Na o ne o Tseba?
Mmino e ne e le karolo ya bohlokwa bophelong ba Baiseraele ba mehleng ya pele
MMINO o ne o le bohlokwa haholo setsong sa Iseraele. Hangata Bibele e bua ka batho ba binang le ba letsang diletsa tsa mmino. Ha e le hantle, karolo e kgolo ya Bibele ke dipina. Ka mohlala, Dipesaleme, Sefela sa Difela le Dillo Tsa Jeremia ke dipina. Buka ya Music in Biblical Life e bontsha hore Bibele e bua ka mmino e le karolo ya bohlokwa bophelong ba letsatsi le letsatsi ba Baiseraele.
Bophelong ba letsatsi le letsatsi. Baiseraele ba ne ba bina e le ho bontsha ka moo ba ikutlwang ka teng. (Esa. 30:29) Meketeng basadi ba ne ba letsa meropa e menyenyane, ba bina ba thabile ba bile ba tantsha. Mekete ena e ne e akarelletsa mekete ya borapedi, ha ho behwa morena e motjha le ha masole a hlotse ntweng. (Baahl. 11:34; 1 Sam. 18:6, 7; 1 Mar. 1:39, 40) Baiseraele ba ne ba boetse ba bina ha ba siame. (2 Dikron. 35:25) Ho ya ka McClintock and Strong’s Cyclopedia ho hlakile hore “Baheberu ba ne ba rata mmino haholo.”
Ntlong ya borena. Marena a Iseraele a ne a rata mmino haholo. Morena Saule o ile a bitsetsa Davida ntlong ya borena hore a tlo mo letsetsa harepa. (1 Sam. 16:18, 23) Ha Davida e eba morena o ile a iketsetsa diletsa tsa mmino, a qapa dipina a boela a theha sehlopha sa mmino se neng se bina tempeleng ya Jehova. (2 Dikron. 7:6; Amose 6:5) Morena Solomone le yena o ne a ena le dibini tsa banna le basadi ntlong ya hae ya borena.—Moek. 2:8.
Borapeding. Habohlokwa le ho feta, Baiseraele ba ne ba rorisa Jehova ka pina. Ha e le hantle, ho ne ho ena le banna ba 4 000 ba neng ba letsa diletsa tsa mmino tempeleng Jerusalema. (1 Dikron. 23:5) Ba ne ba letsa disimbala, diletsa tsa dikgwele, diharepa le diterompeta. (2 Dikron. 5:12) Banna bana ba rupetsweng, e ne e se bona feela ba rorisang Jehova ka mmino. Baiseraele ba bangata ba ne ba bina dipina ha ba le leetong la selemo le selemo le yang moketeng Jerusalema. (Pes. 120-134) Ho latela dibuka tsa Bajuda, Baiseraele ba ne ba bina Dipesaleme tsa Hallel a nakong ya Paseka.
Mmino e ntse e le karolo ya bohlokwa ho batho ba Modimo. (Jak. 5:13) Re bina dipina ho rorisa Jehova. (Baef. 5:19) Mmino o etsa hore re ikutlwe re le haufi le Bakrestemmoho le rona. (Bakol. 3:16) O boetse wa re matlafatsa ha re ena le mathata. (Dik. 16:25) Mmino o re thusa ho bontsha Jehova hore re a mo rata ebile re dumela ho yena.
a Ho Bajuda, Dipesaleme tsa 113 ho ya ho 118, di tsebahala e le Dipesaleme tsa Hallel mme di ne di binwa ho rorisa Jehova.
