O ka Rapela Jwang e le Hore Modimo a o Utlwe?
Jehova ke Modimo “Ya Utlwang thapelo.” (Pesaleme ya 65:2) Re ka bua le yena nako e nngwe le e nngwe re rapella ka pelong kapa re rapella hodimo. Jehova o batla hore re mmitse “Ntate” mme ke Ntate ya molemo eo re ka bang le yena (Matheu 6:9) Ka lerato, Jehova o re ruta hore na re ka mo rapela jwang e le hore a ka re utlwa.
RAPELA JEHOVA MODIMO KA LEBITSO LA JESU
“Haeba le kopa Ntate ntho le ha e le efe o tla le fa yona ka lebitso la ka.”—Johanne 16:23.
Mantswe a Jesu bontsha hore Jehova ha a batle ha re mo rapela re sebedise ditshwantsho, bahalaledi, mangeloi, batho ba hlokahetseng, empa o batla hore re sebedise lebitso la Jesu Kreste. Ha re sebedisa lebitso la Jesu ha re rapela, seo se bontsha hore re a utlwisisa hore Modimo o tla re utlwa ka lebaka la seo Jesu a ileng a re etsetsa sona. Jesu o itse: “Ha ho ya tlang ho Ntate haese ka nna.”—Johanne 14:6.
RAPELA HO TSWA PELONG
“Tshollelang dipelo tsa lona ka pela hae.”—Pesaleme ya 62:8.
Ha re rapela Jehova, re lokela ho bua jwalo ka ha re ne re tla bua le ntate ya lerato. Ho ena le hore re bue mantswe a bukeng kapa re bue mantswe ao esale re a tshwarella ka hloohong, re lokela hore ka tlhompho re rapele Jehova ho tswa pelong.
RAPELA TUMELLANONG LE THATO YA MODIMO
“Ho sa tsotellehe hore na ke eng eo re e kopang ho ya ka thato ya hae, o a re utlwa.”—1 Johanne 5:14.
Ka Bibeleng, Jehova Modimo o a re bolella hore na otla re etsetsa eng le hore na rona re etse eng. E le hore dithapelo tsa rona di amohelehe ho Modimo, re lokela ho rapela “ho ya ka thato ya hae.” E le hore re etse jwalo, re lokela ho ithuta Bibele hore re mo tsebe haholwanyane. Haeba re etsa jwalo, o tla kgahlwa ke dithapelo tsa rona.
RE KA RAPELLA ENG?
Rapella Ditlhoko Tsa Hao. Re ka rapela Modimo hore a re thuse ka ditlhoko tsa letsatsi le letsatsi jwalo ka dijo, diaparo le sebaka sa bodulo. Re ka boela ra rapella hore Modimo a re fe bohlale ba hore re etse diqeto tse nepahetseng le matla a hore re mamelle mathata. Re ka rapella hore re be le tumelo, Modimo a re tshwarele le hore thusa.—Luka 11:3, 4, 13; Jakobo 1:5, 17.
Rapella Batho ba Bang. Batswadi ba ratang bana ba bona ba a thaba ha bana ba bona ba ratana. Ka ha re bana ba Jehova, Jehova le yena o batla hore re kgathalle batho ba bang mme re ba rate. Ho loketse ho rapella balekane ba rona, ba malapa, bana ba rona le metswalle ya rona. Morutuwa Jakobo o ile a ngola a re: “Le rapellane.”—Jakobo 5:16.
Eba ya Lebohang. Bibele e re ka Mmopi wa rona: “O ile a etsa se molemo, a le fa dipula tse tswang lehodimong le dinako tse behang, a tlatsa dipelo tsa lona ka ho phethahetseng ka dijo le ho hlasimoloha ho molemo.” (Liketso 14:17) Ha re nahana ka dintho tsohle tseo Modimo a re etseditseng tsona, seo se tla re susumelletsa hore re mo lebohe ha re rapela. Re boetse re lokela ho bontsha Modimo hore re a mo leboha ka hore re mo mamele.—Bakolose 3:15.
