Jeremia 19:1-15
19 Jehova o itse: “E-ea ’me u reke botlolo ea letsopa ho sebopi.+ U bitse ba bang ba baholo ba sechaba le ba bang ba banna ba hlaheletseng ba baprista,
2 u ee Phuleng ea Mora oa Hinome,+ e Keiting ea Sebopi.* Ha u fihla moo, u phatlalatse mantsoe ao ke tla u bolella ’ona.
3 U re: ‘Utloang lentsoe la Jehova, lona marena a Juda le lona baahi ba Jerusalema. Jehova oa mabotho, Molimo oa Iseraele o re:
“Haufinyane ke tlisa tlokotsi sebakeng sena ’me litsebe tsa mang kapa mang ea utloang ka eona li tla hlohlona
4 hobane ba ntahlile+ ’me ba entse hore ke se ke ka hlola ke tseba sebaka sena.+ Ba etsetsa melimo e meng mahlabelo mona, melimo eo bona, baholo-holo ba bona le marena a Juda ba sa kang ba e tseba ’me ba tlatsitse sebaka sena ka mali a ba se nang molato.+
5 Ba hahile libaka tse phahameng tsa Baale e le hore ba chese bara ba bona mollong e le linyehelo tsa secheso tse etsetsoang Baale+ e leng ntho eo ke neng ke sa ba laela eona kapa ka bua ka eona le eo ho seng mohla nkileng ka e nahana le ho e nahana.”’*+
6 Jehova o re: ‘Matsatsi aa tla ao ka ’ona sebaka sena se ke keng sa hlola se bitsoa Tofethe kapa Khohlo ea Mora oa Hinome empa ho tla thoe ke Khohlo ea Polao.+
7 Ke tla thibela morero oa Juda le oa Jerusalema sebakeng sena ’me ke tla etsa hore ba bolaoe ka sabole ke lira tsa bona le ke letsoho la ba batlang ho ba bolaea. Ke tla fa linonyana le libata tsa lefatše litopo tsa bona hore e be lijo tsa tsona.+
8 Ke tla etsa hore motse ona e be ntho e tšosang le ntho e letsetsoang mololi. E mong le e mong ea fetang pel’a oona o tla o sheba a tšohe ’me a letse mololi ka lebaka la likotlo tsohle tsa oona.+
9 Ke tla etsa hore ba je bara le barali ba bona ’me e mong le e mong o tla ja oa habo ka lebaka la ho thibelloa le ka lebaka la khatello le tsietsi e bakiloeng ke lira tsa bona tse batlang ho ba bolaea.”+
10 “Joale u pshatle botlolo ka pel’a mahlo a banna ba tsamaeang le uena,
11 u re ho bona: ‘Jehova oa mabotho o re: “Ke tla pshatla batho ba motse ona tjena joalokaha motho a pshatla sejana sa sebopi hoo se ke keng sa khona ho lokisoa. Ba tla pata ba shoeleng Tofethe ho fihlela ho se ho se na sebaka sa ho pata ba bang.”’+
12 Jehova o re: ‘Ke tla etsa tjena ka sebaka sena le ho baahi ba sona, ke etse hore motse ona o be joaloka Tofethe.
13 Matlo a Jerusalema le matlo a marena a Juda a tla silafala joaloka Tofethe+ hobane ba ile ba etsetsa makhotla ’ohle a maholimo mahlabelo marulelong a ’ona+ ’me ba tšella melimo e meng linyehelo tsa lino moo.’”+
14 Ha Jeremia a khutla Tofethe moo Jehova a neng a mo romme ho ea profeta, a ema lebaleng la ntlo ea Jehova eaba o re ho sechaba sohle:
15 “Jehova oa mabotho, Molimo oa Iseraele o re: ‘Ke tlisetsa motse ona le litoropo tsohle tsa oona tlokotsi eohle eo ke boletseng hore ke tla e tlisetsa oona hobane ka manganga ba hanne ho* mamela mantsoe a ka.’”+
Linaletsana
^ Ka Seheberu: “Keiting ea Mangeta.”
^ Kapa: “ho seng mohla e kileng ea fihla pelong ea ka.”
^ Ka Seheberu: “ba satalalitse melala hore ba se ke ba.”
