1, 2. Mohlala wa Samsone o ka re thusa jwang?

 KENG e tlang ka hloohong ya hao ha o utlwa lebitso Samsone? Mohlomong o nahana ka monna ya neng a ena le matla a sa tlwaelehang. Teng ke nnete o ne a le matla empa o ile a etsa qeto e fosahetseng e ileng ya mo tlisetsa ditlamorao tse bohloko. Ho ntse ho le jwalo, Jehova o ile a ameha haholo ka taba ya hore Samsone o ile a tshepahala mme o kenyeleditse pale ya hae ka Bibeleng e le hore e re tswele molemo.

² Jehova o ile a sebedisa Samsone ho etsa dintho tse kgolo e le hore a thuse setjhaba sa hae sa Iseraele. Dilemo tse makgolo ka mora hore Samsone a shwe, Jehova o ile a susumeletsa moapostola Pauluse hore a kenyeletse lebitso la Samsone lethathamong la batho ba neng ba ena le tumelo ka tsela e kgethehileng. (Baheb. 11:​32-34) Mohlala wa Samsone o ka re kgothatsa. O ile a tshepa Jehova le ha ho ne ho le boima. A re boneng hore na mohlala wa hae o ka re kgothatsa jwang le hore na re ka ithuta eng ho wona.

3. Jehova o ile a fa Samsone mosebetsi ofe?

³ Samsone o hlahile nakong eo Bafilista ba neng ba busa Baiseraele ba bile ba ba hatella. (Baahl. 13:1) Baiseraele ba ne ba sotlehile haholo ka lebaka la kgatello eo. Jehova o ile a kgetha Samsone hore e be yena “ya etellang pele ho pholosa Baiseraele ho Bafilista.” (Baahl. 13:5) E ne e le mosebetsi o boima haholo. E le hore Samsone a kgone ho phetha mosebetsi oo, o ne a tla lokela ho tshepa Jehova.

4. Jehova o ile a thusa Samsone jwang hore a ipholose ho Bafilista? (Baahlodi 15:​14-16)

 ⁴ Nahana ka mohlala ona o bontshang ka moo Samsone a ileng a tshepa Jehova le ka moo Jehova a ileng a mo thusa ka teng. Ka le leng lebotho la Bafilista le ile la tla motseng wa Lehi ho tla tshwara Samsone. E ka nna yaba Lehi e ne e le motse wa Juda. Banna ba Juda ba ne ba tshohile yaba ba etsa qeto ya ho fana ka Samsone ho ba direng. Batho ba habo Samsone ba ile ba mo tlama ka diropo tse pedi tse ntjha yaba ba mo isa ho Bafilista. (Baahl. 15:​9-13) Le ha ho le jwalo, ‘moya o halalelang wa Jehova wa mo fa matla’ yaba o kgaola diropo tseo. Ka mora moo, “a fumana lesapo la mohlahare wa tonki e tona e sa tswa shwa,” a le nka yaba o bolaya banna ba Bafilista ba 1 000 ka lona.—Bala Baahlodi 15:​14-16.

5. Taba ya hore ebe Samsone o ile a sebedisa mohlahare wa tonki e re rutang ka yena?

⁵ Ke hobaneng ha Samsone a ile a sebedisa mohlahare wa tonki? Ke mang ya ka lwanang ka mohlahare wa tonki? E tlameha ebe Samsone o ne a tseba hore Jehova ke yena ya neng a tla mo thusa ho hlola Bafilista ho sa tsotellehe hore na o sebedisa sebetsa sefe. Monna enwa ya nang le tumelo o ile a sebedisa seo a neng a ka se fumana hore a etse thato ya Jehova. Ho hlakile hore Jehova o ile a hlohonolofatsa Samsone haholo hobane a ne a mo tshepile.

6. Mohlala wa Samsone o ka re thusa jwang ha re lokela ho etsa mesebetsi eo Jehova a re fileng yona?

⁶ Le rona Jehova a ka re fa matla a ho etsa mesebetsi yohle eo a re fang yona le haeba e ka bonahala e le boima haholo. A ka re thusa ka tsela e ka re makatsang. Eba le tumelo ya hore Jehova o tla o thusa ho etsa thato ya hae feela jwalo ka ha a ile a thusa Samsone ha feela o mo tshepa.—Diprov. 16:3.

