1. Jehova o ikutlwa jwang ka bahlanka ba hae?

 JEHOVA o bona ntho e nngwe le e nngwe e etsahallang bahlanka ba hae ba lefatsheng. O a bona ha ba thabile le ha ba utlwile bohloko. (Pes. 37:18) Ha a bona hore re mo sebeletsa ka pelo yohle ho sa tsotellehe mathata ao re thulanang le wona o thaba haholo! Ebile o ikemiseditse ho re tshehetsa le ho re tshedisa mathateng a rona.

2. Jehova o thusa bahlanka ba hae jwang ha ba utlwile bohloko, hona ba lokela ho etsang e le hore ba fole?

² Pesaleme ya 147:3 e re Jehova “o tlamisa maqeba a ba utlwileng bohloko.” Temana ena e re fa maikutlo a hore Jehova o re thoba maikutlo ha re utlwile bohloko. Re ka etsang e le hore re utlwe ha Jehova a re thoba maikutlo? Nahana ka papiso ena: Ngaka e ka thusa motho ya kulang empa motho eo o lokela ho mamela ditaelo tsa ngaka e le hore a tle a fole. Sehloohong sena re tlo bona hore na Jehova o reng ka Lentsweng la hae ha a bua le batho ba utlwileng bohloko le hore na ba ka sebedisa keletso eo jwang e le hore ba fole.

JEHOVA O BATLA HORE RE TSEBE HORE RE BA BOHLOKWA

3. Ke hobaneng ha batho ba bang ba ikutlwa ba se na thuso?

³ Batho ba bangata ha ba na lerato ebile ba etsa hore ba bang ba ikutlwe ba se na thuso. Moradi wa bo rona e mong ya bitswang Helen a o re: “Ke hodisitswe ke batswadi ba se nang lerato. Ntate wa ka o ne a re bolella letsatsi le leng le le leng hore ha re na thuso.” Mohlomong le wena jwalo ka moradi wa  bo rona Helen batho ba o tshwara hampe, ba dula ba o tshwaya diphoso ebile ba etsa o ikutlwe eka ha o ratehe. Haeba ho jwalo, o ka nna wa thatafallwa ke ho dumela hore ho na le motho ya o ratang e le ka nnete.

4. Ho ya ka Pesaleme ya 34:18 Jehova o re tshepisang?

⁴ Kgodiseha hore Jehova o a o rata ebile o o nka o le bohlokwa le haeba batho ba bang ba kile ba o tshwara hampe. “O haufi le bao dipelo tsa bona di utlwileng bohloko.” (Bala Pesaleme ya 34:18.) Haeba o utlwa o ‘kgathetse matla,’ o hopole hore Jehova o ile a bona hore pelo ya hao e ntle yaba o o hulela ho yena. (Johanne 6:44) O o rata haholo! Ka hoo, o ikemiseditse ho o thusa ka dinako tsohle.

5. Tsela eo Jesu a neng a tshwara batho ka yona e re rutang ka Jehova?

⁵ Re ka tseba hore na Jehova o ikutlwa jwang ka hore re ithute mohlaleng wa Jesu. Ha Jesu a ne a le lefatsheng o ne a tsotella batho ba neng ba kgellwa fatshe a bile a ba tshwara ka mosa. (Mat. 9:​9-12) Ka lekgetlo le leng mosadi e mong ya kulang haholo o ile a tla ho Jesu, a tshwara seaparo sa hae a tshepa hore o tla fola yaba Jesu o a mo tshedisa a ba a mo babatsa ka lebaka la tumelo ya hae. (Mar. 5:​25-34) Ha re bona Jesu ho tshwana le ha re bona Jehova hantle. (Joh. 14:9) Ka hoo, o ka kgodiseha hore Jehova o o nka o le wa bohlokwa ebile o bona dintho tse ntle tseo o di etsang, o a bona hore o dumela ho yena ebile o a mo rata.

