Esaia 37:1-38
37 Hang ha Morena Ezekiase a utloa litaba tsena, a tabola liaparo tsa hae a apara lesela le hoashang* eaba o ea ntlong ea Jehova.+
2 A romela Eliakime mohlokomeli oa ntlo ea morena,* mongoli Shebna le baholo ba baprista ho moprofeta Esaia+ mora oa Amoze. Ba ne ba apere masela a hoashang.*
3 Ba mo bolella mantsoe a Ezekiase a reng: “Letsatsi lena ke la mathata, la ho khalemeloa le la ho tlotlolloa. Re tšoana le mosali ea haufi le ho ba le ngoana* empa a se na matla a ho beleha.+
4 Mohlomong Jehova Molimo oa hao o tla utloa mantsoe ’ohle ao morena oa Asiria a a buileng a sebelisa Rabshake e le hore a some Molimo ea phelang.+ Jehova Molimo oa hao o tla mo khalemela ka lebaka la mantsoe ao a a utloileng. Re rapelle+ rona batho ba ntseng ba setse.”+
5 Bahlanka ba Morena Ezekiase ba fihla ho Esaia.+
6 Eaba Esaia o re ho bona: “Le lokela ho re ho morena oa lona, ‘Jehova o re: “U se ke oa tšosoa+ ke mantsoe ao u utloileng bahlanka ba morena oa Asiria+ ba nthohaka ka ’ona.
7 Ke kenya monahano kelellong ea hae. O tla utloa tlaleho ebe o khutlela naheng ea hae+ a be a bolaoe ka sabole moo.”’”+
8 Ka mor’a hore Rabshake a utloe hore morena oa Asiria o tlohile Lakishe, a khutlela ho eena ’me a mo fumana a ntse a loantša Libna.+
9 Morena oa Asiria a utloa ho thoe Morena Tirhaka oa Ethiopia o tl’o mo loantša. Ha a utloa taba ena, a roma batho hape ho Ezekiase+ a re:
10 “Le re ho Morena Ezekiase oa Juda, ‘U se ke oa lumella Molimo oa hao eo u mo tšepileng hore a u thetse, ha a re morena oa Asiria a ke ke a hlola Jerusalema.+
11 U utloile hore na marena a Asiria a ile a felisa linaha tse ling joang.+ Hobane’ng ha u nahana hore uena u tla pholoha?
12 Na melimo ea lichaba tseo baholo-holo ba ka ba ileng ba li felisa e ile ea li pholosa?+ Se kae sechaba sa Gozane, Harane,+ Rezefe le batho ba Edene ba neng ba le Tel-asare?
13 O kae morena oa Hamathe, oa Arpade, oa metse ea Sefarvaime,+ oa Hena le oa Iva?’”
14 Ezekiase a nka mangolo ho baromuoa a a* bala. A ea ntlong ea Jehova eaba o a bula ka pel’a Jehova.+
15 Ezekiase a rapela Jehova+ a re:
16 “Jehova oa mabotho,+ Molimo oa Iseraele, uena ea lutseng teroneng ka holim’a* likerubime, ke uena feela Molimo oa ’nete mebusong eohle e lefatšeng. U entse maholimo le lefatše.
17 Jehova utloa u be u mamele.+ Jehova, sheba ’me u bone.+ Utloa mantsoe ’ohle a tsoang ho Sankeribe ao a somang Molimo ea phelang ka ’ona.+
18 Jehova, ke ’nete hore marena a Asiria a felisitse linaha+ tsohle hammoho le naha ea ’ona.
19 A ile a chesa melimo+ ea tsona hobane e ne e le melimo e iketselitsoeng,+ e entsoeng ka patsi le lejoe. Ke kahoo a ileng a khona ho e felisa.
20 Jehova Molimo oa rona re pholose ho morena oa Asiria e le hore mebuso eohle ea lefatše e ka tseba hore uena Jehova u Molimo u le mong.”+
21 Esaia mora oa Amoze a romella Ezekiase molaetsa o reng: “Jehova Molimo oa Iseraele o re, ‘Kaha u nthapetse ka lebaka la Morena Sankeribe oa Asiria,+
22 Jehova o re ho eena:
“Moroetsana oa Sione o u hloile ebile oa u tšeha.
