1. Jehova o re file tshepo efe?

 JEHOVA o re file tshepo e thabisang ya bophelo bo sa feleng. Ba bang ba rona ba na le tshepo ya ho phela lehodimong e le dibopuwa tse matla tsa moya. (1 Bakor. 15:50, 53) Ha ba bang bona ba ena le tshepo ya ho phela lefatsheng ka ho sa feleng ba sa kule ebile ba thabile. (Tshen. 21:3, 4) Ho sa tsotellehe hore na re tla phela ka ho sa feleng lehodimong kapa lefatsheng, tshepo eo re nang le yona ke ya bohlokwa haholo ho rona.

2. Ke kgodiseho efe eo re nang le yona mabapi le tshepo ya rona, hona hobaneng re tjho jwalo?

² Lentswe “tshepo” le ka bolela “ho lebella hore dintho tse molemo di tla etsahala,” ho latela tsela eo le sebedisitsweng ka yona ka Bibeleng. Re ka kgodiseha hore tshepo ya rona ka bokamoso e tla phethahala hobane ke Jehova ya tshepisitseng. (Bar. 15:13) Re a tseba hore na o tshepisitse eng hape re a tseba hore o tla phethahatsa dintho tse a di tshepisitseng. (Num. 23:19) Re tseba hantle hore Jehova o na le boikemisetso le matla a ho phethahatsa ntho e nngwe le e nngwe eo a reng o tla e etsa. Sena se bolela hore tshepo ya rona ha se toro feela kapa ntho eo re batlang hore e etsahale. Tshepo ya rona ke ya ntho eo re tsebang hantle hore ke nnete.

3. Re tlo bua kang sehloohong see? (Pesaleme ya 27:14)

³ Ntate wa rona ya lehodimong o a re rata hape o batla hore re mo tshepe. (Bala Pesaleme ya 27:14.) Ha re tshepa Jehova haholo re tla kgona ho mamella mathata, re be sebete hape re dule re thabile ho sa tsotellehe hore na re etsahallwa ke eng. A re bueng ka hore na tshepo ya rona e re sireletsa jwang. Re tla hlahloba hore na tshepo e tshwana jwang le ankora le hore na e tshwana jwang le helmete. Re tla boela re bue ka hore na re ka matlafatsa tshepo ya rona jwang.

4. Tshepo e tshwana jwang le ankora? (Baheberu 6:19)

⁴ Moapostola Pauluse o ile a tshwantsha tshepo ya rona le ankora lengolong la hae le yang ho Baheberu. (Bala Baheberu 6:19.) Ka ha Pauluse o ne atisa ho nka maeto ka sekepe, o ne a tseba hore ho sebediswa ankora ho thusa sekepe hore se se ke sa ya kwana le kwana. Ka nako e nngwe ho ile ha tsoha sefefo se matla a le ka sekepeng. Ka nako eo, o ile a bona basesisi ba sekepe ba akgela diankora ka metsing e le ho thusa sekepe hore se se ke sa fefoha yaba se swahlamana majweng. (Dik. 27:29, 39-41) Jwalo ka ha ankora e tsitsisa sekepe, tshepo ya rona e re thusa hore re se ke ra suthela hole le Jehova ha re kopana le mathata a tshwanang le difefo tse matla. Tshepo eo re nang le yona e re thusa hore re dule re kgobile matshwafo le ha re kopana le mathata hobane re dumela hore dintho di tla loka. Re lokela ho hopola hore Jesu o ile a re re tla hloriswa. (Joh. 15:20) Ka hoo, ho nahana ka dintho tseo Jehova a re fileng tsona ho re thusa hore re dule re mo sebeletsa.

