Ha re na lebaka la ho nahana hore ka ha barutuwa ba 70 ba ne ba le siyo Dijong Tsa Shwalane Tsa Morena, seo se bolela hore ba ne ba lahlile Jesu kapa hore o ne a se a sa ba amohele. Jesu o ne a mpa feela a batla ho ba le baapostola ba hae ketsahalong eo.

Dihlopha tsena ka bobedi, ba 12 le ba 70, e ne e le barutuwa ba hae. Jesu o ile a kgetha banna ba 12 hara barutuwa ba hae ba bangata, mme a ba bitsa baapostola. (Luka 6:​12-16) O ne a le Galilea ha “a bitsa baapostola ba hae ba 12” mme “a ba roma hore ba rute ka Mmuso wa Modimo le ho fodisa batho ba kulang.” (Luka 9:​1-6) Hamorao ha a le Judea, Jesu o ile “a kgetha ba bang ba 70 a ba roma ka bobedi.” (Luka 9:51; 10:1) Ka hoo, Jesu o ne a ena le balatedi ba buang ka molaetsa wa hae dibakeng tse fapaneng.

Bajuda ba ileng ba fetoha barutuwa ba Jesu ba ne ba tla nne ba keteke mokete wa selemo le selemo wa Paseka mohlomong ba ena le ba malapa a bona. (Ex. 12:​6-11, 17-20) Ha nako ya hore Jesu a bolawe e ntse e atamela, o ile a ya Jerusalema le baapostola ba hae. Empa ha a ka a etsa mokete wa semetletsahadi wa Paseka bakeng sa barutuwa ba hae ba tswang Judea, Galilea le Perea. Ho hlakile hore Jesu o ne a batla ho ba le baapostola ba hae feela ketsahalong ena. O ile a re ho bona: “Esale ke emetse hore letsatsi lena le fihle e le hore ke je Paseka le lona pele ke hlokofatswa.”—Luka 22:15.

Jesu o ne a ena le lebaka le utlwahalang la ho etsa jwalo hobane o ne a le haufi le ho bolawa e le “Konyana ya Modimo e tlosang sebe sa lefatshe.” (Joh. 1:29) Sena se ne se tla etsahalla Jerusalema, moo Modimo a neng a etsetswa mahlabelo teng ka nako e telele. Konyana ya Paseka e ne e hopotsa Baiseraele hore Jehova o ba ntshitse Egepeta, empa sehlabelo sa Jesu se ne se le bohlokwa ho feta moo hobane se ne se lokolla batho bohle bokgobeng ba sebe le lefu. (1 Bakor. 5:​7, 8) Sehlabelo sa Jesu se ne se tla dumella baapostola ba 12 hore e be motheo wa phutheho ya Bokreste. (Baef. 2:​20-22) Ntho e thahasellisang ke hore motse o halalelang Jerusalema o na le “majwe a motheo a 12” ao ho ona ho ngotsweng “mabitso a baapostola ba 12 ba Konyana.” (Tshen. 21:​10-14) Ka hoo, baapostola ba tshepahalang ba ne ba ena le karolo ya bohlokwa eo ba lokelang ho e bapala ho phethahatsa morero wa Modimo. Ka hoo, ho a utlwahala hore na ke hobaneng ha Jesu a ne a batla ho ba le bona Pasekeng ya ho qetela le ketsahalong e neng e tlo latela ka mora moo, e leng Dijo Tsa Shwalane Tsa Morena.

Barutuwa ba 70 le ba bang ba ne ba le siyo dijong tseo tsa shwalane. Ho ntse ho le jwalo, barutuwa bohle ba tshepahalang ba ne ba tla rua molemo tokisetsong eo Jesu a e thehileng ya Dijo Tsa Shwalane Tsa Morena. Bohle bao qetellong e neng e tla ba Bakreste ba tlotsitsweng ba ne ba tla kena selekaneng sa mmuso, seo Jesu a ileng a bua ka sona ho baapostola ba hae bosiung boo.—Luka 22:​29, 30.