1. Haufinyane Jesu o tla etsang?

 RE PHELA nakong eo ho tla etsahala dintho tse kgolo. Haufinyane Jesu o tla ahlola motho e mong le e mong. Jesu o ile a re bolella ka ho hlaka hore na ho tla etsahalang lefatsheng pele a tlisa kahlolo. O ile a bolella balatedi ba hae hore na ba tla “bona kang” hore o teng le hore ‘lefatshe lena le a fela.’ (Mat. 24:3) Boprofeta bona bo hlaha ho Matheu kgaolo ya 24 le ya 25, Mareka kgaolo ya 13 le Luka kgaolo ya 21.

2. Re tlo bua kang sehloohong see, hona ho etsa jwalo ho tla re thusa jwang?

² Jesu o ile a sebedisa dipapiso tse tharo ho re lemosa. Ke papiso ya dinku le dipodi, barwetsana ba bohlale le ba mawatla le ya ditalenta. Dipapiso tsena di re bontsha hore Jesu o tla ahlola batho ho ya ka diketso tsa bona. Sehloohong, sena re tlo bua ka dipapiso tsena re be re bone hore na re ka ithuta eng ho tsona. Re tla qala ka ho bua ka papiso ya dinku le dipodi.

DINKU LE DIPODI

3. Jesu o tla ahlola batho neng?

³ Papisong ya dinku le dipodi Jesu o ile a re o tla ahlola batho ho latela hore na ba ile ba etsang ha ba utlwa ditaba tse monate le hore na ba ile ba tshehetsa bana babo. (Mat. 25:​31-46) O tla fana ka kahlolo nakong ya “mahlomola a maholo,” pele ho Armagedone. (Mat. 24:21) Jwalo ka ha modisa a arola dinku ho dipodi, Jesu le yena o tla arola batho ba ileng ba tshehetsa balatedi ba hae ba tlotsitsweng ho ba sa kang ba ba tshehetsa.

4. Esaia 11:​3, 4 e re kgodisa jwang hore Jesu o tla ahlola batho ka toka? (Sheba setshwantsho se ka ntle.)

 ⁴ Bibele e re ha Jesu a ahlola bakeng sa Jehova, o tla ahlola ka toka. (Bala Esaia 11:​3, 4.) O hlahloba dintho tseo batho di ba etsang, ba di nahanang le tseo ba di buang ho akareletsa le tsela eo ba tshwarang batlotsuwa ka yona. (Mat. 12:​36, 37; 25:40) Jesu o tla tseba hore na ke bomang ba ileng ba tshehetsa bana babo ba tlotsitsweng le mosebetsi wa bona. a Tsela ya bohlokwa eo re ka tshehetsang bana babo Kreste ka yona ke ka ho ba thusa mosebetsing wa boboledi. Batho ba tshehetsang bana babo Kreste ba tla nkwa ‘ba lokile’ mme ba tla ba le monyetla wa ho “phela ka ho sa feleng” lefatsheng. (Mat. 25:46; Tshen. 7:​16, 17) Ona ke moputso o babatsehang bakeng sa ba tla dula ba tshepahala. Haeba ba ka dula ba tshepahala nakong ya mahlomola a maholo le ka mora moo, mabitso a bona a tla dula a ngotswe “bukeng ya bophelo.”—Tshen. 20:15.

5. Re ithutang papisong ya dinku le dipodi, hona ke bomang ba ruang molemo ho yona?

⁵ Bontsha hore o a tshepahala. Papiso ya Jesu ya dinku le dipodi e ama ka ho kgetheha batho ba nang le tshepo ya ho phela lefatsheng ka ho sa feleng. Ba bontsha hore ba na le tumelo ka ho thusa bana babo Kreste ka mosebetsi wa boboledi le ho latela ka botshepehi tataiso e fanwang ke mohlanka ya bohlale le ya tshepahalang ya kgethilweng ke Jesu. (Mat. 24:45) Le ha ho le jwalo, batho ba nang le tshepo ya ho phela lehodimong le bona ba ntse ba lokela ho mamela temoso e hlahang papisong ena. Hobaneng? Hobane le bona Jesu o ntse a sheba dintho tseo ba di etsang, tseo ba di nahanang le tseo ba di buang. Le bona ba lokela ho tshepahala. Ebile Jesu o ile a etsa dipapiso tse pedi tse lemosang bona ka ho kgetheha. Dipapiso tseo di boetse di hlaha ho Matheu kgaolo ya 25. Hona jwale ha re bueng ka papiso ya barwetsana ba bohlale le ba mawatla.

