1, 2. Taba ya hore Jehova o re bopile re ena le bokgoni ba ho thabiswa haholo ke ho fana ho feta ho fuwa e re tswela molemo jwang?

 HA JEHOVA a ne a bopa batho, o ba entse ba ena le bokgoni ba hore ba thabiswe haholo ke ho fana ho feta ho fuwa. (Dik. 20:35) Na see se bolela hore ha re thabe ha re fuwa ntho e itseng? Ha ho jwalo, hobane kaofela ha rona re a tseba hore re a thaba ha re fuwa mpho. Empa re thaba le ho feta ha e le rona ba fanang. Taba ya hore Jehova o re bopile ka tsela ena e re tswela molemo. Hobaneng?

² Tsela ena eo Jehova a re bopileng ka yona, e fa rona monyetla wa hore re eketse thabo ya rona. Re ka eketsa thabo ya rona ka hore re batle menyetla ya ho fana. Ho a thabisa hore ebe Jehova o re bopile ka tsela ena.—Pes. 139:14.

3. Ke hobaneng ha Bibele e re Jehova ke “Modimo ya thabileng”?

³ Bibele e re bolella hore ho fana ho a thabisa. Ke ka hoo re nolofallwang ke ho utlwisisa hore na ke hobaneng ha e re Jehova ke “Modimo ya thabileng.” (1 Tim. 1:11) Modimo ke yena wa pele wa ho fana ebile ha ho na motho ya ka fanang ho mo feta. Moapostola Pauluse o ile a re: “Ke ka yena re phelang, re sisinyehang mme re leng teng.” (Dik. 17:28) Ka nnete “mpho e nngwe le e nngwe e molemo le ntho e nngwe le e nngwe e phethahetseng” e tswa ho Jehova.—Jak. 1:17.

4. Ke eng e tla re thusa hore re thabe haholwanyane?

⁴ Boholo ba rona re ka thabela ho utlwa hore na ho jwang ho thaba haholwanyane ka lebaka la ho fana. Re ka etsa jwalo ka hore re etsise tsela eo Jehova a fanang ka yona. (Baef. 5:1) Ha re ntse re ithuta sehlooho sena, hlokomela hore na re ka etsang haeba re utlwa eka batho bao re ba thusang ha ba ananele seo re ba etsetsang sona. Dikgopotso tsena di tla re thusa hore re dule re thabile re be re eketse thabo eo re e fumanang ha re fana.

 ETSISA JEHOVA KA HORE O BE MOTHO YA FANANG

5. Ke dintho dife tseo Jehova a re fang tsona?

⁵ Jehova o bontsha ka ditsela dife hore o a fana? A re hlahlobeng mehlala e mmalwa. Jehova o re fa dintho tseo re di hlokang. Ha se ka mehla Jehova a re fang dintho tseo re di batlang, empa o etsa bonnete ba hore re dula re ena le dintho tseo re di hlokang. Ka mohlala, o re thusa hore re be le dijo, diaparo le bodulo. (Pes. 4:8; Mat. 6:​31-33; 1 Tim. 6:​6-8) Na Jehova o re fa dintho tseo re di hlokang hobane a tlamehile? Ha ho jwalo! Empa jwale ke hobaneng ha Jehova a re fa tsona?

6. Re ithutang ho Matheu 6:​25, 26?

⁶ Ka mantswe a bonolo feela, Jehova o re fa dintho tseo re di hlokang hobane a re rata. A re hlahlobeng mantswe a Jesu a hlahang ho Matheu 6:​25, 26. (E bale.) Ditemaneng tsena, Jesu o etsa mehlala ka popo. Ha Jesu a bua ka dinonyana, o ile a re: “Ha di jale peo le ha e le ho kotula kapa ho boloka dijo ka setorong.” Le ha ho le jwalo, mantsweng a hae a latelang o ile a re: “Ntate wa lona ya lehodimong o a di fepa.” Ka mora moo Jesu o a botsa o re: “Na ha le bohlokwa ho di feta?” Re ithutang? Jehova o nka bahlanka ba hae ba tshepahalang e le ba bohlokwa ho feta diphoofolo. Haeba Jehova a kgona ho hlokomela diphoofolo, re ka kgodiseha hore le rona o tla re hlokomela. Feela jwalo ka ha ntate ya lerato a hlokomela lelapa la hae, Jehova o hlokomela lelapa la hae hobane a le rata.—Pes. 145:16; Mat. 6:32.

