Ke hlahile ka 1934 mme batswadi ba ka ba ne ba tswa naheng ya Switzerland, ba fallela Timmins, toropong ya dimmaene e Ontario, Canada. Hoo e ka bang ka selemo sa 1939, mme wa ka o ile a bala makasine ya Tora ya ho Lebela a ba a qala ho ya dibokeng tsa Dipaki Tsa Jehova. O ne a tlwaetse ho tsamaya le nna le bana beso ba tsheletseng mme ka mora nako e seng kae, e ile ya eba Paki ya Jehova.

Le hoja ntate wa ka a ne a sa thaba ka qeto eo a e entseng, mme wa ka o ne a rata nnete mme a sa ikemisetsa ho e tlohela. O ile a tswela pele a tshepahala le nakong eo mosebetsi wa Dipaki Tsa Jehova o neng o thibetswe Canada dilemong tsa bo1940. Mme wa ka o ile a tswela pele a hlompha ntate wa ka le ho ba mosa, le hoja yena a ne a dula a mo hlaba ka mantswe. Mohlala wa hae o motle o ile wa thusa nna le bana beso hore re etse qeto ya hore re batla ho ba Dipaki Tsa Jehova. Ditaba tse monate ke hore ha nako e ntse e ya, ntate wa rona le yena o ile a qalella ho ba mosa, a sebedisana le rona hantle.

Ka 1950 ke ile ka ya kopanong ya potoloho e nang le sehlooho se reng Theocracy’s Increase e neng e tshwaretswe New York City. Ha ke le moo, ke ile ka utlwa ke batla ho etsetsa Jehova se eketsehileng ka mora ho buisana le bara le baradi ba bo rona ba tswang dinaheng tse fapaneng le ho mamela dipuisano tse thabisang tsa ba tswang Sekolong sa Gileade. Ka nako eo, ntho e nngwe feela eo ke neng ke e batla, e leng ho kenela tshebeletso ya nako e tletseng. Hang ha ke fihla hae, ke ile ka kenya kopo ya bopulamadiboho ba ka mehla. Karabo e ile ya fihla ho tswa ofising ya lekala la Canada e reng ke lokela ho kolobetswa pele. Ke ile ka fela ka kolobetswa ka la 1 October 1950. Kgwedi ha morao ke ile ka ba  pulamadiboho ya ka mehla, ka ba ka fuwa kabelo ya ka ya pele toropong ya Kapuskasing. Toropo eo e ne e le hole haholo le moo lelapa leso le neng le dula teng.

Ka 1951, ofisi ya lekala e ile ya mema Dipaki tse buang Sefora hore di fallele moo ho neng ho hlokeha bahweletsi ba buang puo eo profinseng ya Quebec. Ka ha ke hotse ke bua Sefora le Senyesemane, ke ile ka amohela kopo eo mme ka abelwa ho ya Rouyn. Ho ne ho se na motho eo ke mo tsebang moo. Ntho eo ke neng ke ena le yona feela, ke aterese eo ke buileng ka yona qalong. Dintho di ile tsa ntsamaela hantle hobane nna le Marcel re ile ra ba metswalle ya hlooho ya kgomo. Ke ile ka thabela ho sebeletsa Quebec ka dilemo tse nne mme qetellong ke ile ka ba pulamadiboho e kgethehileng.

Ha ke ntse ke le Quebec, ke ne ke thabile haholo ha ke fumana memo ya ho ya tlelaseng ya bo26 ya Sekolo sa Gileade, South Lansing e New York. Re ile ra fuwa mangolo a Gileade ka la 12 February 1956 mme ke ile ka abelwa ho ya naheng eo hona jwale e bitswang Ghana, b Afrika Bophirima. Empa pele ke tsamaya, ke ile ka tlameha ho kgutlela Canada “dibeke tse mmalwa” ke emetse hore ditokomane tsa ka tsa ho tsamaya di loke.