BARWETSANA BA BOHLALE LE BA MAWATLA

6. Barwetsana ba bahlano ba ile ba bontsha jwang hore ba bohlale? (Matheu 25:​6-10)

⁶ Jesu o ile a etsa papiso ka barwetsana ba leshome ba neng ba yo kgahlanyetsa monyadi. (Mat. 25:​1-4) Kaofela ba ne ba batla ho felehetsa monyadi ho ya moketeng wa lenyalo. Jesu o ile a re ba bahlano e ne e le “ba bohlale,” ba bahlano e le “mawatla.” Barwetsana ba bohlale ba ne ba itokisitse ebile ba fadimehile. Ba ne ba itjwetsitse hore ba tla emela monyadi hore a fihle esita le ha a ne a ka fihla bosiu. Ka hoo, ba ile ba nka mabone e le hore ba kgantshe ha ho eba lefifi. Ba ile ba boela ba nka oli e eketsehileng e le hore mabone a bona a se ke a tima haeba monyadi a ne a ka dieha. (Bala Matheu 25:​6-10.) Ha monyadi a fihla, barwetsana ba bohlale ba ile ba kena le yena moketeng wa lenyalo. Ka tsela e tshwanang, Bakreste ba tlotsitsweng ba tla dula ba tshepahala ba bile ba fadimehile ho fihlela Kreste a tla, ba tla fumana moputso wa bona mme ba kene le monyadi e leng Jesu Mmusong wa hae o lehodimong. b (Tshen. 7:​1-3) Ho ile ha etsahalang ka barwetsana ba mawatla?

7. Ho ile ha etsahalang ka barwetsana ba bahlano ba mawatla, hona hobaneng?

⁷ Barwetsana ba bahlano ba mawatla bona ba ne ba sa itokisa ha monyadi a fihla. Mabone a bona a ne a le haufi le ho tima empa ba  ne ba sa nka oli e eketsehileng. Eitse ha ba utlwa hore monyadi o se a ntse a tlo fihla, yaba ke hona ba yo reka oli. Ha monyadi a fihla, ba ne ba eso kgutle. “Barwetsana ba neng ba itokisitse ba kena le yena moketeng wa lenyalo mme monyako wa kwalwa.” (Mat. 25:10) Ha barwetsana ba mawatla ba kgutla mme ba batla ho kena, monyadi o ile a re ho bona: “Ha ke le tsebe.” (Mat. 25:​11, 12) Barwetsana bao ba ne ba sa itokisetsa ho ema haeba monyadi a ne a ka dieha ho fihla. Bakreste ba tlotsitsweng ba ka ithutang papisong ee?

8, 9. Batlotsuwa ba ka ithutang papisong ya barwetsana ba leshome? (Sheba setshwantsho.)

⁸ Dula o itokisitse o bile o fadimehile. Jesu o ne a sa bolele hore ho tla ba le dihlopha tse pedi tsa batlotsuwa, e leng ba neng ba itokiseditse ho ema ho fihlela bofelong le ba neng ba sa itokisetsa ho ema. O ne a mpa a bolela hore na ho tla etsahalang ka batlotsuwa haeba ba ne ba sa itokisetsa ho dula ba tshepahala ho fihlela qetellong. Ba ne ba ke ke ba fumana moputso haeba feela ba sa itokisa. (Joh. 14:​3, 4) Taba ena e tebile. Kaofela ha rona re lokela ho mamela temoso ena e papisong ya barwetsana ba leshome ho sa tsotellehe hore na re na le tshepo ya ho phela lefatsheng kapa lehodimong. E mong le e mong wa rona o lokela ho dula a fadimehile a bile a itokiseditse ho mamella ho fihlela qetellong.—Mat. 24:13.

⁹ Ka mora ho etsa papiso ya barwetsana ba leshome ho bontsha bohlokwa ba ho dula re fadimehile re bile re itokisitse, Jesu o ile a etsa papiso ya ditalenta. Papiso ena e bontsha bohlokwa ba ho sebetsa ka thata.

