Re na le divideo tse nne tseo re di sebedisang tshimong ha re ithuta Bibele le batho. Video ka nngwe e phetha morero ofe?

• Ke Hobaneng ha o Lokela ho Ithuta Bibele?​—Video e Felletseng e etseditswe ho thusa batho hore ba batle ho ithuta Bibele ho sa tsotellehe seo ba se dumelang. E kgothaletsa batho ho batla dikarabo tsa dipotso tsa bohlokwa ka Bibeleng. Hape e ba thusa ho bona hore na ba ka kopa thuto ya Bibele jwang.

• Ke Hobaneng ha o Lokela ho Ithuta Bibele? (video e kgutsufaditsweng) e tshwana le e feletseng empa yona e kgutshwanyane. E ka sebetsa haholo tshimong ya batho ba se nang nako e kaalo ya ho qoqa kapa ba phathahaneng.

• Ho Etsahalang Thutong ya Bibele? e thusa batho hore ba batle thuto ya Bibele e sa lefellweng le ho ba bontsha hore na ba ka e kopa jwang.

• Thabela Thuto ya Bibele e bontshwa batho ba seng ba qadile ho ithuta Bibele. Video ena e hlaha leqepheng la bobedi la buka ya O ka Thaba ka ho sa Feleng! Empa e ntse e ka sebediswa le ha ho balwa bukana ya O ka Thaba ka ho sa Feleng! E hlalosa dintlha tse hlahang bukeng le hore na moithuti a ka lebella eng thutong.

Video ka nngwe e etseditswe ho sebediswa maemong a itseng empa e nngwe le e nngwe ya tsona e ntse e ka bapalwa kapa ya romellwa motho ha ho loketse. Bahweletsi ba kgothaletswa ho tseba divideo tsena hantle e le hore ba ka di sebedisa ha molemo ha ba le tshimong.