1 Likronike 28:1-21
28 Davida a phutha likhosana+ tsohle tsa Iseraele, likhosana+ tsa meloko le likhosana+ tsa lihlopha tsa ba sebeletsang morena le balaoli ba ba likete+ le balaoli ba ba makholo+ le baokameli ba thepa+ eohle le liphoofolo tse ruiloeng+ tsa morena le bara+ ba hae, hammoho le balaoli+ ba makhotla le banna+ ba matla, esita le monna e mong le e mong ea sebete, ea matla, Jerusalema.
2 Joale Morena Davida a ema ’me a re:
“Nkutloeng, barab’eso le sechaba sa ka. Ha e le ’na, e ile ea e-ba takatso ea pelo+ ea ka ho hahela areka ea selekane sa Jehova ntlo ea ho phomola ’me e le setuloana sa maoto+ sa Molimo oa rōna, ’me ke ne ke entse tokisetso ea ho haha.+
3 Molimo oa ’nete a re ho ’na, ‘U ke ke ua hahela lebitso+ la ka ntlo; etsoe u motho oa lintoa, ’me u tšolotse mali.’+
4 Ka lebaka leo Jehova Molimo oa Iseraele o nkhethile ho bohle ntlong ea Ntate+ hore ke be morena+ oa Iseraele ho isa nakong e sa lekanyetsoang; etsoe o ile a khetha Juda hore e be moeta-pele,+ ’me ka tlung ea Juda o khethile ntlo ea Ntate,+ ’me har’a bara+ ba Ntate, ke ’na eo a mo amohetseng,+ hore a nketse morena oa Baiseraele bohle;
5 ho bara bohle ba ka (etsoe bara bao Jehova a mphileng bona ba bangata)+ joale o khethile mora oa ka Solomone+ hore a lule teroneng+ ea borena ba Jehova Iseraele.
6 “Ho ekelletsa moo, a re ho ’na, ‘mora oa hao Solomone ke eena ea tla haha ntlo+ ea ka le mabala a ka; etsoe ke mo khethile hore e be mora oa ka,+ ’me ’na ke tla ba ntat’ae.+
7 Ka sebele ke tla tiisa borena+ ba hae ka thata ho isa nakong e sa lekanyetsoang haeba o tla ikemisetsa ka matla ho phetha litaelo+ tsa ka le liqeto tsa ka tsa boahloli,+ joaloka letsatsing lena.’
8 Joale, ka pel’a mahlo a Baiseraele bohle, phutheho+ ea Jehova, le moo Molimo oa rōna a ntseng a utloa,+ elang hloko ’me le batle litaelo tsohle tsa Jehova Molimo oa lōna, e le hore le ka rua naha+ e ntle ’me ka sebele la e fetisetsa e le lefa ho bara ba lōna ka mor’a lōna ho isa nakong e sa lekanyetsoang.
9 “Uena, mora oa ka Solomone, tseba+ Molimo oa ntat’ao ’me u mo sebeletse+ ka pelo+ e feletseng le ka moea+ o thabileng; etsoe Jehova o phenya+ lipelo tsohle, ’me o lemoha+ tšekamelo e ’ngoe le e ’ngoe ea menahano. Haeba u mo batla, o tla etsa hore u mo fumane;+ empa haeba u mo tlohela,+ o tla u lahla ka ho sa feleng.+
10 Joale, bona, etsoe Jehova o u khethile hore u hahe ntlo e le sehalalelo. E-ba sebete ’me u nke bohato.”+
11 Davida a fa mora oa hae Solomone polane+ ea kaho ea mathule+ le ea matlo a eona le likamore tsa eona tsa polokelo+ le likamore+ tsa eona tse marulelong le likamore tsa eona tse lefifi tse ka hare le ntlo ea sekoahelo+ sa poelano;
12 esita le polane ea kaho ea ntho e ’ngoe le e ’ngoe e neng e tlile ho eena ka pululelo+ bakeng sa mabala+ a ntlo ea Jehova le bakeng sa likamore+ tsohle tsa ho jela ka hohle, bakeng sa matlotlo a ntlo ea Molimo oa ’nete le bakeng sa matlotlo a lintho tse halalelitsoeng;+
13 le bakeng sa lihlopha+ tsa baprista le tsa Balevi le bakeng sa mosebetsi oohle oa tšebeletso ea ntlo ea Jehova le bakeng sa lisebelisoa tsohle tsa tšebeletso ea ntlo ea Jehova;
14 bakeng sa khauta ho ea ka boima ba eona, khauta ea lisebelisoa tsohle bakeng sa litšebeletso tse fapaneng, bakeng sa lisebelisoa tsohle tsa silevera ho ea ka boima ba tsona, lisebelisoa+ tsohle bakeng sa litšebeletso tse fapaneng;
15 le boima ba liluloana tsa mabone+ tsa khauta le mabone a tsona a khauta, ho ea ka boima ba liluloana tsa khauta tse fapaneng le mabone a tsona, le bakeng sa liluloana tsa mabone tsa silevera ho ea ka boima ba tsona bakeng sa seluloana sa mabone le mabone a sona ho ea ka tšebeletso ea liluloana tsa mabone tse fapaneng;
16 le khauta ho ea ka boima ba eona bakeng sa litafole tsa bohobe bo kolohantsoeng,+ bakeng sa litafole tse fapaneng, le silevera bakeng sa litafole tsa silevera;
17 le lifereko le likotlolo+ le lijeke tsa khauta e hloekileng, le bakeng sa likotlolo+ tse nyenyane tsa khauta ho ea ka boima ba tsona bakeng sa likotlolo tse nyenyane tse fapaneng, le bakeng sa likotlolo tse nyenyane tsa silevera ho ea ka boima ba tsona bakeng sa likotlolo tse nyenyane tse fapaneng;
18 bakeng sa aletare+ ea libano khauta e hloekileng ho ea ka boima ba eona le bakeng sa setšoantšo sa koloi,+ e leng, likerubime+ tsa khauta bakeng sa ho phukalatsa mapheo a tsona le ho sireletsa areka ea selekane sa Jehova.
19 “A fana ka temohisiso bakeng sa ntho eohle ka ho ngola+ se tsoang letsohong la Jehova holim ’a ka, esita le bakeng sa mesebetsi eohle ea polane ea kaho.”+
20 Davida a tsoela pele ho re ho mora oa hae Solomone: “E-ba sebete+ u be matla ’me u nke bohato. U se ke ua tšoha+ kapa ua haroha letsoalo,+ etsoe Jehova Molimo, Molimo oa ka, o na le uena.+ A ke ke a u lahla+ kapa a u tlohela ho fihlela mosebetsi oohle oa tšebeletso ea ntlo ea Jehova o phethiloe.
21 Lihlopha tsa baprista+ le tsa Balevi+ ke tsena bakeng sa tšebeletso eohle ea ntlo ea Molimo oa ’nete; e mong le e mong ea ratang+ le ea nang le tsebo bakeng sa tšebeletso+ eohle o na le uena mosebetsing oohle, le likhosana+ le sechaba kaofela, bakeng sa mantsoe ’ohle a hao.”
