NA O KA IKGETHELA HORE NA BOKAMOSO BA HAO BO TLA BA JWANG? Batho ba bang ba re Modimo o ile a rera e sa le pele hore na bophelo ba motho e mong le e mong bo tla ba jwang, ka hoo ha ba dumele hore diqeto tseo re di etsang di ka laola bophelo ba rona. Haeba ba hloleha ho fihlella ditoro tsa bona, hangata ba re: “Mohlomong Modimo o ne a sa batle hore ke etse ntho ena!”

Batho ba bang ba nyahamiswa ke mathata le kgethollo tse tletseng mona lefatsheng. E ka nna ya ba ba ile ba leka ho ntlafatsa bophelo ba bona, empa dintho tse kang ho kula, dintwa, bokebekwa le dikoduwa tsa tlhaho tsa nna tsa senya merero ya bona. Jwale ba a ipotsa ba re: ‘Ke hobaneng ha ke itena ka nthwe?’

Ke nnete hore maemo a bophelo a ka fetola merero ya rona. (Moeklesia 9:11) Le ha ho le jwalo, o na le boikgethelo ha re tla tabeng ya bokamoso ba hao. Ha e le hantle Bibele e bontsha hore bokamoso ba hao, bo itshetlehile diqetong tseo o di etsang. Hlokomela seo e se buang.

Nakong eo Baiseraele ba neng ba le haufi le ho kena naheng e tshepisitsweng, Moshe eo e neng e le moetapele wa bona, o ile a re: “Ke behile bophelo le lefu ka pela lona, tlhohonolofatso le thohako; le kgethe bophelo e le hore le tswele pele le phela, lona le bana ba lona, ka hore le rate Jehova Modimo wa lona, le mamele lentswe la hae mme le mo kgomarele.”—Deuteronoma 30:15, 19, 20.

“Ke behile bophelo le lefu ka pela lona, tlhohonolofatso le thohako; le kgethe bophelo.”—Deuteronoma 30:19

Ho jwalo! Ka mora hore Modimo a ntshe Baiseraele bokgobeng Egepeta, o ile a ba fa tshepo ya hore Naheng e Tshepisitsweng, ba tla phela ka kgotso ebile ba lokolohile. Empa seo se ne se sa tlo iketsahalla feela tjee. E le hore ba fumane ditlhohonolofatso tsena, ba ne ba lokela hore ba “kgethe bophelo.” Ba ne ba tla etsa seo jwang? ‘Ka hore ba rate Modimo, ba mamele lentswe la hae hape ba mo kgomarele.’

Le kajeno bokamoso ba rona bo ntse bo itshetlehile diqetong tseo re di etsang. Haeba re kgetha ho rata Modimo, ho mo mamela le ho mo kgomarela, re tla be re kgetha ho phela ka ho sa feleng lefatsheng le letle la paradeise. Jwale ho etsa sena ho akarelletsang?

Lerato ke bokgabane bo ka sehloohong ba Modimo. Moapostola Johanne o ile a budulelwa hore a ngole a re: “Modimo ke lerato.” (1 Johanne 4:8) Ke ka lebaka leo ha Jesu a ne a botswa hore na ke taelo efe e kgolo ho di feta kaofela, a ileng a re: “O rate Jehova Modimo wa hao ka pelo ya hao yohle le ka moya wa hao wohle le ka kelello ya hao yohle.” (Matheu 22:37) Ho ba motswalle wa nnete wa Jehova Modimo, ha ho a itshetleha ka ho mo tshaba kapa ho mo mamela feela o sena mabaka empa ho itshetlehile ka ho mo rata. Jwale ke hobaneng ha re lokela ho mo rata?

Lerato leo Jehova a ratang batho ka lona, le tshwana le lerato leo batswadi ba ratang bana ba bona ka lona. Le hoja batswadi ba sa phethahala, ka lerato ba laya bana ba bona, ba a ba kgothatsa, ba a ba tshehetsa ebile ba a ba kgalemela hobane ba batla ho ba bona ba thabile ebile ba atleha bophelong. Keng seo batswadi ba se lebelletseng ho bana ba bona? Ba lebelletse hore bana ba bona ba ba rate le hore ba nke ka botebo seo ba ba rutileng sona. Na  ha se ho utlwahalang hore ebe Ntate wa rona ya phethahetseng ya lehodimong o lebelletse hore re bontshe ho ananela lerato leo a re bontshitseng lona?