7. Re ka etsisa tsela eo Jehova a fanang ka yona jwang? (Sheba setshwantsho.)

⁷ Jwalo ka Jehova, re ka bontsha batho ba bang hore re a ba rata ka ho ba thusa ka dintho tseo ba di hlokang. Ka mohlala, na o tseba Mokrestemmoho le wena ya hlokang dijo kapa diaparo? Jehova a ka o sebedisa ho mo thusa ka dintho tseo a di hlokang. Bahlanka ba Jehova ba tsebahala ka ho thusa ha ho hlahile dikoduwa. Ka mohlala, nakong ya sewa sa COVID-19, bara le baradi ba bo rona ba ile ba arolelana dijo, diaparo le dintho tse ding le batho ba neng ba di hloka. Ba bangata ba ile ba boela ba thusa ka hore ba fane ka menehelo mosebetsing wa lefatshe lohle. Menehelo ena e ile ya thusa bara le baradi ba bo rona lefatsheng lohle ba neng ba hloka thuso ka lebaka la koduwa eo. Ba ile ba sebedisa keletso e hlahang ho Baheberu 13:16 e reng: “Le se ke la lebala ho etsa dintho tse molemo le ho arolela ba bang dintho tseo le nang le tsona hobane Modimo o thabiswa ke mahlabelo a jwalo.”

8. Matla a Jehova a re tswela molemo jwang? (Bafilipi 2:13)

⁸ Jehova o fana ka matla. Jehova o na le matla  a sa feleng mme o thabela ho a arolela bahlanka ba hae ba tshepahalang. (Bala Bafilipi 2:13.) Na o kile wa rapela Jehova hore a o fe matla a ho hlola teko e itseng kapa a o thuse ho mamella boemo bo boima? Mohlomong o kile wa rapella hore a o fe matla ao o a hlokang bakeng sa ho phetha mosebetsi wa letsatsi. Ha o hlokomela hore Jehova o arabetse thapelo ya hao, e ka nna yaba o ile wa dumellana le mantswe a moapostola Pauluse, a reng: “Ke na le matla a ho etsa dintho tsohle ka lebaka la ya mphang matla.”—Bafil. 4:13.

9. Re ka etsisa tsela eo Jehova a sebedisang matla ka yona jwang? (Sheba setshwantsho.)

⁹ Le hoja re sa phethahala, re ka etsisa tsela eo Jehova a sebedisang matla ka yona. Ka ha rona ha re kgone ho fa ba bang matla ao re nang le ona, re ka a sebedisa ho ba thusa. Ka mohlala, re ka kgona ho thusa Bakrestemmoho le rona ba kulang kapa ba hodileng ka ho hlwekisa malapeng a bona kapa re ba ele mabenkeleng. Haeba maemo a rona a dumela, re ka ithaopela ho hlwekisa le ho hlokomela Holo ya Mmuso. Haeba re sebedisa matla a rona ka tsela ena, re tla be re thusa bara le baradi ba bo rona.

10. Re ka kgothatsa batho ba bang jwang ka seo re se buang?

¹⁰ Ntho e nngwe eo re sa lokelang ho e lebala ke hore re ka kgona ho kgothatsa ba bang ka seo re se buang. Na ho na le motho eo o mo tsebang eo o ka mo kgothatsang ka hore o mo babatse? Na ho na le motho eo o mo tsebang ya hlokang ho tshediswa? Haeba ho jwalo, o se ke wa dieha ho ya ho motho eo. O ka ya ho motho eo ka ho toba, kapa wa mo founela kapa wa mo romela molaetsa o kgothatsang ka karete, e-mail kapa ka fono. O se ke wa tshwenyeha haholo ka hore na o tla reng. Mantswe a seng makae feela a tswang pelong, e ka ba sona seo Mokreste-mmoho le wena a se hlokang e le hore a tswele pele ho tshepahalla Jehova kapa hore a mamelle boemo boo a leng ho bona.—Diprov. 12:25; Baef. 4:29.

11. Jehova o sebedisa bohlale ba hae jwang?

¹¹ Jehova o fana ka bohlale. Jakobo o ile a re: “Haeba mang kapa mang ho lona a haellwa ke bohlale, a nne a bo kope ho Modimo mme o tla bo fuwa hobane Modimo o fana ka seatla se bulehileng ho bohle a bile a sa nyefole.” (Jak. 1:5; nal.) Jwalo ka ha mantswe ana a bontsha, Jehova ha a timane ka bohlale ba hae. O bo fa le batho ba bang. Hlokomela hore Jakobo o itse ha Jehova a fana ka bohlale, o fana ka bona “a sa ahlole,” kapa “a sa nyefole.” Le ka mohla, ha a etse hore re ikutlwe re le basesaane ha re kopa tataiso ya hae. Ho ena le hoo, o re kgothaletsa hore re e batle.—Diprov. 2:​1-6.