7. Ke mohlala ofe o bontshang hore ho bohlokwa ho batla tataiso ya Jehova?

⁷ Bana ba bo rona ba bangata ba etsang mesebetsi ya ho haha dibaka tsa borapedi ba bontshitse hore ba tshepa Jehova. Nakong e fetileng ba ne ba iketsetsa meralo ya Diholo Tsa Mmuso le mehaho e meng ba bile ba ikahela  yona. Le ha ho le jwalo, ha mokgatlo wa Jehova o ntse o hola, ba ile ba tlameha ho etsa dintho ka tsela e fapaneng. Bara ba bo rona ba etellang pele ba ile ba kopa tataiso ho Jehova yaba ba leka mekgwa e metjha e kang ho reka mehaho ebe ba a e ntjhafatsa. Dilemong tse sa tswa feta, Morabo rona Robert o ile a kenella mesebetsing e mengata ya ho hahwa ha dibaka tsa borapedi dinaheng tse ngata lefatsheng. O re: “Qalong ba bang ba ile ba thatafallwa ke ho amohela mokgwa ona o motjha wa tshebetso. O ne o fapane hole le oo re neng re tlwaetse ho o sebedisa ka dilemo tse ngata. Empa bana ba bo rona ba ile ba ikemisetsa ho fetoha le maemo mme ho bonahetse hore Jehova o hlohonolofatsa mokgwa ona o motjha wa ho sebetsa.” Ona ke mohlala o mong o bontshang ka moo Jehova a tataisang batho ba hae ka teng hore ba etse thato ya hae. Ho hotle hore nako le nako kaofela ha rona re ipotse potso ena, ‘Na ke batla tataiso ya Jehova le ho fetoha le maemo ha ke mo sebeletsa?’

8. Samsone o ile a etsang ka lekgetlo le leng ha a ne a nyorilwe haholo?

⁸ E ka nna yaba o kile wa bala ka dintho tse ding tse makatsang tseo Samsone a ileng a di etsa. O ile a bolaya tau a le mong yaba ha morao o bolaya banna ba 30 motseng wa Bafilista o bitswang Ashkelone. (Baahl. 14:​5, 6, 19) Samsone o ne a tseba hore a ka be a sa kgona ho etsa dintho tseo hoja Jehova a se ke a mo thusa. Taba eo e ile ya bonahala hantle ka lekgetlo le leng ha Samsone a ne a nyorilwe haholo ka mora hore a bolaye Bafilista ba 1 000. O ile a etsang? Ho ena le hore a ipatlele metsi, o ile a kopa Jehova hore a mo thuse.—Baahl. 15:18.

9. Jehova o ile a arabela thapelo ya Samsone jwang? (Baahlodi 15:19)

⁹ Jehova o ile a arabela thapelo ya Samsone ka ho etsa hore ho be le metsi ka mohlolo. Ha Samsone a nwa metsi ao, o ile “a boela a ba le matla.” (Bala Baahlodi 15:19.) Ho bonahala eka sediba seo metsi ana a ileng a tswa ho sona se ne se ntse se le teng dilemo tse ngata ha morao, ha moprofeta Samuele a susumetswa ke moya wa Modimo hore a ngole buka ya Baahlodi. E ka nna yaba Baiseraele ba ileng ba bona metsi a hlahang sedibeng seo ba ile ba hopola hore bahlanka ba Jehova ba ka tshepa hore o tla ba thusa nakong eo ba hlokang thuso.

10. Re lokela ho etsang e le hore Jehova a re thuse? (Sheba setshwantsho.)

¹⁰ Le rona re lokela ho kopa thuso ya Jehova ho sa tsotellehe hore na re na le ditalenta le bokgoni bofe kapa hore na ke dintho dife tseo re di finyeletseng tshebeletsong ya Jehova. Re lokela ho ikokobetsa mme re dumele hore re tla atleha ha feela re tshepile Jehova. Samsone o ile a fumana matla ha a ne a nwa metsi ao Jehova a mo fileng wona. Le rona re tla ba matla tumelong ha re sebedisa dintho tsohle tseo Jehova a re fang tsona.—Mat. 11:28.