Puo ya pele eo Bibele e neng e ngotswe ka yona, lentswe “mamela” le akarelletsa ho “phethahatsa.” Ke sona se bolelwang ke ha ho thwe ngwana a mamele batswadi. Ka hoo, ho mamela lentswe la Modimo ho akarelletsa ho ithuta Bibele le ho phethahatsa seo re ithutileng sona.—1 Johanne 5:3.

Jesu o ile a bontsha bohlokwa ba ho mamela lentswe la Modimo ha a ne a re: “Motho a ke ke a phela ka bohobe feela, empa o tla phela ka polelo e nngwe le e nngwe e tswang molomong wa Jehova.” (Matheu 4:4) Feela jwalo ka ha dijo e le tsa bohlokwa, ho ba le tsebo ya Modimo ke ntho ya bohlokwa ka ho fetisisa. Ke hobaneng ha re tjho jwalo? Morena Solomone ya bohlale o ile a hlalosa a re: “Bohlale ke tshireletso jwalo ka ha tjhelete e le tshireletso; empa molemo wa tsebo ke hore bohlale bo boloka ba nang le bona ba phela.” (Moeklesia 7:12) Le kajeno, ho ba le tsebo le bohlale ba Modimo ho ka re sireletsa, ha ba ha re thusa ho etsa diqeto tse tla re bulela monyetla wa ho phela ka ho sa feleng nakong e tlang.

Hopola papiso eo Jesu a ileng a e etsa sehloohong se fetileng ha a ne a re: “Heke e isang bophelong e moqotetsane le tsela e isang teng e patisane, mme ke ba seng bakae ba e fumanang.” (Matheu 7:13, 14) E le hore re tsamaye tseleng ena mme re fumane bophelo bo sa feleng, re lokela ho ba metswalle e haufiufi ya motataisi ya nang le tsebo e fetang ya mang kapa mang. Ka hoo, re na le mabaka a utlwahalang a hore re be le setswalle se haufiufi le Modimo. (Pesaleme ya 16:8) Jwale re ka etsa seo jwang?

Ka dinako tsohle ho na le dintho tse ngata tseo re tlamehang ho di etsa, le tseo re ka ratang ho di etsa. Dintho tsena di ka etsa hore re phathahane haholo hoo re ka hlokang nako ya ho nahana ka seo Modimo a batlang hore re se etse. Ke ka hoo Bibele e re hopotsang sena: “Le dule le lebetse ka tiyo hore ka moo le tsamayang ka teng ha se jwalo ka batho ba seng bohlale empa ke jwalo ka ba bohlale, le ithekele nako e loketseng, hobane matsatsi a kgopo.” (Baefese 5:15, 16) Haeba re nka setswalle sa rona le Modimo e le sa bohlokwa ka ho fetisisa, re tla atamela haufiufi le yena.—Matheu 6:33.

Le hoja ho sena letho leo o ka le etsang ho fetola dintho tse fetileng empa o ka kgona ho kgetha bokamoso bo botle bakeng sa hao le bao o ba ratang. Bibele e re bontsha hore Ntate wa rona ya lehodimong Jehova Modimo, o re rata haholo hoo a re bolellang seo a lebelletseng ho bona re se etsa. Hlokomela mantswe a moprofeta Mikea:

“Wena motho wa lefatshe, o o boleletse se molemo. Jehova o batla eng ho wena ha e se hore o sebedise toka o rate mosa mme o inyenyefatse ha o tsamaya le Modimo wa hao?”—Mikea 6:8.

Na o tla amohela memo ya Jehova ya hore o tsamaye le yena mme o fumane ditlhohonolofatso tseo a di tshepisang ba tsamayang le yena? Kgetho ke ya hao!