DITALENTA

10. Makgoba a mabedi a ile a etsang ho bontsha hore a a tshepahala? (Matheu 25:​19-23)

¹⁰ Papisong ya ditalenta, Jesu o bua ka makgoba a mabedi a ileng a tshepahalla monga ona le le leng le sa kang la mo tshepahalla. (Mat. 25:​14-18) Makgoba a mabedi a tshepahalang a ile a sebetsa ka thata hore a tswadise tjhelete ya monga ona. Pele monga makgoba a etela hole o ile a a siya le ditalenta. Eo e ne e  le tjhelete e ngata mme makgoba a mabedi a tshepahalang a ile a sebetsa ka thata ho sebedisa tjhelete eo hantle. Ha monga ona a fihla, tjhelete eo a neng a a file yona e ne e imenne habedi. Monga ona o ile a a babatsa yaba a thaba le yena. (Bala Matheu 25:​19-23.) Lekgoba la boraro lona le ile la etsang ka tjhelete eo monga lona a neng a le file yona?

11. Ho ile ha etsahalang ka lekgoba le “botswa,” hona hobaneng?

¹¹ Lekgoba la boraro le ile la fuwa talenta e le nngwe empa lona le ne le le “botswa.” Monga lona o ne a lebeletse hore le sebedise talenta eo ha molemo. Empa le ile la tsetela tjhelete eo fatshe. Ha monga lona a kgutla le ile la mo fa talenta eo e le jwalo, le sa e tswadisa. Lekgoba leo ha le a ka la swabela ntho eo le e entseng. Ho ena le hore le kope tshwarelo ka hore ebe ha le a etsetsa monga lona phaello, le ile la re monga lona ke “motho ya thata.” Monga lona o ne a sa thaba, ka hoo o ile a le amoha talenta eo a ba a le leleka.—Mat. 25:​24, 26-30.

12. Makgoba a mabedi a tshepahalang a emela bomang?

¹² Makgoba a mabedi a ileng a tshepahala a emela Bakreste ba tlotsitsweng ba tshepahalang. Monga makgoba ke Jesu mme o mema makgoba a ileng a tshepahala hore a thabe le yena. Ba fumana moputso wa bona e leng tsoho ya pele. (Mat. 25:​21, 23; Tshen. 20:5b) Le ha ho le jwalo, mohlala o mobe wa lekgoba le botswa ke temoso ho Bakreste ba tlotsitsweng. Jwang?

13, 14. Batlotsuwa ba ka ithutang papisong ya ditalenta? (Sheba setshwantsho.)

¹³ Dula o sebetsa ka thata. Jwalo ka papisong ya barwetsana ba leshome, papisong ya ditalenta Jesu o ne a sa re batlotsuwa ba tla ba botswa. Le hona mona o ne a mpa a hlalosa hore na ho tla etsahalang ka bona haeba ba ka fellwa ke tjheseho. Haeba ba ne ba ka etsa jwalo, ba ne ba ke ke ba tshwaneleha ho kena Mmusong o lehodimong.—2 Pet. 1:10.

¹⁴ Papiso ya Jesu ya barwetsana ba leshome le ya ditalenta di hlakisa hantle hore Bakreste bohle ba tlotsitsweng ba lokela ho dula ba  itokisitse ba bile ba fadimehile hape ba sebetsa ka thata. Na ho na le ntho e nngwe hape eo Jesu a ileng a e bua ho lemosa Bakreste ba tlotsitsweng? Ho jwalo. Re ka fumana temoso eo ho Matheu 24:​40, 41.

KE BOMANG BA “TLA NKWA”?

15, 16. Matheu 24:​40, 41 e thusa Bakreste ba tlotsitsweng jwang hore ba hlokomele hore ba lokela ho dula ba fadimehile?

¹⁵ Pele Jesu a etsa dipapiso tsena tse tharo o ile a hlakisetsa batlotsuwa hore nakong ya kahlolo, ho tla hlaka hore na ke bomang ba amohetsweng. O ile a bua ka banna ba babedi ba sebetsang masimong le basadi ba babedi ba silang. Ka bobedi ba bonahala eka ba ntse ba etsa ntho e tshwanang empa Jesu o ile a re “e mong o tla nkwa, e mong a siuwe.” (Bala Matheu 24:​40, 41.) Ka mora moo, o ile a eletsa balatedi ba hae a re: “Le dule le fadimehile hobane ha le tsebe hore na Morena wa lona o tla ka letsatsi lefe.” (Mat. 24:42) Jesu o ile a bua ntho e tshwanang ka mora hore a etse papiso ya barwetsana ba leshome. (Mat. 25:13) Na ditaba tsee di a amana? Ho bonahala jwalo. Ke Bakreste ba tlotsitsweng ba tshepahalang feela ba tla “nkwa.” Jesu o tla ba kenya Mmusong o lehodimong.—Joh. 14:3.