6. O ka etsang haeba o ikutlwa o se na thuso?

⁶ O ka etsang haeba o ntse o ikutlwa o se na thuso le hoja o lekile ho qoba boikutlo boo? O ka bala ditemana tsa Bibele tse o kgodisang hore o bohlokwa ho Jehova ebe o nahanisisa ka tsona. b (Pes. 94:19) Haeba o hlolehile ho  finyella dipakane tseo o neng o ipehetse tsona, o se ke wa nyahama hape o se ke wa ipapisa le batho ba bang. Jehova ha a lebella hore re etse dintho tse ka hodimo ho matla a rona. (Pes. 103:​13, 14) Haeba o kile wa hlekefetswa, o se ke wa ikutlwa o le molato. O hopole hore Jehova o tla ahlola batho ba tshwarang ba bang hampe le hore o thusa ba ileng ba tshwarwa hampe. (1 Pet. 3:12) Moradi wa bo rona Sandra ya ileng a hlekefetswa ha a le monyenyane o re: “Ke dula ke kopa Jehova hore a nthuse ke ipone ka tsela eo a mponang ka yona, ke bone makgabane a ka.”

7. Dintho tse bohloko tse re hlahelang bophelong di re kwetlisa jwang ha re sebeletsa Jehova?

⁷ Jehova ke yena ya o kgethileng hore o be mosebetsimmoho le yena, ka hoo, o se ke wa ikgalala hore o ka kgona ho thusa batho ba bang. (1 Bakor. 3:9) Mathata a o hlahetseng bophelong a ka o thusa hore o utlwisise tsela eo batho ba ka nnang ba ikutlwa ka yona ha ba utlwile bohloko le hore o ba qenehele. O kgodisehe hore o ka kgona ho thusa batho ba bang! Moradi wa bo rona Helen eo re buileng ka yena pejana o ile a fumana thuso mme hona jwale o kgona ho thusa batho ba bang. O re: “Ke ne ke ikutlwa ke se na thuso empa Jehova o nthusitse hore ke ikutlwe ke ratwa ebile ke kgona le ho thusa batho ba bang.” Hona jwale moradi wa bo rona Helen ke pulamadiboho ya sebetsang a thabile!

JEHOVA O BATLA RE DUMELE HORE O RE TSHWARELA KA HO FELETSENG

8. Ho latela Esaia 1:18 Jehova o re tiisetsa eng?

⁸ Bahlanka ba bang ba Jehova ba dula ba tshwenyehile ka diphoso tseo ba ileng ba di etsa nakong e fetileng, ebang ke pele kapa ka mora hore ba kolobetswe. Empa re lokela ho hopola hore Jehova o re file Mora wa hae hore a re shwele hobane a re rata haholo. Ka lebaka leo, re lokela hore re dule re kgodisehile hore o batla hore re amohele mpho ena ya hae. Ebile o batla hore re dumele hore ka mora hore re “lokise ditaba le yena,” c o re leballa diphoso tsa rona. (Bala Esaia 1:18.) Re leboha Jehova hore ebe o re rata haholo hoo a lebalang diphoso tsa rona. Taba e nngwe e thabisang ke hore o dula a hopola dintho tse ntle tseo re di etsang.—Pes. 103:​9, 12; Baheb. 6:10.

9. Ke hobaneng ha re sa lokela ho dula re nahana ka diphoso tseo re di entseng nakong e fetileng?

⁹ Haeba o dula o tshwenyehile ka diphoso tseo o di entseng nakong e fetileng, leka ka matla ho nahana ka dintho tse ntle tseo o di etsang hona jwale le tseo o tla di etsa nakong e tlang. Hopola mohlala wa moapostola Pauluse. O ne a ikwahlaela hore o kile a hlorisa Bakreste ka sehloho empa o ne a kgodisehile hore Jehova o mo tshwaretse. (1 Tim. 1:​12-15) Na o ile a dula a ikwahlaela diphoso tseo a di entseng nakong e fetileng? Ho hang ha a ka a dula a nahana ka diphoso tsa hae kapa ka dintho tseo a neng a di finyeletse pele e eba Mokreste, tse kang hore e ne e le Mofarisi ya hlomphehang. (Bafil. 3:​4-8, 13-15) Ho ena le hoo, Pauluse o ne a nahana ka bokamoso a bile a sebeletsa Modimo ka mafolofolo ohle. Jwalo ka Pauluse, o ke ke wa fetola dintho tseo o di entseng nakong e fetileng. Empa o ka kgona ho thabisa Jehova le ho mo sebeletsa hona jwale o be o dule o lebelletse hore ditshepiso tsa hae di phethahale.

10. Re ka etsang haeba re ile ra utlwisa batho ba bang bohloko nakong e fetileng?

¹⁰ Ho ka etsahala hore ebe o tshwenyehile ka dintho tseo o di entseng nakong e fetileng  tse ileng tsa utlwisa batho ba bang bohloko. O ka thuswa ke eng? O kope tshwarelo mme o sebetse ka thata hore le lokise bothata bo teng. (2 Bakor. 7:11) Kopa Jehova hore a thuse batho bao o ba utlwisitseng bohloko. A ka le thusa hore le be le kgotso hape le be le tswele pele le mo sebeletsa.

