitso, tse senyang dikamano tsa bona le batho ba bang mme ba qetelle ka ho kula. (Diprov. 28:20; 1 Tim. 6:9, 10) Ka lehlakoreng le leng, bohlale bo re thusa hore re se ke ra nahana ka tjhelete haholo. Ho nahana ka tsela eo ho re thusa hore re se ke ra ba meharo, re dule re thabile re bile re kgotsofalletse dintho tseo re nang le tsona.​—Moek. 7:12.

17. Ke jwang re ka buang “dipuo tsa ba bohlale” ho latela Diproverbia 12:18?

¹⁷ Nahana pele o bua. Haeba re sa hlokomele, re ka utlwisa batho bohloko haholo ka dintho tseo re di buang. Bibele e re: “ Dipuo tse sa nahanwang di hlaba jwalo ka sabole empa dipuo tsa ba bohlale di a fodisa.” (Diprov. 12:18) Re tla etsa hore ho be le kgotso haeba re sa bue ka diphoso tsa batho ba bang. (Diprov. 20:19) Haeba re batla hore dintho tseo re di buang di tshedise batho ba bang ho ena le ho ba utlwisa bohloko, re lokela ho bala Lentswe la Modimo ka mehla re be re nahanisise ka dintho tseo re di balang. (Luka 6:45) Ha re nahanisisa ka seo re se balang, mantswe a rona a ka ba jwalo ka “sediba sa bohlale”  mme a tla kgothatsa batho ba bang.​—Diprov. 18:4.

18. Ho sebedisa Diproverbia 24:6 ho ka re thusa jwang hore re atlehe tshimong?

¹⁸ Latela tataiso eo mokgatlo o fanang ka yona. Bibele e fana ka keletso ena ya bohlokwa: “Ka tataiso e bohlale o tla lwana ntwa ya hao, ka baeletsi ba bangata o tla hlola.” (Diprov. 24:6) Nahana ka moo temana ena e ka o thusang ka teng mosebetsing wa ho bolela le ho ruta batho Bibele. Ho ena le ho etsa mosebetsi wa ho bolela le ho ruta batho Bibele ka tsela ya rona, re latela ditlhahiso tseo re di fuwang. Re fumana tataiso e bohlale ha re le dibokeng tsa rona tsa Bokreste, e leng moo baeletsi ba nang le boiphihlelo ba fanang ka dipuo tse thehilweng Bibeleng tse re kwetlisang. Hape mokgatlo wa Jehova o fana ka dingolwa le divideo tse thusang batho ho utlwisisa Bibele. Na o sebedisa dithulusi tsee ka tsela eo di finyellang morero wa tsona?

19. O ikutlwa jwang ka bohlale boo Jehova a fanang ka bona? (Diproverbia 3:13-18)

¹⁹ Bala Diproverbia 3:13-18. Re leboha haholo ka dikeletso tsa bohlokwa tse tswang ka Lentsweng la Modimo. Re ka be re le kae ha e ne e se ka tsona! Sehloohong sena re buile ka dikeletso tsa bohlokwa tse hlahang bukeng ya Diproverbia. Ke nnete hore Bibele e na le dikeletso tse bohlale tse ngata tse tswang ho Jehova. A re ikemisetseng ho sebedisa bohlale boo Jehova a fanang ka bona bophelong ba rona ba letsatsi le letsatsi. Batho ba bangata ba nka bohlale ba Modimo e se letho empa rona re kgodisehile hore “mang kapa mang ya bo tshwarang o tla phela, a fumane thabo.”