Ke ile ka iphumana ke dutse dikgwedi tse supileng Toronto ke ntse ke emetse ditokomane tsa ka hore di loke. Ka nako eo, ke ne ke dula le lelapa la ha Cripps, yaba ke se ke kgahlwa ke moradi wa bona ra ba ra ratana. Eitse ke sa re ke tla mo kopa hore re nyalane, ditokomane tsa ka tseo esale ke di emela di ile tsa fihla. Ka mora ho rapela ka matla le Sheila ka taba ena, re ile ra etsa qeto ya hore ke tsamaye ke ye kabelong ya ka. Re ile ra dumellana hore re tla tswela pele re ngollana ho fihlela maemo a rona a re dumella hore re nyalane. Ho ne ho le thata ho etsa qeto eo, empa ha morao re ile ra hlokomela hore e ne e le e nepahetseng.

Ke ile ka qeta kgwedi kaofela ke ntse ke tsamaya, ke ile ka tsamaya ka terene, sekepe le ka sefofane, mme qetellong ke ile ka fihla Accra, e leng toropo e naheng ya Ghana. Ha ke fihla moo, ke ile ka abelwa ho ba molebedi wa setereke. Ha ke etsa mosebetsi ona, ke ne ke tsamaya hohle naheng ya Ghana,  Ivory Coast (eo hona jwale e bitswang Côte d’Ivoire) le Togoland (eo hona jwale e bitswang Togo). Hangata ke ne ke tsamaya ke le mong ka koloi ya mokgatlo ya jeep. Ke ne ke thabela maeto a ka haholo ha ke ya ho bara le baradi ba bo rona.

Mafelo a beke, ke ne ke fana ka dipuo dikopanong tsa potoloho. Ka ha re ne re se na Diholo Tsa Dikopano, bara ba bo rona ba ne ba etsa maphephe ka mahlaka ebe ba a rulela ka makgasi e le hore letsatsi le se ke la re tjhesa haholo. Ho ne ho se na sehatsetsi ka hoo bana ba bo rona ba ne ba tla ka diphoofolo tse phelang tse neng di hlabelwa hona moo e le hore batho ba je.

Ho ne ho etsahala dintho tse ngata tse qabolang dikopanong tseo. Ka letsatsi le leng ha Morabo rona Herb Jennings, c eo e neng e le moromuwa a ntse a fana ka puo, kgomo e ile ya kgaola. E ile ya matha pakeng tsa sethala le batho e ferekane e sa tsebe moo e yang teng, yaba Morabo rona Herb o emisa ho fana ka puo. Bara ba bo rona ba bane ba matla ba ile ba matha ba e tshwara, ba e kgutlisetsa moo e neng e fasitswe teng, yaba batho kaofela ba opa diatla.

Hara beke, ke ne ke bontsha batho filimi e reng The New World Society in Action metseng e haufi. E le hore ke kgone ho bapala video ena, ke ne ke haka lesela le lesweu dipalong tse pedi kapa dipakeng tsa difate. Batho ba metseng eo ba ne ba e rata haholo. Boholo ba bona e ne e le lekgetlo la pele ba bona filimi. Ba ne ba opa matsoho haholo ha filimi e hlahisa batho ba kolobetswang. Filimi eo e ile ya ba thusa hore ba bone hore Dipaki Tsa Jehova di momahane lefatsheng lohle.

Ka mora dilemo tse pedi ke le Afrika, ke ile ka thabela ho ya kopanong ya matjhaba New York City ka 1958. Ke ile ka thaba haholo ha ke bona Sheila. O ne a tswa Quebec, moo a neng a sebeletsa teng e le pulamadiboho ya kgethehileng. Re ne re ntse re ngollana mangolo. Ka ha jwale re ne re kopane, ke ile ka mo kopa hore re nyalane mme o ile a dumela. Ke ile ka ngolla Moreso Knorr d lengolo, ka mo botsa hore na Sheila a ka ya Sekolong sa Gileade mme ka mora moo a yo sebetsa le nna Afrika. O ile a dumela. Qetellong Sheila o ile a tla Ghana. Re ile ra nyalana Accra ka la 3 October 1959. Ka nnete Jehova o ile a re hlohonolofatsa hobane re ne re etsa hore ebe yena ya tlang pele bophelong ba rona.

Ka 1961 re ile ra abelwa ho sebeletsa naheng ya Cameroon. Bara ba bo rona ba ile ba nkopa  hore ke thuse ho theha ofisi ya lekala. Ke ne ke phathahane haholo. Ka ha ke ne ke abetswe hore ke hlokomele mosebetsi o etswang Cameroon, ho ne ho ena le dintho tse ngata tseo ke lokelang ho ithuta tsona. Ka 1965 re ile ra fumana hore mohatsaka Sheila o imme. Ho ne ho le thata ho amohela hore re tlo ba batswadi. Empa ha re qala ho thabela boikarabelo bona bo botjha ebile re itlhophisetsa ho kgutlela Canada, re ile ra etsahallwa ke ntho e bohloko.

