Ezekiele 27:1-36
-
Pina ea koli-ea-malla e bineloang sekepe sa Tire se tebang (1-36)
27 Jehova a boela a bua le ’na a re:
2 “Uena mor’a motho, binela Tire koli-ea-malla.*+
3 U re ho Tire:
‘Uena ea lulang likeiting tsa leoatle,Rakhoebo ea rekisetsang batho ba lulang lihlekehlekeng tse ngata,Jehova ’Musi oa Lintho Tsohle o re:
“Uena Tire, u ipoleletse hore u motle haholo.”+
4 Meeli ea hao e har’a leoatle,Lihahi tsa hao li u entse hore u be motle haholo.
5 Li entse mapolanka a hao kaofela ka lifate tsa junipere tse tsoang Senire,+Li u etselitse le palo e tšehetsang ka lifate tsa kedare tse tsoang Lebanone.
6 Li u etselitse masokoana a sekepe ka lifate tsa ouku tse tsoang Bashane.
Nko ea sekepe sa hao e ne e entsoe ka lepolanka la kiprese le tsoang lihlekehlekeng tsa Kitime+ le khabisitsoeng ka lenaka la tlou.
7 Seile ea sekepe sa hao e entsoe ka lesela la line le mebala-bala le tsoang Egepeta,Lesela le koahelang sekepe ka holimo lona le entsoe ka khareng e putsoa le ulu e pherese, tse tsoang lihlekehlekeng tsa Elisha.+
8 Baahi ba Sidone le ba Arvade+ e ne e le bona ba sokang sekepe sa hao.
Uena Tire, bahlanka ba hao ba nang le bokhoni ba ho sesisa likepe e ne e le bona basesisi ba hao.+
9 Banna ba nang le bokhoni le ba nang le boiphihlelo* ba tsoang Gebale+ ba ne ba koala masoba sekepeng sa hao e le hore metsi a se ke a kena.+
Bakhanni ba likepe tsohle tsa leoatle, ba ne ba tla ho uena ho tla etsa khoebo le uena.
10 Banna ba Persia, Lude le Pute+ e ne e le masole a hao.
Ba ne ba haka lithebe le lihelmete tsa bona maboteng a hao ebile ba etsa hore u be matla u be u tume.
11 Banna ba Arvade bao e neng e le masole a hao, ba ne ba ema ho potoloha marako a hao,Banna ba sebete ba ne ba ema litoreng tsa hao.
Ba ne ba haka lithebe tsa bona tse selika-likoe ho potoloha mabota ’ohle a hao,Ba etsa hore u be motle le ho feta.
12 Tarshishe+ e ne e etsa khoebo le uena hobane u ruile haholo.+ E ne e reka lintho ho uena ka silevera, tšepe, thini le loto.+
13 Batho ba Javane, Tubale+ le Mesheke+ ba ne ba etsa khoebo le uena. Ba ne ba u patala ka makhoba+ le lintho tsa koporo e le hore u ba fe lintho tse rekisoang.
14 Leloko la Togarma+ le ne le reka lintho tseo u li rekisang ka lipere le limmoulo.
15 Batho ba tsoang Dedane+ ba ne ba etsa khoebo le uena. Lihlekehlekeng tse ngata u ne u hira bo-rakhoebo. Ba ne ba u fa manaka a tlou+ le mapolanka a sefate se setšo e le lekhetho.*
16 Baedomo ba ne ba etsa khoebo le uena hobane u e-na le lintho tse ngata. Ba ne ba li reka ka majoe a thekoise, ulu e pherese, masela a mebala-bala a khabisitsoeng le a boleng bo botle, likorale le majoe a rubi.
