1, 2. Bahlanka ba Modimo ba thabiswa ke eng? (Jakobo 1:​22-25)

 JEHOVA le Mora wa hae ba batla hore re thabe. Mongodi wa Pesaleme ya 119:2 o ile a re: “Ho thaba batho ba etsang dintho tseo a ba hopotsang tsona, ba mo batlang ka dipelo tsohle tsa bona.” Jesu o ile a re: “Ho thaba ba mamelang lentswe la Modimo mme ba le boloka.”—Luka 11:28.

² Rona batho ba Jehova, re batho ba thabileng. Re thabiswa ke eng? Mabaka a mangata a etsang hore re thabe, empa la bohlokwa ke hobane re bala Lentswe la Modimo ka mehla mme re leka ka hohle ho sebedisa seo re ithutang sona.—Bala Jakobo 1:​22-25.

3. Re fumana melemo efe ha re sebedisa seo re se balang Lentsweng la Modimo?

³ Ho na le melemo eo re e fumanang ha re ‘etsa dintho tseo lentswe la Modimo le di buang.’ Ka mohlala, ha re sebedisa seo re ithutang sona, re thabisa Jehova mme seo se etsa hore re thabe. (Moek. 12:13) Ha re mamela keletso e ka Lentsweng la Modimo, re ba le kamano e ntle le Bakrestemmoho le ba lelapa. Ho ka etsahala hore ebe o na le bopaki ba sena. Ho feta moo, re qoba mathata a mangata a hlahelang batho ba sa mameleng Jehova. Re dumellana le seo Morena Davida a ileng a se bua ka mora hore a bue ka molao, ditaelo le dikahlolo tsa Jehova pineng ya hae. O ile a re ka tsona: “Ya di mamelang o fumana moputso o moholo.”—Pes. 19:​7-11.

4. Ke hobaneng ha ka dinako tse ding ho se bonolo ho etsa dintho tseo Lentswe la Modimo le di buang?

⁴ Nnete ke hore ha se ka mehla ho leng bonolo ho etsa dintho  tseo Lentswe la Modimo le di buang. Ka hoo, re lokela ho ipha nako ya ho bala le ho ithuta Bibele e le hore re utlwisise seo Jehova a batlang hore re se etse. A re boneng hore na ke eng e ka re thusang hore re bale Bibele ka mehla. Re tla boela re bue ka dintho tse ka re thusang hore re nahane ka seo re se badileng le ho sebedisa seo re ithutileng sona.

IPHE NAKO YA HO BALA LENTSWE LA MODIMO

5. Re phathahane ka eng?

⁵ Boholo ba batho ba Jehova ba phathahane haholo. Re qeta nako e ngata re etsa dintho tseo Bibele e reng ke tsa bohlokwa. Ka mohlala, ba bang ba rona re a sebetsa e le hore re itlhokomele re be re hlokomele ba malapa a rona. (1 Tim. 5:8) Boholo ba Bakreste ba hlokomela ba malapa ba kulang kapa ba tsofetseng mme kaofela ha rona re qeta nako re itlhokomela. Ho ekelletsa moo, re na le dikabelo tseo re lokelang ho di phetha ka phuthehong. Ntho e nngwe ya bohlokwa eo re lokelang ho dula re e etsa ke ho bolella batho ditaba tse monate tsa Mmuso ka tjheseho. Ka hoo, ha o nahana ka dintho tseo wena o lokelang ho di etsa, o ka fumana nako ya ho bala Bibele ka mehla, ho thuisa ka seo o se balang le ho sebedisa seo o ithutileng sona jwang?

6. O ka etsang hore ho bala Bibele ebe yona ntho e tlang pele? (Sheba setshwantsho.)

⁶ Ha pesaleme ya pele e bua ka motho ya thabileng e re: “O thabela molao wa Jehova, o bala molao wa Hae le ho nahanisisa ka wona bosiu le motshehare.” (Pes. 1:​1, 2) Ka hoo, ho bala Bibele ke e nngwe ya “dintho tsa bohlokwa haholo” eo Mokreste e mong le e mong a lokelang ho e etsa. (Bafil. 1:10) Ho hlakile hore re lokela ho ipha nako ya ho bala Bibele. O lokela ho bala Bibele neng? Ho itshetlehile ka maemo a hao. Morabo rona Victor o re: “Le hoja ke sa rate ho tsoha hoseng, ke rata ho bala Bibele hoseng hobane ha ho na dintho tse ngata tse ntshitisang ebile ka nako eo kelello ya ka e hlaphohetswe hape ke kgona ho tsepamisa mohopolo.” Mohlomong le wena boemo ba hao bo tshwana le ba Victor. Ipotse, ‘Ke  nako efe e molemo eo nka kgonang ho bala Bibele ka yona?’

NAHANISISA KA SEO O SE BALANG

7, 8. Ke eng e ka re sitisang ho rua molemo ka ho feletseng ha re bala Bibele? Fana ka mohlala.

