1 Timothea 1:1-20
1 Pauluse, moapostola+ oa Kreste Jesu tlas’a taelo ea Molimo+ Mopholosi+ oa rōna le ea Kreste Jesu, tšepo ea rōna,+
2 ho Timothea,+ ngoana+ oa ’nete tumelong:
E se eka ho ka ba le mosa o sa tšoanelang, mohau, khotso e tsoang ho Molimo Ntate le Kreste Jesu Morena oa rōna.+
3 Feela joalokaha ke ile ka u khothaletsa ho lula Efese ha ke ne ke le mothating oa ho ea Macedonia,+ ke etsa joalo hona joale, e le hore u ka laela+ ba bang hore ba se ke ba ruta thuto+ e fapaneng,
4 leha e le ho ela hloko lipale+ tsa bohata le maloko, tseo qetello ea tsona e leng lefeela,+ empa tse hlahisang lipotso bakeng sa phuputso ho e-na le ho aba ntho leha e le efe e tsoang ho Molimo mabapi le tumelo.
5 Ka sebele sepheo sa taelo ena ke lerato+ le tsoang pelong+ e hloekileng le le tsoang letsoalong+ le letle le le tsoang tumelong e se nang boikaketsi.+
6 Ka ho kheloha linthong tsena ba bang ba kheloselitsoe+ puong+ ea lefeela,
7 ba batla ho ba mesuoe+ ea molao,+ empa ba sa lemohe leha e le lintho tseo ba li buang kapa lintho tseo ka tsona ba buang lipolelo tseo ba li tiisang ka matla.
8 Joale rea tseba hore Molao o motle+ hafeela motho a o tšoara ka mokhoa o lumelloang ke molao+
9 a tseba ’nete ena, hore molao ha o kenngoe tšebetsong bakeng sa motho ea lokileng, empa o kenngoa tšebetsong bakeng sa batho ba sa eeng ka molao+ le ba sa laoleheng,+ ba se nang bomolimo le baetsalibe, ba hlokang mosa o lerato,+ le ba silafetseng, ba bolaeang bo-ntate le ba bolaeang bo-’mè, babolai,
10 lihlola,+ banna ba robalang le banna, bakoeteli, ba leshano, bahlapanyi ba bohata,+ le ntho efe kapa efe e ’ngoe e hanyetsanang+ le thuto+ e phelisang hantle
11 ho ea ka litaba tse molemo tse khanyang tsa Molimo ea thabileng,+ tse ileng tsa behoa tlhokomelong+ ea ka.
12 Ke leboha Kreste Jesu Morena oa rōna, ea ileng a mpha matla, hobane o ile a nkuka ke le ea tšepahalang+ ka hore a nkabele bosebeletsi,+
13 le hoja pele ke ne ke le monyefoli le mohlorisi+ le monna oa monyelisi.+ Leha ho le joalo, ke ile ka bontšoa mohau,+ hobane ke ne ke hloka tsebo+ ’me ke etsa ka ho hloka tumelo.
14 Empa mosa o sa tšoanelang oa Morena oa rōna o ile oa ata ka ho fetisisa+ hammoho le tumelo le lerato le leng mabapi le Kreste Jesu.+
15 Polelo+ ena ea tšepahala hape e tšoanela ho amoheloa ka botlalo ea hore Kreste Jesu o ile a tla lefatšeng ho pholosa baetsalibe.+ Ke ’na ea ka pele-pele ho bona.+
16 Leha ho le joalo, lebaka leo ka lona ke ileng ka bontšoa mohau+ e ne e le hore ka ’na ke le mohlala o ka pele-pele Kreste Jesu a ka bontša tiisetso eohle ea hae hore e be mohlala bakeng sa ba tlang ho beha tumelo+ ea bona ho eena bakeng sa bophelo bo sa feleng.+
17 Joale ho Morena oa bosafeleng,+ ea ke keng a bola,+ ea sa bonahaleng,+ eo e leng eena feela Molimo,+ e be tlhompho le khanya ka ho sa feleng le kamehla.+ Amen.
18 Taelo+ ena ke e beha ho uena, ngoana, Timothea, tumellanong le lipolelo tse boletsoeng esale pele+ tse ileng tsa lebisa ka ho toba ho uena, e le hore ka tsona u ka tsoela pele u loana ntoa+ e ntle;
19 u e-na le tumelo le letsoalo+ le letle, leo ba bang ba le qheletseng ka thōko+ eaba ba senyeheloa ke tumelo+ joaloka sekepe se soahlamaneng.
20 Hymenea+ le Alexandere+ ke ba bona bana, ’me ke nehelane ka bona ho Satane+ e le hore ba ka rutoa ka taeo hore ba se ke ba nyefola.+