17 Naha ea Juda le ea Iseraele li ne li etsa khoebo le uena. Li ne li reka lintho tseo u li rekisang+ ka koro e tsoang Minithe,+ lijo tse monate, mahe a linotši,+ oli le balsame.+
18 Batho ba Damaseka+ ba ne ba etsa khoebo le uena hobane u ne u ruile haholo ebile u rekisa lintho tse ngata. Ba ne ba u patala ka veine ea Helbone le ulu e tsoang Zahari.*
19 Batho ba Vedane le ba Javane e leng metse e haufi le Uzale, ba ne ba reka lintho tseo u li rekisang ka lintho tsa tšepe, kasia* le lehlaka.*
20 Batho ba Dedane+ ba ne ba etsa khoebo le uena ka hore ba u fe masela a sebelisoang ha ho palangoa lipere.
21 U ile oa hira likhosana tsohle tsa Kedare+ le Maarabia. Ba ne ba rekisa likonyana, liramo le lipoli.+
22 Bo-rakhoebo ba Sheba le ba Rama+ ba ne ba etsa khoebo le uena, ba reka lintho tseo u li rekisang+ ka litlolo tsa mefuta eohle tse nkhang hamonate, majoe a bohlokoa le khauta.
23 Batho ba Harane,+ Kane le Edene+ hammoho le bo-rakhoebo ba Sheba,+ Asshure+ le Kilmade ba ne ba etsa khoebo le uena.
24 Limmarakeng tsa hao, ba ne ba rekisa liaparo tse ntle, liaparo tsa ka holimo tse entsoeng ka lesela le leputsoa le le mebala-bala le khabisitsoeng le limmete tse mebala-bala. Kaofela li ne li fasitsoe hantle ka liropo.
25 Likepe tsa Tarshishe+ li ne li tsamaisa lintho tseo u li rekisang.Kahoo, u ile oa tlala ’me oa ba morui har’a leoatle.
26 Batho ba sokang sekepe sa hao ba u tlisitse leoatleng moo ho nang le metsi a mangata.Moea o hlahang ka bochabela o entse hore u soahlamane har’a leoatle.
27 Maruo a hao, lintho tseo u li rekisang, batho ba u sokelang likepe le ba li sesisang,Batho ba koalang masoba a sekepe sa hao, ba rekisang lintho tsa hao+ le banna bohle* ba ntoa+E leng batho bohle ba nang le uena,Kaofela ha bona ba tla teba bohareng ba leoatle letsatsing leo u oang ka lona.+
28 Ha basesisi ba likepe tsa hao ba hoeletsa ho kopa thuso, libaka tse lebopong la leoatle li tla thothomela.
29 Banna bohle ba sokang likepe tsa hao le ba sebetsang ho tsonaBa tla li theoha ’me ba eme fatše.
30 Ba tla hoeletsa ’me ba u llele habohloko,+Ba ntse ba itšela ka mobu hloohong ebile ba ipitika moloreng.
31 Ba tla kuta moriri oa bona kaofela ’me ba apare lesela le hoashang.*
Ba tla u llela habohloko.
32 Ba tla u binela koli-ea-malla ba ntse ba lla ba re:
‘Ke mang ea tšoanang le Tire ea felisitsoeng* bohareng ba leoatle?+
33 Ha thepa ea hao e tsoang leoatleng e fihla, u ne u khotsofatsa lichaba tse ngata.+
Maruo a hao a mangata le lintho tseo u neng u li rekisa li ne li ruisa marena a lefatše.+
34 Hona joale uena le batho ba u sebeletsang hammoho le lintho tsohle tseo u li rekisang,Le soahlamane joaloka sekepe har’a leoatle+ ’me lea teba.+
35 Baahi bohle ba lulang lihlekehlekeng ba tla u makalla,+Marena a bona a tla tšoha haholo+ le lifahleho tsa ’ona li tla bontša hore a tšohile.
36 Bo-rakhoebo ba har’a lichaba ba tla letsa mololi ha ba utloa se u etsahalletseng.
U tla felisoa ka sehloho ka ho panya ha leihloEbile u ke ke oa hlola u e-ba teng.’”+
Linaletsana
^ Kapa: “pina e binoang ka lebaka la ho utloa bohloko.”
^ Ka Seheberu: “Banna ba baholo.”
^ Kapa: “sethabathaba.”
^ Kapa: “ulu e bofubelu bo bothokoa.”
^ Ke sefate se tsoang mofuteng o le mong le sa sinamone.
^ Kapa: “lehlaka le nkhang hamonate.”
^ Ka Seheberu: “le phutheho eohle.”
^ Ka Seheberu: “ea entsoeng hore a thole.”