EBA LE MAMELLO MME O TSWELE PELE O RAPELA
Ka dinako tse ding, re ka utlwa bohloko ka lebaka la hore Modimo ha a arabele dithapelo tsa rona hanghang. Na seo se bolela hore Modimo ha a re tsotelle? Tjhe! Ela hloko mehlala e latelang e bontshang hore ke ha bohlokwa ho tswela pele ho rapela.
Steve eo ho buuweng ka yena sehloohong se qalang o re: “Haeba ene e se ka thapelo nkabe ke sena tshepo ya hore ke tla thaba hape.” Keng se ileng sa mo thusa hore a fetohe? O ile a qala ho ithuta Bibele mme a ithuta hore ke hobaneng ha a lokela ho rapela le ho dula a rapela. O re: “Ke ne ke rapela Modimo mme ke ne ke mo leboha ka tshehetso eo ke ileng ka e fumana ho tswa ho metswalle, hona jwale ke thabile ho feta pele.”
Hothweng ka Jenny, ya neng a ikutlwa ekare ha a na thuso hoo Modimo a ke keng a mo mamela? O re: “Ha kene ke ikutlwa ke sena thuso ke ile ka kopa Modimo hore a nthuse ke utlwisise hore ke hobaneng ha ke ikutlwa jwalo.” Seo se ile sa mo thusa jwang? “Ho bua le Modimo ho ile ha nthusa hore ke ipone ka tsela eo a mponang ka yona le hore ke bone hore le hoja ke ka inka ekare ha ke molemo Jehova o nka ke le wa bohlokwa. E boetse e nthusitse hore ke se ke ka tela.” Ditlamorao e ile yaba dife? O re: “Thapelo e nthusitse ho bona Jehova jwalo ka Ntate ya lerato, ya ntsotellang, Motswalle, ya dulang a ntsheheditse ka mehla le ya nthusang ha feela ke etsa dintho tseo a batlang ke di etse.”
Isabel ha a bona mora wa hae Gerard a thabela bophelo ho sa tsotellehe ho kula o re: “Ke a hlokomela hore ke karabo ya dithapelo tsa ka.”
Hlokomela mohlala o mong wa Isabel. Eitse ha eba moimana, dingaka tsa hae di ile tsa mo bolella hore ngwana wa hae otla hlaha a sa itekanela. O ne a utlwile bohloko haholo. Batho ba bang ba ile ba mo eletsa ka hore a ntshe mpa. O re: “Ke ile ka utlwa eka ke tlo bolawa ke bohloko boo ke ileng ka bo utlwa pelong ya ka.” O ile a etsang? O re: “Ke ile ka rapela Modimo hangata hore a ntshehetse.” Ha nako e ntse eya o ile a tswala mora eo lebitso la hae e leng Gerard mme o la hlaha a sa itekanela. Na Isabel o utlwa eka Modimo o arabetse dithapelo tsa hae? E ho jwalo! Ka tsela efe? O re: “Ha ke bona mora wa ka, eo hona jwale a seng a le dilemo di 14, a thabela bophelo ho sa tsotellehe ho kula, ke a hlokomela hore ke karabo ya dithapelo tsa ka, le hore Jehova o ntlhohonolofaditse haholo ka ho mpha yena.”
Mantswe ao a tswang pelong a etsa hore re nahane ka mantswe a mopesaleme a reng: “O tla utlwa ditakatso tsa ba bonolo. O tla lokisa dipelo tsa bona. O tla sekeha tsebe.” (Pesaleme ya 10:17) Ka nnete re na le mabaka a utlwahalang a hore re tswele pele ho rapela Modimo!
Ka Bibeleng ho na le dithapelo tse ngata tsa Jesu. E tsebahalang haholo ke eo a ileng a e ruta barutuwa ba hae. Re ka ithuta eng ho yona?
O ka Nna wa Rata le Tsena
DIPOTSO TSA BIBELE DI A ARAJWA
Na ke Lokela ho Rapela Bahalaledi?
Ithute seo Bibele e se buang ka hore na ke mang eo re lokelang ho mo rapela.
TORA YA HO LEBELA
Tswela Pele ho Rapella Hore Modimo a o Amohele
Re ka rapela jwang e le hore Modimo a arabele dithapelo tsa rona?