Ngwana wa rona o ile a hlokahala a eso hlahe. Ngaka e ile ya re bolella hore ngwana wa rona e ne e le moshanyana. Ho se ho fetile dilemo tse ka hodimo ho 50 ntho ena e etsahetse, empa ha re a ka ra e lebala. Le hoja se etsahetseng se re utlwisitse bohloko haholo, re ile ra tswela pele ka kabelo ya rona ya ho sebeletsa naheng e nngwe mme ke ntho eo re neng re e rata haholo.

Hangata Dipaki Tsa Jehova tse dulang Cameroon di ne di hloriswa ka lebaka la ho se nke lehlakore dipolotiking. Maemo a ne a eba mabe le ho feta ka nako ya dikgetho. Ntho eo e leng kgale re e tshohile e ile ya etsahala ka la 13 May 1970, ha mosebetsi wa Dipaki Tsa Jehova o thibelwa naheng eo. Mmuso o ile wa nka ofisi ya rona ya lekala e ntjha, eo re neng re sebeleditse ho yona ka dikgwedi tse hlano feela. Le pele beke e fela, baromuwa bohle ho akarelletsa nna le Sheila, re ile ra lelekwa naheng eo. Ho ne ho le thata ho siya bara le baradi ba bo rona bao re neng re ba rata haholo mme re ne re tshwenyehile ka hore na ho tla etsahalang ka bona ha nako e ntse e ya.

Re qetile dikgwedi tse tsheletseng ofising ya lekala ya Fora. Ha ke le moo, ke ile ka etsa sohle seo nka se kgonang ho thusa bara ba bo rona ba Cameroon ka dintho tseo ba di hlokang. Ka December selemong sona seo, re ile ra abelwa ho sebeletsa lekaleng la Nigeria, le neng le ikarabella ka ho hlokomela mosebetsi o etswang Cameroon. Bara le baradi ba bo rona ba Nigeria ba ile ba re amohela ka mofuthu mme re ile ra thabela ho sebeletsa moo dilemo tse mmalwa.

Ka 1973 re ile ra lokela ho etsa qeto e boima haholo. E ne e se e le nako e telele Sheila a mamelletse ho kula. Ha re le kopanong ya setereke New York, o ile a lla a re ho nna: “Ke utlwile ho lekane! Ke dula ke kgathetse ebile ke opelwa.” Re sebeditse mmoho dilemo tse fetang 14 Afrika Bophirima. Ke ne ke le motlotlo haholo ka yena ka tshebeletso eo a e entseng ka botshepehi empa re ne re lokela ho etsa diphetoho. Ka mora ho buisana ka boemo ba rona le ho rapela ka bona nako e telele, re ile ra etsa qeto ya ho kgutlela Canada, moo molekane wa ka a neng a tla fumana thuso ya dingaka ha bonolo. Ho tlohela kabelo ya rona ya ho ba baromuwa le tshebeletso ya nako e tletseng e bile qeto e boima le e bohloko ka ho fetisisa eo re kileng ra e etsa.

Ka mora ho kgutlela Canada, ke ile ka hirwa ke motswalle wa ka eo esale re tsebana ka dilemolemo. O ne a ena le kgwebo ya dikoloi toropong e ka leboya ho Toronto. Re ile ra hira ntlo, ra ba ra reka thepa e kileng ya sebetsa. Re ile ra qala bophelo ba rona bo botjha ntle le hore re kene dikolotong. Re ile ra iphelela bophelo bo bonolo, re ena le tshepo ya hore ka le leng re tla kgutlela tshebeletsong ya nako e tletseng. Re ile ra makala ha re bona tshepo eo e phethahala kapele ho feta ka moo re neng re nahanne.