⁷ Nnete ke hore re ka bala boitsebiso bo bongata empa re be re sa nahanisise ka bona. Na o kile wa bala ntho e itseng ebe ka mora nakwana o a lebala hore na o ne o ntse o bala ka eng? Kaofela ha rona re kile ra etsahallwa ke ntho e tshwanang. Ka maswabi, sena se ka etsahala le ha re bala Bibele. Mohlomong o ipehetse pakane ya ho bala dikgaolo tse itseng tsa Bibele ka letsatsi. Ka nnete re a o babatsa. Re lokela ho tshepahalla dipakane tseo re ipehetseng tsona. (1 Bakor. 9:26) Le ha ho le jwalo, ho bala Bibele e mpa e le qalo. Ho na le dintho tse ding tseo re lokelang ho di etsa e le hore re rue molemo ho yona.

⁸ Nahana ka papiso ena: Dijalo di hloka pula e le hore di hole. Empa ha pula eo e ka na ka sekgahla, ha e di thuse hobane metsi a a di kgama. Ha pula e sa ne ka sekgahla, mobu o tlo kgona ho monya metsi ebe dijalo di rua molemo. Ka tsela e tshwanang, re lokela ho qoba ho bala Bibele kapele, hoo re sa kgoneng ho nahanisisa ka seo re se balang le ho se sebedisa.—Jak. 1:24.

9. Re ka etsang haeba re hlokomela hore re se re ena le tlwaelo ya ho bala Bibele kapele feela re feta?

⁹ O ka etsang haeba o tlwaetse ho bala Bibele kapele feela o feta? Kga moya, o iphe nako ya ho nahana ka seo o se balang kapa seo o sa tswa se bala. Taba ena ha e thata. O ka leka ho eketsa nako eo o balang ka yona e le hore o iphe nako ya ho nahanisisa, kapa wa kgetha ho bala ditemana tse mmalwa feela e le hore ka nako e setseng o kgone ho nahana ka seo o se badileng. Morabo rona Victor eo re buileng ka yena pejana, o re: “Ke bala ditemana tse mmalwa feela ka letsatsi, mohlomong kgaolo e le nngwe feela. Ka ha ke bala hoseng, ke kgona ho dula ke nahanisisa ka seo ke se badileng letshehare lohle.” Ho sa tsotellehe hore na o bala neng, ntho ya bohlokwa ke hore o bale ka lebelo le o loketseng, le tla o thusa hore o rue molemo ho seo o se balang.—Pes. 119:97; sheba  lebokose le reng “ Dipotso Tseo o ka Ipotsang Tsona.”

10. Fana ka mohlala o bontshang hore na o ka etsang hore o sebedise seo o se balang. (1 Bathesalonika 5:​17, 18)

¹⁰ Etsa bonnete ba hore o sebedisa dintho tseo o ithutileng tsona ho sa tsotellehe hore na o bala Bibele neng le hore na o qeta nako e kae o ntse o e bala. Ha o ntse o bala ditemana tse itseng, o ka ipotsa, ‘Nka sebedisa seo ke ithutang sona jwang kajeno kapa nakong e tlang?’ Ka mohlala, a re re o ntse o bala 1 Bathesalonika 5:​17, 18. (E bale.) Ka mora hore o bale ditemana tsena tse pedi, o ka ema hanyane mme wa ipotsa: ‘Thapelo ya ka e tebile hakae, hona ke rapela hakae ka letsatsi?’ O ka boela wa nahana ka dintho tseo o ka lebohang Jehova ka tsona. Mohlomong o ka leboha Jehova ka dintho tse tharo tseo a o etseditseng tsona bophelong. Le ha o ka nka metsotso e mmalwa feela o nahanisisa ka seo o se badileng ka Bibeleng, seo se ka o thusa hore o be motho ya etsang seo Lentswe la Modimo le se buang. Nahana feela hore na o tla rua molemo hakae ha o etsa dintho tsena letsatsi le letsatsi ha o bala Bibele. Ka nnete o tla phetha seo Lentswe la Modimo le se buang. Empa ho thweng haeba ho bonahala eka o na le dintho tse ngata tseo o lokelang ho sebeletsa ho tsona?

EBA LE DIPAKANE TSEO O KA KGONANG HO DI FINYELLA

11. Ke hobaneng ha ka dinako tse ding o ka ikutlwa o nyahame ha o bala Bibele? Fana ka mohlala.

¹¹ Ka dinako tse ding ha o bala Bibele, o ka ikutlwa o nyahama ha o hlokomela hore ho na le dintho tse ngata tseo o lokelang ho ntlafatsa ho tsona. Nahana ka sena: Ha re re o ntse o bala Bibele, mme kgaolo eo o e balang e bua ka hore o se ke wa kgetholla batho ba bang. (Jak. 2:​1-8) Jwale, o a hlokomela hore o lokela ho ntlafatsa tseleng eo o tshwarang batho ba bang ka yona mme o etsa qeto ya hore o tla etsa diphetoho. Ha o etsa jwalo, o tla be o etsa hantle! Jwale letsatsing la bobedi, o bala ditemana tse buang ka bohlokwa ba ho laola tsela eo o buang ka yona. (Jak. 3:​1-12) O a hlokomela hore ka makgetlo o ye o bue dintho tse seng hantle ho batho ba bang. Ka hoo, o etsa qeto ya hore o tla bua dintho tse hahang batho ba bang. Letsatsing la boraro, o bala ditemana tse lemosang ka ho ba motswalle wa lefatshe. (Jak. 4:​4-12) Le teng o a hlokomela hore o lokela ho ntlafatsa tseleng eo o kgethang boithabiso ka yona. Letsatsing la bone, o ka nna wa ikutlwa o nyahame ha o nahana ka dintho tse ngata tseo o lokelang ho ntlafatsa ho tsona.