11. Re ka bontsha jwang hore re tshepile Jehova hore a re thuse? Fana ka mohlala.

¹¹ Nahana ka mohlala wa Morabo rona Aleksey wa Russia ya mameletseng mahloriso a boima. Keng e mo thusitseng ho dula a le matla tlasa maemo aa a thata? Yena le mosadi wa hae ba rapela Jehova le ho ithuta Bibele ka mehla. O re: “Ke leka ho etsa hore letsatsi le letsatsi ke bale Bibele le hore ke ithute ka Jehova ka mehla. Hoseng ho hong le ho hong nna le mosadi wa ka re tshohla temana ya letsatsi le ho rapela Jehova.” Re ithutang tabeng ee? Re lokela ho tshepa Jehova ho ena le  hore re itshepe. Re ka bontsha jwang hore re a mo tshepa? Re lokela ho matlafatsa tumelo ya rona ka ho itlwaetsa ho etsa dintho tse kang ho ithuta Bibele, ho rapela le ho ya dibokeng le tshimong. Ha re etsa jwalo, Jehova o tla hlohonolofatsa boiteko ba rona ba ho mo sebeletsa. Re ka kgodiseha hore o tla re matlafatsa feela jwalo ka ha a ile a matlafatsa Samsone.

12. Ke qeto efe e fosahetseng eo Samsone a ileng a e etsa, hona e ne e fapane jwang le diqeto tseo a ileng a di etsa pele ho moo?

¹² Ka ha Samsone o ne a sa phethahala jwalo ka rona, ka dinako tse ding o ile a etsa diqeto tse fosahetseng. E nngwe ya diqeto tseo a ileng a di etsa e ile ya fella ka masisapelo. Samsone e ne e bile moahlodi ka nakwana ha “a kgahlwa ke mosadi e mong Kgohlong ya Soreke mme lebitso la mosadi eo e ne e le Delila.” (Baahl. 16:4) Pele ho moo, Samsone o ne a tlo nyala mosadi wa Mofilista empa qeto eo e ne “e susumetswa ke Jehova hobane o ne a batla monyetla wa ho lwantsha Bafilista.” Ha morao Samsone o ile a dula ntlong ya mosadi wa letekatse motseng wa Bafilista o bitswang Gaza. Ha a le motseng oo, Modimo o ile a mo fa matla a ho ntsha dikeiti tsa motse le ho tsamaya ka tsona yaba motse o sala o le lepalapaleng. (Baahl. 14:​1-4; 16:​1-3) Empa taba ya Delila yona e ne e fapane hobane ho ka etsahala hore ebe e ne e le Moiseraele.

13. Delila o ile a tswa Samsone tlase jwang?

¹³ Bafilista ba ile ba reka Delila ka tjhelete e ngata e le hore a tswe Samsone tlase. Na Samsone o ne a foufaditswe ke lerato hoo a ileng a sitwa ho bona hore na Delila o batla ho etsang? Ho sa tsotellehe hore na boemo e ne e le bofe, Delila o ile a phehella Samsone ka  makgetlo hore a mo bolelle hore na o nka matla a hae kae yaba Samsone o qetella a inehetse. Ka bomadimabe, Samsone o ile a ipeha boemong bo ileng ba etsa hore a lahlehelwe ke matla a hae le hore Jehova a mo lahle ka nakwana.—Baahl. 16:​16-20.

14. Samsone o ile a fumana ditholwana dife tse bosula ka lebaka la ho tshepa Delila?

¹⁴ Samsone o ile a fumana ditholwana tse bosula hobane a ile a tshepa Delila ho ena le ho tshepa Jehova. Bafilista ba ile ba mo tshwara yaba ba mo ntsha mahlo. O ile a kenngwa teronkong Gaza e leng wona motse wane oo a neng a ile a tlotlolla batho ba wona yaba e ba motho ya silang koro. Ha morao Bafilista ba ile ba tlotlolla Samsone nakong eo ba neng ba entse mokete. Ba ile ba etsetsa modimo wa bona wa bohata Dagone sehlabelo se seholo jwalo ka ha eka ke yena ya neng a ba file Samsone. Ba ile ba ntsha Samsone teronkong ba mo tlisa moketeng oo e le hore ‘a tlo ba qabola.’—Baahl. 16:​21-25.

15. Samsone o ile a bontsha jwang hore o se a tshepa Jehova hape? (Baahlodi 16:​28-30) (Sheba setshwantsho se ka ntle.)

¹⁵ Samsone o ne a entse phoso e kgolo empa ha a ka a tela. O ile a batla monyetla wa ho phetha thomo eo Modimo a neng a mo file yona ya ho lwantsha Bafilista. (Bala Baahlodi 16:​28-30.) Samsone o ile a rapela Jehova a re: “Ke kopa o nthuse . . . hore ke iphetetse ho Bafilista.” Modimo wa nnete o ile a araba kopo ya Samsone yaba o mo fa matla a sa tlwaelehang hape. Ka lebaka leo, Samsone o ile a atleha ho bolaya Bafilista ba bangata ho feta bao a neng a kile a ba bolaya pele ho moo.