5. Ho ba le tshepo ho ile ha thusa Jesu jwang ha a ne a tobane le lefu?

⁵ Nahana ka moo tshepo e ileng ya thusa Jesu hore a dule a tshepahala le ha a ne a tseba hore o tlo shwa lefu le sehloho. Ka letsatsi la Pentekonta ya selemo sa 33, moapostola Petrose o ile a bua ka boprofeta bo hlahang bukeng ya Dipesaleme bo neng bo hlalosa ka moo Jesu a neng a kgobile matshwafo ka teng. Bo re: “Ke tla dula ke ena le tshepo hobane o ke ke wa ntlohela lebitleng kapa wa dumella motho ya o tshepahallang hore a bolle lebitleng . . . o tla etsa hore ke thabe haholo ha ke na le wena.” (Dik. 2:25-28; Pes. 16:8-11) Le ha Jesu a ne a tseba hore o tlo shwa, o ne a ena le tshepo e tiileng ya hore Jehova o tla mo tsosa le hore o tla boela a thabele ho ba le yena lehodimong.​—Baheb. 12:2, 3.

6. Morabo rona Leonard Chinn o ile a reng ka tshepo?

⁶ Tshepo eo re nang le yona re le Bakreste e thusitse bara le baradibabo rona ba bangata ho mamella. Nahana ka mohlala wa Morabo rona Leonard Chinn ya dulang Engelane. Nakong ya Ntwa ya Pele ya Lefatshe o ile a kenngwa teronkong hobane a ne a sa batle ho kenela sesole. O ile a kwallwa seleng a le mong ka dikgwedi tse pedi. Ka mora moo, o ile a qobellwa ho etsa mosebetsi o boima. Ha morao o ile a ngola a re: “Maemo ao ke ileng ka ba ho ona a ile a nthusa ho bona ka moo tshepo e leng ya bohlokwa ka teng ho re thusa ho mamella. Re na le mohlala wa Jesu, baapostola le baprofeta. Re boetse re na le ditshepiso tsa bohlokwa tse hlahang ka Bibeleng. Kaofela ha tsona di re thusa hore re dule re ena le tshepo e tiileng ka bokamoso hape di re thusa ho mamella.” Tshepo e ile ya eba jwalo ka ankora ho Morabo rona Leonard, le ho rona e ka ba ka tsela e tshwanang.

7. Mathata a tiisa tshepo ya rona jwang? (Baroma 5:3-5; Jakobo 1:12)

⁷ Ka mora ho mamella diteko mme re hlokomela ka moo Jehova a re thusitseng ka teng, tshepo ya rona e tiya le ho feta. (Bala Baroma 5:3-5; Jakobo 1:12.) E tiya ho feta ha re ne re qala ho ithuta Bibele. Satane o batla hore mathata a re imele empa Jehova o re thusa hore re atlehe ho a mamella.

8. Tshepo ya rona e ka tshwana le helmete jwang? (1 Bathesalonika 5:8)

⁸ Bibele e re tshepo ya rona e ka boela ya tshwana le helmete. (Bala 1 Bathesalonika 5:8.) Lesole le rwala helmete ho sireletsa hlooho ya lona ha le le ntweng. Ka ha le rona re ntweng le Satane, re lokela ho  sireletsa dikelello tsa rona e le hore a se ke a di silafatsa. O sebedisa dintho tse ngata ho silafatsa menahano ya rona le ho etsa hore re lakatse ho etsa dintho tse fosahetseng. Ka hoo, feela jwalo ka ha helmete e sireletsa hlooho ya lesole, tshepo e sireletsa menahano ya rona e le hore re ka dula re tshepahalla Jehova.

9. Ho etsahalang ka batho ha ba se na tshepo?

⁹ Ho ba le tshepo ya bophelo bo sa feleng ho tla re thusa hore re etse dintho ka bohlale. Ka lehlakoreng le leng, haeba tshepo e se matla, re ka iphumana re se re nahana ka dintho tseo re di batlang feela yaba re lebala ka bophelo bo sa feleng. Nahana ka Bakreste ba neng ba phela Korinthe mehleng ya kgale. Ba ile ba kgaotsa ho dumela tshepisong ya Modimo ya tsoho. (1 Bakor. 15:12) Pauluse o ile a re batho ba se nang tshepo ya tsoho ba phelela ho kgotsofatsa ditakatso tsa bona feela. (1 Bakor. 15:32) Mehleng ena batho ba se nang tshepo ditshepisong tsa Modimo ba etsa ntho e nngwe le e nngwe e ka ba kgotsofatsang. Ho fapana le bona, re behile tshepo ya rona bokamosong boo Modimo a re tshepisitseng bona. Tshepo ya rona e tshwana le helmete ya tshwantshetso e sireletsang menahano ya rona mme e re thusa hore re se ke ra inahana borona feela e leng ntho e ka senyang kamano ya rona le Jehova.​—1 Bakor. 15:33, 34.

