Ka September, re tla ikitlaetsa ka matla ho qalisa lithuto tsa Bibele re sebelisa bukana ea U ka Thaba ka ho sa Feleng! Bahoeletsi ba ka khetha ho nka bopula-maliboho bo thusang ba lihora tse 30. Letšolo lee le tla etsoa joang?

• Leetong la Pele: Sebelisa leqephe le qetellang la bukana ho tsosa thahasello ea motho le ho mo bontša hore na thuto ea Bibele e khannoa joang. Hopola ba ileng ba bontša thahasello pele le bao u ileng oa khutlela ho bona nakong e fetileng. Le haeba ba ile ba hana ho ithuta qalong, ba ka thabela bukana e ncha le mokhoa o mocha oa ho ithuta. Ha rea tlameha ho siea libukana matlong ao ho se nang batho ho ’ona kapa ra li kenya ka hare ho mangolo ao re a ngoletseng batho ba sa kang ba bontša thahasello. Komiti ea Tšebeletso ea Phutheho e ka ’na ea hlophisa hore ho be le liboka tsa tšimo tse eketsehileng khoeling eo.

• Menyetla e Meng: Le ka beha bukana ea U ka Thaba ka ho sa Feleng! litoroling haeba le e-na le tsona phuthehong ea lona. Bolella ba bontšang thahasello hore re ithuta Bibele le batho mahala re sebelisa bukana ena. Hang feela ha u kopana le motho, mo bontše ka bokhutšoanyane hore na thuto ea Bibele e khannoa joang kapa u mo bontše hamorao. Molebeli oa tšebeletso a ka lokisetsa hore ho be le bahoeletsi ba tla ea moo ho nang le likhoebo e le hore ba qalise lithuto tsa Bibele. U ka boela oa qalisa thuto ea Bibele le basebetsi-’moho kapa le batho bao u kopanang le bona ha u ntse u etsa bopaki bo sa reroang.

Jesu o re laetse hore re “etse barutuoa” re be re “ba rute.” (Mat 28:​19, 20) E se eka letšolo lena le khethehileng le ka re thusa ho finyella morero ona, re sebelisa bukana ea U ka Thaba ka ho sa Feleng!