Nka hore o phela Galilea nakong eo Jesu a neng a le teng ka yona lefatsheng. Mme o nkile leeto ho ya Jerusalema ho ya keteka Mokete wa Maphephe. Motse o tletse ka badumedimmoho le wena ba tswang hole. O batla ho fana ka nyehelo ho Jehova. O tla o tshwere podi eo o tlo e nyehela, o tsamaya hara motse o tletseng batho tseleng e petetsaneng, o ya o lebile tempeleng. Ha o fihla tempeleng, o fumana ho tletse batho ba tlo nyehela. Qetellong ho fihla monyetla wa hao wa hore o fane ka podi ho baprista. Ka yona nako eo, o a hopola hore moreno o na le ho hong kgahlanong le wena, mme ho ka etsahala hore o teng moketeng ho tlo nyehela mpho ya hae. Jesu o hlalosa seo o lokelang ho se etsa. (Bala Matheu 5:24.) O ka bopa kgotso jwang le moreno jwalo ka ha Jesu a laetse? Mabokoseng a latelang kgetha karabo e nepahetseng.

O LOKELA HO . . .

• bua le moreno haeba o nahana hore ona le lebaka le utlwahalang la ho o kwatela

• leka ho lokisa monahano wa moreno haeba o nahana hore ke motho ya nkehang maikutlo ka pele kapa hore le yena o ntse a e na le bothata

• mamela ka hloko ha moreno a ntsha maikutlo a hae ebe ka boikokobetso o kopa tshwarelo ka ho se utlwisisane ho bileng teng hara lona, le hoja o sa utlwisise ka botlalo se mo kwatisitseng

MORENO O LOKELA HO . . .

• fumana tshehetso ho ba bang ka phuthehong ka ho ba bolella kamoo o mo foseditseng kateng

• bua le wena hampe, a o bolelle kamoo o mo entseng hampe kateng a be a o qobelle hore o kope tshwarelo

• hlokomela boikokobetso ba hao le sebete seo o bileng le sona ka ho buisana le yena, a be a o tshwarele ka bolokolohi

Le hoja borapedi ba rona bo sa akarelletse ho etsa mahlabelo ka diphoofolo, Jesu o ne a re rutang ka ho bopa kgotso le morabo rona e le hore Modimo a tle a amohele borapedi ba rona?