Morali oa Jerusalema o sisinya hlooho ha a u bona.
23 Na oa tseba hore ke mang eo u mo rohakang+ le ho mo tella?
Ke mang eo u mo halefetseng+Le ho mo sheba hampe?
Ke Mohalaleli oa Iseraele.+
24 U nyefotse Jehova u sebelisa bahlanka ba hao+ oa re:
‘Ka likariki tsa ka tsa ntoa tse ngataKe tla hloella ka holim’a lithaba,+Libakeng tse hole tsa Lebanone.
Ke tla rema lifate tsa eona tsa kedare tse telele le lifate tsa eona tse ntle tsa junipere.
Ke tla fihla lithabeng tsa eona tse phahameng ka ho fetisisa, morung oa eona o teteaneng haholo.
25 Ke tla cheka liliba ’me ke noe metsi.
Ke tla pshesa linokana* tsa Egepeta ka maoto a ka.’
26 Na ha oa utloa hore khale ke rerile* ho etsa ntho eo?
Ke nahanne ka eona* ho tloha mehleng ea khale.+
Joale ke tla e phetha.+
U tla etsa hore metse e sirelelitsoeng ka thata e be qubu ea majoe.+
27 Baahi ba eona ba tla felloa ke matla.
Ba tla tšoha ’me ba hlajoe ke lihlong.
Ba tla ba joaloka limela tsa naha le joang bo botalaJoaloka joang bo melang ka holim’a ntlo bo omelelitsoeng ke moea oa bochabela.
28 Ke tseba hantle ha u lula, ha u tsoa, ha u kena+Leha u nkhalefetse.+
29 Ke utloile kamoo u nkoatetseng+ le ho nkhalefela kateng.+
Kahoo, ke tla kenya hakisi ea ka ka nkong ea hao le tomo ea ka+ pakeng tsa molomo oa hao.
Ke tla u khutlisetsa morao ka tsela eo u tlileng ka eona.”
30 Ezekiase o tla bona ka lintho tse latelang hore sena se tla phethahala: Selemong sena le selemong sa bobeli le tla ja koro* e itlhahisitseng. Empa ka selemo sa boraro le tla lema le be le kotule ’me le tla lema lirapa tsa morara le be le je litholoana tsa tsona.+
31 Batho ba Juda ba setseng+ ba tla tšoana le limela tse metseng ka metso ’me ba hlahise litholoana.
32 Batho ba setseng ba tla tsoa Jerusalema ’me ba phonyohileng ba tsoe Thabeng ea Sione.+ Jehova oa mabotho o tla etsa sena ka cheseho.+
33 Jehova o itse ka morena oa Asiria:+
“A ke ke a kena motseng ona+Kapa a betsetsa motsu ho oona.
A ke ke a tla ho oona a nkile thebeKapa a haha qubu e o thibellang.”+
34 Jehova o re: ‘Morena oa Asiria o tla khutla ka tsela eo a tlileng ka eona.
A ke ke a kena motseng ona.
35 Ke tla sireletsa motse+ ona ’me ke o pholose ka lebaka la lebitso la ka+Le ka lebaka la mohlanka oa ka Davida.’”+
36 Lengeloi la Jehova la tla ’me la bolaea masole a 185 000 litenteng tsa Baasiria. Ha batho ba tsoha hoseng, ba fumana masole ao a shoele kaofela.+
37 Morena Sankeribe oa Asiria a khutlela Ninive+ ’me a lula teng.+
38 Ha a ntse a rapela tempeleng* ea molimo oa hae Nisroke, bara ba hae e leng Adrameleke le Sharezere ba mo bolaea ka sabole+ ’me ba balehela naheng ea Ararate.+ Mora oa hae Esare-hadone+ ea e-ba morena.
Linaletsana
^ Kapa: “phaleisi.”
^ Ka Seheberu: “Bana ba fihlile molomong oa popelo.”
^ Ka Seheberu: “le.”
^ Kapa mohlomong: “lipakeng tsa.”
^ Kapa: “melatsoana ea Noka ea Nile.”
^ Ka Seheberu: “qetile.”
^ Kapa: “Ke e entse.”
^ Ka Seheberu: “lijo-thollo.” Sheba Tlhaloso.
^ Kapa: “ntlong.”
