Dikoduwa tsa tlhaho di se di etsahala hangata matsatsing ana. Ha koduwa e eba teng, re lokela ho fana ka thuso ka tsela e hlophisehileng. Ka lebaka leo, Sehlopha se Busang se entse tokisetso ya hore diofisi tsa makala di be le Lefapha le Thusang Nakong ya Dikoduwa.

Ka mora hore ho be le koduwa, kapelepele bara babo rona ba kopana le baholo ho utlwa hore na bahweletsi ba anngweng ke koduwa ba hloka thuso efe. Haeba ho bile le tshenyo e kgolo hoo bahweletsi ba sa kgoneng ho thusana, ofisi ya lekala e tla romela bara babo rona ba tshwanelehang ho etella pele mosebetsi wa ho fana ka thuso. Bara babo rona bao, ba ka hlophisa hore ho be le baithaopi, ba kopa menehelo ya dintho tse itseng kapa ba reka le ho fana ka dintho tse hlokahalang sebakeng seo.

Ho etsa dintho ka tsela ena ho a thusa. Ho etsa hore ho se ke ha eba le mosebetsi o mongata o sa hlokahaleng, pherekano le tshenyo ya menehelo kapa ya thepa. Sena se ka etsahala haeba re etsa dintho ka tsela ya rona mme re sa mamele tataiso e fanweng.

Bara babo rona ba kgethilweng ke ofisi ya lekala, ba ka rera hore na ho hlokahala tjhelete le baithaopi ba bakae. Ba ka boela ba kopa thuso ho ba boholong pusong e le hore mosebetsi o ka fela kapele. Ka hoo, ka kopo le se ke la bokella menehelo, la romela diphallelo kapa la ya moo ho hlahileng koduwa haeba le sa kopuwa ho etsa jwalo.

Le ha ho le jwalo, ha koduwa e eba teng re batla ho thusa. (Heb 13:16) Re rata bara le baradi babo rona. Ka hoo, re ka etsang ho ba thusa? Re ka rapella bara le baradi babo rona ba anngweng ke koduwa ha mmoho le bohle ba ba thusang. Re ka boela ra fana ka monehelo wa mosebetsi wa lefatshe lohle. Diofisi tsa makala di ka sebedisa tataiso ya Sehlopha se Busang ho bona hore na menehelo e ka sebedisetswa ho thusa hokae. Haeba re batla ho thusa moo koduwa e bileng teng, re ka tlatsa foromo ya Local Design/Construction Volunteer Application (DC-50).

SHEBELLANG VIDEO YA DIKGOHOLA TSE BAKILENG TSHENYO BRAZIL EBE LE ARABA POTSO E LATELANG:

Keng e o kgahlang ka tsela eo Dipaki Tsa Jehova di ileng tsa thusa ka yona ka mora dikgohola tse ileng tsa eba teng Brazil ka 2020?