Habakuke 3:1-19
3 Ena ke thapelo ea moprofeta Habakuke, ke koli-ea-malla:*
2 Jehova, ke utloile ka liketso tsa hao.
Ke tsota mesebetsi ea hao Jehova.
E se eka u ka e phetha mehleng ena ea rona,*Oa e tsebahatsa mehleng ea rona.
E se eka u ka re hopola eaba oa re hauhela nakong ea pherekano.+
3 Molimo o tlile a tsoa Temane,Ea Halalelang o tlile a tsoa Thabeng ea Parane.+ (Selah)*
Khanya ea hae e ile ea koahela maholimo,+Lefatše la tlala batho ba mo rorisang.
4 Khanya ea hae e ne eka ea letsatsi.+
Ho ne ho e-na le mahlaseli a tsoang letsohong la haeMoo matla a hae a neng a le hona teng.
5 Lefu la seoa le ne le mo eteletse pele,+Feberu e matla eona e mo sala morao.
6 A ema tlekelele! eaba o sisinya lefatše.+
O ile a sheba lichaba eaba lia thothomela.+
Lithaba tseo esale li le teng tsa heleha,Maralla ’ona a oa.+
O tsamaea litseleng tsa hae tsa khale.
7 Ke ile ka bona mathata ka litenteng tsa Kushane.
Litente tsa naha ea Midiane li ile tsa tsukutleha.+
8 Jehova, na u halefetse linoka?
Na u tuka ke bohale ka lebaka la tsona?
Kapa na u halefetse leoatle?+
U ile oa palama lipere tsa hao,+Likariki tsa hao li ile tsa hlola.*+
9 U ntšitse seqha sa hao ’me u se chehile.
Melamu* e fuoe mosebetsi.* (Selah)
U arotse lefatše ka linoka.
10 Lithaba tsa u bona eaba lia reketla ke bohloko.+
Metsi a pula ea litloebelele a phorosela.
Boliba ba rora,+Ba akholetsa maqhubu a bona holimo.
11 Letsatsi le khoeli tsa ema tsi! holimo maholimong.+
Metsu ea hao ea tsoa e le joaloka khanya,+Lerumo la hao le ne le benya joaloka lehalima.
12 U ile oa pholletsa le lefatše u halefile,Oa hatakela* lichaba u tuka ke bohale.
13 Oa tsamaea hore u e’o pholosa batho ba hao le motlotsuoa oa hao.
Oa thuhakanya moeta-pele* oa ntlo ea ba khopo.
E ile ea timetsoa ho tloha motheong ho ea tsoa marulelong.* (Selah.)
14 U ile oa hlaba lihlooho tsa masole a hae ka lihlomo tsa hae*Ha a ne a mphutuhela hore a nqhalakanye.
A ne a thabetse ho bolaea motho ea mathateng ka lekunutu.
15 U ile oa feta har’a leoatle ka lipere tsa hao,Oa phunyeletsa har’a maqhubu a lona.
16 Eitse ha ke utloa lintho tsena, ka tlala tšabo.
Molomo oa ka oa thothomela ha ke utloa molaetsa.
Ka felloa ke matla,*+Ka tšerema mangole.
Empa ke tla emela letsatsi la mahlomola ke khobile matšoafo,+Etsoe le tla tlela batho ba re hlaselang.
17 Leha sefate sa feie* se ke ke sa thunyaLe lifate tsa morara tsa se ke tsa beha litholoana,Leha sefate sa mohloaare se ke ke sa behaLe masimo a ke ke a hlahisa lijo,Leha mehlape e ka ba sieo sakengLe likhomo tsa ba sieo masakeng,
18 Ha e le ’na, ke tla thaba ha ke nahana ka Jehova,Ke nyakalle ha ke nahana ka Molimo ea mpholosang.+
19 Jehova ’Musi oa Lintho Tsohle o mpha matla.+
O tla etsa hore ke be lebelo joaloka khama,A ntsamaise libakeng tse phahameng.+
Linaletsana
^ Kapa: “pina e binoang ka lebaka la ho utloa bohloko.”
^ Ka Seheberu: “bohareng ba lilemo.”
^ Kapa: “pholosa.”
^ Kapa mohlomong: “Metsu.”
^ Kapa mohlomong: “likano tsa meloko li boletsoe.”
^ Ka Seheberu: “pola.”
^ Ka Seheberu: “hlooho.”
^ Ka Seheberu: “molaleng.”
^ Ka Seheberu: “melamu ea hae.”
^ Ka Seheberu: “Masapo a ka a bola.”
^ Kapa: “feiga.”
