O ka Tseba Bokamoso ba Hao Jwang?
Batho ba bangata ba dumela hore bophelo ba bona bo laolwa ke matla a sa bonahaleng kapa bo rerilwe esale pele. Ditumelo tseo di etsa hore ba etse dintho tse ngata tseo ba nahanang hore di tla ba tlisetsa lehlohonolo kapa di ntlafatse bophelo ba bona ka tsela e itseng.
SEO BATHO BA BANGATA BA SE DUMELANG
BONOHE BA DINALEDI: Batho ba bang ba dumela hore tsela eo dinaledi di neng di dutse ka yona ha ba ne ba hlaha e ne e bontsha hore na bokamoso ba bona bo tla ba jwang. Ba bua le dinohe tsa dinaledi kapa ba bala ditaba tse buang ka bonohe ba dinaledi hore di ba bolelle dintho tse tlo ba etsahalla, ebe ka mora moo ba leka ho fumana ditsela tsa ho itshireletsa kapa ho atleha.
DIKARETE: Batho ba bang ba dumela hore haeba ba buisana le batho ba sebedisang dikarete ho ba bolella bokamoso ba bona, ba tla tseba hore na ke hobaneng ha ba hlahelwa ke dintho tse itseng le hore na ba lokela ho etsang. Ha ba se ba tseba hore na ba tlo etsahallwa ke eng ba qoba dintho tse ka ba ntshang kotsi, ebe ba leka ho fumana tharollo ya mathata a bona le hore ba atlehe.
HO RAPELA BADIMO: Batho ba bang ba dumela hore ba lokela ho hlompha batho ba hlokahetseng kapa ba rapele medimo e fapaneng e le hore e ba sireletse le ho ba hlohonolofatsa. Van * ya dulang Vietnam o re: “Ke ne ke dumela hore haeba ke hlompha badimo, ba tla etsa hore nna le bana ba ka re phele ha monate hona jwale le nakong e tlang.”
HO TSWALWA HANGATA: Batho ba bangata ba dumela hore nako le nako ha motho a hlokahala o tswalwa hape. Ba dumela hore dintho tse ntle kapa tse mpe tse ba etsahallang hona jwale ke ditlamorao tsa dintho tseo ba ileng ba di etsa bophelong ba bona bo fetileng.
Batho ba bangata ba re ha ba dumele dinthong tsena, empa ba ntse ba etsa dintho tse kang ho bala mela ya matsoho, ho bala ditaba tse buang ka bonohe ba dinaledi, ho buisana le badimo le tse ding. Ba nahana hore mohlomong ho etsa dintho tsena ho ka ba thusa hore ba tsebe bokamoso ba bona.
DITLAMORAO E BA DIFE?
Na batho ba dumelang dintho tsee ba atlehile bophelong, hona ba tla dula ba thabile?
Nahana ka se ileng sa etsahalla Hào ya dulang Vietnam. O ne a kopa thuso ho dinohe tsa dinaledi, a rapela badimo hore ba mo tataise, a bile a phela ka moetlo o bitswang feng shui o tlwaelehileng dinaheng tsa Asia. Na o ile a atleha? Hào o re: “Ke ile ka lahlehelwa ke tjhelete e ngata, ka kena dikolotong, ka ba le mathata a lelapa le ho ba le kgatello ya maikutlo.”
Qiuming ya dulang Taiwan le yena o ne a dumela ho bonohe ba dinaledi, ho tswalwa hangata, hore bophelo bo rerilwe esale pele, a phela ka moetlo wa feng shui a bile a rapela badimo. Ka mora ho hlahloba dintho tsena tseo a neng a di dumela o ile a re: “Ke ile ka hlokomela hore dithuto tsena ha di dumellane ebile di a ferekanya le hore hangata seo dinohe tsa dinaledi di neng di se bua se ne se sa etsahale. Ha e le tabeng ya ho tswalwa hangata, haeba motho a sa hopole dintho tse ileng tsa etsahala bophelong bo fetileng a ka fetoha jwang mme a etsa dintho ka tsela e nepahetseng bophelong bo latelang?”
“Ke ile ka hlokomela hore dithuto tsena le meetlo ena ha e dumellane ebile e ya ferekanya.”—QIUMING, TAIWAN
Hào, Qiuming le batho ba bang ba bangata ba hlokometse hore ba ke ke ba tseba bokamoso ba bona ka ho sebedisa bonohe ba dinaledi, ho buisana le batho ba hlokahetseng kapa ho tswalwa hangata. Na see se bolela hore ha re kgone ho laola dintho tse tla re etsahalla nakong e tlang?
Batho ba bangata ba nahana hore ba lokela ho ya diyunivesithi le ho ba barui e le hore ba phele ha monate. Ditlamorao e bile dife ho batho ba ileng ba etsa qeto eo?
^ par. 6 Sehloohong sena le tse latelang mabitso a mang a fetotswe
^ par. 16 Mantswe ana a hlaha Bibeleng e Halalelang ho Bagalata 6:7. Mantswe ana a nkuwe mantsweng a tlwaelehileng a reng: “Ha o jala lehapu, o tla kotula lehapu mme ha o jala dinawa, o tla kotula dinawa.”
O ka Nna wa Rata le Tsena
TORA YA HO LEBELA
Na Maselamose le Dinohe Tsa Dinaledi di ka o Bolella Nnete ka Bokamoso?
Na o ka tshepa dikgakanyo tsee?
TORA YA HO LEBELA
Seo Bibele e se Buang ka Bophelo le Lefu
Na ho na le karolo e nngwe ka hara rona e tswelang pele e phela ha re shwa? Na re na le moya o sa shweng? Hantlentle bafu ba hokae?
