Jesu o ile a nolofalloa ke ho bua le mosali oa Mosamaria ka Molimo hobane o ile a qalisa moqoqo le mosali eo. Re ka ntlafatsa bokhoni ba rona joang ba ho qalisa moqoqo le batho bao re sa ba tsebeng?

• E-ba botsoalle ’me u bue le batho. Le hoja Jesu a ne a shoele ke mokhathala, o ile a qalisa moqoqo ka tsela e bonolo ka hore feela a kope metsi. Kahoo, u ka qala ka ho lumelisa ka tsela e botsoalle, ka mor’a moo u ka ’na oa bua ka boemo ba leholimo, kapa ka litaba tsa morao-rao. Hopola hore morero oa mantlha ke ho qalisa moqoqo, kahoo bua ka ntho leha e le efe eo motho a ka ’nang a rata ho bua ka eona. Haeba ho se nko ho tsoa lemina, u se ke oa nyahama, leka ho buisana le motho e mong. Kopa Jehova hore a u fe sebete.​—Ne 2:4; Lik 4:29.

• Le hoja u sa lokela ho ba lepotlapotla, e-ba malala a laotsoe ho bua ka litaba tse molemo ha monyetla o hlaha. Etsa hore moqoqo o be bonolo, ho seng joalo, motho eo u buisanang le eena a ka ’na a se ke a phutholoha e be o khaotsa ho qoqa. U se ke oa khathala matla haeba moqoqo oa lona o ka fela u s’o bue le eena ka Molimo. Haeba u sa khone ho qalisa moqoqo le batho ka morero oa ho bua le bona ka litaba tse molemo, leka ho qoqa le bona feela. [Bapala video ea 1 e be le buisana ka eona.]

• Leka ho fumana monyetla oa ho bua ka litaba tse molemo ka hore u bue ka ntho e ’ngoe e mabapi le tumelo ea hao, e ka ’nang ea etsa hore motho eo a batle ho tseba ho eketsehileng. Jesu o ile a bua lintho tse ileng tsa qholotsa mosali ea neng a bua le eena hore a batle ho tseba haholoanyane. Ha e le hantle, Jesu o ne a se a ntse a bolella mosali eo litaba tse molemo nakong eo a neng a ntse a araba lipotso tsa hae. [Bapala video ea 2 e be le buisana ka eona, ka mor’a moo bapala video ea 3 e be le buisana ka eona.]