Haeba re ipehela dintho tseo re batlang ho di finyella tshebeletsong ya rona, re tla be re sebedisa matla a rona ka tsela e nepahetseng. (1Ko 9:26) Ho ba le dintho tseo re batlang ho di finyella tshebeletsong, ho re thusa hore re sebedise nako ya rona hantle pele lefatshe lena le fela. (Ef 5:15, 16) Nakong ya borapedi ba lelapa, le ka rera hore na le batla ho finyella eng selemong se setjha sa tshebeletso. Kgatiso ena e na le dihlooho tse mmalwa tsa dintho tseo le ka rapellang hore le di finyelle tshebeletsong ya lona.​—Jak 1:5.

Ka mohlala, lelapa lohle le ka sebetsa hammoho ho thusa bonyane motho a le mong hore e be pulamadiboho ya ka mehla. Haeba o nahana hore o ke ke wa atleha ho finyella dihora tse hlokahalang, o ka bua le bopulamadiboho ba nang le maemo a tshwanang le a hao. (Lipr 15:22) Mohlomong le ka ba memela borapeding ba lelapa mme la ba botsa dipotso. Ka mora moo, le ka ngola matsatsi ao le ka yang tshimong ka ona. Haeba o kile wa ba pulamadiboho nakong e fetileng, hlahloba maemo a hao ho bona hore na o ka se be yona hape hona jwale.

Na lelapeng la lona ho na le ya ka kgonang ho ba pulamadiboho e thusang ka kgwedi kapa ho feta? Haeba o se na matla a lekaneng, o ka nkela bopulamadiboho bo thusang ebe ka letsatsi o nka nako e seng kae feela tshebeletsong ya tshimo. O ka kgetha kgwedi e nang le matsatsi a phomolo kapa e nang le mafelobeke a mahlano haeba o se na nako e lekaneng hara beke hobane o sebetsa kapa o kena sekolo. Kgetha hore na o tla nkela bopulamadiboho bo thusang kgweding efeng ebe o ngola le matsatsi ao o tla ya tshimong ka ona.​—Lipr 21:5.

SHEBELLANG VIDEO YA EBA PULAMADIBOHO E SEBETE EBE LE ARABA POTSO E LATELANG:

• Mohlala wa Moradiwabo rona Aamand o re rutang ka lerato le tlhokomelo eo Jehova a e fang batho ba itelang hore e be bopulamadiboho?