KA May 1963, ho ile ha qhoma merusu ea batho ba hlaselang Machaena West Java. E ile ea e-ba matla haholo Sukabumi, moo lelapa leso le neng le e-na le khoebo ea ho thota thepa ka literaka. Batho ba bangata ba sa laoleheng, ho akarelletsa le baahisani ba bang ba rōna, ba ile ba thuha ’me ba itšohlometsa ka tlung. Re ne re tšohile haholo ha ba ntse ba inkela thepa ea rōna ka mahahapa.

Ha ba qeta ho tsamaea, baahisani ba bang ba rōna ba ile ba tla ho tla re tšelisa. Ntate o ile a lula le bona fatše ka kamoreng ea ho amohela baeti. O ile a batla Bibele ea hae e khōlō ea Sesundane har’a moferefere oo oa lintho tse pshatlehileng. A ba bontša hore Bibele e ile ea bolela esale pele hore lintho tse tjena li tla etsahala. Eaba o ba hlalosetsa lintho tse thabisang tse tla etsahala ’Musong oa Molimo.

Ntate o ne a sa ameha ka ho ipokellela maruo. O ne a atisa ho re: “Kamano ea lōna le Molimo e lokela ho ba ea bohlokoa ka ho fetisisa!” Mohlala oa hae o motle, o ile oa etsa hore ’Mè le banab’eso ba bahlano e be Lipaki, esita le ntate-moholo oa rōna ea lilemo li 90 le baahisani ba bang.