12. Ke hobaneng ha o sa lokela ho nyahama ha o ntse o bala Bibele mme o hlokomela hore ho na le moo o lokelang ho ntlafatsa teng? (Sheba naletsana.)

 ¹² Haeba o hlokomela hore o lokela ho etsa diphetoho kapa ho ntlafatsa dinthong tse ngata, o se ke wa nyahama. Sena se bontsha hore o motho ya ikokobeditseng ebile o na le sepheo se setle. Ha o bala Bibele o se ke wa ithetsa. E bale ka sepheo sa hore e o thuse ho ntlafatsa tsela eo o phelang ka yona. Ha o etsa jwalo, o tla be o bontsha hore o motho ya ikokobeditseng. a Hopola hore re lokela ho dula re apara “botho bo botjha.” (Bakol. 3:10) Keng e tla o thusa hore o dule o etsa dintho tseo Lentswe la Modimo le di buang?

13. Ke tsela efe e molemo e ka o thusang hore o etse diphetoho tseo o lokelang ho di etsa? (Sheba setshwantsho.)

¹³ Ho ena le hore o leke ho ntlafatsa dintho tsohle tseo o fumaneng hore o hloka ho etsa diphetoho ho tsona, leka ho sebeletsa ho e le nngwe ka nako. (Diprov. 11:2) O ka leka sena: Ngola dintho tseo o lokelang ho ntlafatsa ho tsona, ebe ka mora moo o kgetha e le nngwe kapa tse pedi tseo o ka qalang ka tsona, ebe tse ding o tla di bona ha morao. O lokela ho qala ka dife?

14. O ka qala ka ho etsa eng?

¹⁴ O ka qala ka ntho eo ho leng bonolo hore o sebeletse ho yona kapa o ka kgetha ho sebeletsa nthong eo o haellang haholo ho yona. Ha o se o kgethile ntho eo o lokelang ho ntlafatsa ho yona, o ka etsa dipatlisiso o sebedisa dingolwa tsa rona, mohlomong o ka sebedisa Watch Tower Publications Index kapa Tataiso ya ho Etsa Dipatlisiso ya Dipaki Tsa Jehova. Kopa Jehova hore a o fe ‘tabatabelo le matla a hore o etse dintho tse mo kgahlisang.’ (Bafil. 2:13) Ka mora moo, o sebedise seo o ithutileng  sona. Ha o hlokomela hore o kgonne ho ntlafatsa nthong e le nngwe eo o neng o batla ho sebeletsa ho yona, seo se ka etsa hore o bone hore o ka kgona ho ntlafatsa ho tse ding.

DUMELLA LENTSWE LA MODIMO HORE LE O “THUSE”

15. Bahlanka ba Jehova ba fapane jwang le batho ba reng ba bala Bibele? (1 Bathesalonika 2:13)

¹⁵ Batho ba bang ba re ba se ba badile Bibele ka makgetlo a mangata. Empa na ka nnete ba dumela seo Bibele e se buang? Na ba a e sebedisa bophelong ba bona? Ka maswabi, karabo ke tjhe. Empa bahlanka ba Jehova bona ba nka Bibele e le ya bohlokwa. Jwalo ka Bakreste ba lekgolong la pele la dilemo, re nka Bibele “e le lentswe la Modimo hobane ka nnete ke lona.” Re etsa sohle seo re ka se kgonang ho sebedisa seo Bibele e se buang bophelong ba rona.—Bala 1 Bathesalonika 2:13.

16. Ke eng e ka re thusang hore re etse dintho tseo Lentswe le di buang?

¹⁶ Ha se ka mehla ho leng bonolo ho bala le ho sebedisa seo re ithutang sona ka Lentsweng la Modimo. Mohlomong re ka thatafallwa ke ho fumana nako ya ho e bala kapa re ka e bala re tatile ebe ha re nahanisise ka seo re ithutang sona. Maemong a mang re ka utlwa re nyahamiswa ke dintho tse ngata tseo re lokelang ho ntlafatsa ho tsona. Haeba o bona eka bothata ba hao bo tshwana le thaba, tseba hore o ka e hlwa ka thuso ya Jehova. E se eka re ka ikemisetsa ho amohela thuso ya Jehova le ho se lebale seo re ithutileng sona mme re etse dintho tseo Lentswe le di buang. Re tla dula re thabile haeba re bala Lentswe la Modimo le ho le sebedisa bophelong ba rona.—Jak. 1:25.