 Ke ile ka qala ka ho ithaopa ka Meqebelo ha ho ne ho hahwa Holo ya Kopano Norval, Ontario. Ha nako e ntse e ya, ke ile ka kopuwa hore ke sebeletse ke le molebedi wa Holo ya Kopano. Bophelo ba mohatsaka Sheila bo ne bo ntse bo eba betere. Re ile ra hlokomela hore a ka etsa mosebetsi ona o motjha. Ka June 1974, re ile ra yo dula kamoreng e Holong ya Kopano. Re ne re thabile haholo ha re fumana monyetla wa ho kgutlela tshebeletsong ya nako e tletseng!

Re ile ra thaba ha bophelo ba Sheila bo ntse bo tswela pele ho ba betere. Dilemo tse pedi ha morao, re ile ra kgona ho amohela kabelo ya ho etsa mosebetsi wa potoloho. Re ne re potoloha Manitoba, e leng profinse ya Canada e tsebahalang ka mariha a batang haholo. Le hoja ho ne ho bata haholo, lerato la bara le baradi ba bo rona ba moo, le ile la re futhumatsa. Re ile ra hlokomela hore taba ya hore na o sebeletsa o le hokae ha se ya bohlokwa, empa ha bohlokwa ke hore o tswele pele ho sebeletsa Jehova ho sa tsotellehe hore na o hokae.

Ka mora ho qeta dilemo tse mmalwa re etsa mosebetsi wa potoloho, re ile ra memelwa ho ya sebeletsa Bethele e Canada ka 1978. Nakwana ka mora moo, ke ile ka ithuta thuto e bohloko empa e le ya bohlokwa. Ke ile ka abelwa ho fana ka puo e nkang hora le halofo ka Sefora, sebokeng se kgethehileng Montreal. Ka maswabi, ha ke a ka ka fana ka puo eo ka tjheseho, mme morabo rona wa Lefapha la Tshebeletso o ile a mpha keletso mabapi le taba eo. Ho bua nnete feela, nka be ke ile ka hlokomela ka nako eo, jwalo ka ha ke hlokomela hona jwale hore ha ke sebui se hlwahlwa. Ha ke a ka amohela keletso eo morabo rona a neng a mpha yona. Puisano ya rona ha e a ka ya tsamaya hantle. Ke ne ke kwatile hobane o ne a ntshwayatshwaya diphoso ho ena le ho mpolella hore na ke hokae moo ke entseng hantle. Ke ile ka etsa phoso ya ho se mamele keletso ka lebaka la tsela eo e fanweng ka yona le hobane ke sa utlwisise motho ya faneng ka yona.

Ka mora matsatsi a seng makae, setho sa Komiti ya Lekala se ile sa bua le nna ka taba ena. Ke ile ka dumela hore ha ke a ka ka amohela keletso mme ka kopa tshwarelo. Ha ke tloha moo, ke ile ka buisana le morabo rona ya neng a mphile keletso mme o ile a ntshwarela. Phihlelo ena e nthutile bohlokwa ba ho ikokobetsa mme nke ke ka e lebala. (Diprov. 16:18) Ke ile ka rapela Jehova ka makgetlo ka taba ena mme ke ikemiseditse hore le ka mohla, ke se ke ka hlola ke hana keletso.

E se e le dilemo tse ka hodimo ho 40 ke sebetsa mona Bethele e Canada, mme ho tloha ka 1985 ke ile ka abelwa ho sebeletsa ke le setho sa Komiti ya Lekala. Ka February 2021, mohatsaka Sheila o ile a hlokahala. Ke mo hopola haholo. Ntle ho moo le nna ke se ke kula. Tshebeletso ya Jehova e etsa hore ke dule ke phathahane ebile ke thabile hoo ‘ka sewelo ke hlokomelang hore matsatsi a ntse a feta.’ (Moek. 5:20) Ho na le mathata a mangata a ntlhahetseng bophelong, empa hape ho na le dintho tse ngata tse monate tse nketsahaletseng tse etsang hore ke dule ke thabile. Ho etsa hore Jehova e be yena ya tlang pele bophelong ba ka le ho qeta dilemo tse 70 ke le tshebeletsong ya nako e tletseng ho entse hore ke kgotsofale bophelong. Ke rapella bara le baradi ba bo rona ba batjha hore ba tswele pele ho etsa hore Jehova e be yena ya tlang pele bophelong ba bona, hobane ke kgodisehile hore ba tla phela bophelo bo kgotsofatsang ba be ba fumane thabo e tliswang feela ke ho sebeletsa Jehova.