Lillo Tsa Jeremia 1:1-22
א [Aleph]*
1 Jerusalema ea neng a e-na le baahi ba bangata,+ o se a le bolutu hakaakang!
O ne a le moholo har’a lichaba+ empa o se a tšoana le mohlolohali,E ne e le khosatsana har’a liprofinse* empa e se e le lekhoba.+
ב [Beth]
2 O lla haholo bosiu kaofela+ ’me meokho ea hae e keleketla marameng.
Ha ho le ea mong oa batho ba ratanang le eena ea mo tšelisang.+
Metsoalle ea hae kaofela e mo tsoile tlase.+ E se e le lira tsa hae.
ג [Gimel]
3 Juda o hapuoe,+ o entsoe lekhoba ebile oa hlorisoa.+
O lokela ho lula har’a lichaba.+ Ha a phomole.
Bohle ba mo hlorisang ba mo fumane nakong eo a leng mahlomoleng.
ד [Daleth]
4 Litseleng tse eang Sione ho thotse hobane ha ho ba tlang moketeng.+
Likeiti tsohle tsa hae li senyehile.+ Baprista ba hae baa feheloa.
Baroetsana ba hae ba utloile bohloko ’me o saretsoe haholo.
ה [He]
5 Bahanyetsi ba hae e se e le beng ba hae. Lira tsa hae li iketlile.+
Jehova o mo baketse mesarelo hobane liphoso tsa hae li ngata.+
Bana ba hae ba hapuoe ke lira.+
ו [Waw]
6 Morali oa Sione ha a sa na seriti.+
Likhosana tsa hae li tšoana le litšephe tse tona tse sa fumanang lekhulo,Li tsamaea li khathetse ka pel’a ea li hlorisang.*
ז [Zayin]
7 Nakong eo Jerusalema a neng a le mahlomoleng a bile a se na lehae, o hopotseLintho tsohle tsa bohlokoa tseo a neng a e-na le tsona mehleng ea khale.+
Ha sechaba sa hae se oela matsohong a sera ebile se se na mothusi,+Bahanyetsi ba hae ba ile ba mo bona ha a oa eaba baa mo tšeha.*+
ח [Heth]
8 Jerusalema o entse sebe se seholo.+
Ke kahoo a fetohileng ntho e nyatsehang.
Bohle ba neng ba mo hlompha ba mo tšoara joaloka ntho e nyonyehang kaha ba mo bonetse.+
Oa feheloa+ ’me o khutla a soabile.
ט [Teth]
9 Liaparo tsa hae li litšila.
Ha aa ka a nahana ka bokamoso ba hae.+
O oele habohloko feela ha ho motho ea mo tšelisang.
Ka kopo Jehova, bona mesarelo ea ka hobane sera se ikhohomositse.+
י [Yod]
10 Mohanyetsi oa hae o otlolotse matsoho, a nka matlotlo ’ohle a hae.+
Etsoe o bone ha lichaba li kena ka sehalalelong sa hae,+Tseo u laetseng hore li se ke tsa kopana le batho ba hao.
כ [Kaph]
11 Batho bohle ba Jerusalema baa feheloa. Ba batla lijo.+
Ba fane ka lintho tsa bona tsa bohlokoa bakeng sa se eang ka maleng hore feela ba lule ba phela.
Ka kopo Jehova, bona hore ke se ke tšoana le mosali* ea se nang thuso.
ל [Lamed]
12 Na ha le na taba lona bohle ba fetang ka tsela?
Shebang ’me le bone,Na ho na le matšoenyeho a tšoanang le ao ke otliloeng ka ’ona,Ao Jehova a mpaketseng ’ona letsatsing la bohale ba hae bo tukang?+
מ [Mem]
13 O rometse mollo masapong a ka+ a le leholimong ’me o a chesitse kaofela.
O nchehetse leraba kahoo o nqobeletse hore ke khutlele morao.
O entse hore ke be joaloka mosali ea lahliloeng.
Kea kula letsatsi lohle.
נ [Nun]
14 Liphoso tsa ka li faselelitsoe molaleng oa ka joaloka joko. O li lohelletse ’moho ka letsoho la hae.
Li tlanngoe molaleng oa ka, joale ke feletsoe ke matla.
Jehova o nehelane ka ’na ho batho bao ke sa khoneng ho ba loantša.+
ס [Samekh]
15 Jehova o qheletse ka thoko banna bohle ba ka ba matla.+
O bokeletse lebotho e le hore a bolaee bahlankana ba ka.+
Jehova o hataketse moroetsana oa Juda ka sehatelong sa veine.+
ע [Ayin]
16 Ke llisoa ke lintho tsena.+ Mahlo a ka a rotha likeleli.
Motho e mong le e mong ea ka ntšelisang o hole le ’na.
Bara ba ka ba utloile bohloko hobane sera se re hlotse.
פ [Pe]
17 Sione o otlolotse matsoho,+ ha ho motho ea mo tšelisang.
Jehova o laetse hore batho bohle ba pota-potileng Jakobo e be lira tsa hae.+
Jerusalema o fetohile ntho e nyonyehang ho bona.+
צ [Tsade]
18 Jehova o nkhalemetse ka nepo+ hobane ha kea mamela melao ea hae.+
Mamelang, lona lichaba tsohle ’me le bone kamoo ke utloileng bohloko kateng.
Baroetsana ba ka le bahlankana ba ka ba hapuoe.+
ק [Qoph]
19 Ke kopile thuso ho ba ratanang le ’na empa ba ntsoile tlase.+
Baprista ba ka le banna-baholo ba ka ba shoetse motseng,Ha ba ntse ba ipatlela lijo e le hore ba lule ba phela.+
ר [Resh]
20 Jehova, bona kamoo ke leng mahlomoleng kateng.
Ke tsielehile.
Pelo ea ka e utloile bohloko haholo kaha ke bile lerabele.+
Ka ntle sabole e ntse e bolaea bana ba ka.+ Ka tlung le teng batho ba ntse ba shoa.
ש [Shin]
21 Batho ba utloile ha ke ntse ke feheloa. Ha ho ea ntšelisang.
Lira tsohle tsa ka li utloile ka tsietsi ea ka.
Li thabisitsoe ke ntho eo u e entseng.+
Empa letsatsi leo u le phatlalalitseng le tla fihla+ ’me li tla tšoana le ’na.+
ת [Taw]
22 E se eka u ka bona bobe bohle ba lira tseo ’me oa li fa kotlo+Feela joalokaha u mphile kotlo ka lebaka la liphoso tsohle tsa ka.
Etsoe ke feheloa haholo ’me pelo ea ka e bohloko.
Linaletsana
^ Khaolo ea 1-4 ke koli-ea-malla e ngotsoeng ka tatellano ea litlhaku tsa Seheberu.
^ Kapa: “litereke.”
^ Kapa: “lelekisang.”
^ Kapa: “soma.”
^ Mona Jerusalema e mothofalitsoe.
