Moeklesia 7:1-29
7 Lebitso le molemo ho feta oli e ntle,+ ’me letsatsi la ho shoa le molemo ho feta letsatsi la ho tsoaloa ha motho.+
2 Ho molemo ho ea ntlong ea ho siama ho feta ho ea ntlong ea mokete,+ hobane eo ke pheletso ea moloko oohle oa batho; ’me ea phelang o lokela ho e tebisetsa pelong ea hae.
3 Matšoenyeho a molemo ho feta litšeho,+ etsoe ka ho hlonama ha sefahleho pelo e ba molemo.+
4 Lipelo tsa ba bohlale li ntlong ea ho siama,+ empa lipelo tsa ba hlokang kelello li ntlong ea ho thaba.+
5 Ho molemo ho utloa khalemelo e matla ea ea bohlale+ ho feta ho ba motho ea utloang pina ea ba hlokang kelello.+
6 Etsoe joaloka molumo oa meutloa tlas’a pitsa, litšeho tsa ea hlokang kelello li joalo;+ sena le sona ke lefeela.
7 Etsoe khatello feela e ka etsa hore ea bohlale a etse ka bohlanya,+ ’me mpho+ e ka senya pelo.+
8 Qetello ea taba hamorao e molemo ho feta tšimoloho ea eona.+ Ea sa feleng pelo o molemo ho feta ea ikhohomosang moeeng.+
9 U se ke ua potlaka moeeng oa hao hore u khopehe,+ etsoe ho khopeha ho lula lifubeng tsa ba hlokang kelello.+
10 U se ke ua re: “Ke hobane’ng ha matsatsi a pele a bile molemo ho feta aa?”+ etsoe hase ka lebaka la bohlale+ u botsitseng ka sena.
11 Bohlale hammoho le lefa bo molemo ebile boa ruisa ho ba bonang letsatsi.+
12 Etsoe bohlale ke tšireletso+ joalokaha chelete e le tšireletso;+ empa molemo oa tsebo ke hore bohlale bo boloka ba nang le bona ba phela.+
13 Bona mosebetsi+ oa Molimo oa ’nete, etsoe ke mang ea khonang ho otlolla seo a se khopamisitseng?+
14 Letsatsing le letle u be ea molemo,+ ’me letsatsing la tlokotsi u bone hore Molimo oa ’nete o entse hore esita le lena le be hantle feela joalo,+ ka morero oa hore ho hang moloko oa batho o se ke oa fumana letho ka mor’a oona.+
15 Ke bone ntho e ’ngoe le e ’ngoe matsatsing a ka a lefeela.+ Ho na le ea lokileng ea timelang ho lokeng ha hae,+ ’me ho na le ea khopo ea tsoelang pele halelele bobeng ba hae.+
16 U se ke ua ba ea lokileng ho feta tekanyo,+ kapa ua iponahatsa u le bohlale ka ho fetisisa.+ Ke hobane’ng ha u ka ipakela tšenyeho?+
17 U se ke ua ba ea khopo ho feta tekanyo,+ kapa ua ba leoatla.+ Ke hobane’ng ha u ka shoa e se nako ea hao?+
18 Ho molemo hore u tšoare ho hong, empa hape u se ke ua tlosa letsoho la hao ho ho hong;+ etsoe ea tšabang Molimo o tla tsamaea le tsona kaofela.+
19 Bohlale bo matla bakeng sa ea bohlale ho feta banna ba leshome ba pusong ba bileng motseng.+
20 Etsoe ha ho motho ea lokileng lefatšeng ea tsoelang pele ho etsa se molemo ’me a sa etse sebe.+
21 Hape, u se ke ua tebisetsa pelong mantsoe ’ohle ao batho ba ka a buang,+ e le hore u se ke ua utloa mohlanka oa hao a u rohaka.+
22 Etsoe pelo ea hao e tseba hantle esita le makhetlo a mangata ao ka ’ona u rohakileng ba bang.+
23 Sena sohle ke se lekile ka bohlale. Ke ile ka re: “Ka sebele ke tla hlalefa.” Empa se ne se le hōle le ’na.+
24 Se leng teng se hōle ’me se tebile ka ho fetisisang. Ke mang ea ka se fumanang?+
25 Ke ile ka reteleha, esita le pelo ea ka e ile ea ho etsa,+ hore ke tsebe le ho phenya le ho batla bohlale+ le lebaka la lintho,+ le ho tseba ka bokhopo ba ho hloka kelello le booatla ba bohlanya;+
26 ’me ke ne ke fumana hore: Mosali eo e leng matlooa a ho tsoma le eo pelo ea hae e leng matlooa a huloang le eo matsoho a hae e leng litlamo+ o sehlōhō ho feta lefu.+ Motho o molemo ka pel’a Molimo oa ’nete haeba a baleha ho eena, empa motho o etsa sebe haeba a haptjoa ke eena.+
27 “Bonang! Ke fumane sena,” ho boletse ’mokelli,+ “ntho e ’ngoe e kopanngoa le e ’ngoe, ho fumana kakaretso,+
28 eo moea oa ka o e batlileng o sa khaotse, empa ke sa e fumana. Ke fumane monna a le mong ho ba sekete,+ empa har’a bana bohle ha kea fumana mosali.+
29 Bonang! Ke fumane sena feela, hore Molimo oa ’nete o ile a etsa moloko oa batho o lokile,+ empa ke oona o batlileng mano a mangata.”+
