Numere 28:1-31
28 Jehova a bua ka ho eketsehileng le Moshe, a re:
2 “Laela bara ba Iseraele, ’me u re ho bona, ‘Le lokela ho ela hloko hore le ntlhahisetse nyehelo ea ka, bohobe+ ba ka, bakeng sa linyehelo tsa ka tse entsoeng ka mollo e le monko o khathollang ho ’na,+ ka linako tsa tsona tse behiloeng.’+
3 “U tla re ho bona, ‘Ena ke nyehelo e entsoeng ka mollo eo le tla e hlahisetsa Jehova: ka letsatsi likonyana tse peli tse tona tse phetseng hantle tse nang le selemo e le nyehelo ea secheso kamehla.+
4 Le tla fana ka konyana e ’ngoe e tona hoseng, ’me konyana e ’ngoe e tona le tla fana ka eona pakeng tsa lishoalane tse peli,+
5 hammoho le karolo ea leshome ea efa+ ea phofo e thumisehileng e le nyehelo ea lijo-thollo+ e kolobisitsoeng ka oli ea karolo ea bone ea hine ea oli e tutsoeng;+
6 nyehelo ea kamehla ea secheso,+ e fanoeng Thabeng ea Sinai e le monko o khathollang, nyehelo e etselitsoeng Jehova ka mollo,+
7 hammoho le nyehelo ea eona ea seno,+ karolo ea bone ea hine bakeng sa konyana+ e ’ngoe le e ’ngoe e tona. Tšollela nyehelo ea seno ea joala bo tahang+ sebakeng se halalelang bakeng sa Jehova.
8 U tla fana ka konyana e ’ngoe e tona pakeng tsa lishoalane tse peli. U tla fana ka eona hammoho le nyehelo ea lijo-thollo e tšoanang le ea hoseng le nyehelo ea eona e tšoanang ea seno e le nyehelo e entsoeng ka mollo, ea monko o khathollang ho Jehova.+
9 “‘Leha ho le joalo, ka letsatsi la sabatha+ ho tla ba le likonyana tse tona tse peli tse nang le selemo le litekanyo tse peli tsa leshome tsa phofo e thumisehileng e le nyehelo ea lijo-thollo e kolobisitsoeng ka oli, hammoho le nyehelo ea eona ea seno,
10 e le nyehelo ea secheso ea sabatha ka sabatha ea eona, hammoho le nyehelo ea secheso+ ea kamehla le nyehelo ea eona ea seno.+
11 “‘Mathoasong a likhoeli tsa lōna le tla hlahisetsa Jehova e le nyehelo ea secheso lipohoana tse peli le pheleu e le ’ngoe, likonyana tse tona tse supileng tse phetseng hantle e ’ngoe le e ’ngoe e e-na le selemo,+
12 le litekanyo tse tharo tsa leshome tsa phofo e thumisehileng e le nyehelo ea lijo-thollo+ e kolobisitsoeng ka oli bakeng sa poho ka ’ngoe le litekanyo tse peli tsa leshome tsa phofo e thumisehileng e le nyehelo ea lijo-thollo e kolobisitsoeng ka oli bakeng sa pheleu e le ’ngoe,+
13 ho latele tekanyo ea leshome ea phofo e thumisehileng e le nyehelo ea lijo-thollo e kolobisitsoeng ka oli bakeng sa konyana e ’ngoe le e ’ngoe e tona, e le nyehelo ea secheso, monko o khathollang,+ nyehelo e etselitsoeng Jehova ka mollo.
14 Ho be le halofo+ ea hine ea veine bakeng sa poho le karolo ea boraro+ ea hine bakeng sa pheleu le karolo ea bone+ ea hine bakeng sa konyana e tona e le linyehelo tsa tsona tsa seno. Ena ke nyehelo ea secheso ea khoeli le khoeli khoeling ea eona bakeng sa likhoeli tsa selemo.+
15 Hape, ho lokela hore ho fanoe ka potsanyane+ e le ’ngoe e le nyehelo ea sebe ho Jehova ho phaella ho nyehelo ea secheso ea kamehla hammoho le nyehelo ea eona ea seno.+
16 “‘Ka khoeli ea pele, letsatsing la leshome le metso e mene la khoeli, e tla ba paseka+ ea Jehova.
17 Letsatsing la leshome le metso e mehlano la khoeli ena e tla ba mokete. Ho tla jeoa mahobe a sa lomosoang ka matsatsi a supileng.+
18 Letsatsing la pele ho tla ba le kopano e halalelang.+ Le se ke la etsa mosebetsi o boima oa mofuta leha e le ofe.+
19 Le hlahisetse Jehova nyehelo ea secheso,+ lipohoana tse peli le pheleu e le ’ngoe le likonyana tse supileng tse tona, e ’ngoe le e ’ngoe e e-na le selemo,+ e le nyehelo e entsoeng ka mollo. E be tse phetseng hantle ho lōna.+
20 Le tla fana ka litekanyo tse tharo tsa leshome bakeng sa poho le litekanyo+ tse peli tsa leshome bakeng sa pheleu e le linyehelo tsa tsona tsa lijo-thollo+ tsa phofo e thumisehileng e kolobisitsoeng ka oli.
21 Le tla fana ka tekanyo+ ea leshome ka ho latellana bakeng sa konyana e ’ngoe le e ’ngoe e tona ho likonyana tse tona tse supileng;
22 le pōli e le ’ngoe ea nyehelo ea sebe bakeng sa ho koahela libe tsa lōna.+
23 Ntle ho nyehelo ea secheso ea hoseng, e leng nyehelo ea secheso+ ea kamehla,+ le tla fana ka tsona.
24 Le tla fana ka tse tšoanang le tsena letsatsi le leng le le leng ka matsatsi a supileng joaloka bohobe,+ nyehelo e etselitsoeng Jehova ka mollo, ea monko o khathollang.+ E lokela ho fanoa hammoho le nyehelo ea secheso ea kamehla, le nyehelo ea eona ea seno.
25 Letsatsing la bosupa le lokela ho tšoara kopano e halalelang.+ Le se ke la etsa mosebetsi o boima oa mofuta leha e le ofe.+
26 “‘Ka letsatsi la litholoana tsa pele tse butsoitseng,+ ha le hlahisetsa Jehova nyehelo ea lōna ea lijo-thollo tse ncha, moketeng oa lōna oa libeke+ le lokela ho ba le kopano e halalelang. Le se ke la etsa mosebetsi o boima oa mofuta leha e le ofe.+
27 Le hlahisetse Jehova lipoho tse peli, pheleu e le ’ngoe, likonyana tse supileng tse tona e ’ngoe le e ’ngoe e e-na le selemo+ e le nyehelo ea secheso hore e be monko o khathollang;
28 le litekanyo tse tharo tsa leshome bakeng sa poho ka ’ngoe, litekanyo tse peli tsa leshome+ bakeng sa pheleu ka ’ngoe e le nyehelo ea tsona ea lijo-thollo ea phofo e thumisehileng e kolobisitsoeng ka oli,
29 tekanyo ea leshome+ ka tatellano bakeng sa konyana e ’ngoe le e ’ngoe e tona ho likonyana tse supileng;
30 potsanyane e le ’ngoe bakeng sa ho koahela libe tsa lōna.+
31 Ntle ho nyehelo ea kamehla ea secheso le nyehelo ea eona ea lijo-thollo, le tla fana ka tsona.+ E lokela hore e be tse phetseng hantle bakeng sa lōna,+ hammoho le linyehelo tsa tsona tsa seno.+
