Batho ba ithutang Bibele ba lokela ho ba le tumelo e matla e le hore ba ka kgahlisa Modimo. (Heb 11:6) Re ka ba thusa ho etsa sena re sebedisa buka ya O ka Thaba ka ho sa Feleng! Buka ena e na le mangolo a bohlokwa, ditlhaloso tse hlakileng, dipotso tse susumetsang maikutlo, divideo tse kgothatsang le ditshwantsho tse kgahlang mahlo. Ha re thusa batho bao re ithutang Bibele le bona hore ba be le makgabane a Bokreste le hore ba be le setswalle le Jehova, ho tla ba jwalo ka ha eka re haha ka thepa e sa tjheng.​—⁠1Ko 3:​12-⁠15.

Batho ba bang ba utlwa ho le thata ho ba metswalle ya Modimo hobane ha ba mo bone. Ka hoo, re lokela ho ba thusa hore ba tsebe Jehova haholwanyane le hore ba mo tshepe.

SHEBELLANG VIDEO YA MATLAFATSA TUMELO HO JEHOVA O SEBEDISA BUKA YA “O KA THABA KA HO SA FELENG!” EBE LE ARABA DIPOTSO TSE LATELANG:

• Re tseba jwang hore moradiwabo rona o ile a lokisetsa hantle bakeng sa thuto ee?

• Moradiwabo rona o ile a sebedisa dipotso tse eketsehileng jwang e le hore a ka thusa moithuti wa hae hore a ntshe maikutlo a hae mabapi le lengolo la Esaia 41:​10, 13?

• Video le lengolo la Bibele di ile tsa thusa moithuti jwang?

Batho ba bangata ha ba utlwisise hore na thekollo ke eng ebile ha ba e nke e le mpho eo Modimo a re fileng yona. (Gal 2:​20) Ka hoo re lokela ho ba thusa hore ba be le tumelo sehlabelong sa thekollo sa Jesu.

SHEBELLANG VIDEO YA MATLAFATSA TUMELO HO JESU O SEBEDISA BUKA YA “O KA THABA KA HO SA FELENG!” EBE LE ARABA DIPOTSO TSE LATELANG:

• Re tseba jwang hore morabo rona o ile a lokisetsa hantle bakeng sa thuto ee?

• Morabo rona o ile a sebedisa karolo ya “Batla” jwang ho thusa motho eo a ithutang Bibele le yena?

• Ke hobaneng ha thapelo e le bohlokwa bakeng sa batho ba ithutang Bibele?