Lengolo la Pele le Eang ho Bakorinthe 6:1-20
6 Haeba u qabane le ngoan’eno,+ na kannete u na le sebete sa ho mo isa khotla ka pel’a batho bao e seng balumeli? Ke hobane’ng ha u sa ee ho batho ba khethiloeng ke Molimo ka phuthehong?*
2 Na ha le tsebe hore batho ba khethiloeng ke Molimo* ba tla ahlola lefatše?+ Haeba le tla ahlola lefatše, na le ka hloleha ho rarolla litaba tse sa reng letho?
3 Na ha le tsebe hore re tla ahlola mangeloi?+ Joale ke hobane’ng ha le sitoa ho rarolla mathata a sa reng letho a bophelo boo?
4 Haeba le e-na le mathata bophelong ao le hlokang ho a rarolla,+ ke hobane’ng ha le ka a isa ho baahloli bao e seng karolo ea phutheho?
5 Ke bua tjena e le hore le soabe. E tlameha ebe ho na le motho ea bohlale har’a lona ea ka rarollang mathata a lona.
6 Ho ntse ho le joalo, Mokreste o isa Mokreste* e mong khotla, le hona ka pel’a batho bao e seng balumeli.
7 Haeba le qosana ka bolona, le se le ntse le hlolehile. Ke hobane’ng ha le sa itlohele hore le fosetsoe?+ Ke hobane’ng ha le sa itlohele hore le etsetsoe bolotsana?
8 Ho fapana le hoo, le fosetsa bana ba bo lona ebile le ba etsetsa bolotsana.
9 Na ha le tsebe hore batho ba sa lokang ba ke ke ba kena ’Musong oa Molimo?+ Le se ke la khelosoa.* Batho ba tloaetseng ho etsa* boitšoaro bo bobe bo amanang le thobalano,*+ ba rapelang litšoantšo,+ ba febang,+ banna ba etsang thobalano le banna ba bang,*+
10 masholu, batho ba sa khotsofaleng,*+ matahoa,+ ba litlhapa* kapa ba nkang lintho tsa batho ba bang ka mahahapa ba ke ke ba kena ’Musong oa Molimo.+
11 Ba bang ba lona le ne le le joalo empa le hloekisitsoe,+ le halalelitsoe+ hape le nkoa le lokile+ ka lebitso la Morena oa rona Jesu Kreste le ka moea oa Molimo oa rona.
12 Ke lumeletsoe ho etsa lintho tsohle empa ha se lintho tsohle tse molemo.+ Ke lumeletsoe ho etsa lintho tsohle empa nke ke ka lumella ntho leha e le efe hore e ntaole.
13 Lijo li etselitsoe mpa le mpa e etselitsoe lijo empa Molimo o tla li felisa li le peli.+ ’Mele ha oa etsetsoa ho etsa boitšoaro bo bobe bo amanang le thobalano* empa o etselitsoe ho sebeletsa Morena+ hape Morena oa o hlokomela.
14 Molimo o ile a tsosa Morena+ ’me le rona o tla re tsosa bafung+ ka matla a hae.+
15 Na ha le tsebe hore ’mele ea lona e ikarabella ho Kreste?+ Na ho nepahetse ho nka seo e leng sa Kreste ebe le se kopanya le letekatse? Ho hang!
16 Na ha le tsebe hore motho ea etsang thobalano le letekatse ke ’mele o le mong le lona? Etsoe Molimo o re: “Ba babeli e tla ba nama e le ’ngoe.”+
17 Empa ea ikopanyang le Morena o nahana joaloka eena.*+
18 Balehang boitšoaro bo bobe bo amanang le thobalano.*+ Libe tse ling tsohle tseo motho a li etsang ha li ame ’mele oa hae ka ho toba empa ea tloaetseng ho etsa boitšoaro bo bobe bo amanang le thobalano o siteloa ’mele oa hae.+
19 Na ha le tsebe hore ’mele ea lona ke tempele+ ea moea o halalelang oo le o filoeng ke Molimo?+ Le ikarabella ho Molimo+
20 hobane o le rekile ka theko e phahameng.+ Kahoo, le mo tlotlise+ ka ’mele ea lona.+
Linaletsana
^ Ka Segerike: “bahalaleli.”
^ Ka Segerike: “bahalaleli.”
^ Ka Segerike: “ngoan’abo.”
^ Ka Segerike ho sebelisitsoe mantsoe a mabeli a fapaneng, mantsoe ao a akareletsa banna ba lumelang ho etsa thobalano le banna ba bang le ba etsang thobalano le banna ba bang.
^ Ka Segerike ke por·nei′a. Sheba Tlhaloso.
^ Kapa: “ba etsang.”
^ Kapa: “thetsoa.”
^ Kapa: “ba meharo.”
^ Kapa: “ba hlabang ba bang ka mantsoe.”
^ Ka Segerike ke por·nei′a. Sheba Tlhaloso.
^ Ka Segerike: “ke moea o le mong le eena.”
^ Ka Segerike ke por·nei′a. Sheba Tlhaloso.