16. Re ithuta eng phosong ya Samsone?

¹⁶ Le hoja Samsone a ile a fumana ditholwana tse bosula ka lebaka la phoso ya hae, ha a ka a kgaotsa ho leka ho etsa thato ya Jehova. Le haeba re ka etsa phoso yaba re a kgalemelwa kapa re lahlehelwa ke mosebetsi o itseng ka mokgatlong wa Jehova, ha re a lokela ho tela. Re lokela ho hopola hore Jehova o dula a ikemiseditse ho re tshwarela. (Pes. 103:​8-10) Le ha re entse diphoso, Jehova a ka tswela pele a re sebedisa feela jwalo ka ha a ile a sebedisa Samsone.

17, 18. Ke hobaneng ha mohlala wa Morabo rona Michael o o kgothatsa? (Sheba setshwantsho.)

¹⁷ Nahana ka mohlala wa morabo rona e motjha ya bitswang Michael. O ne a phathahane ka ho sebeletsa Jehova, e le mohlanka ya sebeletsang ebile e le pulamadiboho ya ka mehla.  Ka maswabi o ile a etsa phoso e ileng ya etsa hore a qetelle a amohuwe mesebetsi yohle eo a neng a e etsa ka phuthehong. O re: “Pele ho moo, ke ne ke phathahane haholo ka ho sebeletsa Jehova. Yaba ka ho panya ha leihlo, ke se ke utlwa eka ha ho sa na letho leo nka hlolang ke mo etsetsa lona. Ha ho mohla nkileng ka nahana hore Jehova a ka ntahla empa ke ne ke ipotsa hore na ebe setswalle sa ka le yena se tla ke se tshwane le pele. Hape ke ne ke ipotsa hore na ho na le mohla ke tla mo sebeletsa ka botlalo ka phuthehong jwalo ka ha ke ne ke ile ka etsa.”

¹⁸ Ditaba tse monate ke hore Morabo rona Michael ha a ka a tela. O re: “Ke ile ka sebetsa ka thata ho lokisa kamano ya ka le Jehova ka hore ka mehla ke mo rapele ho tswa pelong, ke ithute ke be ke nahanisise.” Ka mora nako Michael o ile a boela a tshwaneleha hore a ka sebediswa hape ka phuthehong. Hona jwale ke moholo ebile ke pulamadiboho ya ka mehla. O re: “Bana beso ka phuthehong, haholoholo baholo, ba ile ba ntshehetsa le ho nkgothatsa mme ntho eo e ile ya etsa hore ke bone hore Jehova o ntse a nthata. Hona jwale ke kgona ho sebeletsa hape ka phuthehong ka letswalo le kgutsitseng. Dintho tsena tse nketsahaletseng di nthutile hore Jehova o tla tshwarela mang kapa mang ya bakang e le ka nnete.” Re ka kgodiseha hore Jehova o tla re sebedisa a be a re hlohonolofatse le haeba re entse diphoso, ha feela re etsa sohle hore re di tlohele re bile re tswela pele ho mo tshepa.—Pes. 86:5; Diprov. 28:13.

19. Mohlala wa Samsone o o matlafaditse jwang?

¹⁹ Sehloohong sena re tshohlile tse ding tsa diketsahalo tse hlollang paleng ya Samsone. Le hoja a ne a sa phethahala, ha a ka a tlohela ho sebeletsa Jehova esita le ka mora hore a etse phoso tabeng ya Delila. Le Jehova o ile a tswela pele ho mo sebedisa ho etsa dintho tse kgolo. Hape Jehova o ile a nna a mo nka e le motho ya nang le tumelo ka tsela e kgethehileng a ba a mo kenyeletsa lethathamong la batho ba tshepahalang ba hlahang ho Baheberu kgaolo ya 11. Ka nnete ho a kgothatsa ho tseba hore re sebeletsa Ntate wa rona ya lehodimong ya re ratang, ya batlang ho re matlafatsa haholoholo ha re fokola. E se eka le rona jwalo ka Samsone re ka re ho Jehova: “Ke kopa o nkgopole mme o mmatlafatse.”—Baahl. 16:28.