12. Re na le menyetla efe ya ho arolelana le ba bang bohlale boo re nang le bona?

¹² Na le rona re ka kgona ho etsisa Jehova ka hore re arolele ba bang bohlale boo re nang le bona? (Pes. 32:8) Bahlanka ba Jehova ba na le menyetla e mengata ya hore ba arolele ba bang  seo ba ithutileng sona. Ka mohlala, hangata re kwetlisa ba batjha hore ba atlehe mosebetsing wa boboledi. Baholo ha ba fele pelo ha ba thusa bahlanka ba sebeletsang le bara babo rona ba kolobeditsweng hore ba ithute ho etsa mesebetsi e itseng ka phuthehong. Bara le baradi ba bo rona ba nang le boiphihlelo mosebetsing wa kaho le wa ho hlokomela dibaka tsa rona tsa borapedi, ba kwetlisa ba se nang boiphihlelo hore le bona ba atlehe ho etsa mosebetsi ona.

13. Ha re kwetlisa ba bang, re ka etsisa tsela eo Jehova a arolelang ba bang bohlale ka yona jwang?

¹³ Batho ba kwetlisang ba bang, ba tla be ba etsa hantle haeba ba etsisa tsela eo Jehova a fang ba bang bohlale ka yona. Hopola hore Jehova o thabela ho arolela ba bang bohlale ba hae. Ka tsela e tshwanang, re lokela ho arolela batho ba ntseng ba ithuta tsebo le boiphihlelo boo re nang le bona. Ha re timane ka tsebo eo re nang le yona hobane feela re tshaba hore motho eo re mo rutang o tla re nkela mosebetsi kapa boikarabelo bo itseng. Hape ha re a lokela ho ba le maikutlo a ho re: ‘Ha ho na motho ya nkwetlisitseng! Ka hoo, e mong le e mong o lokela ho hela a itlamela.’ Maikutlo a jwalo ha a lokela ho ba teng hara batho ba Jehova. Ho ena le hoo, ha re thabele feela ho fetisa tsebo eo re nang le yona, empa re ikemiseditse “ho tela bophelo ba rona” bakeng sa batho bao re ba kwetlisang. (1 Bathes. 2:8) Ha re ruta ba bang dintho tseo re di tsebang, re batla hore ‘le bona ba tshwanelehe ho di ruta ba bang.’ (2 Tim. 2:​1, 2) Haeba re thabela ho kwetlisa ba bang, kaofela ha rona re tla ba bohlale mme re thabe.

RE KA ETSANG HAEBA BA BANG BA SA ANANELE THUSO YA RONA?

14. Batho ba bangata ba etsang ha re ba thusa?

¹⁴ Hangata haeba re thusa kapa re etsetsa bara le baradi ba bo rona ntho e itseng, ba a re leboha. Ba ka re romela molaetsa kapa ba bontsha ka ditsela tse itseng hore ba a leboha. (Bakol. 3:15) Ha ba bontsha kananelo ka tsela e jwalo, re thaba le ho feta.

15. Re lokela ho etsa eng haeba batho ba bang ba sa bontshe kananelo?

¹⁵ Ha se ka mehla batho ba bang ba bontshang kananelo ha ba thusitswe. Ka dinako tse ding, re ka tela nako, matla le dintho tseo re nang le tsona ho thusa motho e mong empa ka mora moo ha bonahala eka ha a bontshe kananelo. Ha seo se etsahala, re ka etsang hore re dule re thabile ebile re sa nyahame? Hopola mantswe a hlahang ho Diketso 20:​35, e leng lengolo la rona la sehlooho. Thabo ya rona ha ya itshetleha ka hore na batho ba a leboha kapa tjhe. Re ntse re ka kgona ho thabela ho ba batho ba fanang, le hoja ho bonahala eka ba bang ha ba ananele seo re ba etsetsang sona. Re ka thuswa ke eng? A re hlahlobeng dintlha tsena tse mmalwa.

16. Re lokela ho ameha ka eng ha re fana?

¹⁶ Re amehe ka ho etsisa Jehova. O fa batho bohle dintho tse molemo, ho sa tsotellehe hore na ba a di ananela kapa tjhe. (Mat. 5:​43-48) Jehova o tshepisa hore haeba re fana ‘re sa lebella hore re patalwe, moputso wa rona o tla ba moholo.’ (Luka 6:35) Ka hoo, o se ke wa ikutlwa o nyahame haeba ka dinako tse ding batho ba sa bontshe hore ba ananela seo o ba etseditseng sona. Hopola hore Jehova o tla o hlohonolofatsa ka lebaka la ho etsetsa ba bang dintho tse molemo, hobane Jehova “o rata motho ya fanang a thabile.”—Diprov. 19:17; 2 Bakor. 9:7.

