Haesale ho tloha ka 2018, limakasine tsa batho bohle li na le sehlooho se le seng makasine ka ’ngoe. Limakasine tsena ke karolo ea Teaching Toolbox. Kahoo, re ka li sebelisa tšimong. Re ka ba ra nka tse ling ha re ea leetong kapa ha re ea mabenkeleng. Ha re sebelise limakasine bakeng sa ho ithuta Bibele le batho empa li ka etsa hore ba batle ho ithuta haholoanyane ka Molimo.

Ka mor’a ho qala moqoqo le motho, u ka mo bontša temana ea Bibele ebe u bua ka sehlooho sa makasine seo motho eo u qoqang le eena a ka se ratang. Mohlala, ha re re u bua le motho ea holisang bana, ea sa tsoa hlokahalloa ke motho eo a mo ratang kapa ea nang le stress, u ka re: “Hona le sehlooho se seng se monate seo nkileng ka se bala se buang ka taba ena, na u ka rata hore ke u bontše sona?” Haeba ka lekhetlo la pele u bona a ratile moqoqo, u ka mo fa makasine o hatisitsoeng kapa oo a ka o balang sesebelisoeng sa hae sa elektronike. Leha ho le joalo, morero ha se ho fana ka limakasine tse ngata feela, empa limakasine li ka re thusa ho fumana batho ba hlileng ba ratang ho mamela Molimo.​—Lik 13:48.