10. Ho ba le tshepo ho ka re thusa jwang hore re se ke ra ba le menahano e fosahetseng?

¹⁰ Tshepo e ka re thusa hore re se ke ra nahana hore ha ho mohla re tla kgona ho kgahlisa Jehova. Ka mohlala, batho ba bang ba nahana hore ha ba tshwanelehe ho phela ka ho sa feleng. Ba bang ba ka nahana hore ha ba bohlokwa hakaalo, ha ba bang bona ba ka ikutlwa eka ba ke ke ba kgona ho phela ka tsela eo Modimo a e ratang. Re lokela ho hopola hore Elifaze ya neng a etsa eka o tshedisa Jobo, o ile a bua dintho tse tshwanang le tseo ho Jobo. O ile a re: “Ha ho mohla motho e ka bang ya hlwekileng.” A boela a re: “Modimo ha a tshepe mangeloi a hae le mahodimo ha a hlweka mahlong a hae.” (Jobo 15:14, 15) Ao ke mashano e le ka nnete! Re lokela ho hopola hore Satane ke yena ya susumetsang mashano ana. O a tseba hore ha re dula re nahana ka tsela eo, re ka qetella re se re se na tshepo. Le ka mohla o se ke wa dumela mashano ao ho ena le hoo o dule o nahana ka ditshepiso tsa Jehova. Kgodiseha hore o batla o phele ka ho sa feleng hape o tla o thusa hore o finyelle seo.​—1 Tim. 2:3, 4.

11. Ke hobaneng ha re lokela ho ba le mamello ha re ntse re emetse dintho tseo re di tshepisitsweng?

¹¹ Ha se ka dinako tsohle ho leng bonolo hore re dule re ena le tshepo e tiileng. Re ka nna ra fellwa ke tshepo ha re ntse re emetse Modimo hore a phethahatse ditshepiso tsa hae. Ke kgale Jehova a le teng ka hoo nako e ka bonahalang e le telele ho rona, ho yena ke nako e kgutshwanyane. (2 Pet. 3:8, 9) Jehova o tla etsa seo a se tshepisitseng, le ha ho le jwalo e ka nna ya se ke ya eba ka nako eo rona re e lebeletseng. Keng e ka re thusang hore re dule re ena le tshepo e tiileng ha re ntse re emetse hore Modimo a etse dintho tseo a di tshepisitseng?​—Jak. 5:7, 8.

12. Ho ya ka Baheberu 11:1, 6, tumelo e re thusa jwang hore re be le tshepo?

¹² Re tla ba le tshepo e tiileng hafeela re dula re le haufi le Jehova e leng yena ya fanang ka tshepo. E le hore re be le tshepo, re lokela ho ba le tumelo ya hore Jehova o teng mme “o putsa ba mo batlang e le ka nnete.” (Bala Baheberu 11:1, 6.) Haeba re dumela hore Jehova o teng, re tla kgodiseha hore o tla etsa dintho tseo a di tshepisitseng. A re hlahlobeng dintho tse ka re thusang ho matlafatsa kamano  ya rona le Jehova e leng se tla re thusa hore re be le tshepo e tiileng.

13. Re ka atamela ho Modimo jwang?

¹³ Rapela Jehova mme o bale Lentswe la hae. Le hoja re ke ke ra bona Jehova, re ka kgona ho atamela ho yena. Re ka bua le yena ka thapelo re kgodisehile hore o tla re mamela. (Jer. 29:11, 12) E le hore re mamele Modimo, re lokela ho bala Lentswe la hae le ho nahanisisa ka seo re se badileng. Tshepo ya rona e tiya le ho feta ha re ithuta ka moo Jehova a ileng a thusa bahlanka ba hae ba tshepahalang ka teng nakong e fetileng. Ntho e nngwe le e nngwe e ka Lentsweng la Modimo, e ile ya “ngollwa ho re ruta e le hore re be le tshepo. Ha e le hantle, Mangolo ao a a re tshedisa ebile a re thusa hore re mamelle.”​—Bar. 15:4.

