Kopano ea machaba e neng e tšoaretsoe London, Engelane, e bile ketsahalo e thabisang ho bara le barali babo rōna ba naheng eo hammoho le ba tsoang linaheng tse ling. Andrew le Elizabeth ba ile ba ea hoteleng e ’ngoe ea London, ho ea amohela baeti ba tsoang linaheng tse ling. Ha ba bona mosali e mong ea neng a apare hantle, ba ile ba nahana hore ke e mong oa baeti  ba tlileng kopanong, ’me Elizabeth o ile a mo lumelisa ka mofuthu. Mosali eo o ile a makala, eaba Elizabeth o kōpa tšoarelo. O ile a re: “Ke kōpa tšoarelo, ke ne ke nahana hore u e mong oa baeti ba tlileng kopanong!”

Mosali eo o ile a re: “Kopano ea eng?”

Elizabeth o ile a mo supisa boto e neng e e-na le molaetsa o amohelang Lipaki Tsa Jehova ’me a makatsoa ke seo mosali eo a ileng a se bua. O ile a re, “Kea thaba kannete haeba ke tšoana le Lipaki Tsa Jehova!”

Ha moqoqo o ntse o tsoela pele, mosali eo o ile a bolella Elizabeth hore lebitso la hae ke Vivien, o hlaha Nigeria empa joale o se a lula haufi le moo Elizabeth a lulang teng. Vivien o ile a lumela ho ithuta Bibele ’me o ne a batla hore le bana ba hae ba ithute. Andrew le Elizabeth ba ile ba mo etela, eaba o ba amohela ka mofuthu. Tsela eo ba ileng ba mo lumelisa ka eona hoteleng e ile ea etsa hore a thabele ho ithuta. Ha ba mo bontša buka ea Seo Bibele e se Rutang, ba ile ba makala ha a ba bolella hore o na le eona le hore o e bala le bana ba hae. Ka mor’a hore ba mo bolelle hore ba ka ithuta buka eo le eena mahala, Vivien o ile a re: “A re hle re qaleng hona joale!”

Ka November 2014, ho ile ha thehoa phutheho ea pele Roma, Slovakia. Kopanong e sa tsoa feta ea potoloho, ho ile ha kolobetsoa bahoeletsi ba 21 ba buang Seromani. Kaofela ba ne ba tsoa motseng o le mong. Batho ba bileng teng Sehopotsong phuthehong ea Seromani ba ne ba le 495. Mor’abo rōna e mong ea sa tsoa kolobetsoa o ile a ngola lengolo a re:

“Ke Moromani ea lulang Žehra, Slovakia. Moo ke lulang  teng makhooa aa re nyatsa, ba re re litšila, re leshano ebile rea utsoa. Ka lekhetlo le leng ha ke ile kerekeng, moruti o ile a nteleka habohloko. Lintho tsena li ile tsa etsa hore ke se ke ka rata makhooa. Joale, Lipaki Tsa Jehova li ile tsa ’memela ho ea Holong ea ’Muso. Ke ile ka ea empa ke belaela, ke nahanne hore ke tla phoqeha hape. Ke ile ka makatsoa ke hore le pele ke kena ka Holong ea ’Muso, monna e mong oa lekhooa o ile a ntumelisa ka letsoho ’me a nkamohela ka mofuthu. Ha puo ea phatlalatsa e ntse e tsoela pele, ke ne ke sa khone ho mamela. Ke ipotsa hore na ho tla joang hore ebe motho e mong le e mong o nthabetse.

“Ha kea ka ka khona ho robala bosiung boo, ke ne ke nahana ka se etsahetseng motšehare Holong ea ’Muso. Ke ile ka ea libokeng hape, ke batla ho bona hore na ehlile Lipaki li lula li le mosa ka tsela eo. Joale lekhetlong lena li ile tsa nkamohela ka mofuthu le ho feta, eka ke khale re tsebana. Ho tloha ka nako eo, ha kea ka ka khaotsa ho ea libokeng ’me ke ile ka qetella ke kolobelitsoe. Barab’abo rōna ba ile ba ’na ba ntšoara ka mosa le ka mor’a hore ke kolobetsoe ’me ba ntse ba ntalima ke le motho oa bohlokoa. Ha ke ba etetse, ba pheha lijo tse monate ho feta tseo ba tloaetseng ho li pheha! Ke batla ho lula ke le ka mokhatlong ’ona, ’me ke batla ho sebeletsa Jehova Molimo ka ho sa feleng.”

Morali’abo rōna e mong ea bitsoang, Aysel o ne a tsamaea ka bese a tloha toropong ea Ganja a ea Baku, naheng ea Azerbaijan. O ile a rapela Jehova ’me a kōpa hore a mo thuse hore a fumane motho eo a tla bua le eena ka Bibele. Le hoja Aysel a ne a se a fumane setulo seo a lokelang ho lula ho sona ka beseng, mosali e mong o ile a mo phehella hore a lule pel’a hae. Aysel o ile a qoqa le mosali eo ’me qetellong a khona ho bua le eena ka Bibele. Mosali eo o ile a re o rata Jesu ebile o batla ho mo tseba haholoanyane. Aysel o ile a  nka linomoro tsa mosali eo tsa founo ’me le eena a mo fa tsa hae eaba ba lumellana ka hore ba tla kopana hape. Mosali eo o ile a kōpa hore Aysel a mo tlisetse Bibele haeba a ka khona.

Ha Aysel a se a khutletse Ganja, o ile a etela mosali eo moo a sebetsang teng. Mosali eo o ile a re o na le “buka ea lithapelo” eo a e balang letsatsi le letsatsi. Morali’abo rōna o ile a makala ha a hlokomela hore buka eo ha e le hantle ke bukana ea Ho Hlahlobisisa Mangolo Kamehla ea 2013! Aysel o ile a ithuta Bibele le eena, ’me o thabile hore ebe Jehova o ile a mo fa sebete sa hore a pakele mosali eo.

Lengolo lena le ka tlaase le tsoa Spain:

Felicity, ea lilemo li 68 ea lulang Sweden, o re: “Ke ne ke ikutloa ke khathatsehile ebile ke sa khotsofala, ke batla thabo empa ke sa e fumane.” Kaha o ne a sa khotsofatsoe ke lithuto tsa K’hatholike, o ile a qala ho ea malumeling a sa tšoaneng hoo a ileng a qetella a keneletse boloing le bonoheng.

Kaha Felicity o ne a sa utloisise hore na o phelela’ng, o ile a nyahama hoo a ileng a batla ho ipolaea. O re: “Ke ile ka  hoeletsa ho Molimo ke ntse ke lla, ka re a mpolelle seo a batlang hore ke se etse. Libekeng tse peli hamorao, batho ba babeli ba ile ba fihla ha ka. Mohlankana e mong o ile a mpotsa hore na nka thabela ho mamela Lentsoe la Molimo. Ke ile ka re ka pelong, ‘Molimo ke ne ke sa re u ntlisetse Lipaki Tsa Jehova!’”

Le hoja qalong Felicity a ne a sa batle ho mamela, o ile a qetella a mametse a ba a lumela ho ithuta Bibele ka buka ea Seo Bibele e se Rutang. O re: “Buka ena e ile ea etsa hore ke thabele ho bala Bibele.” O kolobelitsoe kopanong ea setereke ea Sweden ka 2014. O re: “Sena ke sona seo esale ke se batla. Qetellong ke ile ka fumana khotso ea kelello.”