RE KA ETSANG HORE RE HLOLE LEHLOYO?
3 | Ntsha Lehloyo ka Pelong ya Hao
Seo Bibele e se Rutang:
“Le fetohe ka ho fetola dikelello tsa lona, e le hore le ka ipakela e le lona thato ya Modimo e molemo le e amohelehang le e phethahetseng.”—BAROMA 12:2.
Seo Temana Ena e se Bolelang:
Tsela eo re nahanang ka yona ke ya bohlokwa ho Modimo. (Jeremia 17:10) Re lokela ho etsa ho fetang ho qoba ho etsa dintho tse bontshang lehloyo kapa ho di bua. Lehloyo le qala ka pelong le ka dikelellong tsa rona. Ka hoo, re lokela ho kgaotsa ho nahana ka dintho tse ka etsang hore re be le lehloyo. Haeba re etsa jwalo, re tla kgona “ho fetoha” mme re hlole lehloyo.
Seo o ka se Etsang:
Nahanisisa ka hloko hore na o ikutlwa jwang ka batho ba bang, haholoholo ba morabe o fapaneng kapa ba tswang dinaheng tse ding. Ipotse: ‘Ke ba tshwara jwang? Na tsela eo ke ba tshwarang ka yona e itshetlehile ka hore na ke a ba tseba kapa e itshetlehile ka hore na ke na le kgethollo?’ Qoba metjha ya puisano, difilimi kapa boithabiso bo bontshang lehloyo kapa dintwa.
Lentswe la Modimo le ka re thusa hore re hlole lehloyo le ka pelong le le ka dikelellong tsa rona
Ka dinako tse ding ho ba thata ho hlokomela tsela eo re hlileng re ikutlwang ka yona. Empa Lentswe la Modimo le re thusa “ho lemoha menahano le boikemisetso ba pelo.” (Baheberu 4:12) Ka hoo dula o ntse o ithuta Bibele. Bapisa seo Bibele e se rutang le tsela eo o nahanang ka yona mme o leke ho ithuta ho nahana ka tsela e thabisang Modimo. Lentswe la Modimo le ka re thusa hore re hlole lehloyo le “metseng ka matla” ka dipelong le ka dikelellong tsa rona.—2 Bakorinthe 10:4, 5.