11. Re ithutang mohlaleng wa moprofeta Jonase? (Sheba setshwantsho )

¹¹ Ithute diphosong tsa hao mme o itumelle hore Jehova a o sebedise. O hopole mohlala wa Jonase, eitse ha Modimo a mo roma Ninive a baleha. Jehova o ile a mo kgalemela yaba Jonase o ithuta phosong eo ya hae. (Jon. 1:​1-4, 15-17; 2:​7-10) Ka mora moo, Jehova o ile a nka Jonase e ntse e le moprofeta wa hae, a mo fa monyetla o mong hape wa ho ya Ninive yaba lekgetlong lena Jonase o a mamela. Le hoja Jonase a ne a ikwahlaela phoso eo a e entseng, ha a ka a itumella hore boikutlo boo bo mo sitise ho amohela mosebetsi oo Jehova a mo fang wona.—Jon. 3:​1-3.

JEHOVA O RE TSHEDISA KA MOYA O HALALELANG

12. Jehova o re tshedisa jwang ha re hlahetswe ke dintho tse bohloko? (Bafilipi 4:​6, 7)

¹² Ha re hlahelwa ke dintho tse bohloko Jehova o re tshedisa ka moya wa hae o halalelang. Nahana ka mohlala wa Ron le Carol. Ka bomadimabe mora wa bona o ile a ipolaya, ha ba bua ka bothata bona ba re: “Re kile ra hlahelwa ke mathata empa ha re eso kopane le bo tshwanang le bona. Matsatsing ao re neng re sa kgone ho robala, re ne re rapela Jehova mme re ne re fumana kgotso eo ho buuwang ka yona ho Bafilipi 4:​6, 7.” (E bale.) Haeba pelo ya hao e utlwisitswe bohloko ke mathata ao o nang le wona, phetlela Jehova sefuba o bue le yena neng le neng ha o batla. (Pes. 86:3; 88:1) O mo kope hore a o fe moya o halalelang kgafetsa. Le ka mohla a ke ke a iphapanyetsa wena!—Luka 11:​9-13.

13. Moya o halalelang o ka re thusa jwang hore re tswele pele re sebeletsa Jehova ka botshepehi? (Baefese 3:16)

¹³ Na o ikutlwa o se na matla ka lebaka la bothata bo boima boo o ileng wa sebetsana le bona nakong e fetileng? Moya o halalelang o ka o matlafatsa hore o nne o tswele pele ho sebeletsa Jehova ka botshepehi. (Bala Baefese 3:16.) Nahana ka se ileng sa etsahalla moradi wa bo rona Flora. Yena le molekane wa hae e ne e le baromuwa. Molekane wa hae ha a ka a mo tshepahalla mme ba ile ba hlalana. O re: “Ke ne ke utlwile bohloko hoo ke neng ke dula ke nahana ka ho se tshepahale ha molekane wa ka bosiu le motshehare. Ke ile ka kopa Jehova hore a mphe matla a ho mamella. Jehova o ile a nthusa hore ke amohele mme ke ile ka fola, e leng ntho eo ke neng ke sa nahane hore e ka etsahala.” Ka lebaka lena Flora o kgodisehile le ho feta hore Jehova o tla mo thusa mathateng a hae. O re: “Ke ile ka bona ha mantswe a ho Pesaleme ya 119:32 a phethahala ho nna, a reng: ‘Ke tla latela ditaelo tsa hao ka pelo ya ka yohle hobane o nthusa hore ke di utlwisise.’”

14. Ke eng seo o ka se etsang ho dumella moya o halalelang hore o o thuse?

¹⁴ Ka mora hore o kope Jehova hore a o fe moya wa hae o halalelang, keng seo o lokelang ho se etsa? Etsa dintho tse tla etsa hore moya o halalelang o o thuse. Dintho tseo di akareletsa ho ba teng dibokeng le ho bua le batho ba bang ka Bibele. Bala Lentswe la Modimo ka mehla e le hore o dule o nahana ka dintho tse hlwekileng. (Bafil. 4:​8, 9) Ha o ntse o bala Bibele, ela hloko mehlala ya batho ba ileng ba kopana le mathata mme o nahanisise ka tsela eo Jehova a ileng a ba thusa hore ba mamelle. Sandra eo ho builweng ka yena qalong, o ile a  thulana le mathata a mangata. O re: “Pale ya bophelo ba Josefa e a mmatlafatsa, ha a ka a dumella hore mathata a ileng a mo hlahela a ame setswalle sa hae le Jehova.”—Gen. 39:​21-23.