17. Ke lebaka lefe le ka sehloohong le lokelang ho re susumelletsa ho fana? (Luka 14:​12-14)

¹⁷ Ntho e nngwe e ka re thusang ho etsisa Jehova ha re fana, ke ho sebedisa mantswe ao Jesu a a buileng ho Luka 14:​12-14. (E bale.) Ha se phoso ho bontsha ba bang mosa le ho ba memela dijong ebe ha morao le bona ba etsa se tshwanang. Empa ho thweng haeba re hlokomela hore re fana hobane le rona re lebeletse se seng? Haeba ho jwalo, leka ho etsa seo Jesu a se buileng. Re ka mema motho eo re tsebang hore a ke ke a ba le bokgoni ba ho re mema. Seo se tla re  thabisa hobane re tla be re etsisa Jehova. Hape haeba re fana re sa lebella letho ho batho ba bang, re tla dula re thabile le haeba ba sa bontshe kananelo.

18. Ke eng seo re sa lokelang ho se etsa, hona hobaneng?

¹⁸ O se ke wa nahana hore batho ba bang ha ba na kananelo. (1 Bakor. 13:7) Ha ba bang ba sa bontshe kananelo, re lokela ho ipotsa: ‘Na ehlile ha ba ananele, kapa ke feela hore ba mpa ba lebetse ho bontsha kananelo?’ Mohlomong ho na le mabaka a entseng hore ba se ke ba re leboha ka tsela eo re neng re e lebeletse. Le hoja ba bang ba ananela, ho ka ba thata ho bontsha kananelo eo. E ka nna yaba ba bang ba hlajwa ke dihlong hobane nakong e fetileng, ba ne ba kgona ho fana mme hona jwale ha ba sa kgona. Empa haeba re rata bara le baradi ba bo rona e le ka nnete, re ke ke ra nahana dintho tse mpe ka bona mme re tla tswela pele re fana re thabile.—Baef. 4:2.

19, 20. Ke hobaneng ha mamello e le ya bohlokwa ha re fana? (Sheba setshwantsho.)

¹⁹ Eba le mamello. Morena Solomone ya bohlale, o ile a re ha a bua ka ho fana: “Lahlela bohobe ba hao ka metsing ka ha ka mora matsatsi a mangata o tla boela o bo fumane.” (Moek. 11:1) Sena se re ruta hore batho ba bang ba ka bontsha kananelo ka mora nako e telele. Sena ke se ileng sa etsahalla moradi wa bo rona e mong.

²⁰ Dilemo tse ngata tse fetileng, mosadi wa mopotolohi o ile a ngolla moradi wa bo rona e mong ya neng a sa tswa kolobetswa lengolo, a mo kgothaletsa hore a dule a tshepahala. Hoo e ka bang ka mora dilemo tse robedi, moradi wa bo rona eo le yena o ile a ngolla mosadi wa mopotolohi lengolo, a re: “Le hoja o sa tsebe sena, o nthusitse haholo dilemong tse fetileng.” Ha a tswela pele o ile a re: “[O ile wa ngolla] mantswe a mosa, mme ha ke lebale temana eo o ileng wa bua ka yona.” a Ka mora hore a hlalose mathata ao a kopaneng le ona dilemong tse fetileng, o ile a re: “Ka dinako tse ding ke ne ke batla ho kgaotsa ho sebeletsa Jehova, empa ke ne ke dula ke  hopola temana eo o ileng wa ngolla yona, mme seo se ile sa etsa hore ke be le matla a . . . ho dula ke tshepahala.” O ile a tswela pele ho re: “Dilemong tseo tse robedi, ke ile ka kgothatswa haholo ke lengolo le temana eo o ileng wa nngolla yona.” A ko nahane feela hore na mosadi wa mopotolohi o ile a ikutlwa a thabile hakaakang ha a fumana lengolo lena ka mora dilemo tseo tse ngata! Ka ho tshwanang, le rona batho ba ka nna ba bontsha hore ba ananela dintho tseo re ileng ra ba etsetsa tsona, nako e telele ka mora hore re ba etsetse tsona.

21. Ke hobaneng ha re ikemiseditse ho dula re etsisa Jehova ka hore re be batho ba fanang?

²¹ Jwalo ka ha ho boletswe, Jehova o re bopile re ena le bokgoni bo ikgethang. O re bopile ka tsela e tla etsa hore re thabe ha re fana ho feta ha re fuwa. Re a thaba ha re kgona ho thusa Bakrestemmoho le rona. Re boetse re a thaba ha ba bontsha kananelo. Ebang motho eo re mo etsetsang ntho e itseng o bontsha kananelo kapa tjhe, re thabiswa ke hore re entse se nepahetseng. Ho sa tsotellehe hore na ke eng eo o fanang ka yona, Jehova a ka o fa se sengata ho feta seo. (2 Dikron. 25:9) Jehova o tla dula a fana ka dintho tse ngata ho feta tseo re fanang ka tsona! Ha ho na ntho e thabisang ho feta ho putswa ke Jehova. Ka hoo, a re ikemisetseng ho etsisa Ntate wa rona ya fanang ka seatla se bulehileng.