Re phela lefatsheng le lekang ho etsa hore re nahane hore dintho tse ntle di mpe mme tse mpe di ntle. (Esa 5:20) Se utlwisang bohloko ke hore batho ba bang ba etsa dintho tseo Jehova a di hloileng tse akarelletsang boitshwaro bo bobe bo etswang ke batho ba bong bo tshwanang. Ha batjha ba le sekolong, dithaka tsa bona kapa batho ba bang ba ka leka ho ba hatella hore le bona ba etse dintho tse mpe tseo ba di etsang. O ka thusa bana ba hao jwang hore ba atlehe ha ba ba le diteko tse kang tsee?

Ruta bana ba hao ka melao ya Jehova. (Le 18:3) Hanyane hanyane ba rute hore na Bibele e reng ka thobalano empa seo o ba bolellang sona se tla itshetleha ka hore na ba dilemo di kae le hore na ba tla utlwisisa hakae. (De 6:7) Ipotse: ‘Na ke se ke rutile bana ba ka hore na tsela e nepahetseng ya ho bontsha lerato ke efe, hore na ke hobaneng ha ba lokela ho apara ka tsela e hlomphehileng le hore batho ha ba a lokela ho ba ba tshwara moo ba sa lokelang ho ba tshwara teng? Na bana ba ka ba a tseba hore ba lokela ho etsang haeba motho a leka ho ba bontsha pornography kapa a ba kopa hore ba etse ntho eo Jehova a reng e fosahetse?’ Ha bana ba hao ba tseba hore ba lokela ho etsang seo se tla ba thusa hore ba qobe mathata. (Lipr 27:12; Moe 7:12) Ka hoo ha o ruta bana ba hao, sena se a bontsha hore o nka letlotlo leo Jehova a o fileng lona e le la bohlokwa.​—Pes 127:3.

SHEBELLA VIDEO E RENG HAHA NTLO E TIILENG​—SIRELETSA BANA BA HAO HO “SE SEBE,” EBE KA MORA MOO O ARABA DIPOTSO TSE LATELANG:

• Ke hobaneng ha ho le thata hore batswadi ba bang ba rute bana ba bona ka thobalano?

• Ke hobaneng ha batswadi ba tlameha ho ruta bana ba bona ka “tayo le kelello e laolwang ke Jehova”?​—Ef 6:4

• Mokgatlo wa Jehova o fane ka eng e thusang batswadi hore ba rute bana ba bona ka thobalano?​—w19.05 12, lebokose

• Ke hobaneng ha o lokela ho itlwaetsa ho bua le bana ba hao ka mehla pele ba ba le mathata?