JEHOVA O SEBEDISA BAKRESTEMMOHO LE RONA HO RE TSHEDISA

15. Re ka fumana matshediso ho bomang, hona ba ka re thusa jwang? (Sheba setshwantsho.)

¹⁵ Ha re ena le mathata, Bakrestemmoho le rona ‘ba ka re tshedisa haholo.’ (Bakol. 4:11) Jehova o a re bontsha hore o a re rata ka ho re fa bara le baradi ba bo rona. Ba ka re tshedisa ka ho re mamela le ho ba le rona ha re hlahelwa ke mathata. Ba ka re balla temana ya Bibele e kgothatsang kapa ba rapela le rona. d (Bar. 15:4) Ka dinako tse ding mora kapa moradi wa bo rona a ka re hopotsa hore na Jehova o ikutlwa jwang ka mathata a re hlahelang mme sena se ka re thusa hore re kgone ho mamella. Bakrestemmoho le rona ba ka boela ba re thusa ka ditsela tse ding jwalo ka ho re tlisetsa dijo nakong eo re nang le mathata.

16. O lokela ho etsang e le hore batho ba bang ba o thuse?

¹⁶ Ka dinako tse ding e le hore re fumane matshediso, ho ka hlokahala hore re kope thuso. Le hoja bara le baradi ba bo rona ba re rata ebile ba batla ho re thusa, ka dinako  tse ding ba ka se tsebe hore na re ikutlwa jwang le hore na re hloka eng. (Diprov. 17:17; 14:10) Ha o utlwile bohloko bua le metswalle ya hao e haufi o ba hlalosetse hore na ba ka o thusa jwang. O ka nna wa kgetha ho bua le moholo a le mong kapa ba babedi bao o tla phutholoha ha o na le bona. Ka dinako tse ding baradi ba bo rona ba ye ba ikutlwe ba sireletsehile ha ba buile le baradi ba bo rona ba bang.

17. Keng e ka etsang hore o se ke wa batla ho ba le bara le baradi ba bo rona, hona keng e ka o thusang ho hlola bothata boo?

¹⁷ Itlwaetse ho qeta nako o na le bara le baradi ba bo rona. Ho ka etsahala hore maemong a mang ha o utlwile bohloko, o batle ho ba moo o leng mong. Ho ka boela ha etsahala hore bara le baradi ba bo rona ba se ke ba o utlwisisa kapa ba bue ntho e o utlwisang bohloko. (Jak. 3:2) Le ha ho le jwalo, ka ha Jehova a ka ba sebedisa ho o kgothatsa, leka ho ba haufi le bona. Morabo rona e mong wa moholo ya bitswang Gavin ya nang le kgatello ya maikutlo o re: “Ka dinako tse ding ha ke batle ho bua le batho.” Empa maemong a mangata morabo rona enwa o dula a na le batho ebile ke yona ntho e mo thusang. Moradi wa bo rona Amy yena o re: “Ka lebaka la dintho tse nketsahaletseng bophelong, ha ho bonolo hore ke tshepe batho empa ke ntse ke ithuta ho etsisa Jehova ka hore ke rate batho le hore ke ba tshepe. Ke a thaba ha ke etsa jwalo ebile ke a tseba Jehova le yena o a thaba.”

HO TSHEPA JEHOVA HO KA RE TSHEDISA

18. Keng seo re se lebeletseng kamoso mme re ka etsang hona jwale?

¹⁸ Ka ha re a tseba hore Jehova o tlo re fodisa mmeleng le maikutlong, re ka dula re na le tshepo ya hore ho tla loka. (Tshen. 21:​3, 4) Ka nako eo re ‘ke ke ra hlola re hopola’ dintho tse re utlwisitseng bohloko. (Esa. 65:17) Re se re ithutile hore le hona jwale “Jehova o tlamisa maqeba” a rona. Ka hoo, o fe Jehova monyetla wa hore a o fodise a be a o tshedise. O dule o kgodisehile hore “o a o tsotella!”—1 Pet. 5:7.