1 Likronike 22:1-19
22 Joale Davida a re: “Ena ke ntlo+ ea Jehova Molimo oa ’nete, ’me ena ke aletare+ ea nyehelo ea secheso bakeng sa Iseraele.”
2 Joale Davida a re ho phuthoe bajaki+ bohle hammoho ba neng ba le naheng ea Iseraele, joale a ba beha hore e be babetli+ ba majoe hore ba betle majoe+ a nang le mahlakore a mane a lekanang bakeng sa ho haha ntlo ea Molimo oa ’nete.
3 Davida a lokisa tšepe e ngata haholo bakeng sa lipekere tsa mamati a liheke le bakeng sa lintho tse kopanyang, le koporo ka bongata bo ke keng ba lekanngoa,+
4 le lifate tsa kedare+ tse se nang palo; etsoe Basidone+ le Batyre+ ba ile ba tlisetsa Davida lifate tsa kedare tse ngata haholo.
5 Ka lebaka leo Davida a re: “Mora oa ka Solomone o mocha ’me ha aa tiea,+ ’me ntlo e lokelang ho haheloa Jehova e lokela ho ba e hlollang+ ka mokhoa o fetisisang ka botle+ linaheng tsohle. Kahoo, e-re ke mo lokisetse.” Kahoo Davida a lokisetsa lintho tse ngata haholo pele ho lefu la hae.+
6 Ho feta moo, a bitsa mora oa hae Solomone e le hore a ka mo laela hore a hahele Jehova Molimo oa Iseraele ntlo.
7 Davida a tsoela pele ho re ho mora oa hae Solomone: “Ha e le ’na, e ile ea e-ba takatso ea pelo+ ea ka ho hahela lebitso+ la Jehova Molimo oa ka ntlo.
8 Empa lentsoe la Jehova le ile la tla khahlanong le ’na, le re, ‘U tšolotse+ mali a mangata haholo, ’me u loanne+ lintoa tse khōlō. U ke ke ua hahela lebitso+ la ka ntlo, etsoe u tšolotse mali a mangata haholo lefatšeng ka pel’a ka.
9 Bona! U tla tsoalloa mora.+ E tla ba motho oa phomolo, ’me ka sebele ke tla mo fa phomolo ho lira tsohle tsa hae ka hohle;+ lebitso la hae e tla ba Solomone,+ ’me ke tla beha khotso+ le khutso holim ’a Iseraele matsatsing a hae.
10 Ke eena ea tla hahela lebitso+ la ka ntlo, ’me e tla ba mora+ oa ka, ’me ’na ke be ntat’ae.+ Ka sebele ke tla tiisa terone ea borena+ ba hae ka thata holim ’a Iseraele ho isa nakong e sa lekanyetsoang.’
11 “Joale, mora oa ka, e se eka Jehova a ka ba le uena, ’me u atlehe ’me u hahe ntlo ea Jehova Molimo oa hao, feela joalokaha a buile malebana le uena.+
12 Feela e se eka Jehova a ka u fa masene le kutloisiso,+ ’me e se eka a ka u fa taelo malebana le Iseraele le hore u boloke molao oa Jehova Molimo oa hao.+
13 Tabeng eo u tla atleha+ haeba u ela hloko ho phetha melao ea tsamaiso+ le liqeto tsa boahloli+ tseo Jehova a li laetseng+ Moshe malebana le Iseraele. E-ba sebete ’me u be matla.+ U se ke ua tšoha+ kapa ua haroha letsoalo.+
14 Bona! nakong ea mahloreho+ a ka ke lokiselitse ntlo ea Jehova litalenta tsa khauta+ tse likete tse lekholo le litalenta tsa silevera tse milione, ’me koporo+ le tšepe+ ha ho mokhoa oa ho li lekanya hobane li ngata haholo; ke lokisitse le lifate le majoe, empa u tla li eketsa.
15 U na le basebetsi ba bangata, babetli ba majoe le ba sebetsang ka majoe+ le lehong le e mong le e mong ea nang le tsebo ea mosebetsi oa mofuta o mong le o mong.+
16 Khauta, silevera le koporo le tšepe ha ho mokhoa oa ho li bala.+ Ema u nke bohato,+ ’me e se eka Jehova a ka ba le uena.”+
17 Davida a tsoela pele ho laela likhosana tsohle tsa Iseraele hore li thuse mora oa hae Solomone:
18 “Na Jehova Molimo oa lōna ha a na le lōna,+ ’me na ha aa le fa phomolo ka hohle?+ Etsoe o nehelane ka baahi ba naha letsohong la ka, ’me naha e hlōtsoe ka pel’a Jehova+ le ka pel’a sechaba sa hae.
19 Joale behang lipelo tsa lōna le meea+ ea lōna hore le botse Jehova Molimo oa lōna,+ ’me le eme le hahe sehalalelo+ sa Jehova Molimo+ oa ’nete, hore le tlise areka+ ea selekane sa Jehova le lisebelisoa tse halalelang tsa Molimo oa ’nete ntlong e hahetsoeng lebitso+ la Jehova.”