¹⁶ Dula o fadimehile. Bakreste ba tlotsitsweng ba sa fadimehang ba ke ke ba bokellwa le “bakgethwa.” (Mat. 24:31) Ha e le hantle bahlanka bohle ba Modimo ba lokela ho dula ba fadimehile ba bile ba tshepahala ho sa tsotellehe hore na ba na le tshepo ya ho phela lefatsheng kapa lehodimong.

17. Ke hobaneng ha re sa lokela ho tshwenyeha ha re bona Jehova a ntse a kgetha batlotsuwa le mehleng ee?

¹⁷ Ka ha re tseba Jehova hantle, re tshepa hore ntho e nngwe le e nngwe eo a e etsang e nepahetse. Ka hoo, ha re tshwenyehe ha Jehova a kgetha ho tlotsa Bakreste ba bang ba tshepahalang dilemong tsa morao tjena. c Re a hopola hore na Jesu o ile a reng ka basebetsi ba ileng ba hirwa motsotsong wa ho qetela papisong ya tshimo ya morara. (Mat. 20:​1-16) Ba ileng ba hirwa ho tloha hoseng ba ile ba fumana moputso o lekanang le wa ba ileng ba hirwa motsotsong wa ho qetela. Ka hoo, ho sa tsotellehe hore na batlotsuwa ba kgethwa neng, ba tla fumana moputso wa bona haeba feela ba dula ba tshepahala.

MAMELA DITEMOSO

18, 19. Re ithutileng dipapisong tsee?

¹⁸ Re ithutileng? Papiso ya dinku le dipodi e a bontsha hore na ke hobaneng ha ho le bohlokwa hore Bakreste ba nang le tshepo ya ho phela ka ho sa feleng lefatsheng ba dule ba tshepahalla Jehova hona jwale le nakong ya mahlomola a maholo. Nakong e tlang Jesu o tla nka bohle ba tshepahetseng ba tshwanelwa ke ho phela “ka ho sa feleng.”—Mat. 25:46.

¹⁹ Re boetse re buile ka dipapiso tse pedi tse lemosang Bakreste ba tlotsitsweng. Papisong ya Jesu ya barwetsana, ba bahlano ba bona ba ile ba bontsha hore ba bohlale. Ba ne ba ikemiseditse ho emela monyadi ho sa tsotellehe hore na o fihla neng, ba itokisitse ba bile ba fadimehile. Empa barwetsana ba mawatla ba ne ba sa itokisa. Jwale monyadi o ile a ba hanela ho kena moketeng wa lenyalo la hae. Le rona re lokela ho ikemisetsa ho leta ho fihlela Jesu a fedisa lefatshe lena ho sa tsotellehe hore na e tla ba neng. Papisong ya ditalenta re ile ra ithuta hore makgoba a mabedi a ile a sebetsa ka thata. A ile a sebeletsa monga ona ka thata, ka hoo o ile a thaba. Empa lekgoba le botswa lona le ile la lelekwa. Re ithutang? Re lokela ho dula re phathahane ka ho sebeletsa  Jehova ho fihlela bofelo bo tla. Qetellong re ile ra bona hore batlotsuwa ba lokela ho dula ba fadimehile e le hore ba fumane moputso wa bona wa ho ya lehodimong. Ba labalabela “ho bokellwa” hore ba ye ho Jesu lehodimong. Ka mora ntwa ya Armagedone, kaofela ha bona e tla ba monyaduwa lenyalong la konyana.—2 Bathes. 2:1; Tshen. 19:9.

20. Jehova o tla etsetsa batho ba mamelang ditemoso tsa hae eng?

²⁰ Le hoja nako ya hore Jesu a ahlole e atametse, ha re a lokela ho tsoha. Haeba re tshepahala, Ntate wa rona ya lerato ya lehodimong o tla re fa “matla a sa tlwaelehang” e le hore re ka “atleha . . . ho ema ka pela Mora motho.” (2 Bakor. 4:7; Luka 21:36) Ho sa tsotellehe hore na re na le tshepo ya ho phela lehodimong kapa lefatsheng, re tla thabisa ntate wa rona haeba re mamela ditemoso tse dipapisong tsa Jesu. Ka ha Jehova o mosa, mabitso a rona a tla ‘fumanwa a ngotswe bukeng’ ya bophelo.—Dan. 12:1; Tshen. 3:5.