14. Ke hobaneng ha re lokela ho hlahloba dintho tseo Jehova a di etseditseng batho ba bang?

¹⁴ Nahana ka ditshepiso tsa Jehova tseo a seng a di phethahaditse. Nahana ka ntho eo Modimo a ileng a e etsetsa Abrahama le Sara. Ba ne ba se ba tsofetse hoo ba ke keng ba eba le bana. Le ha ho le jwalo, Modimo o ile a ba tshepisa hore ba tla ba le ngwana. (Gen. 18:10) Abrahama o ile a etsang? Bibele e re o ne a ‘ena le tumelo ya hore e tla ba ntate wa ditjhaba tse ngata.’ (Bar. 4:18) Le hoja Abrahama a ne a sa tsebe hore na Modimo o tla phethahatsa tshepiso ya hae jwang, o ne a kgodisehile hore Jehova o tla phethahatsa seo a se tshepisitseng. Monna enwa ya nang le tumelo ha a ka a swetseha. (Bar. 4:19-21) Ditlaleho tse kang tsena di re kgodisa hore Jehova o tla phethahatsa ditshepiso tsa hae le ha rona re bona eka ho ke ke ha kgoneha.

15. Ke hobaneng ha re lokela ho nahana ka dintho tseo Jehova a re etseditseng tsona?

¹⁵ Nahana ka seo Jehova a o etseditseng sona. Nahana ka melemo eo o e fumaneng ditshepisong tse ka Lentsweng la Modimo  tse seng di phethahetse. Ka mohlala, Jesu o tshepisitse hore Ntate wa hae o ne a tla re fa dintho tseo re di hlokang letsatsi le letsatsi. (Mat. 6:32, 33) Jesu o ile a boela a re tiisetsa hore Jehova o tla re fa moya wa hae o halalelang ha re o kopa. (Luka 11:13) Jehova o phethahaditse ditshepiso tseo. Nahana ka dintho tseo Jehova a di tshepisitseng tseo a seng a o etseditse tsona. Ka mohlala, o tshepisitse hore o tla o tshwarela, o tla o tshedisa a be a o fe dintho tseo o di hlokang e le hore o dule o le haufi le yena. (Mat. 6:14; 24:45; 2 Bakor. 1:3) Ha o nahana ka dintho tseo Modimo a seng a o etseditse tsona, tshepo ya hao e tla ba matla dinthong tseo a tla o etsetsa tsona ka moso.

16. Ke hobaneng ha tshepo e le mpho ya bohlokwa?

¹⁶ Tshepo ya rona ya bophelo bo sa feleng ke mpho e tswang ho Modimo. Re lebelletse bokamoso bo thabisang haholo boo re tsebang hantle hore bo a tla, ho bata kapa ho tjhesa. Tshepo ena e tshwana le ankora ka ha e re thusa hore re se ke ra tsukutlwa ke mathata, re mamelle ha re hloriswa esita le ha re tobane le lefu. E tshwana le helmete ka ha e sireletsa dikelello tsa rona e le hore re se ke ra ba le menahano e ka etsang hore re etse dintho tse fosahetseng. E boetse e re thusa hore re etse dintho tse nepahetseng. Tshepo eo Bibele e re fang yona e re atametsa ho Modimo ebile e re thusa ho bona hore na o re rata haholo hakae. Re fumana molemo o moholo haeba re dula re ena le tshepo e matla.

17. Ke hobaneng ha tshepo eo re nang le yona e re thabisa?

¹⁷ Pauluse o ile a kgothalletsa Baroma hore ba ‘thabe ka lebaka la tshepo eo ba nang le yona.’ (Bar. 12:12) Pauluse o ne a thabile hobane o ne a tseba hore o tla phela ka ho sa feleng lehodimong hafeela a ntse a tshepahala. Le rona re ka thabela tshepo eo re nang le yona hobane re a tseba hore Jehova o tla phethahatsa ditshepiso tsa hae. Mopesaleme o ile a ngola a re: “Ho thaba motho . . . ya tshepileng Jehova Modimo wa hae . . . ya dulang a tshepahala.”​—Pes. 146:5, 6.