Jesu o ile a kgona ho pakela mosadi wa Mosamaria ha monyetla o hlaha hobane o ile a qala ka ho qoqa le mosadi eo. Re ka ntlafatsa tsebo ya rona ka ho qadisa moqoqo le batho bao re sa ba tsebeng jwang?

• Eba botswalle mme o bue le batho. Le hoja Jesu a ne a kgathetse, o ile a qadisa moqoqo ka ho kopa metsi. Ka hoo, o ka qala ka ho dumedisa mme ka mora moo mohlomong o ka bua ka boemo ba lehodimo kapa ka ntho e sa tswa etsahala. Hopola hore sepheo sa hao ke ho qadisa moqoqo, ka hoo o ka bua ka eng kapa eng eo o nahanang hore motho a ka e thahasella. Haeba motho eo a sa thabele ho qoqa le wena, o se ke wa nyahama. Leka ho bua le motho e mong hape. Kopa Jehova hore a o fe sebete.—Ne 2:4; Lik 4:29.

• Ela hloko monyetla o ka hlahang wa hore o bolele ditaba tse molemo empa o se ke wa potlaka. Qoqa ka dintho tse tlwaelehileng. Haeba o qobella moqoqo, motho eo o buang le yena a ka nna a ikutlwa a sa phutholoha ebe o kgaotsa ho qoqa le wena. O se ke wa nyahama haeba moqoqo o fela le pele o paka. Haeba o tshaba ho paka ha monyetla o hlaha, itlwaetse ho qadisa moqoqo feela empa o sa pake. [Bapala video ya 1 le be le buisane ka yona.]

• Leka ho qadisa moqoqo ka ho bua ho hong ka bodumedi ba hao, mohlomong seo se ka etsa hore motho eo o buang le yena a botse dipotso. Jesu o ile a bua dintho tse ileng tsa makatsa mosadi eo hoo a ileng a botsa dipotso. Jesu o ile a araba dipotso tsa hae ha a ntse a mo bolella ditaba tse molemo. [Bapala video ya 2 le be le buisane ka yona, ebe ka mora moo o bapala video ya 3 le be le buisane ka yona.]